युहन्ना 3
3
निकोदेमस येशूकी डुप्की राछ
1होला काट जना निकोदेमस म्यार्मीन लेच भर्मी यहूदी महासभुङ सदस्य लेया, होसे फरीसी लेया। 2कायाक नाबीक होचे येशू लेठाङ राहार इट डेया, “ए गुरुज्यु, कान वार्ल्हे नाको परमेश्वरै बीर्न्हकाच शिक्षक हो। इडीक परमेश्वर नाकोखाटा माले डेनाङ च इसे नाकै जाट्च अचम्मौ चीन्हओ कामको सुयेर जाट्की माय्होक्ले।”
3येशूये होसकी डेया, “साँच्ची न ङा नाङ्की डेले, सुर नयाँ जाट्न माजन्मडीसा डेनाङ होचे परमेश्वरौ राज्यकी डाङ्की माय्होक्ले।”
4निकोदेमसै येशूकी गीना, “बुढा छान्न भ्याच भर्मी फेरी कुटजाट्न जन्मडीस्की य्होक्ले? ही होसे भर्मी फेरी मोयो गर्भाङ पर्यार जन्मडीस्की य्होक्ले र?”
5येशूये डेया, “साँच्ची न ङा नाकोकी डेले, डी र आत्मा लकीङ माजन्मडीस्ठर सुर परमेश्वरौ राज्याङ पर्की माय्होक्ले। 6शरीर लकीङ जन्मडीस्च शरीर हो, आत्मा लकीङ जन्मडीस्च आत्मा हो। 7ङै नाकोकी नयाँ जाट्न जन्मडीस्की पर्ले डेनाङ अचम्म मामन्डीनी। 8नाम्सु कुलाक नुङ्की मीमन सेया होलाक न नुङ्ले। नाकै नाम्सुओ आवाज मट्टै सेले, टर होसे कुटै राल्हे र कुलाक नुङ्ले, होसे चहीँ माव्हार्ले। आत्मा लकीङ जन्मडीस्च पट्ट न भर्मीकुङ लागी र होङ्च न छान्ने।”
9निकोदेमसै डेया, “याङ्च कुटजाट्न छान्की य्होक्ले र?”
10येशूये होसकी डेया, “नाको च इस्राएलुङ गुरु हो, र नाकै इसे कुरा माबुझडीस्ले? 11साँच्ची न ङा नाकोकी डेले, कानै ही वार्न्हने होसे डेले, अनी ही डाङ्ङ ने होसे न सेटाक्ले, टर नाखुरीक कानै याछ गबाही स्वीकार माजाट्ले। 12ङै नाखुरीककी इसे संसारौ कुराको डेनाङ च नाखुरीकै विश्वास माजाट्ले डेनाङ, ङै नाखुरीककी स्वर्गौ कुरा डेया डेनाङ झन कुटजाट्न विश्वास जाट्की य्होक्ले? 13स्वर्ग लकीङ झाल्न राछ भर्मीयो मीजा बाहेक अरु सुर ढेनाम स्वर्गाङ मानुङ्ने। 14कुटजाट्न इस्राएलीको उजाड ठावाङ लेनाङ मोशै पीटलौ बुल #3:14 मोशै पीटलौ बुल मोशौ समयाङ, परमेश्वर चहीँ इस्राएलीको खाटा मीरीस ख्योहा र होखुरीककी साट्च मीमन जाटार बुलकै अट जीकै डेम बीर्न्हका। परमेश्वरै मोशाकी पीटलौ बुल खासार सीङाङ गाराङ्की लैडीया अनी सुये होसे बुलीकी ङोस्ले होसे गेप्ले। खासार सीङाङ गाराङा, होटजाट्न न भर्मीयो मीजा र ढेनाम गाराङ्की न पर्ले, 15र सु-सुये होसको मीटाक विश्वास जाट्ले, होखुरीक पट्टकै सेन्र मासीच जीवन डुप्ले। 16हीजैडेनाङ परमेश्वरै संसारुङ भर्मीकोलाक याङ्च प्रेम जाटा, की होसकै लहो काटजा मीजाकी र याहा। होसकोकी विश्वास जाट्च सुर नास माछान्ले, टर होचे सेन्र मासीच जीवन डुप्ले। 17परमेश्वरै संसारुङ भर्मीकोलाक दोषी ठहरीकी डेयार लहो मीजाकी बीर्न्हकाच होइन, टर होखुरीककी जीवाक्की डेम बीर्न्हकाच हो। 18सु-सुये होसको मीटाक विश्वास जाट्ले, होखुरीक दोषी माठहरीस्ले, टर विश्वास माजाट्चको चहीँ अघीलकीङ न दोषी ठहरीस्नने, हीजैडेनाङ होखुरीकै परमेश्वरौ काट मट्टै मीजौ म्यार्मीनाङ विश्वास माजाट्नने। 