Mak 3
3
Yeso glì gho àku-abwo
(Mat 12:9-14; Luk 6:6-11)
1Yeso wu ngɔ̀ɔ a ndɔ bɛ̀ɛrɛ atsɛrɛ bɔ Juu, àku-abwo deʼ mwɔ aŋu. 2Bɔ deʼ mwɔ aŋu mà zɛ̀ʼ aghɛʼ é gè abwa enji Yeso, éngɛ angɔ sa kɔ̀ʼ kpe è wa ngo glì gho mɔmbwo anji ku̧ru bɔ Juu ngà? 3Yeso gâ ebe àku-abwo wɛ kpe, “Tam zeʼe embè anɔ.” 4Éngɛ Yeso biiri ebe angɔ kpe, “Ebwa we me nara é fwɛʼ anji ku̧ru bɔ Juu? Etsɛrɛ ne tee kpe é fwɛ̀ʼɛ ǹchwɔ̀ kà èbo? É pwèerè gho chì efwɔ ǹgoʼ kà é zhudu engɔ?” Bɛʼngɛ, angɔ sa zhwezhwe. 5Engɔ ghɛɛbɛ amɔ kède angɔ ene atwataa, e me see engɔ mbɔʼ akama etaa yɛ angɔ à me le ngɛ. Yeso gâ ebe gho àku-abwo wɛ kpe, “Ndɛrɛ abwo njɛ!” Engɔ ndɛrɛ abwo mɔ a gɛrɛ bwada ekyɛ ŋwaʼ. 6Éngɛ bɔ Farisii mane bɔ Hɛrɔd klada sa ndèerè ewɔ̧ɔ ato Yeso, gɛ̀rɛ̀ sa zɛ̀ʼ aghɛʼnji é zhudu engɔ.
Ebaŋabɔ kiri Yeso ngɔ̀ɔ angli Galilii
7Yeso nyɛrɛ nè bɔ bɛɛrɛ abwa mɔ a Judeya afwɔ yɛ angɔ à mwɔ ngɛ, ngɔ̀ɔ angli Galilii. Ebaŋabɔ nyɛrɛ abɛɛ abɛ Galilii gɛ̀rɛ̀ kìrì angɔ. 8Èndzobo chɛ angɔ à zɔ abwa gimkpaʼ yɛ Yeso à ma fwɛʼ ngɛ, bɔ akɛkɛ a Judeya, Jerusalɛm, Idumayi, mane abɛɛ abɛ anjid eji Joodan, Taya mane Sidɔn e kɛɛrɛ sɔ̀, zeʼe ebe engɔ. 9Na aŋu ebaŋabɔ à me ghɛʼ ngɛ, Yeso gâ ebe bɔ bɛɛrɛ abwa mɔ kpe angɔ zɛʼɛ âfwɔ ekpe deʼ ndɛ̀ʼ énde mbɔʼtye bɔ ne sa ngbèdè angbe bo. 10Na aŋu Yeso à shi gli bɔ akɛkɛ ngɛ, abɔ byɛ â me le eŋwan ngɛ sa tiri à ngɔ̀ɔ é mɔ̀mɔ̀ engɔ. 11Èndzobo chɛ ezhwɛɛrɛ bɔɔbɔɔ à ma de zɔ engɔ ngɛ, e godo efàarà ngɔ sa kù̧u à gà kpe, “Ngwo na ŋwɔ Ngwe.” 12Bɛʼngɛ Yeso gâ ebe ezhwɛɛrɛ bɔɔbɔɔ byɛ kpe e ke toʼro M̀pè gho yɛ mbè mwɔ ngɛ bo.
Yeso chidi bèmpwɔnɔntɔm wum ǹchwɔ̀ fyee
(Mat 10:1-4; Luk 6:12-16)
13Éngɛ Yeso kwaʼ ngɔ̀ɔ edɔ̀m egu gɛ̀rɛ̀ zɔ̀ʼ abɔ byɛ engɔ à shi pwɔ̀nɔ ngɛ, angɔ zeʼ ebe engɔ. 14Yeso pwɔnɔ bɔ wum ǹchwɔ̀ fyee è gè angɔ ene bèmpwɔnɔntɔm mɔ kpe e sa tsɔmɔ nè engɔ mbɔʼtye è sa tɔmɔ angɔ é sa zhiri à sɛ̀ɛrɛ̀ ega Ngwe, 15gɛ̀rɛ̀ le ekama é chì ezhwɛɛrɛ bɔɔbɔɔ. 16Abɔ wum ǹchwɔ̀ fyee byɛ Yeso à chidi ngɛ à na Shimun wɛ â ndɛʼ ekumu ngɔ kpe Petoro ngɛ. 17Jems ŋwɔanɔm Zɛbɛdii mane ghongwaanɔm mɔ Eyɔɔ, engɔ ndɛʼ ekumu angɔ kpe, “Boanejɛs” ǹji me ga kpe bwɔ m̀bò bwe. 18Andere, Firiboʼ, Batolomyo, Matyo, Tɔmas, Jems ŋwɔanɔm Alfiyɔs, Tadayus, Shimun ŋwɔ etaa abɛ wɛ à ma gho Kanan ngɛ, 19mane Judas Iskariyɔd wɛ à fɛn engɔ ngɛ.
