maṯa 2

asa 2

ḏiwila ḏeḏi liji lun lilɩŋiḏi ŋuɽuna ŋutu

1gwune na yecu lɩŋini beṯlam gweḏi yauḏia kaja geḏi ərudus gwun gwiro gwele, na liji wila urucəlim kalo gun gaṯɩn anyin abuḏa lun lilɩŋiḏi ŋuɽuna ŋutu. 2nalarno, ŋu gwaḏa gwun gwilɩŋinu gwun gwiro gwele gweḏi liju? gi gwune anaŋəḏi luḏuma luŋun kalo gun gaṯɩn anyin abuḏa, nanila gwanorṯeḏa. 3gwune na ərudus diŋɩni gwun gwiro gwele, nuubəga na ḏugwor mɩɽi, na liji wei leḏi urucəlim lun lijille dino. 4gwune nuwəɽeice jɩsis wei idu jun jɩbuḏo na jalgaṯɩm jeḏi liji, nulɽoṯəḏɩjo galo ge gun gar gan kɩrisṯo lɩŋane. 5naluməḏɩjo naleicɩno, beṯlam gweḏi yauḏia; gi gwune ŋulilo nebi dino:

6ŋa beṯlam, amɩrɩgen yeḏi yauḏia,

ŋa gwate gwɩlieno gi lele leḏi yauḏia no,

gi gwune lugwuŋa gwədio mudirŋ

gwaʼi liji linyi lun liro lisreiyil.

7na gwune na ərudus orniḏa liji lun lilɩŋiḏi ŋuɽuna ŋutu nyɩkwom, nuɽoṯeḏe lagin gworki jaḏo gwiro gwaŋingwe ludum. 8nulwəje beṯlam nuleicɩno, wiḏɩl nyabunyi ŋaɽe muma ŋun ŋoga, na ḏa ŋɩmanyabuja nyamɩni aɽuwa nyiluməḏɩjo, kani nyiwele dino nyiorṯeḏa. 9gwune naldiŋɩni ŋuɽuna ŋeḏi ŋwele nalwele, na ludum lun laŋəḏɩlo kalo gun gəṯɩn anyin abuḏa nuldərɩjo nuwele nuḏuḏɩni kalo gun gijɩne ŋaɽe ŋun ŋoga. 10gwune nalaŋu luḏuma naldile ganu gworki; 11na gwune naləḏi gɩdəno nalaŋu ŋaɽe ŋun ŋoga mariam gwe gwun gwiro nana gwuŋun. nalculɩjo galo ŋwurko ŋwe nalorṯeḏa, nalkədu jurəḏo jagin nalḏəḏə ŋɩdio ga jai, ŋun ŋiro ḏab, na ŋaɽa ŋun ŋiro ḏɩmama na ŋun ŋiro mur. 12nalmɩni elo uməḏɩjo ŋwumɩnya late laɽuwe ḏi ərudus no, nalwele gi ṯaṯ ḏiro kaja kamɩrɩgen ŋagin.

ḏabɩrada ḏun ḏebɩriḏɩl masɩr

13gwune nalele, na gwiji gweḏi kanyin gweḏi gwele aŋinɩjo yusibŋ ŋwumɩnya, nueicɩno, diɽu ŋape ŋaɽe na nana gwuŋun, nyalabɩre masɩr nyaɽe ŋɩnəwei kəbe ŋanuməḏɩjo, gi gwune ərudus gwubunyu ŋaɽe ŋaɽ ŋuɽinye. 14nudiɽi nuape ŋaɽe na nana gwuŋun gilio nalwele masɩr, 15nuji ŋɩnəwei kəbe na ərudus ai; kani nalṯɩmi ŋuɽuna ŋun ŋarɩŋe gwele gwun gwiro elo ḏi nebi ŋun ŋuməḏulo nuarno, nyi gworniḏa ŋaɽe ŋinyi masɩr.

ḏiɽinyɩḏa nyaɽe nyeḏi beṯlam

16gwune na əruḏus nulɩŋe liji lun lilɩŋiḏi ŋuɽuna ŋutu gwalirdəḏeico, nuɽe ganu gworki, nuwəjo ŋuɽuna alɽinye nyaɽe wei nyun nyiro ləmɩnyo beṯlam na gi diɽil deḏi amɩrɩgen, nyun nyanəṯi jɩḏilio jɩttən na nyun nyouwɩɽeno jɩḏilio, kaja ge gɩɽoṯəḏɩju gworki liji lun lilɩŋiḏi ŋuɽuna ŋutu. 17na kaja gun gɩṯɩmige ŋuɽun ŋun ŋuməḏɩlo nebi gwun gwan irmiya ŋarno,

18ŋwal ŋwidiŋɩnilo ŋɩne rama

ŋweḏi ḏupa ganu, na ḏərio gwula,

raʼil gwəri gwula gwan nyaɽe nyuŋun,

nuate nuəmɩnyi gwalmoɽe ganu no gi gwune nyate no.

ḏaɽuwa masɩr

19gwune na ərudus ai na gwiji gweḏi kanyin gweḏi gwele nuaŋinijo yusibŋ ŋwumɩnya masɩr, 20nueicɩno, diɽu, ŋape ŋaɽe na nana gwuŋun nyalele kamɩrɩgen yeḏi isreiyil, gi gwune luŋa laiyo lun lar laɽinye ŋaɽe. 21nudiɽi nuape ŋaɽe na nana gwuŋun, nalwila kamɩrɩgen yeḏi isreɩyil. 22gwune nudiŋɩni arkilawus maɽenyeḏe yauḏia ŋele ŋeḏi ərudus gwun gwiro baba gwuŋun, nuḏonye gi gwele ŋɩnəwei, na elo uməḏɩjo ŋwumɩnya nuwele kalo geḏi jalil. 23nuwila nujiga kamɩrɩgen yun yan nasɩra kani nalṯɩmi ŋuɽuna ŋun ŋuməḏɩlo nebiŋa ŋun ŋarno; ŋu gwaje gwan gwunasɩra.

Voafantina amin'izao fotoana izao:

maṯa 2: OTR1966

Asongadina

Hizara

Dika mitovy