Lug 12
12
Inug ijìm ne yaʼi inə̀mbi biri dù asaŋ
(Mat 10:26-27)
1Icheg ne inɔ̰ bəd ya fete nyə̀mə̀ nyə̀mə̀ mbi mɔ̀ʼɔ se tə̀ʼrə̀ mə̀mbin, Yeso ya bì ko ni ghàm abə mə̀mə̀nənùg məd. Wì ya ghà inɔb gha, “Mbə̀ pati awən imbə̀ʼ àfòrì ze abə mə̀Farìsi. Àfòrì ze ya ìmbɔb inug fubri. 2Chəyi aghi mɔ̀ʼɔ ne yaʼi inə̀mbi ne chəyi ze biri ghum dù asaŋ. Chəyi bə̀ ìsə mɔ̀ʼɔ ne yaʼ inə̀mbi ne chəyi bəd biri ghum kyeri. 3Ane, mbə̀ kyeri gha anug ne mbə̀ gha tizimi, bəd biri zug tisi. Anug ne mbə̀ jiti atog nəb ighubi, bəd biri təm igun idɔm nəb se sàʼa.”
Wə̀d ne tì koʼi ni bɔ
(Mat 10:28-31)
4Yeso ya ywìri chè imbìghè gha, “Ìmbum mə̀sə̀ʼ, mə ghà inən gha, imbə̀ʼ mbə̰ bɔ awən bəd ne zwète məyi nyàmnyɔd ne chəyi tì mbi fàʼ anug ndəŋ ne bə chè. 5Mə biri chwi wə̀d ne mbe koʼi ni bɔ. Mbə̀ bɔ Ŋwiye imbə̀ʼ icheg ne, məd we tì wì zwèti wə̀d bə̀ kiri bèrì ika ni màʼ tengàŋ inga asiŋi ichə. E! À ya Ŋwiye ne mbə̀ koʼi ni bɔ.
6Mbi ya fḛ tèghubàʼ tita̰ ane ikab kwa kwa. Si ya gha, chəyi Ŋwiye we nèbè fèghubàʼ fimɔʼ. 7Tesiʼ ya gha, kə̀ bèyi ìtən nyɔ̀ŋì atog, Ŋwiye fə taŋ. Ane, imbə̀ʼ mbə̰ bɔ awən. Mbə̰ ya ighi ne ka inun chè tèghubàʼ ndan ndàn.
Anug ni bḛ tì anug ni to̰ Yeso Kristo
(Mat 10:32-33; 12:32; 10:19-20)
8Mə ghà tesiʼ inən, bəd ne bḛ asaŋ asaŋ gha mbɔb ya ìmbum bəd, Ŋwan Wə̀d biri bə bḛ awɔb imbìghè abə mbè angirə̀ Ŋwiye. 9Àsi bəd ne to̰ awɔb awum asaŋ asaŋ, Ŋwan Wə̀d biri bə to̰ yi awɔb imbìghè abə mbè angirə̀ Ŋwiye. 10Ŋwiye biri waʼ inug tibɔ̀ŋ abə wə̀d ijìm ne ghàmi ìngam tibɔ̀ŋ imbə̀ʼ Ŋwan Wə̀d. Àsi wə̀d ne zɔ̀mbi Azwighi Ŋwiye, chəyi Ŋwiye biri waʼ inug tibɔ̀ŋ məd.
11Anyumə̀ ne mbi niŋ awən ghò inga ichamì Ŋwiye, kə̀ imbìghè abə itog bəd ne tùmbə̀ aben, imbə̀ʼ mbə̰ nwìʼè awən nyɔd ni kɔndi anug ne mbə̀ biri ghò pè ghà. Imbə̀ʼ mbe bə kɔndɔ awən inɔnjì ni tàŋì ìwən nyɔd. 12À ya Azwighi Ŋwiye biri mə̀tì anug ne mbə̀ biri ghà ane nyùmə̀ we.”
Ngam məgri imbə̀ʼ wə̀d ne beri ighi, chəyi si iwe
13Mbaŋà mɔ̀ʼɔ inga inɔ̰ bəd we ya ghà abə Yeso gha, “Àchwitìnùg, àghò ghà abə ìmə ifi gha wì ghapa ighi mbe ne ìwa mbaʼ ku nɔ̀ŋì ina, nàʼ ìmbum.”
14Yeso ya ywìtì ibo gha, “Ìmə sə̀ʼ, wə̀d ne chɔʼi amə ane wə̀d ne sàʼa awən kə̀ wə̀d ne ghàpà ighi inən, àkə we?”
