यहूना 16
16
1यीशु ले क्योछ, यो बात मैंले तुमूनथैं येक कारण क्योछ, कि जो विश्वास तुमूले मैंमें करछ्य तुम उ विश्वास स छोड़ जन दी। 2उन तुमून यहूदी सभाघर में भटे निकाली द्याला, बल्कि उ बखत ऊँन मरियोछ, कि जो कोई तुमून मार डालोल, उ यो समझोलो कि मैं परमेश्वर की सेवा करून मरयूँ। 3और उन येक कारण कराला कि उनूनले नै पिता परमेश्वर जाण छै और नै मैंस। 4लेकिन यो बात मैंले येक कारण तुमूनथैं क्योछ, कि जब उनोरो पुरो हुना को बखत आ जालो तैं तुमून याद जौ, कि मैंले तुमूनथैं पैलि भटे कै राखछ्यो, जब तुम शुरू में म्यारा शिष्य बन छ्या, मैंले इन बात तुमून शुरूवाद में येक कारण नै क्यो क्याखिनकि मैं तुमार दगाड़ छयूँ।
पवित्र आत्मा को काम
5अब मैं अपून भेजून वाला का पास जाछूँ, और तुमून में भटे कोई ले मैंथैं नै पुछुनो, “तैं काँ जान मरछै?” 6लेकिन मैंले जो यो बात तुमूनथैं क्यान, येक कारण तुमोरो मन भौत उदास हो ग्योछ। 7फिरले मैं तुमूनथैं सच्ची कुछूँ, कि म्यारा जान तुमून खिन निको छै, क्याखिनकि अगर मैं नी जूलो, त उ मद्दगार तुमार पास नै आलो, और अगर मैं जूलो त उ मद्दगार तुमार पास भेजोलो। 8जब उ आलो संसार का लोगून पाप और धार्मिकता और न्याय का बारिमें यकीन दिलालो। 9उ पाप का बारिमें यकीन दिलालो कि उन मैंमें विश्वास करून है इन्कार करनान। 10और धार्मिकता का बारिमें ले यकीन दिलालो कि मैं पिता परमेश्वरा का पास जाछूँ। और तुम मैंस फिर नै देखा। 11और न्याय का बारिमें ले यकीन दिलालो कि यो संसारा अधिकारी, मतलब शैतान स दोषी ठैराई ग्योछ।
12यीशु ले क्योछ, मैंले तुमूनथैं और ले भौत कुछ बतून छै, लेकिन ऐल तुम उन बातुन सह नै सकना। 13लेकिन जब उ मतलब सत्य को आत्मा आलो, जो पवित्र आत्मा छै, उ परमेश्वरा का बारिमें सत्य प्रगट करछो, क्याखिनकि उ अपून अधिकार ले नै कलौ, लेकिन जो कुछ परमेश्वरा का तरफ भटे सुणोलो, उई कलौ, और ऊँन वाली बातुन तुमून बतालो। 14और उ मेरि महिमा करोलो, क्याखिन ऊस मेरि तरफ भटे मिलीना को छै, उई तुमून बतालो। 15जो कुछ पिता परमेश्वरो को छै, उ सब म्येरो छै; येक कारण मैंले क्योछ, कि उ मेरि बातुन में लीभेरन तुमून बतालो।
दुख सुख में बदली जालो
16“थ्वाड़ा देर तुम मैंस नी देखला, और फिर थ्वाड़ा देर में तुम मैंस देखला।” 17तब यीशुका थ्वाड़ा शिष्य आपस में कुंनान, “यो कि बात छै, जो उ हमून थैं कुंछो, ‘थ्वाड़ा देर में तुम मैंस नी देखला, और फिर थ्वाड़ा देर में तुम मैंस देखला?’ और यो ‘येक कारण कि मैं पिता परमेश्वरा का पास जाछूँ’?” 18तब उनूनले क्योछ, “यो ‘थ्वाड़ा देर’ जो उ कुंछो, कि बात छै? हम नै जाणना, कि उ कि कुंछो।” 