19होखुरीककी दोष लैडीच कारन चहीँ इसे हो: ज्योति संसाराङ राम्हने, टर भर्मीकै ट्याङ्छकी डेनाङ बरु छुम्छकी जाका, हीजैडेनाङ होखुरीकुङ कामको दुष्ट लेया। 20दुष्ट काम जाट्च पट्टये ज्योतिकी माजाक्ले, र ज्योतियाङ होखुरीकै जाट्च दुष्ट कामको डाङ्ले डेम बीर्हीयार होखुरीक ज्योतियाङ मार्हाले। 21टर सत्य कुराङ जीवाच भर्मी चहीँ ज्योतियाङ राल्हे, र होटबाटै होचे जाट्च काम परमेश्वरलकीङ जाट्च हो डेच कुरा छ्याङ्गै डाङ्ले।”
बप्तिस्मा याछ युहन्नै येशूओ बारेयाङ फेरी गबाही याछ
22होटै न्हुइङ येशू र होसकुङ चेलाको यहूदिया क्षेत्राङ नुङा, र होसको होला होखुरीक खाटा कालाप डीन ङुवा र भर्मीकोलाक बप्तिस्मा याहा। 23युहन्नै र सालीमौ खेरेप एनोन डेच ठावाङ बप्तिस्मा याछ जाट्नन्या, हीजैडेनाङ होला डी वास्टै लेया। होला भर्मीको राम्हन्या र बप्तिस्मा लामन्या। 24(होडीक बेलासम्म युहन्ना झ्यालखानाङ मापर्नन्या।)
25होडीक बेला शुद्ध छान्च रीटीयो बारेयाङ युहन्नौ चेलाको काट जना यहूदीखाटा वाद-विवाद छाना। 26होखुरीकै युहन्ना लेठाङ राहार डेया, “ए गुरुज्यु, यर्दन नदि पारी लेनाङ नाकोखाटा काट जना भर्मी लेया, होसकुङ बारेयाङ नाकै कानकी गबाही याम्हन्या, चाँहा होसकै न बप्तिस्मा याम्हन ले, र पट्ट न भर्मीको होसको लेठाङ टी नुङ्ङन ले।”
27युहन्नै होखुरीककी डेया, “परमेश्वरै माय्हाठर सुयेर हीर डुप्की माय्होक्ले। 28‘ङा मुक्ति याछ ख्रीष्ट होइन, ङा चहीँ होसकुङ अघी-अघी बीर्न्हकाच भर्मी मट्टै हो’ डेच ङौ गबाही नाखुरीक लहे न सेमने। 29ब्याहुली चहीँ ब्याहुलौ हो। ब्याहुला खाटा टोङ्छ लाफा ब्याहुलौ सोर सेयार मार्हाङ्ले। होसे न ङौ आनन्द हो, अब होसे पुरा छान्नने। 30होसको चहीँ बड्डीस्की, टर ङा चहीँ घट्डीस्की पर्ले।”
स्वर्ग लकीङ राछ मीजा
31ढेनाम स्वर्ग लकीङ राछ चहीँ पट्ट डेनाङ महान ले। संसार लकीङ राछ चहीँ संसारुङ न हो, होचे संसारुङ न कुरा ङाक्ले। स्वर्ग लकीङ राछ पट्ट डेनाङ महान ले।
32होसकै ही डाङ्ङने र सेमने, होच्यो न गबाही याल्हे, टर होसकुङ गबाही सुयेर विश्वास माजाट्ले। 33टर सुये होसकुङ गबाहीकी विश्वास जाट्नने, होचे परमेश्वर सत्य हो डेच कुरौ पर्मान याल्हे। 34सुकी परमेश्वरै बीर्न्हकामने होचे न परमेश्वरौ बचन ङाक्ले, हीजैडेनाङ परमेश्वरै होसकोकी लहो आत्मै न्हेपाक्ङने। 35अनी बोये लहो मीजाकी माया जाट्ले, र पट्ट न ठोक होसकुङ मीहुटाङ याम्हने। 36सु-सुये परमेश्वरौ मीजा मीटाक विश्वास जाट्ले होखुरीकै सेन्र मासीच जीवन डुप्ले। टर मीजौ आज्ञा मामन्डीचकै चहीँ होसे जीवन माडुप्ले, टर परमेश्वरौ मीरीस होखुरीक मीटाक ङुम न ङुले।
Voafantina amin'izao fotoana izao:
युहन्ना 3: EMGP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