15Wì ya si ghà abə inɔ̰ bəd we gha, “Mbə̀ pata awən bə̀ we awən imbə̀ʼ anug ni ghə̀ʼrì ighi. Chəyi wə̀d we kweʼè chùghə izɔm imbə̀ʼ icheg ne wì beri ighi nɔʼ nɔʼ.”
16Yeso ya ghàm ìngam məgri inɔb gha, “Wə̀d mɔ̀ʼɔ ya yaʼ angu ne beri asiŋi ìseg ne ighijəg ya bɔ̀ŋɔ̀ angu. 17Wə̀d gho̰ ya se kɔ̀ndɔ inga fìŋ gha, ‹Ze kə anìŋ mə ghənə? Chəyi mə̀ beri asiŋi ni nɔ̀ŋì ìmbum ighi ne mə̀ biri niŋ a mben.› 18Wì ya si ghà ibo inga fìŋ gha, ‹Mə kyèri aghi ne mə̀ biri fàʼ. Mə biri buʼ ìtum ngən, si kɔd ìti kyen kyen. À ya inga angu ne mə̀ biri nɔ̀ŋì ìtum kyì fɔrɔ ighi ndəŋ ne mə̀ biri niŋ a mben.› 19Wì ya si ghà ini inga fìŋ gha, ‹Mə bèrì ighi nɔʼ nɔʼ. Mə biri jəg ane tituʼ nɔʼ nɔʼ. Ìmbum inug biri se yḛ̀ yi. Mə biri se jə̀ghə, no, gyènde.› 20Ŋwiye ya si ghà ibo gha, ‹Àghò ya anen. Mə biri niŋ ìwe ìtḛ̀ izimi tèchɔ̀ŋ. Wə̀d ne biri si niŋ ighi mbe ne àghò kàʼi nɔ̀ŋì, àkə we?›
21Aŋa ya icheg ne ze biri yaʼ abə wə̀d ne feti ighi nɔʼ nɔʼ nɔ̀ŋì abə ìwi nyɔd ne chəyi wì beri aghi mɔ̀ʼɔ imbìghè abə Ŋwiye.”
Anug ni nɔ̀ŋì ibḛfiŋ igun Ŋwiye
(Mat 6:25-34)
22Yeso ya ghà abə mə̀mə̀nənùg məd gha, “Imbə̀ʼ mbə̰ nwìʼè awən nyɔd imbə̀ʼ ìtḛ̀ gha mbə̀ kə ghi jəg aghə? Kə̀ imbə̀ʼ ìtən nyàmnyɔd gha mbə̀ kə ghi zì aghə? 23Ìtḛ̀ chè ighijəg. Ìtən nyàmnyɔd bə̀ chè ndwi. 24Mbə̀ nḛ tìnən icheg àŋa. Chəyi te wèrè ngwèd kə̀ bə̀ nìŋə ighi a mben. Chəyi ti beri itog nəb ni ya nɔ̀ŋɔ̀ ighi kə̀ bə̀ bèrì ngən. À ya Ŋwiye ya jə awɔb. Àsi awən, mbə̰ ya ighi àka inun ne che tìnən. 25Àkə we ne kyeri yètì iki nyumə̀ ane ìwi ìtḛ̀ igun isəg, ane inwiʼi nyɔd? 26Àghò kə mə̀ chəyi àghò kyèri yètì iki nyumə̀ ane ìwe ìtḛ̀, àghò bə̀ se nwìʼè nyɔd imbə̀ʼ inug ndəŋ, ane aghə? 27Mbə̀ nḛ icheg ne igyen mbe màʼà mbe tewàrà ne chəyi mbe fàʼà kə̀ bə̀ tànga ndwi abə ìwɔb nyɔd. Ka à ya bì ifɔn Solomùn ne ya beri ikab fɔrɔ ndwi chɔm chɔm, chəyi wì ya beri ndwi ne njə̀ngə icheg mbe tewàrà. 28À ya Ŋwiye we zìyè ndwi igun agyen ne tèchɔ̀ŋ ze kweg, isu ze ku, zɔm, mbi tɔ̀n inga iywid. Mbə̰ si kɔ̀ndi gha, chəyi Ŋwiye biri zì ndwi igun inən? Mbə̰ ya kwàʼ bəd ne ibḛfiŋ kə! 29Imbə̀ʼ mbə̰ chə awən ìwən nyɔd ane aghi ni jəg kə̀ ni no. 30Aton ya gha, bəd ne chəyi mbi kyeri Ŋwiye mbe nwìʼè nyɔd imbə̀ʼ ighi mbo̰ igun isəg ijìm. Si ya gha, ìwən mbaʼ kyèri gha mbə̰ kòʼ ni bèrì ighi mbo̰ ijìm. 31Anyumə̀ ne mbə̀ zi fìŋ yaʼ ane anug ìfɔ̀n məd, wì biri nàʼ ighi mbo̰ ijìm inən.
