Jenesis 9
9
Nogna nhaꞌa cheke God ranghini mae Noa
1Aonu God ne fablahini mae Noa baludi mae thugnare, ne cheke eghu, “Au sua kmana mala fodu nauthoglu gne. 2Glepo tautagu te gnafa, nanghaji te gnafa nei sasa te gnafa teu igre ginauna na mhaghu ghami ghotilo. Eghuteuna iara na snakre aridi glepo igre ka khamemi ghotilore. 3Tifa na iara neke tusu ari sisi nei khuromu mala ghemi ghotilo neku, nu gognaro na iara jaola tusu ari ka ghotilo buluka nei nanghaji ba thua nafnata glepo te tautagu mala ghamu ghotilo.
4“Nu kaisei glepo ngala te thosei ima ghotilo na, u nafnahi te au teu dadara tagna na, eigna u dadara gne ngala u nafugna u karha na. 5-6Eghuteuna iara theome snakreni ka ghotilo te mala faleheni naikno na. Jame ihei te faleheni keha naikno na ghotilo ginauna mala falelehe mae tuana. Jaola jame kaisei buluka te faleheni naikno na, ghotilo falelehe buluka tuana. Naugna iara neke vuavuhani naikno na mala jateula thegu neku.”
7God ne cheke eghu ka mae Noa, “Ghema Noa, iara magnahaghei ghami ghotilo te au thumi mala vuragha e thovu ka nauthoglu gne.”
8Aonu God ne cheke eghu ka mae Noa baludi mae thugna mana re, 9“Iara gognaro na magnahaghei te nhaꞌa cheke balumi ghotilo nei baludi thumi ghotilo ginau re eghu. 10Eghuteuna iara na jaola eni nhaꞌa cheke igne ranghidi glepo te karha te gnafa teke jifla balumi ghotilo ka vaka na are. 11Iara eni nhaꞌa cheke igne balumi ghotilo. Iara ginauna nake theome goigonidi glepo te karha igre ka nabritha biꞌo jateula teke eni iara tuana eghu ka nauthoglu. Nabritha na ginauna nake theome roꞌeni nauthoglu gne.”
12-13Eghuteuna God ne cheke eghu ka mae Noa, “Iara ginauna na lilisei nogu maja na ka khoveo ka maloa na are. Maja igne na mala jateula kaisei fagaglana eghu eigna nogu nhaꞌa cheke iara teke eni balumi ghotilo ia nei baludi glepo te gnafa te au ka nauthoglu igne. Nogu nhaꞌa cheke iara igne ginauna theome hui. 14-17Kate kuru meini iara khoveo na ke kligna gna nauthoglu gne eghuteuna maja na thakle mei ka maloa na, iara ginauna filoni maja igne nei ghatho fapuloni fabrahu u nhaꞌa cheke teke enihi iara balumi ghotilo ia, nei baludi soasopai gna nafnata glepo te karha igre. Naugna maja igne kaisei fagaglana eigna nhaꞌa cheke teke eni iara ka ghotilo. Uve, nabritha na ginauna nake theome mei roꞌedi gobigna lepo te karha te au ka nauthoglu igne.”
Mae Noa ne diꞌatagna ka mae Ham
18Igre nanghadi thilo thugna mae Noa re, mae Sem, mae Ham nei mae Jafet. Thilo mae igre neke au balugna mae Noa ka vaka na. Mae Ham gne kmagna mae Kenan. 19Thilo mae igre neke thugna mae Noa, eghuteuna naikno te gnafa te au ka nauthoglu igne neke jifla mei ka thilo mae igre.
20Mae Noa gne kaisei mae keli mala joꞌu sisi grep mala ei waen. 21Kaisei narane mae Noa ne koꞌu waen ne dranga fara, aonu mana ne thuru soesole neu ka nogna suga tapuale na. 22Mae Ham ne filoni mae kmagna na ne thuru soesole neu. Mae Ham jifla kosi ne tei chekedi phei mae thabusignare. 23Aonu mae Sem ghe mae Jafet ne hata kaisei pohe ne nhaꞌa lao ka fafradire. Phiamare figri lao thagrudire ka suga tapuale na thoghei ne tei ruma ne toku tafruni mae kmadi na. Phiamare neke theome figri lao tathadire neke filoni te soesole teu mae kmadi na.
24Kate dofra haghe te laseni unha te eni ranghini Jafet, mae thugna leghu lahu na, 25mae Noa ne cheke eghu, “Iara ginauna toreni God mala tibrini mae Kenan, thugna mae Ham! Mana ginauna mala nodi mae sneka kolho ka mae kheragna re.” 26Mae Noa jaola ne cheke eghu, “Tahati cheke fakelini Lord mae ihei Sem te pogho soru ranghini! Mae Kenan gne mala nogna mae sneka kolho mae Sem. 27Iara toreni God mala fabruaradi thugna mae Jafet gre ginauna, eghuteuna thugna mae Jafet igre ginauna mala kaisei ngala baludi thugna mae Sem gre. Eghuteuna thugna mae Kenan re ginauna mae sneka kolho ka mae Jafet.”
28Mae Noa ne au nabagna thilo gobi glima fulu finogha ke leghugna nabritha na. 29Mae Noa karha neu ne thokeni nheva gobi glima fulu finogha neke lehe nga.
Voafantina amin'izao fotoana izao:
Jenesis 9: mrn
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators , Inc. All rights reserved.