Yeso mane m̀fɔ̀ ezhwɛɛrɛ bɔɔbɔɔ
(Mat 12:22-32; Luk 11:14-23; 12:10)
20Éngɛ Yeso wu klo ngɔ̀ɔ a ndɔ, e sa ndada enɔrɔ bɔ shi wu shwe akwa, e nè wu le endzobo é nde mane bɔ bɛɛrɛ abwa mɔ bo. 21Èndzobo chɛ ekla ngɔ à zo éngɛ ngɛ, e gli ngɔ̀ɔ aŋu kpe mbɔɔ ngɔɔ nu engɔ klo enga bɔ à ma gà kpe, “Ato ngɔ ye bɔɔ.” 22Bàtee atsɛrɛ byɛ â kla zeʼe abɛ Jerusalɛm ngɛ, sa gà kpe, “È we le Bɛlzɛbul ekwa mɔ, engɔ na fwɛʼ ene ekama yɛ e me zeʼe ebe m̀fɔ̀ ezhwɛɛrɛ bɔɔbɔɔ ngɛ.” Ne ǹji yɛ engɔ ma flì ezhwɛɛrɛ bɔɔbɔɔ ngɛ. 23Éngɛ Yeso zɔʼ angɔ gà ebe angɔ ene nklama timi kpe, “Asatan ya da sa flì Asatan e ne?” 24Mbɔn nɛɛ kpe, mala abɛ m̀fɔ̀ sa wa ngwè àmɔ̀ àmɔ̀, ebwa m̀fɔ̀ wɛ ke né tam bo. 25Ndɔ yɛ me gɛ̀bbɛ ma wa ngwè amɔ ngɛ ke né tam bo. 26Éngɛ mala asatan sa ngwè amɔ mɔmbwo, shi è ke ma ngo tam bo. Éngɛ me gà kpe ebwa m̀fɔ̀ ngɔ shi ngùdu. 27Ne éŋwaʼa kpe gho deʼ ke né nyii efwɔ ndɔ gho kamakam deʼ sa bèʼrè ela ngɔ tɔrɔ engɔ kè koro bo. Engɔ wa dye koro gho kamakam mɔmbwo mbɔʼtye ngɛ è sa bèʼrè ela byɛ è ma ke ngɛ. 28“Mmɛ gà éŋwaʼa endɔn, e yà dzɛ̀d abwa bɔɔbɔɔ mane andwaʼa gimkpaʼ yɛ e ma ndwàʼ Ngwe anyi ngɛ 29bɛʼngɛ, egho wɛ è ma ndwàʼ Azhwɛɛrɛ pɛ ngɛ, e yà ne dzɛrɛ abwa bɔɔbɔɔ ngɔ bo ngɔ̀ɔ bwɛ̀n anji ngùdu. Eju ya ngo mwɔ ekwa ngɔ mbɔʼ ebwa bɔɔbɔɔ wunɔ ngɔ̀ɔ bwɛrɛ anji kengudu.” 30Yeso à ga éngɛ mbɔʼnga angɔ à ma gà kpe engɔ we le azhwɛɛrɛ bɔɔbɔɔ ekwa mɔ.
Áʼɔ̧̀ Yeso mane bwɔngwaanɔm ngɔ
(Mat 12:46-50; Luk 8:19-21)
31Éngɛ áʼɔ̧̀ Yeso mane bwɔngwaanɔm ngɔ zèʼ dù tamma ese sàa ekɔn kpe e zɔʼɔ Yeso. 32Bɔ akɛkɛ à ne kɛɛrɛ Yeso sɔ̀, gho deʼ gà ebe engɔ kpe áʼɔ̧̀ ngwɛ mane bwɔngwa mbyɛ ba kɔ̀ʼrɔ awɛ ese. 33Yeso biiri ebe angɔ kpe, “Áʼɔ̧̀ ngu mane bwɔngwa mbu ne ewɛ?” 34Engɔ ghɛɛbɛ amɔ kède abɔ byɛ â me tsɔmɔ kɛ̀ɛrɛ engɔ ge aghɛɛghɛɛ ngɛ ga kpe, “Kɔʼɔ, áʼɔ̧̀ ngu mane bwɔngwa mbu bɔ. 35Egho wɛ è ma fwɛʼ ebwa wɛ Ngwe ma ke ngɛ, na ghongwaanɔm, ghongwaaye mane áʼɔ̧̀ ngu.”
Voafantina amin'izao fotoana izao:
Mak 3: nbt
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