Nɔŋi ìmbe ighi ikaŋ àbɔ̀ŋɔ
(Mat 6:19-21)
32Ìmbum bɔn njə̀g, imbə̀ʼ mbə̰ bɔ awən. Ìwən mbaʼ gyèndi kwàʼ ako ni nàʼ anug ìfɔ̀n ikaŋ inən. 33Mbə̀ fende ìmbən ighi ijìm, nàʼ ikab abə bəd ne chəyi àzɔb. Mbə̀ beri mə̀taka ne chəyi mbi biri nùn. Mbə̀ bə nɔ̀ŋì ìmbən ighi ikaŋ àbɔ̀ŋɔ, asiŋi ne chəyi mbi biri swèʼè ati. Chəyi tì iji bə̀ niŋ. Chəyi tì ìsəʼə bə̀ kud. 34Mbə̀ kyeri gha, asiŋi ne ìmbe ighi yaʼi angu, à ya angu ne ìze fìŋ biri bə yaʼ.
Wə̀d àfàʼì ne chùghə ikyèʼi
35Mbə̀ zi ìtən ndwi àfàʼì bə̀ che ìmbən inam nɔ̀ŋì mbe ghì bere, 36icheg bəd àfàʼì ne ghɔ̀mɔ̀ gha ìwɔb mbaʼ àfàʼì kurə ane inam. Mbi ya ghɔ̀mɔ̀ ni gha wì mə yèʼe pè gɔ̀ngi, mbi nɔ̀ʼ fìʼì inuʼ akɔŋi ibo kwàʼ ati ati. 37Ŋwiye biri zì àbɔrɔ̀bɔd igun bəd àfàʼì mbe ne ìwɔb mbaʼ àfàʼì kùrə pè kɔ̀ti awɔb ikyèʼi. Mə gha tesiʼ inən gha, ìwɔb mbaʼ àfàʼì biri zì ndwi àfàʼì, ghà inɔb gha mbe chughi aseg, wì si nàʼ tijəg inɔb. 38Ŋwiye biri zì àbɔrɔ̀bɔd igun bəd àfàʼì mbe ne ìwɔb mbaʼ àfàʼì pè kɔ̀ti awɔb ane àngɔŋ izimi kə̀ ane achəg ituʼ ne mbi fə chuʼri ìwɔb nyɔd bə̀ yaʼ ikyèʼi se ghɔ̀mɔ̀ aməd. 39Ane, mbə̀ kyeri gha, àkə aghi ne wə̀d ne beri nəb we kyère nyùmə̀ ne iji we yèʼe, nji chəyi wì ya sàŋà gha iji buʼ nəb məd nyi inga. 40Mbə̰ inən bə chùʼri ìwən nyɔd imbə̀ʼ icheg ne, Ŋwan Wə̀d biri bə yeʼe ane nyumə̀ ne chəyi wə̀d kyèri.”
Wə̀d ne fàʼà ane ìzi fìŋ ijìm tì wə̀d ne chəyi we fàʼà ane ìzi fìŋ ijìm
(Mat 24:45-51)
41Pità ya biri abə Yeso gha, “Anɔŋisəg, ìngam məgri gho̰ kə àghò ghàmi məyi ina kə̀ abə bəd məjìm?”
42Anɔŋisəg ya ywìtì ibo gha, “Wə̀d àfàʼì ne fàʼà ane ìzi fìŋ ijìm bə̀ bèrì iwe, à ya məd ne mbaʼ àfàʼì biri nɔ̀ŋì aməd ane atog wə̀d igun bəd àfàʼì mbin ni gha wì se nàʼà tijəg inɔb igun nyumə̀. 43Ŋwiye biri zì àbɔrɔ̀bɔd igun wə̀d àfàʼì we ne mbaʼ àfàʼì kùrə pè bàd aməd ne we fàʼà kwàʼ icheg chɔm. 44Mə gha tesiʼ inən gha, mbaʼ àfàʼì we biri nɔ̀ŋì aməd gha wì se nḛ̀ ìmbi ighi ijìm. 45Mbə̀ niŋ gha, wə̀d àfàʼì we ghà ibo inga fìŋ gha, ‹Ìmə mbaʼ àfàʼì we tà̰ ni yeʼe.› Si ko se sɔ̀mɔ bəd àfàʼì mbin, mə̀yi fɔrɔ mbaŋà, bə̀ ko se jə̀ghə bə̀ no be yi. 46Mbaʼ àfàʼì məd biri yeʼe ane aneg ne chəyi məd kə̀ ghɔ̀mɔ̀ fɔrɔ ane nyumə̀ ne chəyi wì kyèri. Wì biri chə aməd, chì aməd chà abɔ̀ʼ bəd mbe ne chəyi mbe fàʼà ane fìŋ ijìm.
