Yohane 6
6
Pktngiun ka 50'00 Seediq
(Mat 14:13-21. Mrk 6:30-44. Ruk 9:10-17)
1Bobo noda nii de mosa mntaril rcilung Galil ka Yesu. Kiya ka rcilung Tiberias. 2Ado ntaan daha ka pnskraya qneepah na mnarux seediq. Kiya de smnegul heya ka hbaro bale seediq. 3Kiya de mosa dgiyaq ka Yesu ma msuupu tnugsaan na tleung hiya. 4Ciida we smdaling ka smseman hrnasan seediq Yudaya. 5Qmita ka Yesu ma taan na gisu hbaro bale ka seediq meyah ma rngagan na ka Pilipos: “Mbaruy ta inu pang uuqun seediq nii ho?” 6So nii ka kari rnengo na Pilipos we gisu psepung heya. Ado mkela naq mhuwa ta mesa qmeepah. 7Cmiyuk rmengo heya ka Pilipos: “Ani 2'00 hbangan ging ka pang we uxe mptuku ani pnbiciq pqdiyan txtaxa heyi daha!” 8Rmengo heya ka Andreas mtswai Simon Petros 1 tnugsaan na: 9“Nii hini ka 1 laqi ga dmoi 5 pang mugi ma 2 qcurux. Kiya de mmaha maanu so nii knhbragan seediq ka nii da ho?” 10Rmengo ka Yesu: “Ptleung ka seediq.” Egu ba speriq ka hiya. Maanu so kiya de tleung hiya kana da. Knhbragan rseno we yaa 50'00. 11Maanu so kiya de mangal pang ka Yesu ma bobo wada mqaras dmurun de saasu na seediq ga tleung hiya di. Duri wada na pssugun ka qcurux ma spooda na ngngalun daha masu. 12Bobo tngtengi ka dheya rmengo tnugsaan na ka Yesu: “So uxe ssliqun ka nemu nngari pnuqan we psseli.” 13Maanu so kiya de pssliun daha ma stenge 12 rawa ka nemu nngari pnuqan n5 pang mugi. 14Maanu so kiya de mita pnskraya qneepah Yesu ka seediq de rmengo: “Bale ba mpgeela kari meeyah bobo dxeral ka seediq nii!” 15Meeyah pkeyux ngalan daha qbsuran paru ka heya we klaun Yesu. Kiya de brinah dungal mosa nanak dgiyaq.
Mkkesa Bobo Rcilung
(Mat 14:22-33. Mrk 6:45-52)
16Gbiyan de mosa ssiyo rcilung ka tnugsaan na, 17mntaril yayung paapa asu mquri Kaparnaom. Keeman ka ciida duma ini eyah dheya nana ka Yesu. 18Asi tutuy ka sbhuran paru bgihur ka rcilung. 19Micux qsiya ka tnugsaan, maanu so kiya de yaa 10 stati ka ncuxal daha ma taan daha mkkesa bobo rcilung gisu smdaling asu ka Yesu ma miicu ka dheya da. 20Rmengo dheya ka Yesu: “Yaku wa! Iya kiicu!” 21Tnugsaan we, qrasun daha psteme asu ka Yesu ma asi dehuk ssaan daha ka asu da.
Uqun Knuudus ka Yesu
22So kusun mheyu sipo rcilung hiya ka hbaro ba seediq ge, wano 1 asu ka ga meeniq hiya. Klaun daha ini psuupu tnugsaan na paapa hiya ka Yesu ma wano tnugsaan na nanak ka paapa asu ma wada da. 23Kiya de pneyah Tiberias ka yaa piya asu we meyah smdaling pnuqan pang bobo qnrasan dmurun Bukung hiya. 24Maanu so kiya de taan hbaro seediq uka hiya ka Yesu ma tnugsaan na uri de paapa asu ma mosa Kaparnaom igin daha Yesu.
25Kiya de slayan daha sipo rcilung hiya de rngagan daha: “Mptgesa, mneyah su hini sknuwan?” 26Cmiyuk dheya ka Yesu: “Bale ba rngage maku. Siigin namu kenan we uxe namu qmnita pnskraya. Tngtengi namu mnekan pang ka siigin namu kenan. 27Iya qeepah quri uqun mpsburo. Pqpahi quri uqun meeniq betaq uka psteqan knuudus. Uqun nii we bbege na yamu ka Laqi seediq. Ado Utux Baro Tama we spgkela na ka heya.” 28Maanu so kiya de smiling heya ka dheya: “Asi nami ka qmeepah manu kika kesun qmeepah qpahun Utux Baro ho?” 29Smiling dheya ka Yesu: “Snhii snkgulan Utux Baro. Nii we kika pnqeepah Utux Baro yamu.” 30Maanu so kiya de rngagan daha: “So kiya de maanu pnskraya qneepah Utux ka qpahun su taun nami ma so ssnheyi nami sunan? Maanu ka qpahun su ho? 31Mnekan mana tadus brenux ka rudan ta. So nii ka ga spatis Patis: ‘Wada na spekan dheya peeyah baro ka uuqan.’” 32Maanu so kiya de rmengo dheya ka Yesu: “Bale ba rngage maku, uqun pneyah baro uxe bnege Moseh. Bale ba uqun pneeyah baro we bege na yamu ka Tama mu. 33Ado pneyah baro ka uuqun Utux Baro ma mege knuudus bobo dxeral.”
