MATIYE 7

Aŋ a waatete kuŋ bayməlaŋ cəərə kumsuŋa ba

(Liki 6.37-38, 41-42)

1«Aŋ a ceme kəəti də kumsuŋ ba kir minti Pepeŋ a jəmaŋ kəəti cəərəŋa bə gəm. 2Gud maa mo, Pepeŋ bə jəmaŋ kəəti dəŋ haa damdi aŋ a jəmaŋ kəəti də kumsuŋ ana gəm. Karman bə minti aŋ ŋaɓte kar a kaŋ duuruŋ, Pepeŋ ŋaɓtaŋ nəətiŋ yaŋ duuru gəm. 3Tam ase kaɗəkaw weseki gə dər seenem haa səm mo, anaaŋa tam paapa bə ase kəbaŋ kəmtəŋ gə dərəma ba ɗaw! 4Tam neke bə waate seenem minti: ‹Taakan la bə he kaɗəkaw weseki gə dərəma wəraŋ› haa naanaanə mo bə minti kəbaŋ kəmtəŋ kəm dərəmaŋ? 5Tam bə minti ɗiki dəm ɓas-ɓasiŋ, haa kəbaŋ gə dərəm la wəra kəm, adoro dərəm ase yaŋ wəra kəm pəsa kirka he kaɗəkaw weseki gə dər seenem wəra .

6Aŋ a aye karman pisiŋ a káayaŋ ba, gud maa mo yə bə kole kuy cəərəŋa bə hətəŋa ɗawmay mo. Aŋ a ve ataara də gusi awəy nəətiŋ tiinə gaduuruŋa ba, gud maa mo wə isi bə tayta wəra ɗawmay mo .»

Pepeŋ ayə kar pəsaŋ a kaa gə minti məntəy kəəsuŋ

(Liki 11.9-13)

7«Aŋ mantə kar la, yə ayaŋ yaŋ. Aŋ goldə la, aŋ fele yaŋ. Aŋ latə ku kuli la, yə bəŋəŋ dəŋ yaŋ wəra. 8Gud maa mo, hulum bə minti mantaŋ, yə əyu. Hulum bə minti bə goldeŋ, wə fele. Hulum bə minti lətaŋ ku kuli neŋ, yə buŋu wəra a nuunu. 9Mindi adəwaldəŋa minti kurmuyuŋ mante kəəsu so, wə bə əyu máŋ haa pərkiŋ mo? 10Kumundu ba wə mante kəəsu aska, wə əyu máŋ hənjiŋ mo? 11Jəəne minti aŋ kaa kə bayməlaŋ asaŋ aye bə kar pəsaŋ a karməyaŋ bə anə hãy ɗaw, máŋ bə Aba nəətiŋ bə minti apəyaŋ mo? Wə aye kar pəsaŋ a kaa gə minti məntəy kəəsuŋ dəŋaŋ aŋ gə minti aye kar pəsaŋ a karməyaŋ. 12Kar gə minti aŋ bele minti kaŋ jəŋ dəŋ la keɗe, aŋ jəy di la bədoona ana gəm. Gud maa mo *ku giliŋ, də *kaa kə jogte ku mini kə Pepeŋ hate kaŋ haa bədoona.»

Ku kuli ɓasiŋ

(Liki 13.23-24)

13«Ku kuli boblo bəhiŋ, kəkəy duŋ boblo vəɗə-vəɗi gəm. Kaŋ ablaw bə hawa, səma wə ɗe a mələy wəra a ko bə beseŋa. Aŋ kaltə la haa a ku kuli feleŋleŋiŋa. 14Ku kuli toŋ, kəkəy duŋ ɓeɓle'i hasi. Kaa gə minti fəluŋ, yə anə maki təwa, səma kəkəy toŋ ɗe a mələy a ko bə dədərgəŋa.»