47Mbi biri taŋ sɔm wə̀d àfàʼì we ne kyeri anug ne mbaʼ àfàʼì məd we kə̀bə̀, chəyi wì si chùʼri ìwi nyɔd ni fàʼ àzewən. 48Àsi wə̀d ne chəyi wì kyèri aghi ne mbaʼ àfàʼì məd we kə̀bə̀, ne wì ya fàʼà yaʼ inug ne chwìye gha mbe sɔm aməd, mbi biri sɔm aməd iki piʼì. Wə̀d ijìm we ne mbi nàʼi ighi nɔʼ nɔʼ ibo, mbi biri bə kə̀b ighi nɔʼ nɔʼ ibo. Wə̀d we ne mbi naʼi ighi ne nɔʼi chè ibo, mbi biri bə kə̀b ighi ne bə̀ nɔʼ chè ibo.
Àghàpì ze ne biri nyi inga bəd imbə̀ʼ Yeso.
(Mat 10:34-36)
49Mə yèʼe ni che iywid igun isəg. Mə kɔ̀ŋ ni gha nji wi fə se bère. 50Si ya gha, mə bèrì mənib mɔ̀ʼɔ ni niŋ. Chəyi ìmə fìŋ biri chughi ane àbɔrɔ̀bɔd anene mə niŋ mənib mbe. 51Mbə kə kɔ̀ndɔ gha mə yeʼe ni zì àbɔrɔ̀bɔd igun isəg? Indèʼ! Mə yèʼe ni zì yaʼ àghàpì. 52Nɔ̀ʼ tèchɔ̀ŋ, inəbi ne beri bəd məta̰ biri ghàpà. Bəd məbe aba afibì, mətad aba àzin. Mbin məbe biri se chɔ̀bɔ tì mbin mətad. Mbin mətad bə̀ se chɔ̀bɔ tì mbin məbe. 53Mə̀mbaʼ biri se chɔ̀bɔ tì ìmbɔb bɔn mbaŋà. Bɔn mbaŋà bə̀ se chɔ̀bɔ tì ìmbɔb mə̀mbaʼ. Mbì ngɔb biri se chɔ̀bɔ tì ìmbɔb bɔn àyi. Bɔn àyi bə̀ se chɔ̀bɔ tì ìmbɔb mbì ngɔb. Mbì ngɔb inɔm biri se chɔ̀bɔ tì mə̀yi bɔn. Mə̀yi bɔn biri bə̀ se chɔ̀bɔ tì mbì ngɔb inɔm.”
Anug ni kyeri nyumə̀
(Mat 16:2-3)
54Yeso ya ghà abə inɔ̰ bəd gha, “Mbə̰ ya mə̀ bàd pàʼ aba ze ne achwi ze fḛ, mbə gha, ‹Mbə̀ŋ biri no›, zì bə no kwàʼ ati. 55Mbə̰ ya mə̀ bàd afim ze chè kɔ̀ʼɔ, mbə gha, ‹Azo̰ biri yaʼ, ze bə̀ yaʼ.› 56Mbə̰ ya kwàʼ bəd ne bèmnè inug! Mbə kyèri icheg ni nèn isiŋi, bə̀ nḛ̀ àbɔ̀ŋɔ, ghà anug ne biri dù. Mbə̀ kə se gha chəyi mbə̀ si kyèri icheg ni tòʼrì nyumə̀ isəg gho̰ iye?
Anug ni mànì isaʼi tì bəd
(Mat 5:25-26)
57Aton ne chəyi mbə̰ mbe kɔ̀ndɔ anug ne koʼi ni fàʼ àkə gha? 58Anyumə̀ ne àghò we ghò a nəb isaʼi tì wə̀d ne zi isaʼi igun ine, kə̀bə mənɔnjì ijìm ni mànì isaʼi bɔŋ se pè a nəb isaʼi. Àmə chəyi, nji wə̀d we ne puti awe biri nàʼ awe abə wə̀d ne sàʼa tisaʼi. Wə̀d ne sàʼa tisaʼi biri nàʼ awe abə wə̀d ne sɔ̀bɔ tisaʼi. Wə̀d ne sɔ̀bɔ tisaʼi biri sɔb isaʼi, si nàʼ awe abə pùrusì. Pùrusì biri si chà awe a ndəŋ. 59Mə ghà tesiʼ ine gha, chəyi àghò biri dù a ndəŋ witì àghò mànì ni nàʼ ìwe itu ijìm.”
Voafantina amin'izao fotoana izao:
Lug 12: MBTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019 CABTAL