19यीशु ले यो जाणिभेरन, कि उन मैंथैं इन बातुन पुछून चाँनान, उले उनूनथैं क्योछ, “थ्वाड़ा देर में तुम मैंस नी देखला, और फिर थ्वाड़ा देर बाद मैंस देखला?” 20मैं तुमूनथैं सच्ची-सच्ची कुछूँ; कि तुम म्यारा मरना का बाद तुम रोला और विलाप करला, लेकिन संसार का लोग खुशी मनाला, तुमून दुख होलो, लेकिन जब मैं मरिनान में भटे दुबारा ज्यून हो भेरन वापस ऊँलो, तुमोरो दुख खुशी में बदल जालो। 21जब स्यैनि बच्चा स जन्म दीन बखत उछो, त उ भौत तखलीफ में हुछी। क्याखिनकि उको दुखो को बखत आ जाछो, लेकिन जब उ बच्चा जन्म दी दीछी, त यो खुशी में कि संसार में एक आदिमी पैद भ्योछ, येक कारण उ स्यैनि उ तखलीफ स भूल जाछी। 22उसीकैं तुमून ले ऐल दुख छै, लेकिन जब मैं तुमूनथैं फिर मिललो, और तुम भौत खुश हो जाला; और तुमेरि खुशी कोई तुमूनथैं छीन नै सकना। 23उ बखत जब मैं तुमून फिर देखलो तब तुम मैंथैं के नी पूछला; मैं तुमूनथैं सच्ची-सच्ची कुछूँ, अगर पिता थैं कै माँगला त उ म्यारा शिष्य हुना का नाता ले तुमून द्योलो। 24ऐल तक तुमून ले म्यारा शिष्य हुना का नाता ले पिता परमेश्वर थैं के नै माँगयो, पिता परमेश्वर थैं माँगला, त तुमून दीई जालो, ताकि तुम पुर तरीका ले खुश रौ।
संसार में जीत
25मैंले यो बात तुमूनथैं उदारण में क्योछ, लेकिन अब उ बखत ऊँन मरियोछ, कि मैं तुमूनथैं उदारणुन में और फिर नी कुँलो, लेकिन खुलभेरन तुमून पिता का बारिमें बतुलो। 26उ दिन तुम म्यारा शिष्य हुना का नाता ले पिता परमेश्वर थैं माँगला, और मैंस तुमूनथैं कुंछूँ कि मैं तुमून खिन पिता थैं प्रार्थना नी करूँलो। 27क्याखिनकि पिता परमेश्वर त खुद तुमूनथैं प्रेम राखछो, येका कारण कि तुमून ले मैंथैं प्रेम राखछा, और यो विश्वास करछ्य, कि मैं पिता परमेश्वर में का तरफ भटे आरयूँ। 28मैं पिता का तरफ भटे आरयूँ, फिर संसार स छोड़भेरन पिता परमेश्वरा का पास जाछूँ।
29यीशुका शिष्यून ले क्योछ, “देखा, अब तैं तुम खुलभेरन कुँछै, और कोई उदारण नै कुँनै। 30अब हम जाण ग्या, कि तैं सब कुछ जाण छै, और तैंस कैकी जरूरत नाहतिन कि कोई तैथैं सवाल पुछोलो, येमें हम विश्वास करनू, कि तैं परमेश्वरा का तरफ भटे आईना को छै।” 31यो सुणभेरन यीशु ले उनुस जबाब दीछ, “क्या अब तुम विश्वास करछा? 32देखा, उ बखत उछो, बल्कि आई ग्योछ कि तुम सब तितर-बितर हो भेरन अपून-अपून बाटा हो ल्याला, और मैंस ऐकलो छोड़ देला, फिरले उले मैंस ऐकलो नै छोड़ियो; क्याखिनकि पिता परमेश्वर म्यारा दगाड़ छै। 33मैंले यो बात तुमूनथैं येक कारण क्यान, कि तुम म्यारा शिष्य छा शान्ति मिलो। लेकिन हिम्मत राखा, क्याखिनकि मैंले यो संसारा का अधिकारी मतलब शैतान स हरा दीछ।”
Voafantina amin'izao fotoana izao:
यहूना 16: SORNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
