Genesis 4
4
1Dai bhodïrï aidïxi ka pogïduitadai bïïxi go maaxi sai go kïïrhi abhana bii oñigadï. Eba tïgidu oñigadï. Dai abhana tïï ïgai ïmo arhi odami. Aidïxi ka duayi ïgai sai bua ïmo kïïrhi Kain tïgidukami. Kïï bhai gï ïldan tïï ïgai go arhi odami daidi ikaiti,
—Kaxi gin urhiña Gïr Nukadakami ïmo arhi kïïrhi gin maara— ikaiti go oki bhai gï ïrhiditai.
2Dai gokiïrï go Eba maara ïpïpï ïmo kïïrhi, ïgai ïr gasukurhi, Abel tïgidu. Dai aidïxi ka kïkïïrhitu maamaradï go oki sai go Abel ïr nukadami kañiñiru dai go gïmai go Kain ïr aatabuadami dïbïrapi.
3Ïmo imidagai sai buapi Kain lïïchi yoobadï dai mïida agai Gïr Nukadakami ïmo xadutudaragai dukai. 4Dai Abel buapi ïpï ix makïdï mïida agai Gïr Nukadakami. Bua ïgai ïmoko soigadï kañiñiru maradï ix makïdï bïïxi ïr gaxïgi kañiru dai ix makïdï kïïgadukïdioma. Dai Gïr Nukadakami bhai ïldan tïï go Abel ïmadï go ix makïdï buatadai ïgai mïida bïïtarï. 5Dïï mai podukai nïidi ïgai go Kain ïmadï go ix makïdï buatadai ïgai xi gokïdï ka sïïrhikïdï bhamu aidï go Kain dai bhiibhixorai.
6Dai Gïr Nukadakami potïtïdai aidï,
—Tui pïxi aidï mosïï bhamu aapi dai bhiibhixorai— itïtïdai. 7—Bhaiyoma ix dukai aagai aanï podukai gin buapidamudai aapi daxdaragai. Aidï gia oigïda gï nïijadamudai aanï dai kïï bhai ïldamudai aapi— itïtïdai. —Dïï xibi ka mai kïï dui aapi di. Kaxkïdï an aagai sai todian dukai gï ayimu soi maaxi tïgibudagai dai gïïpi soimaaxkami iduña antaada aapi ïïgidakai aapi gobai. Dïï gia gï aagai ix kabakada aapi gï tïgibudaga bhaiyoma dai mai ïïgiada go soimaaxi— itïtïdai Gïr Nukadakami.
8Dïï bïïxkïrï ïmo imidagai go Kain baidaja sukurhidï dai no xibhïkai oidigana paxarhimu. Baidaja ïgai go Abel tudu. Ka oidigana gukigi ïgai daidi bui kïkiba ïgai dai anaaxi mua.
9Amaxi Gïr Nukadakami potïtïdai go Kain,
—Bako daja gobai gï sukurhi— itïtïdai. —Bïï mai maatï aanï— itïtïdai go Kain —¿Aanï ix tudu ïr nukadakamigadï gin sukurhi?— itïtïdai.
10Dai Gïr Nukadakami potïtïdai aidï,
—Tuipïxi aidï imaaxi idui— itïtïdai. —Ka dïbïriïrï kaatï ïradï gobai gï sukurhi ami xako aaxi aapi. Dai gin tanïi gobai ïmo gïgïbituldaragai aapi gï bïïtarï. 11Kaxkïdï xibi ka gïpiïrï kaatïkamiïrï gïi aapi Kain. Ka dïbïrapi aaxi aapi ïradï gï sukurhi dai mua dai xibi ka mai kïï ïldamu aaduindagai xako aatabuayi aapi dïbïriïrï— itïtïdai Gïr Nukadakami go Kain. 12—Dai tomaxi gï aaga aatadui aapi dïbïriïrï tomax dukai mai bañigimu kuadagai ix makïdï gaïsai aapi dai aatabuayi. Ka mai tipuka agai gï ibhïxtaraga gï bïïtarï tudu aapi Kain. Ka mos ïr aimïrdamika agai aapi oidigi dama— itïtïdai Gïr Nukadakami.
13Bhodïrï Kain potïtïdai Gïr Nukadakami,
—Aiji— itïtïdai. —Xadïrï naakogana aanï mosïï bïïtïkami gïgïbituldaragai— itïtïdai. 14—Kaxi gin busaidimi aapi Gïr Nukadakmi tami idi dïbïraiñdïrï. Dai ka ïxto aimïradamu aanï aipakoga xi maiti gin nïijadagi aapi. Ka mai biakamu aanï gin ibhïxtaraga— itïtïdai. —Dai xorai gin tïïgiagi mos in mua agadamu gin tïïgakai— itïtïdai go Kain.
15—Cho— itïtïdai aidï Gïr Nukadakami —Ix gï mua agadagi ïgai aidï gia gïn kodituda agai kubarakami aaduñdï ïgai dai podukai gï aa namïida agai ix makïdï gï muagi— itïtïdai.
Bhodïrï Gïr Nukadakami tïpa go Kain dai ka tïparhi aimïrai gobai bai podukai ka mai muagi ixtumaxi tïïgakai. 16Dai daibuno jii go Kain abhiadïrï xako aatagaitadai Gïr Nukadakami dai maigo xibhïako oidatu xako Nod tïgidu oidigi. Edenañdïrï xarhiapakoga kaatï oidigi ïgai.
17Daidi go Kain abhana boi oñigadï dai nonoakami bii ïgai dai bua ïmo arhi odami Enok tïgidukami. Kïïrhi ïgai. Dai gokiïrï kïi go Kain ïmo gïï kiiki dai Enok tïïtï ïgai go gïï kiiki ïpï ïpïan dukai maradï.
18Go Enok marai ïmo kïïrhi Irad tïgidukami. Dai gokiïrï go Irad marai go Mehujael. Dai Mehujael marai go Metusael. Dai Metusael marai go Lamek.
19Dai gokadukatadai ooñigadï go Lamek. Ïmoko Ada tïgidukatadai dai go gïmai Sila. 20Go Ada marai go kïïrhi Jabal tïgidukami. Go Jabal ïr pipiixaradï go ix makïdï ikuxi bhabhakiïrï oidaga nukadatai buxtaki. 21Dai marai Ada go kïïrhi Jubal tïgidukami ïpï. Dai ïgai ïr pipiixaradï go ix makïdï ïr ibadami sabikarui dai flauta. 22Dai go Sila marai go kïïrhi Tubal-cain tïgidukami. Dai ïgai ïr sosonadami papaiñomi. Dai biakatadai ïmo sukurhi oki Naama tïgidukami.
Voafantina amin'izao fotoana izao:
Genesis 4: NTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Copyright: Ethnos360 Sanford, Florida