uMataayi 2
2
Avhamanyinsanyi avha nzota vhakusogola kumusugamilila uYeesu
1UYeesu ápafwilwe mu nkaaya iya Betelehemu, mu shigavho isha nsi isha Yudeeya, ahavhaliilizyo he umwene uHeelodi#2:1 UHeelodi: Vhaazya mu Ntantiho izya Mazwi aMajeni. ahakonzyaga. Lwe apaapwa, mu nkaaya iya Yelusaleemu kuhafumila avhamanyinsanyi vhamo avha nzota vhe vháfumile kuvhutukulo. 2Vhahavhuziilizya vhahati, “Ali kwoshi we apafwilwe, uMwene uwa Vhayuuda? Tukuvhuziilizya isho, mwe pe tuluvhwenyi uluzota kufuma kuvhutukulo lwe lukulolesya kuuti apafwilwe. Ye nongwa twinzile kumusugamilila.”
3Lwe umwene uHeelodi ayiivwa inongwa izyo, zihamutamwa mu mwoyo waakwe pooka na vhantu vhonti avha mu Yelusaleemu. 4Pe ahavhavhungaaniha avhapiti vhonti avha vhapuuti#2:4 Avhapuuti: Vhaazya mu Ntantiho izya Mazwi aMajeni. na vhasambiilizi avha ndajizyo izya Moose,#2:4 Avhasambiilizi avha ndajizyo izya Moose: Vhaazya mu Ntantiho izya Mazwi aMajeni. ahavhavhuziilizya ahati, “Amwe uChilisiti akwanzilwa kupaapwa kwoshi?” 5Vhoope vhahamwamula vhahati, “Akwanzilwa kupaapwa mu nkaaya iya Betelehemu, mu shigavho isha nsi isha Yudeeya. Yeenya, izi zye umukuvhwi ásimvile kuuti,
6‘Niimwe mwe vhantu avha mu nkaaya iya Betelehemu,
iya mu shigavho isha nsi isha Yudeeya,
te mwe vhakuvhasuufwa inga hansi,
mu vhulongozi uvhwa nsi iya Yuuda!
Yeenya, muli imwe aliifuma umulongozi
we alivhadiimaga avhantu vhaane aVhaisilayeeli.’#2:6 uMiika 5:2”
7Pe uHeelodi lwe aamanya izyo, ahavhiita avhamanyinsanyi avha nzota vhaala kukwilu inga vhamuvhuuzye uvhwanalyoli ahavhaliilizyo he vháluvhwenyi uluzota luula. 8Pe ahavhasonteelezya mu Betelehemu, ahavhavhuuzya ahati, “Sogooli mupenze ahinza, mumanye kwe umwana uyo ali. Inga mwamwaga, mwinze mumbuuzye naluvhiilo, inga niine insogole imusugamilile.”
9Lwe avhamanyinsanyi avha nzota ivho vhiivwa amazwi aga mwene, vhaheepa. Uluzota luula lwe vháluvhwenyi kuvhutukulo, luhavhanga luvhalongoleeye kwe vhakusogola, luhimiilila pamwanya pe umwana ula áamile. 10Lwe vhalulola uluzota ulwo, vhahaseshela nkaani. 11Pe vhahinjila mu nyumba, vhahamulola umwana ali nu nyina uMaliiya, vhahamusugamilila nu kumupuuta. Vhahasatula vwe vhápinyile, vhahamufumwizya ivipeelwa ivwa sahaabu ni vwa kusuushizya na mafuta ge gakununshila. 12Lwe zyavha vhwevhulo, uMulungu ahavhasoha mu njozi, kuuti vhatahinze vhagalushe havhili kwa Heelodi. Pe vhahavhwela mu nkaaya yaavho kutuushila idala ilinji.
Kushimbiilila mu nsi iya Miisili
13Lwe avhamanyinsanyi avha nzota vheepa, uhavhizya uwa MWENE uMulungu ahamuloleshela uYoosefu mu njozi, ahamuvhuuzya ahati, “Vhuuha, umunyatule umwana nu nyina, mushimbiilile mu nsi iya Miisili, mwe pe uHeelodi kwe amulondole umwana uyo, inga amugoje. Mutendame ukwo, kufishila ahavhaliilizyo he ndiyinza imbavhuuzye kuuti mugalushe.” 14Pe uYoosefu ahadaamula, ahamunyatula umushi nu mwana uvhusiku, naluvhiilo ahashimbiilila ku Miisili. 15Ahatendama ukwo kufishila lwe uHeelodi aafwa. Zyávhombesile isho, inga lilunjishe izwi lye uMWENE uMulungu áyanzile kwi idala ilya mukuvhwi kuuti, “Námwisite uMwana waane kufuma ku Miisili.”#2:15 uHoosiya 11:1
UHeelodi akugoga avhaana ku Betelehemu
16Lwe uHeelodi aamanya kuuti, avhamanyinsanyi avha nzota vhaala vhamuleganya, ahaviitwa nkaani. Pe ahavhalajizya avhasikaali kuuti, vhavhagoje avhaana avhanaavuli vhonti avha ku Betelehemu pooka na vha mu ntala izinji zye zili mu luvhazu, kwandila avhacheeche kufishila avha maaha gavhili. Ávhomvile vhwevhulo kulandatana na vwe áhomesheziizye kufuma ku vhamanyinsanyi avha nzota, ahavhaliilizyo he uluzota lwátalisile kuloleha. 17Isho vwe lyálunjisile izwi lye umukuvhwi uYelemiya áyanzile kuuti,
18“Izwi ilya nkuuta impiti na maloosyo amamwamu
lihivwiha mu nkaaya iya Laama.
ULaaheli ahavhalosezyaga avhaana vhaakwe,
havhili, atahanzaga kuuti vhamusuvhaalizye,
mwe pe avhaana vhaakwe vháfuuye vhonti.”#2:18 uYelemiya 31:15
Kugaluha kufuma mu nsi iya Miisili
19Lwe uHeelodi aafwa, uhavhizya uwa MWENE uMulungu ahamuloleshela uYoosefu mu njozi havhili ku Miisili. 20Ahamuvhuuzya ahati, “Vhuuha, umunyatule umwana nu nyina, ugalushe mu nsi iya Isilayeeli, mwe pe vhaala vhe vhalondolaga kumugoga umwana uyo, vhafuuye.”
21Pe uYoosefu ahavhuuha, ahamunyatula umwana nu nyina, vhahagaluha mu nsi iya Isilayeeli. 22Ileelo lwe uYoosefu ayiivwa kuuti, uAlikelaawo akukonzya ku Yudeeya, kwe uyise uHeelodi ahakonzyaga, ahoogopa kusogola. Lwe uMulungu amusoha mu njozi, aheepa nu kusogola mu shigavho isha nsi isha Galilaaya. 23Ahafiha nu kutendama mu nkaaya iya Naazaleeti, inga izwi lilunjishe lye avhakuvhwi vháyanzile kuuti, “Vhalimwita vhaliiti, Munaazaleeti.”
Voafantina amin'izao fotoana izao:
uMataayi 2: nih
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021 Wycliffe Bible Translators, Inc.