We də kəbaŋ

(Mat. 12.33; Liki 6.43-46; 13.27)

15«Aŋ amə kusrəŋ la pisi sar *kaa gə minti jogte ku mini kə Pepeŋ paapa a kuɗuŋa baŋ. Yə tuli sarəŋa haa damdi kaamaŋ ana bay kel kuya. Anaaŋa kel kə giidiŋ haa bə kə kaaya gə pəəriŋ ana dege'-dege'i faɗi. 16Kaa teŋ ha'aŋ, aŋ bə əsəy haa gud joŋre neeteŋa. Hulum teke we də atələələmaŋ a gidiwgi ba. Hulum fele we də totkaŋ a amorkoya bə gəm! 17Daana pa, kəbaŋ pəsaŋ, we diŋ ji pəsaŋ gəm, kaayaŋ gə bayməlaŋ, we diŋ ji bayməlaŋ gəm. 18Kəbaŋ pəsaŋ, we diŋ neke bə ji bayməlaŋ ba, kəbaŋ gə bayməlaŋ, we diŋ neke bə ji pəsaŋ bə gəm. 19Kəbaŋ gə minti we diŋ paapa pəsaŋ baŋ, yə ŋitiy wəra, yə vay warna dər cəwaŋ na. 20Bədoona ta, kaa teŋ ha'aŋ, aŋ bə əsəy haa gud joŋre neeteŋa.

21Ɗe a ve a *Kumna kə Pepeŋ na haa kaa məntəŋ mo? Haa kaa gə minti jəəti kar gə minti giidə Barən bə minti apəyaŋ bələy. Kaa gə minti mantan: ‹Barkaŋ, Barkaŋ›, yə ɗe a ve a Kumna kə Pepeŋ na keɗe ba. 22Bə minti hi bə jeme kəətiŋ tuukuŋ ne akaceŋaŋ, kaa ablaw waatan yaŋ minti: ‹Barkaŋ, Barkaŋ! Are jognom kum wəra a kaŋ də səmam bə mo? Are sarmətaŋ kəwal wəra cəərə kaŋa də səmam bə mo? Are jəətəŋ kar gə məɗ-miɗiŋ ablaw haa də səmam bə mo?› 23Səma ten bə wəətəy yaŋ wəra anə kaŋkaŋ minti: ‹Aŋ a jəŋ də dərən hõy ane mo? Aŋ zee la warna sarən na, aŋ kaa gə minti jəəti baymeleŋ!›»

Hərsi bə kuliŋ

(Liki 6.47-49)

24«Bədoona ana ta, hulum bə minti iski kel kə waate nin daana ji joŋre diiriŋ, wə bə ŋarə-ŋere də hulum bə naa-ne bə minti gaŋ gud kuli nuutuŋ a ko gagraŋiŋa ana. 25Koŋ hagaŋ ablaw, kan haŋ faɗi, kaŋkaw əsəŋ bə ji, yə lətaŋ kuliŋ anə kicik-kiciki, də teŋ keɗe wə vaŋ wəra ba gud bə minti guudu bə gaa-ge haa a ko gagraŋiŋaŋ. 26Səma, mindi mindi mo əskəŋ kel gə minti ten a wəətənəy kəna neŋ, wə paapa bə ji joŋre diiri baŋ, wə bə ŋarə-ŋere də hulum bə bay ase kel bə minti ɗeŋ a ge gud kuli nuutuŋ a ko bə caɓcaɓiŋa ana. 27Koŋ hagaŋ ablaw, kan haŋ faɗi, kaŋkaw əsəŋ bə ji, yə lətaŋ kuliŋ də səɓaki anə gig-gig, kəya kuliŋ vaŋ wəra adawra anə gurug-dug! Wə ɓalkaŋ wəra anə pecek-peceki.»

Kaŋ ŋili ablaw gud waate bə kel kə Yeesuŋa

(Mar. 1.22; Liki 4.32)

28Yeesu ɗeŋ a tewe kel nuutuŋ wəra kəyaŋ, kaŋ ŋələŋ ablaw gud hel də hate nuutuŋa. 29Gud maa mo, wə də abay də hateŋ, paapa bə kə *kaa kə hate ku gili kə Pepeŋ ana ba.

Voafantina amin'izao fotoana izao:

MATIYE 7: KERNT05

Asongadina

Hizara

Dika mitovy