34Maanu so kiya de rngagan daha: “Bukung, ani su ba rabang, uqun nii we biqi nami hiya klaali.” 35Rmengo dheya ka Yesu: “Yaku ka pang knuudus. Meyah kenan we uxe mpkuure. Snhii kenan we uxe mphqeni betaq ani knuwan. 36Kiya de rmnengo ku yamu, wada namu qmita yaku ka yamu da ma ini namu snhii. 37Kana seediq ga sbege Tama kenan we ida meeyah kenan. Meyah kenan ka seediq we ida mu uxe qada. 38Ado seeyah mu peeyah baro we uxe ka qqeepah mu lnglungan mu nanak, qqeepah mu lnglungan smnkagul kenan. 39So nii ka lnglungan smnkagul kenan, uxe mu ppgdangun ani 1 ka bnege na kenan ma pkdusun mu qnhdean ali. 40Ado lnglungan Tama mu we aangal uka psteqan knuudus kana qmnita laqi ma snhii laqi. Kiya de pkdusun mu qnhdean ali.”
41Ado rmnengo, yaku ka pang pneyah baro. Kiya de smnetur quri heya ka seediq Yudaya. 42Rmengo ka dheya: “Uxe Yesu laqi Yosehu ka seediq nii peni? Uxe ta ida klaun ka tama na ma bubu na peni? Ma mchaya rmengo ka heya: ‘Pneyah ku baro ka yaku’ ho?” 43Cmiyuk rmengo dheya ka Yesu: “Iya pssnetur ka yamu. 44Nasi uxe Tama smnkagul kenan ka dmudul seediq, kiya de uka ka seediq tduwa meyah kenan hini. Kiya de meyah kenan we pkdusun mu qnhdean ali. 45Ga spatis patis dmpgeela kari: ‘Tgsaun Utux Baro ka kana dheya.’ Kana mnbahang tnugesa Tama ma kmsluhe we meeyah kenan. 46Uxe kesun ka qmnita tama ka seediq. Wano pneyah Utux Baro ka qmnita Heya. 47Bale ba rngage maku. Seediq snhii na we pniqan uka psteqan knuudus. 48Pang knuudus ka yaku. 49Mnekan mana tadus brenux ka rudan namu ma ida wada mhuqil. 50Nii ka ppuqun pneyah baro uuqun seediq uxe hhuqil da. 51Uuqun knuudus pneyah baro ka yaku. Nasi mekan pang nii ka ani ima we mpkuudus ani betaq knuwan. Pang bbege mu kkuudus seediq bobo dxeral we kika heyi mu.”
52Maanu so kiya de pkeekan kari ka dseediq Yudaya: “Seediq nii we huwa na kesun mege ita uuqun ta ka heyi na ho?” 53Kiya de rmengo dheya ka Yesu: “Bale ba rngage maku. Nasi namu ini ekan heyi Laqi seediq, ini namu imah dara Laqi seediq we uka knuudus ga ckceka namu. 54Mekan heyi mu ma mimah dara mu ka seediq we mpniqan uka psteqan knuudus. Kiya de pkdusun mu qnhdean ali. 55Bale ba tduwa uqun ka heyi mu, bale ba tduwa mahun ka dara mu. 56Mekan heyi mu ma mimah dara mu ka seediq we meeniq ckceka mu ma meeniq ku ckceka daha ka yaku uri. 57Huwa mesa smkagul kenan ka Tama uka psteqan muudus we ririh Tama nii ku huwa mesa muudus. Mntena so nii uri mekan heyi mu ka seediq we ririh yaku mpkuudus. 58Nii ka pang pneyah baro, ini pntena rudan namu mnekan mana ma wada mhuqil. Mekan pang nii ka seediq we mpkuudus ani betaq knuwan.” 59Kari nii we rnengo na tmgesa sapah pnssliyan Kaparnaom hiya ciida.
Kari Uka Psteqan Knuudus
60Hbaro ba tnugsaan na qbhangan daha ka kari nii de rmengo: “Rriqu ba ka kari nii. Ima ka mpdehuk mbahang ho?” 61Kiya de Yesu we klaun na ka ga gmruus smnetur quri nii ka tnugsaan na ma rngagan na: “Prrudu yamu ka kari nii ho? 62Nasi namu taan mosa mnkala nniqan na plaale ka Laqi seediq we mphuwa namu mesa ho? 63Mege knuudus seediq ka Bgihur Utux. Uka rrihan ka heyi. Kari rnengo mu yamu we kiya ka Bgihur ma kika knuudus. 64Ani sa ini snhii ka duma ckceka namu.” Ado ima ka ini snhii ma ima ka mbaruy Yesu we ida na klaun peeyah plaale. 65Kiya de rmengo ka Yesu: “Ado so nii ma rmnengo ku yamu, nasi uxe huwe Tama mu mpuuka seediq tduwa meyah kenan.”
66Peeyah so nii de malix ka hbaro ba tnugsaan na ma ini psuupu heya mkkesa da. 67Maanu so kiya de rmengo 12 tnugsaan na ka Yesu: “Mplatac namu ka yamu uri ho?” 68Cmiyuk Heya ka Simon Petros: “Bukung! Gaga sunan ka kari quri uka psteqan knuudus. Ima ka saun nami smnegul dungal ho? 69Wada namu snhii ka yami da, klaun nami uri isu ge Mrtaso ba nuUtux Baro ka isu.” 70Cmiyuk dheya ka Yesu: “Yamu 12 heyi we uxe nugeegun mu peni? Kiya de ckceka namu we niqan 1 Qbsuran Bgihur Naqah.” 71Yehudah laqi Simon seediq Iskariot mbaruy Yesu ka srengo na. Heya we 12 heyi 1 na hiya ka Yehudah.
Voafantina amin'izao fotoana izao:
Yohane 6: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
