Ruka 20
20
Smiling Pusu beyax Yesu
(Mat 21:23-27. Mrk 11:27-33)
1Niqan 1 ali, tmgesa seediq Sapah Thmkuwan ka Yesu ma gmarang malu kari ciida, meyah berah na ka dpusu msapuh, dmptpatis ma drudan mpqlahang, 2smiling heya: “Tgsai nami. Spooda su pusu beyax maanu ka qmeepah su so nii ho? Ima ka bnege pusu beyax sunan ho?” 3Cmiyuk dheya ka Yesu: “Mpsiling ku 1 kari ka yaku uri, cyuki ku hiya. 4Mptgaya smino Yohane we ye pneeyah Utux Baro, ye pneeyah seediq ho?” 5Mpprengo ka dheya nanak: “Nasi ta kesun pneyah Utux Baro, maha mprengo ita: ‘Hmuwa, ma namu ini snhii heya?’ 6Nasi ta kesun ‘pneeyah seediq’ we phqilun tena mcebu btunux ita ka kana seediq. Ado kana seediq we ngalan daha mppgeela kari ka Yohane.” 7Kiya de cmiyuk rmengo ka dheya: “Yaa pneyah inu we ini miyan klai.” 8Kiya de rmengo dheya ka Yesu: “Uxe ku mprengo yamu uri, mnoda ku pusu beyax maanu qmeepah ku so nii.”
Pnungalan Kari Mpqeepah Naqah
(Mat 21:33-46. Mrk 12:1-12)
9Kiya de rmengo pnungalan kari seediq ka Yesu: “Kmbgurah qnpahan lipas ka 1 seediq. Skbarux na dmpqeepah ma mosa bsiyaq meeniq icil qnlhangan. 10Dehuk ka ali de skgulan dmpqeepah hiya ka 1 tnqliyan na aangal daha peeyah neepah bbege daha duma heyi lipas hiya. Kiya de psruwan dmpqeepah ma ini daha pdesi ani maanu mosa. 11Skgulan na ka taxa tnqliyan dungal. Heya uri we sbeti daha ma tsyaxan daha ma ini daha pdesi ani maanu mosa. 12Kiya de skgulan na ka tg3 tnqliyan na dungal. Plqihan daha ma qdaani daha nganguc. 13Rmengo ka tnqmpahan lipas: ‘Mphuwa ku mesa da ho? Skgulun mu ka laqi sgaalu mu. Ida daha spruun ka heya da.’ 14Kiya de mita heya ka dmpqeepah de mpprengo: ‘Mpririh ka nii da. Phqilo ta. So kiya de mmaha nita kana ka hniti na da.’ 15Kiya de sqada daha nganguc qnpahan lipas ma phqilun daha. So kiya de hwaun tnqmpahan lipas ka dmpqeepah nii di ho? 16Yahun na phuqil ka dmpqeepah nii ma sbege na taxa ka qnpahan lipas.” Mbahang so nii ka seediq de: “Ida uxe maha so nii!” 17Mita dheya ka Yesu ma rmengo: “Mesa ka ga spatis Patis:
‘Btunux qnada mpsmalu sapah ge
wada ma pusu muxi sapah da.’
Maanu ka kari nii ho? 18Ani ima ka mntuting bobo btunux nii we mptnemu mgeerung. Mtuting heyi ani ima ka btunux nii we pstmaqun na ka heya.”
19Mkela mesa pnungalan kari nii we gisu rmengo dheya ka dmptpatis ma dpusu msapuh de kmpqerac Yesu ka dheya. Kiya de miicu seediq.
