Yohane 7
7
Ini Snhii ka Mtswai Yesu
1Bobo na nii de mooda mtqiri Galil ka Yesu ma ini pkmooda mtqiri Yudaya. Ado kmphuqil heya ka seediq Yudaya. 2Ciida we smdaling ka smseman Pkobu dseediq Yudaya. 3Rmengo Yesu ka mtswai na: “Mlatac peeyah hini ma osa Yudaya, so qqtaun tnugsaan su ka ga su qpahun. 4Ado qmpqita ngayan na ka seediq we ini gruus qmeepah ani maanu. Nasi su qmeepah so nii we osa mtqita seediq bobo dxeral.” 5Ado ani mtswai na uri ini snhii heya. 6Kiya de rmengo dheya ka Yesu: “Ini dehuk ka ali mu nana. Ani knuwan ka ali namu yamu. 7Ini qnriqu yamu ka seediq bobo dxeral. Kiya de yaku ka qrquun daha. Ado wada mu spgkeela ka noda daha we naqah. 8Osa smmesung ka yamu! Uxe ku maha ka yaku. Ado ini pttuku ka ali mu nana.” 9Mhedu rmengo kari nii de ida meeniq Galil ka heya.
Mooda Smseman Kobu ka Yesu
10Bobo wada smseman ka mtswai na de mosa hiya ka Yesu uri. Kiya de ini ptuura ma gmruus mosa. 11Migin Yesu smseman ciida ka seediq Yudaya ma rmengo: “Ga inu ka heya?” 12Smnetur bale quri heya ka hbaro ba seediq. Duma na rmengo: “Malu ba seediq ka heya.” Duma na rmengo: “Uxe wa, pkuni ba hbaro ba seediq ka heya.” 13Ani so kiya uka ka pkleexan mpprengo quri Yesu berah seediq, ado kniicu daha seediq Yudaya.
14Wada dmeka ka smseman ciida, mosa Sapah Thmkuwan ma tmgesa seediq ka Yesu. 15Mskluwi bale ka seediq Yudaya, rmengo: “Ini sluhe ka seediq nii we ma na klaun bale ka patis ho?” 16Cmiyuk rmengo dheya ka Yesu: “Tnugesa mu we uxe nnaku, nsmnkagul kenan. 17Nasi mqmpqeepah lnglungan Utux Baro ka ani ima ge, maha daha klaun yaa pneyah Utux Baro ma uxe uri we yaa pneyah rnengo mu nanak ka tnugesa mu nii. 18Rmengo peeyah heya nanak ka seediq we knledax na nanak ka gimun na. Mesa knledax smnkagul heya ka seediq we mnduwa bale, lhebun na we uka qnquwan noda. 19Uxe bnege gaya yamu ka Moseh peni? Kiya de ini puyu gaya ka ani taxa namu. Hmuwa, ma namu kmphuqil kenan?” 20Cmiyuk rmengo ka hbaro ba seediq: “Ga su sdooyun bgihur naqah ka isu da! Ima ka kmphuqil sunan ho?” 21Cmiyuk rmengo dheya ka Yesu: “Qmneepah ku 1 noda ma mskluwi namu kana. 22Moseh we wada na sbege yamu ka gaya ppsalak. (Uxe pnrading peeyah Moseh ka nii. Pnrading peeyah rudan cbeyo.) Kiya de ali sngayan ka ptgeya namu psalak seediq. 23Nasi ptgaya psalak ali sngayan ka seediq we uxe namu sseeliq gaya pndakar Moseh. Hmuwa, ma namu mseang ba kenan pkmalu ku 1 seediq ali sngayan ho? 24Iya qita hnyegan psgao, asi ka ini psanak psgao.”
Kiristo ka Heya Ho?
