Jɔn 10
10
Ngam məgri imbə̀ʼ àjənjə̀g
1Yeso ya ghà abə ìmbi mə̀mə̀nənùg gha, “Mə ghà kwàʼ tesiʼ inən gha, wə̀d ne chəyi wì nyi inga ikam njə̀g ane inuʼ ikam, ne wì kòʼi yaʼ ane inɔnjì ndəŋ ibəm ikam nyi inga ikam, tengàŋ ya kwàʼ iji ka. 2Wə̀d ne nyḭ̀yḛ inga ikam njə̀g ane inuʼ ikam, məd ya kwàʼ àjənjə̀g tesiʼ. 3Wə̀d ne fàʼà inuʼ ikam, biri fìʼì inuʼ ikam ibo. Njə̀g məd ya zùghə gì məd, bène abɔ̀ʼ məd icheg ne wì ya kàrà awɔb imɔʼ imɔʼ ane ikum, nìŋə dùwə̀ isəg. 4Anyumə̀ ne wì nìŋi ìti njə̀g tijìm dù isəg, wì ya yḛ̀ ghò imbìghè, ti bène abɔ̀ʼ məd, icheg ne ti fə kyeri gì məd. 5Àsi wə̀d tìsɔ̀ʼ, chəyi tì njə̀g te beni abɔ̀ʼ məd. Ti biri bɔ, nòrò imbə̀ʼ icheg ne, chəyi ti kyeri gì məd ka.” 6Yeso ya ghàm ìngam məgri gho̰ inɔb, si ya gha, chəyi ìmbɔb itog ya zḛ ane anug ne wì yaya ghà inɔb.
Yeso ya àjənjə̀g chɔ̀m
7Yeso ya ywìrì ghà abə mə̀mə̀nənùg məd gha, “Mə ghà kwàʼ tesiʼ inən gha, mo ya kwàʼ inuʼ ikam njə̀g. 8Bəd mbe ne ya bi yèʼe inum imbìghè ya kwàʼ məji ka məjìm. Chəyi njə̀g ya zugri awɔb. 9Mo ya inuʼ ikam. Wə̀d we ne chè inga inum, wì biri pum. Wì biri ya nyḭ̀yḛ, bə̀ chè dùwə̀ ghò kə̀bə̀ agyen. 10Iji ya yèʼe ni ji, kə̀ ni zweti, kə̀ ni nimni njə̀g. Mə yèʼe gha, mbə̀ jəg ìtḛ̀, ne ya kwàʼ ìtḛ̀ ne chəyi wi cheʼi aghi mɔ̀ʼɔ ka.”
11Yeso ya chè imbìghè ghà inɔb gha, “Mo ya àjənjə̀g chɔm. Àjənjə̀g chɔm ya bḛ ni ku imbə̀ʼ ìti njə̀g. 12Wə̀d we ne mbi niŋi aməd ane àfàʼì gha wì ya jə njə̀g, kayi məd beri njə̀g te. Wì mə bàd àfɔn ze yèʼe, wì ya nòrò yi, wàʼa njə̀g te. Àfɔn biri pè gwì njə̀g mɔ̀ʼɔ, ta ìtin sàkì. 13Wə̀d we ne mbi niŋi aməd ane àfàʼì bèrì ni nòrò yi imbə̀ʼ icheg ne məd ya mbi niŋi niŋi. Ane, chəyi məd we zìyè atog ni kyèʼrì njə̀g.
14Àsi mo, mo ya àjənjə̀g chɔm. Mə kyèri ìtum njə̀g. Ìtum njə̀g bə̀ kyèri amə. 15Mə kyèri ìmə Mbaʼ, kwàʼ icheg ne wì bə kyèri amə. Mə fə bḛ ni ku imbə̀ʼ ìtum njə̀g. 16Mə bèrì njə̀g ndəŋ ne chəyi awɔb inga inɔ̰ njə̀g gho̰. Mə mənyìʼ niŋ njə̀g te yèʼe abɔ̀ʼ ìto̰. Ti biri bə zug ìmə gì. Ane, njə̀g te tijìm biri si fɔ̀ti ane inɔ̰ imɔʼ bə̀ bèrì àjənjə̀g imɔʼ. 17Aton ne ìmə mbaʼ we kɔ̀ŋɔ̀ amə ya gha, mə fə sɔ̀ŋ ìmə ìtḛ̀ ni ku imbə̀ʼ icheg ne mə̀ kyèri gha, Ŋwiye biri ywiri nàʼ ìtḛ̀ inum. 18Chəyi tì wə̀d mɔ̀ʼɔ niŋ ìmə ìtḛ̀ ka. À ya mo kɔ̀ŋi ni ku. Mo bèrì ika ni ku bə̀ bèrì ika ni ywiri yaʼ izɔm. Aŋa ya àfàʼì ne ìmə Mbaʼ fə zì inga ìtum tikye ibo.”
19Àghàpì ya nyi inga mə̀Ju mbe ne ya zughi inug mbe ne Yeso yaya ghà. 20Bəd nɔʼ nɔʼ ya ko se gha, “Azwighi tibɔ̀ŋ ze inga məd. Wì ya anìŋ, wì fə be. Àkə aghə ne mbə̰ mbe zùghə ibo?”
21Mbi mɔ̀ʼɔ ya ghà àzɔb gha, “Chəyi tì wə̀d ne beri azwighi tibɔ̀ŋ ghàm iku ìngam gho̰. Tì azwighi tibɔ̀ŋ ghi məfəg bàd isiŋi?”
