Mak 5
5
Yeso glì gho deʼ wɛ à me le ezhwɛɛrɛ bɔɔbɔɔ ngɛ
(Mat 8:28-34; Luk 8:26-39)
1Angɔ à kpɛn angli ngɔ̀ɔ abɛɛ abɛ Gɛrasa. 2Èndzobo chɛ Yeso à gli efwɔ ekpe ngɛ, gho deʼ wɛ à me le azhwɛɛrɛ bɔɔbɔɔ ngɛ gli efwɔ akwâ etoshe sa ngo kla engɔ. 3Egho wunɔ à na tsɔmɔ efwɔ akwâ etoshe, me tsɛʼ gho deʼ wɛ à me nɛɛ tye è koro engɔ ngɛ bo, me tsɛʼ anduʼ deʼ â me mwɔ tyè e koro engɔ anyi bo. 4Â na koro ebwo mane elo ngɔ akyɛ gimkpaʼ, bɛʼngɛ è ma tsɛddɛ anduʼ mɔmbwo à waʼa mane etɔrɔ byɛ elo ngɔ ngɛ. À ne tsɛʼ gho deʼ à me le ekama fɔɔ engɔ bo. 5Engɔ à na ko edɔm agu mane etoshe ǹklì mane nchi, mà gbɛ̀dɛ̀ ekwa mɔ ene atye mà flàbà akwâ. 6Èndzobo chɛ engɔ à zɔ Yeso bli abɛɛ tsɛrɛ ngɛ, engɔ dɔrɔ ngɔ̀ɔ gunu etongu efàarà ngɔ. 7Engɔ zhwara akwâ eghɛʼɛ gà kpe, “Ngwo na ke ayɛ ena Yeso ŋwɔ Ngwe yɛ mwɔ ekere ngɛ? Mmɛ è buʼ ebwo engɛ̂ ene ekumu Ngwe kpe ka angu gbɛɛrɛ.” 8Engɔ à gâ énde mbɔʼnga Yeso à gâ ebe azhwɛɛrɛ bɔɔbɔɔ yɛ kpe, “Gli ekwa gho wunɔ.” 9Éngɛ Yeso biiri ebe engɔ kpe, “Ekumu ngwɛ na awɛ?” Engɔ gii kpe, “Ekumu ngu na, ‘Ǹglibi bɔ’ Mbyɛɛ be ghɛʼɛ” 10Éngɛ engɔ buʼ ebwo ebe Yeso kpe è ke fli angɔɔ afwɔ mɔmbwo bo. 11Enɔrɔ kunyɛm deʼ à na nde ebara egu aŋu. 12Ezhwɛɛrɛ bɔɔbɔɔ byɛ bii Yeso kpe, “Saa angbɛɛ efwɔ kurunyɛm tsende.” 13Engɔ bɛrɛ ebe angɔ, ezhwɛɛrɛ bɔɔbɔɔ byɛ gli ngɔ̀ɔ nyii efwɔ kurunyɛm chɛ. Enɔrɔ kunyɛm wɛ â me bwɛrɛ ne ètɔɔshin fyee nɔ, sa kùmù à kla ene m̀bɛ̀rɛ̀ ngɔ̀ɔ turu efwɔ eji. 14Abɔ byɛ â ma ndee kurunyɛm mɔmbwo ngɛ dɔrɔ ngɔ̀ɔ sɛ̀ɛrɛ̀ abwa yɛ efwɔ abɛ mane ashimakwa yɛ ebara aŋu ngɛ, bɔ gɛrɛ ngɔ̀ɔ zɔ abwa yɛ aŋu â me gli ngɛ. 15Èklɔ̀ bere abɔ byɛ â zeʼ zɔ Yeso mane gho ezhwɛɛrɛ bɔɔbɔɔ wɛ ngɛ, è me tsɔmɔ amɔ a chwâ shi pɛ. 16Abɔ byɛ à zɔ abwa zɔnɔ ngɛ sɛɛrɛ mbɔʼ abwa yɛ â gli ekwa egho ezhwɛɛrɛ bɔɔbɔɔ wɛ mane kurunyɛm chɛ ngɛ. 17Éngɛ, bɔ klada sa bii Yeso kpe è gli efwɔ abɛ ndzɔɔ. 18Aŋu Yeso à sa nyii efwɔ ekpe ngɛ, egho ezhwɛɛrɛ bɔɔbɔɔ wɛ bii engɔ kpe mbè ngɔɔ nè engɔ. 19Yeso ne bɛrɛ bo ga ebe engɔ kpe, “Ngɔ̀ɔ achim ebe ekla ngwɛ, tòʼrò abwa yɛ Masakɛ shi fwɛʼɛ engɛ̂ ngɛ, mane aŋu è shi klasɔn ene ngwo ngɛ.” 20Egho wunɔ nyɛrɛ ngɔ̀ɔ a Dekapolis, è klada sa sɛ̀ɛrɛ̀ aŋu Yeso à fwɛʼ ekwa ngɔ ngɛ. Bɔ gimkpaʼ kɔn.
