Yohane 11
11
Mhuqil ka Rajaros
1Niqan ka 1 seediq mnarux Rajaros ngayan na. Heya we meeniq alang Betania. Kiya ka alang Maria, qbsuran na we Marta. 2Maria nii we kiya ka rmnisuh malu skenux Bukung ma snerus na papak Yesu ka snuunux na. Rajaros mnarux we mtswai na rseno. 3Maanu so kiya de smkagul seediq mosa rmengo Yesu ka dheya: “Bukung, ga mnarux ka seediq sgaalu su.” 4Qbhangan ka Yesu de rmengo: “Uxe mphuqil ka knnarux nii. Ado mpkledax Utux Baro. Sooda nii maha mangal knledax ka laqi Utux Baro.” 5Yesu we sgaalu na bale ka Marta ma mtswai na mqedil ma Rajaros. 6Wada mbahang ga mnarux ka Rajaros ka heya we ida mk2 ali meeniq hiya nana ka heya. 7Bobo na de rmengo tnugsaan na: “Nita dungal Yudaya!” 8Rmengo ka tnugsaan na: “Mptgesa, mcebu btunux sunan snii ka seediq Yudaya we maha su hiya dungal ho?” 9Cmiyuk ka Yesu: “1 ali we uxe 12 toke peni? Nasi mkkesa diyan ka seediq we uxe mptakur, ado mita ledax bobo dxeral nii. 10Nasi mkkesa keeman ka seediq we mpktakur, ado uka ledax ka heya.” 11Bobo rmnengo ka Yesu de rmengo dheya dungal: “Gaga mtaqi ka Rajaros dadal ta, saun mu tmutuy.” 12Rmengo ka tnugsaan na: “Bukung! Nasi ga mtaqi ka heya we naka malu bale.” 13Nii srengo Yesu we quri Rajaros wada mhuqil di. Quri mtaqi ka ga daha lnglungun. 14Kiya de klexan ba rmengo dheya ka Yesu: “Ga mhuqil ka Rajaros da. 15Ado ririh yamu ini ku eeniq hiya we mqaras ku, so maha namu snhii. Kiya de nita heya saya.” 16Tomas kesun Tidumos we rngagan na ka duma tnugsaan msuupu heya: “Saye ta msuupu theyaq heya mhuqil uri!”
Muudus Peeyah Hnqilan ma Knuudus ka Yesu
17Dehuk Betania ka Yesu de tena wada mk4 ali meeniq habung ka Rajaros we klaun na. 18Betania we yaa ba 6 stati ktnheya ini pstheya daha ka Yerusalem. 19Meyah mita Marta ma Maria ka hbaro seediq Yudaya, ado mhuqil ka mtswai daha ma meyah smbeyax dheya. 20Marta we qbhangan na gisu ka Yesu de mosa nganguc smterung heya. Kiya de ida gaga tleung sapah ka Maria. 21Rmengo Yesu ka Marta: “Bukung! Nasi su meeniq hini we kani qhuqil ka mtswai mu! 22Ani saya ida mu klaun, mesa su ani maanu Utux Baro we ida mbege sunan ka Utux Baro.” 23Rmengo ka Yesu: “Mpkuudus ka mtswai su.” 24Rmengo ka Marta: “Kdesan peeyah hnqilan qnhdean ali ciida de mpkuudus ka heya we klaun mu.” 25Rmengo heya ka Yesu: “Yaku we muudus peeyah hnqilan ma knuudus. Ani mhuqil ka snhii kenan we ida mpkuudus. 26Ga muudus ka snhii kenan we uxe mphuqil ani betaq knuwan. Snhiyun su ka kari nii ho?” 27Rmengo heya ka Marta: “Bukung! Un! Snhiyun mu, isu we Kiristo, laqi Utux Baro. Kiya ka mmeeyah bobo dxeral.”