Mə̀Ju to̰ awɔb Yeso
22Nyùmə̀ iteri we ne mə̀Ju mbe wènde icheg ne mbi ya ywìrì fìʼì mbàn Ŋwiye a Jèrusalèm ya kòʼ. À ya yaʼ inga nyùmə̀ ifə ka. 23Ane, Yeso yaya yèndè yi inga mbàn Ŋwiye inga asiŋi ze ne mbe kàrà ane məkə̀tə̀ Solomùn. 24Mə̀Ju ya kad məd chuʼ, se bìre ibo gha, “Aton ne àghò we kiri saŋa awa gha tì ya jə̀mə̀ wə̀d ne àghò yaʼi ìwiwən àkə gha? Àghò mə yaʼ Wə̀d we ne Ŋwiye zɔ̀ʼi,#10:24 Kristo fə gha ina asaŋ asaŋ.”
25Yeso ya ywìtì gha, “Mə ya fə gha inən, si ya gha, chəyi mbə̀ bḛ. Iyeti inug mbe ne mə fàʼà ane ikum ìmə Mbaʼ mbe ghìyə̀ bəd kyere wə̀d we ne mə̀ yaʼi ìwiwən. 26Chəyi mbə̀ bḛ imbə̀ʼ icheg ne, mbə̰ kayi ìtum njə̀g. 27Ìtum njə̀g ya zùghə anug ne mə̀ ghà. Mə kyèri ìtum njə̀g. Ti ya bène abɔ̀ʼ inum. 28Mə ya nàʼà ìtḛ̀ ighə̀m imɔʼ inɔb. Chəyi mbɔb biri nɔ̀ʼ ku nim. Chəyi tì wə̀d mɔ̀ʼɔ chì awɔb inga ìtum tikye abo. 29Ìmə Mbaʼ we ne nàʼi njə̀g te inum, we chè wə̀d ijìm. Chəyi wə̀d mɔ̀ʼɔ angu ne tì wì bən njə̀g te abə ìmə Mbaʼ. 30Mo tì ìmə Mbaʼ ya ane anug amɔʼ.”
31Mə̀Ju ya ywìrì gwe ateg ni tumbi məd. 32Yeso ya ghà inɔb gha, “Mə fə fàʼ iyeti inug nɔʼ nɔʼ ne ìmə Mbaʼ nàʼi ika gha mə fàʼa inən. Àkə ayeti anug azeg inga inug nɔʼ nɔʼ mbo̰ ne mbə̰ mbe kə̀bə̀ ni tumbi mə imbə̀ʼ àzewən?”
33Mə̀Ju mbe ya ywìtì ibo gha, “Kayi imbə̀ʼ ayeti inug mɔ̀ʼɔ ne àghò ghi ne te kə̀bə̀ ni tumbi awe. Tì ya kə̀bə̀ ni tumbi awe gha àghò we zɔ̀mbɔ̀ Ŋwiye. Kwàʼ wə̀d-aku icheg ine, àghò we gha, àghò ya Ŋwiye.”
34Yeso ya ywìtì inɔb gha, “Àkə chəyi mbi ŋwaʼri inga ìmbən mə̀nɔ̀ʼɔ̀ gha, ‹Ŋwiye fə gha, mbə̰ ya mə̀ŋwiye›?#10:34 Psalms 82:6 35Tè kyèri gha, anug ne Àŋwàʼrì Ŋwiye gha, à ya tesiʼ ne chəyi tì wə̀d chɔ̀ʼri. Ane, Ŋwiye ya kàrì bəd mbe ne ya zugri ìngam məd ane mə̀ŋwiye. 36Àsi mo, ìmə Mbaʼ ya zɔʼ amə chà igun isəg. Mbə̀ kə si chè iye se gha, mə zɔ̀mbɔ̀ Ŋwiye icheg ne mə gha, ‹Mo ya Ŋwan Ŋwiye›? 37Àmə yaʼ ne chəyi mə̀ fàʼà inug mbe ne ìmə Mbaʼ kə̀bi gha mə fàʼa, imbə̀ʼ mbə̰ nɔŋɔ awən ibḛfiŋ igun inum. 38Mo mə̀ ya fàʼà inug mbe. Ka chəyi mbə̀ jiʼì kə̀b ni bḛ amə, mbə̀ bḛ yaʼ inug mbe ne mə ghìyə̀. Àze biri ghì mbə kyeri gha ìmə Mbaʼ we ane anug amɔʼ tì inum. Mo inum we bə̀ ane anug amɔʼ tì məd.” 39Mbi ya ywìrì kə̀b ni gwì aməd. Si ya gha, wi ya nyaʼ, bu yi inɔb ikye abo.
40Yeso ya ghì ane, ywìrì bàni ghò injḭ igyi Jodàn, asiŋi ze ne Jɔn yaya nàʼà mənib abə bəd. Wì ya pè chùghi angu. 41Bəd nɔʼ nɔʼ ya ghò bàd aməd. Mbi yaya ghàmà mbɔb mbɔb gha, “Ka chəyi Jɔn we ne yaya nàʼà mənib ya fàʼi ayeti anug, inug mbe ne wì yaya ghàmà imbə̀ʼ wə̀d gho̰ ya kwàʼ tesiʼ.” 42Bəd nɔʼ nɔʼ inga asiŋi ze ya nɔ̀ŋì ibḛfiŋ igun Yeso.
Voafantina amin'izao fotoana izao:
Jɔn 10: MBTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019 CABTAL