Yeso gli ŋwɔaye Jaryɔs mane aye deʼ wɛ à ma gwɔ̀n ngɛ
(Mat 9:18-26; Luk 8:40-56)
21Èndzobo chɛ Yeso à wu kpɛ̀n efwɔ ekpe ngɔ̀ɔ anjid angli zè ngɛ, ebaŋagho shùnu àmɔ̀ ebara engɔ. 22Éngɛ, gho bi wɛ à mwɔ ato abwaʼ eto efwɔ ndɔ bɛ̀ɛrɛ atsɛrɛ bɔ Juu wɛ ekumu ngɔ à ma Jaryɔs ngɛ zeʼ aŋu. Èndzobo chɛ engɔ à zɔ Yeso ngɛ, è chwɔ̀n etongu mɔ efàarà ngɔ 23è bii engɔ ene etaa mɔ gimkpaʼ kpe, “Ngà zeʼ, aŋwɔaye ngu wa ku, mmɛ è buʼ ebwo. Zeʼ tɛʼ ebwo mbyɛ ekwa ngɔ shi è bwada tyè ekɔʼɔ.” 24Éngɛ, Yeso ngɔɔ nè engɔ. Ebaŋabɔ kiri, gɛ̀rɛ̀ mà ngbèdè à ngɔ̀ɔ ebara engɔ. 25Aye deʼ wɛ anɔm à ma kla ekwa ngɔ ne ma tsɛrɛ bo efwɔ enɔ̂m wum ǹchwɔ̀ fyee ngɛ à na abwaʼ. 26Aye wunɔ à shi zɔ ǹgoʼ ghɛʼ eblabwo ǹgàrakyè gɛ̀rɛ̀ shi tsɔŋɔ ekɛb mɔ gimkpaʼ, ekobo deʼ ne gli bo, aŋwan ma wɛ ghɛʼghɛʼ. 27Na aŋu à zo mbɔʼ Yeso ngɛ, è zhiri zeʼe achim ebaŋagho gɛ̀rɛ̀ mɔ̀mɔ̀ ǹdi ngɔ, 28mbɔʼnga à zhuŋu kpe, “Ma mmɛ mɔmɔ mɔmɔ ka de ma ǹdi ngɔ, mmɛ wa ngo bwada.” 29Engɔ mɔmɔ ǹdi ngɔ, anɔm yɛ tsɛd ekyɛ ŋwaʼ. Engɔ zo efwɔ ekwa mɔ nɛ̀ɛ kpe mbè è glî efwɔ ǹgoʼ. 30Éngɛ nɔ, Yeso zo efwɔ ekwa mɔ kpe ekama shi gli ekwa ngbe. È bìiri kpe, “Awɛ a mɔ̀mɔ ǹdi ndza?” 31Bɔ bɛɛrɛ abwa Yeso gíì ebe engɔ kpe, “Ngwo we zɔ bɔ me kɛɛrɛ awɛ sɔ̀ énde, ngwo shi sa biiri éngɛ ene?” 32Bɛʼngɛ, Yeso a mà kɔ̀ʼrɔ kɔʼrɔ kpe mbè zɔ́ egho wɛ a mɔ̀mɔ angbe ngɛ. 33Éngɛ nɔ, aye wunɔ wɛ à me nɛɛ ebwa wɛ â me gli ngɛ, zeʼ gɛ̀rɛ̀ gò elo ngɔ sa biri klìklìklì ene èklɔ̀, tòʼrò éŋwaʼa gimkpaʼ ebe engɔ. 34Yeso kpe ebe engɔ, “Ŋwɔaye ngu, ebɛrɛtaa njɛ shi gli awɛ, ngɔ̀ɔ ene m̀bwarambwad gɛ̀rɛ̀ gli efwɔ ǹgoʼ njɛ.” 35Aŋu Yeso à ma bli à gà ngɛ, bɔ deʼ gli zeʼe abɛ Jaryɔs dù gà ebe engɔ kpe, “Ŋwɔaye ngwɛ shi ku, ngwo shi tsɔmɔ nyìi àtee abwa ngɛ ene yɛ?” 36Yeso sere ega wɛ engɔ à ga ngɛ, gà ebe Jaryɔs kpe, “Ka bum, le me ebɛrɛtaa.” 37À ke bɛrɛ gho tsɛrɛ deʼ kiri engɔ bo, tyetye Petoro, Jems mane ghongwaanɔm mɔ Eyɔɔ. 38Èndzobo chɛ angɔ à bwɛrɛ abɛ Jaryɔs, ato a ndɔ bɛ̀ɛrɛ atsɛrɛ bɔ Juu ngɛ, Yeso zɔ enɔrɔ bɔ ma kù̧urù mà zà akwâ ekamakama. 39È nyii efwɔ aŋu biiri ebe angɔ kpe, “Na yɛ mbɔn mà kù̧urù mà flàbà akwâ, eŋwɔ wɛ ke shi ku bo, è na bwɛrɛbwɛrɛ!” 40Bɛʼngɛ e tsɔʼ engɔ. Èndzobo chɛ engɔ à chidi bɔ sàa ese ngɛ, è nu àtɛ ŋwɔ, áʼɔ̧̀ mane bɔ bɛɛrɛ abwa mɔ ngɔ̀ɔ efwɔ atwɔndɔ yɛ eŋwɔ wɛ à ma aŋu ngɛ. 41È sàa abwo mɔ klini eŋwɔ wɛ ga ebe engɔ kpe, “Talita, koum” wɛ ǹji mɔ me ga kpe, “Aŋwɔaye, mmɛ kpe engɛ̂ tam.” 42Èndzobo chɛ èndzobo chɛ, aŋwɔaye wɛ tam gɛ̀rɛ̀ sa zhinni aŋu. Engɔ à shi bwɛrɛ enɔ̂m wum ǹchwɔ̀ fyee. Bɔ à kɔ̂n mbɔʼ ebwa wunɔ. 43È gbèʼre eto angɔ kpe e ke le gho deʼ nɛɛ bo, gɛ̀rɛ̀ gà eba angɔ kpe, “Mbɔn ndɛʼɛ ala deʼ engɔ nde.”
Voafantina amin'izao fotoana izao:
Mak 5: nbt
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
