यहून्ना 2

काना नगरी म ब्या

1आ बाता क होबा क पाछै तीसरै दिन गलिल का काना नगरी म कोई ब्या हो। अर ईसु की माँ बी बठै ही। 2ईसु अर बिका चेलानै बी इ ब्या म नूतेड़ो हो। 3अर जद अँगूरी निमड़गी जणा, ईसु की माँ बिऊँ बोली, “आकै कनै अँगूरी निमड़गी।”

4ईसु बोल्यो, “मावड़ी, मेरूँ क्युं बी करबा ताँई मना बोल। हाल मेरो टेम कोनी आयो।”

5ईसु की माँ नोकर-चाकराऊँ बोली, “जोक्यु बो थानै करबा ताँई बोलै बंय्यांई करज्यो।”

6बिधी-बिधान गेल न्हाबा-धोबा ताँई यहूदि मिनखा की एक रीत ही, जि ताँई बठै भाठा की छ बडी-बडी झाल म्हेलेड़ी ही। बा हरेक म करीब सो लिटर पाणी नावड़तो हो।

7ईसु नोकर-चाकराऊँ बोल्यो, “आ झालानै पाणीऊँ भरद्‍यो।” जणा बे बाकै पोळ लगा दिनी।

8जणा पाछै बो बोल्यो, “इब इमैऊँ का'डर कोठ्यारी कनै लेज्याओ।”

अर बे लेग्या, 9अर जद बो कोठ्यारी बि पाणीनै पीयो जखो अँगूरी बणगो हो। बो कोनी जाणतो हो क आ अँगूरी कठैऊँ आई। पण जखा नोकर-चाकर बि पाणीनै काड्या हा बे जाण्ता हा। जणा बो कोठ्यारी बनड़ानै बुलायो 10अर बोल्यो, “सगळा मिनख पेली चोखी अँगूरी परोसी हीं, अर मिनखा क पीर धाप्या पाछै हळकी। पण तू तो चोखी अँगूरी हाल ताँई राख राखी ह।”

11अंय्यां गलिल का काना नगरी म ईसु पेलो चमत्कार कर आपकी मेमा दिखाई। अर बिका चेला बिपै बिस्वास कर्या।

12 # मत्त 4:13 इकै पाछै ईसु अर बिकी माँ अर बिका भाई अर बिका चेला कफरनूम नगर जार बठै क्युंक दिन रिह्या।

ईसु को परमेसर का मनदर म जाबो

(मत्ती 21:12,13; मरकुस 11:15–17; लूका 19:45,46)

13यहूदिआ को फसै को त्युंहार साकडैई हो, जि बजेऊँ ईसु यरूसलेम गयो। 14ईसु बठै मनदर का चोक म आर काँई देखै ह क, ढांडा, लल्डी, कबूतर बेचबाळा अर रिपीआ-पिसा को लेणदेण करबाळा आपकी दुकान लगा राखी ह। 15जणा ईसु जेवड़ी को कोल्डो बणार, लल्ड्या क सागै बा सगळा ढांडानै मनदर का चोक क बारनै घेर्यायो। अर पाछो मुड़र पिसा को लेणदेण करबाळा का सीक्का खिन्डा दिआ। अर बाका पाटिया उन्दा मार दिआ। 16अर कबूतर बेचबाळानै बोल्यो, “आनै लेर अठैऊँ चल्या जाओ। मेरा परम-पिता का घरनै बजार बणाबा की थारी हिमत कंय्यां होई?” 17जणा बिका चेलानै पबितर सास्तर म मंडेड़ी बात याद आई, “तेरै घर को मो मनै खाज्यासी।”

18यहूदि अधिकारी ईसु कनै पाछा आर एक सुवाल कर्यो, “तू काँई चमत्कार दिखा सकै ह? जिऊँ ओ साबित होवै क, तनै अंय्यां करबा को हक ह।”

19 # मत्त 26:61; 27:40; मर 14:58; 15:29 ईसु जुबाब दिओ, “इ मनदरनै ढा द्‍यो, अर म तीन दिना म इनै पाछो खड़्यो कर देस्युँ।”

20बे बिऊँ बोल्या, “के तू इनै तीन दिना म खड़्यो कर देसी? इ मनदरनै बणाबा म छियाळिस बरस लाग्या हा।” 21पण ईसु जि मनदर की बात करर्यो हो बा बिकी काया ही। 22अर जद बो मरेड़ा मऊँ जी उठ्यो जणा बिका चेलानै याद आयो क इकै बारां म बो बानै बोल्यो हो। अर बे धरमसास्तर प अर ईसु जखो बोल्यो हो बिपै बिस्वास कर्या।

23फसै का त्युंहार की टेम जद ईसु यरूसलेम हो, बोळा हा जखा बिका चमत्कारानै देखर जानै बो कर्या करतो हो बिस्वास कर्या। 24पण ईसु खुदनै बाकै भरोसै कोनी छोड्यो, क्युं क बो सगळानै जाणतो हो। 25बिनै इकी जुर्त कोनी ही क, कोई मिनख दुसरा मिनख क बारां म बतावै, क्युं क बो खुद जाण्या कर्तो हो क मिनखा क मन म काँई चालर्यो ह।

Voafantina amin'izao fotoana izao:

यहून्ना 2: एस डब्लु वी

Asongadina

Hizara

Dika mitovy