Mege Pila Bbege Kaisar
(Mat 22:15-22. Mrk 12:13-17)
20Maanu so kiya de qmlahang ba mita Yesu ma skgulan daha ka mpskuuruy nnnangi malu. Kiya we migin qnuuqu kari na ma bbege daha qbsuran mpqlahang. 21Rmengo heya ka mpskuuruy: “Mptgesa, klaun nami malu ba kari ka rmengo su ma tmgesa su, ini su psaanak seediq ma bale ba ka tnugesa su elu Utux Baro. 22Mege ta pila qbsuran Ruma Kaisar ye tduwa ho, ye ini tduwa ho?” 23Klaun na ka ttraki daha de rngagan na ka dheya: 24“Pqtai ku hiya ka pila ging! Hnyegan ima ma patis pnskraya ima ka nii ho?” Rmengo ka dheya: “NKaisar.” 25Rmengo ka Yesu: “So kiya de nKaisar we bqani Kaisar, nuUtux Baro we bqani Utux Baro.” 26Berah kana seediq we uka daha klaan ptgdiyal ka kari na. Sklwiun daha uri ka cniyuk na ma mgmelux da.
Kuudus Peeyah Hnqilan
(Mat 22:23-33. Mrk 12:18-27)
27Meyah mita Yesu ka duma seediq Sadokay, rmengo uka ka kkuudus peeyah hnqilan ka dheya, kiya de smiling Yesu: 28“Mptgesa, pnatis na yami ka Moseh: ‘Nasi niqan mqedil ma uka laqi ma wada mhuqil ka qbsuran we ida asi ka ngalun mtswai na ka mqedil na ma peeniq laqi quri qbsuran na.’ 29Niqan ka 7 mtswai. Mnangal mqedil ka qbsuran ma uka laqi ma wada mhuqil. 30Tg2, 31tg3 na mtswai ka mangal mqedil nii uri. So kiya ka 7 mtswai mnangal mqedil nii. Uka laqi ma wada mhuqil kana. 32Hiti de mhuqil ka mqedil nii uri da. 33Maanu so kiya de muudus peeyah hnqilan ciida de mmaha mqedil nima ka mqedil nii da ho? Ado tnmqedil heya ka 7 mtswai.” 34Rmengo ka Yesu: “Dlaqi kdesan nii we maangal mqedil ma mosa rseno uri. 35Wano seediq wada muudus peeyah ckceka hnqilan ma mndungus mangal mknexan meeyah ka uxe maangal mqedil ma uxe maha rseno uri. 36Ado uxe mphuqil ka dheya da. Mntena snkgulan baro ka dheya. Dheya ge mnuudus peeyah hnqilan, kiya ka mlqlaqi Utux Baro ka dheya. 37Quri muudus peeyah hnqilan, pnatis quri ndaan na mita dupi ka Moseh we pnugkela na ge rmnengo, Bukung we Utux Baro nuAbraham, Utux Baro nuYijxaq ma Utux Baro nuYakobu. 38Utux Baro we uxe Utux Baro seediq wada mhuqil. Heya we Utux Baro dseediq ga muudus. Ado gaga muudus berah na ka kana seediq.” 39Rmengo heya ka duma dmptpatis: “Mptgesa, malu ba ka rnengo su.” 40Bobo na de uka mnpahung daha ssiling ani maanu heya ka dheya.
Knluban Kiristo ma Dawid
(Mat 22:41-46. Mrk 12:35-37)
41Rmengo dheya ka Yesu: “Hmuwa ma rmengo ‘Lqlaqi mslutuc Dawid ka Kiristo’ ka seediq ho? 42Patis uyas hiya we rmengo nanak ka Dawid:
‘Rmengo tnpusu sapah mu ka Bukung:
Tleung narac mu ka isu, 43betaq mu spilan papak su ka pais su.’
44Dawid we Bukung kesun na ka heya, so kiya de ma lux lqlaqi mslutuc Dawid ka Kiristo dungal?”
Kseengun Yesu ka Dmptpatis
(Mat 23:1-36. Mrk 12:38-40)
45Mbahang ka kana seediq ciida, rmengo tnugsaan na ka Yesu: 46“Qlhangi ka dmptpatis. Dheya we smkuxul mlukus rila mkkesa ma smkuxul pthmuku seediq quri dheya pssliyan ma smkuxul pusu malu tluungan sapah pssliyan ma smkuxul paru tluungan uqan mqaras. 47Dheya we gmeeluk maangal dnoi sapah mqedil mqrinuc ma pqita bbaro dnurun. Maha krinah mgkala ngalun mndungus pkdraun ka dheya!”
Voafantina amin'izao fotoana izao:
Ruka 20: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