25Maanu so kiya de rmengo ka duma seediq Yerusalem: “Uxe seediq nii ka qmphqilun daha peni? 26Tai, nii mtuura rmengo nana ka heya ma ini daha rngagi ani maanu! Kiristo ka seediq nii yaa bale ba wada mesa mkela ka dmpdudul ho? 27Ani so kiya we pneeyah inu ka seediq nii we klaun ta. Kiya de meyah ciida ka Kiristo we mpeeyah inu ka heya we uxe ani ima ka mkela.” 28Ciida, tmgesa Sapah Thmkuwan ka Yesu ma mdiras rmengo: “Klaun namu ka yaku ma klaun namu pneeyah ku inu ka yaku uri. Uxe yaku ka seeyah mu. Ani so kiya we smnkagul kenan we bale ba ka heya ma ini namu klai. 29Mkela ku heya ka yaku. Ado pneyah ku heya ma heya ka smnkagul kenan.” 30Kiya de qmqerac Yesu ka dheya. Kiya de uka ani ima ka posa baga daha. Ado ini dehuk ka ali na nana. 31Kiya de ckceka hbaro seediq we hbaro ka snhii heya. Rmengo ka dheya: “Meyah ka Kiristo ciida we yaa mpgkala noda seediq nii ka pnskraya qneepah noda na ho?”
Qmerac Yesu ka Dmpqlahang
32Seediq Parisay we mnbahang ga smnetur quri Yesu ka hbaro ba seediq. Kiya de dpusu msapuh ma seediq Parisay we skgulan daha ka dmpqlahang daha qqeerac daha heya. 33Maanu so kiya de rmengo ka Yesu: “Uxe ku qbsiyaq theyaq yamu ka yaku da. Maha ku smnkagul kenan hiya. 34Migin namu kenan ma uxe ku namu slayun. Ini namu tduwa mosa ka nniqun mu yamu.” 35Maanu so kiya de mpprengo ka seediq Yudaya: “Maha inu ka seediq nii, betaq ta uxe slayun ho? Yaa maha seediq Yudaya wada mkrehak alang Hellenis hiya ma mptgesa seediq Hellenis ho? 36Rmengo ka heya: ‘Migin namu kenan ma uxe ku namu slayun. Ini namu tduwa mosa ka nniqun mu yamu.’ Kari nii we yaa maanu ho?”
Yayung Qsiya Muudus
37Qnhdean ba ali smseman ciida, kiya ka pusu bale ali. Mheyu ka Yesu ma mdiras rmengo: “Nasi mhqeni ka ani ima we eyah mimah kenan. 38Snhii ka seediq we maha mntena ga spatis Patis: ‘Mpheru peeyah lhebun na ka yayung qsiya muudus.’” 39Srengo na kari nii we Bgihur Utux ngngalun seediq ga snhii heya. Ini eyah nana ka Bgihur Utux. Ado ini aangal knledax ka Yesu na.
Ado Yesu Sptgdiyal Hbaro Seediq
40Mbahang kari so nii ka hbaro seediq, duma na we rmengo: “Bale ba nii ka mpgeela kari!” 41Rmengo ka duma daha: “Misaya ka nii!” Rmengo ka duma daha: “Mpeeyah Galil ka Kiristo peni?” 42Uxe ga rmengo ka Patis: “‘Kiristo we lqlaqi mslutuc Dawid ma mpeeyah Betlexem alang nniqan Dawid’ peni?” 43Maanu so kiya de ado Yesu ka stgdaha pkeekan kari ka hbaro seediq. 44Duma daha we satang so mqerak heya Kiya de ini qerac heya ka ani ima.
Ini Snhii Yesu ka Dmpdudul Yudaya
45Meyah berah dpusu msapuh ma seediq Parisay ka dmpqlahang rhengun. Rmengo dheya ka dheya: “Ma namu ini desi ka heya?” 46Cmiyuk rmengo ka dmpqlahang rhengun: “Uka ba ka mntena heya rmengo so nii kari!” 47Rmengo ka seediq Parisay: “Ga namu na psrdilun uri da ho? 48Dmpqlahang ma seediq Parisay we niqan ka wada snhii heya peni? 49Kiya de ini kela gaya ka hbaro seediq nii we nii syusan.” 50Ga ckceka daha hiya ka Nikodemos. Heya we mnita Yesu cuuxal. Rmengo dheya: 51“Ini ta pllai mbahang ka rnengo na seediq nii ma ini ta say migin ka qneepah na we ye mtduwa sbege qnuuqu noda heya ka gaya ta peni?” 52Cmiyuk heya ka dheya: “Pneyah su Galil ka isu uri peni? Osa slluhe Patis Mrtaso maha su klaun. Uka mpeeyah mpgeela kari ka Galil.”
Qmerac Mqedil Mkmhemuc Msuupu
53Kiya de wada sapah kana da,
Voafantina amin'izao fotoana izao:
Yohane 7: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