Lmingis ka Yesu
28Mnhedu rmnengo kari nii ka Marta de wada di, mosa lmeing mlawa Maria mtswai na, rmengo: “Nii hini ka mptgesa ma ga mlawa sunan.” 29Mbahang ka Maria de mtutuy nhari ma mosa Yesu hiya. 30Ciida, ini teme alang nana ka Yesu. Ida ga meeniq alang sntreengan Marta heya nana. 31Msuupu Maria meeniq sapah ma smbeyax heya ka seediq Yudaya we taan daha asi tgaaguh mtutuy ma mosa nganguc ka Maria de smnegul heya. Lnglungan daha ida maha lmingis paru habung hiya ka heya. 32Mosa ga niqan Yesu hiya ka Maria de mita heya de asi tgtemaq berah na ma rmengo: “Bukung! Nasi su meeniq nhari hini we kani qhuqil ka mtswai mu!” 33Yesu we taan na nii lmingis ka heya ma gaga lmingis ka seediq Yudaya msuupu heya uri de mngihur lhebun na ma naqah bale kuxul na. 34Kiya de rngagan na: “Ga namu psaan inu ka heya?” Rmengo heya ka dheya: “Bukung! Eyah mita bino.” 35Lmingis ka Yesu da. 36Maanu so kiya de rmengo ka seediq Yudaya: “Tai, teyal ba gnaalu na heya!” 37Rmengo ka duma daha: “Wada na rwahun ka doriq mbudu, ye ini huwa kesun na iya qhuqil ka seediq nii peni?”
Pkdusun Peeyah Hnqilan ka Rajaros
38Kiya de mngihur bale lhebun na ka Yesu ma meyah berah habung. Habung nii we gnqeran beling tasil ma ga leban tasil ka beling na. 39Rmengo ka Yesu: “Hediqi ka tasil nii!” Rmengo heya ka Marta qbsuran Rajaros wada mhuqil: “Bukung! Skenux saya da. Ado mk4 ali mhuqil ka heya da.” 40Rmengo ka Yesu: “Uxe ku rmnengo isu, nasi su snhii we mqita su knledax Utux Baro peni?” 41Maanu so kiya de hdili daha ka tasil da. Kiya de qmita baro ka Yesu ma rmengo: “Tama, mqaras ku ba sunan, ado wada su mbahang kenan ka isu. 42Mbahang su kenan klaali we klaun mu uri. Hbaro ba seediq nii mtqiri mheyu hini ka srengo mu so nii. Kiya de so maha snhii isu ka smnkagul kenan.” 43Rmnengo so nii de paru ba quwaq na mdiras mlawa: “Rajaros, eyah nganguc!” 44Kiya de meyah nganguc ka seediq mnhuqil. Ida ga qruyan lnabu ka papak na ma baga na ma dqeras na. Rmengo dheya ka Yesu: “Lhlahi ka heya ma pksai!”
Migin Phqilan Yesu
(Mat 26:1-5. Mrk 14:1-2. Ruk 22:1-2)
45Mneyah qmita Maria ka dseediq Yudaya we taan daha ka noda Yesu de hbaro ka snhii heya. 46Duma na we mosa mita seediq Parisay smneeru qneepah Yesu ka dheya. 47Dpusu msapuh ma seediq Parisay we pssliun daha prngagan ma rmengo: “Mphuwa ta mesa di ho? Seediq nii we qmeepah egu pnskraya ka heya? 48Nasi ta asi laxi ka heya we mpsnheyi heya ka kana seediq. Meeyah smeliq sapah thmkuwan ta ma seediq ta ka seediq Roma.” 49Ckceka daha hiya we niqan 1 seediq ngayan na we Kayapas. Paru msapuh knkawas ciida ka heya we rmengo dheya: “Yamu we ini namu kela ani maanu. 50Lnglungi bino, pririh kana seediq mhuqil ma so na uxe pkuuka ka kana qnlhangan ka 1 seediq. Niqan rrihan na yamu ka nii.” 51Kari na nii we uxe pneyah heya nanak. Ado mparu msapuh knkawas ciida ka heya. Kiya ka kari pgeela rmengo ririh seediq nii mphuqil ka Yesu. 52Uxe wano seediq nii ka shuqil na. Psliun niya pskingal ka lqlaqi Utux Baro wada mkrehak. 53Peeyah ali ciida, mpprengo phuqil Yesu ka dheya.
54Kiya de ini ptuura mkkesa dseediq Yudaya ka Yesu da. Kiya de mlatac hiya mosa alang Eprayim kesun ga dxeral smdaling tadus brenux. Kiya de msuupu tnugsaan na meeniq hiya da.
55Smdaling ka smseman hrnasan seediq Yudaya. Berah smseman ciida mooda psbgurah dheya nanak ka hbaro seediq mosa Yerusalem pneyah bcbiciq alang. 56Kiya de migin Yesu ka dheya ma mpprengo mheyu nganguc Sapah Thmkuwan: “Hmuwa mesa ka lnglungan namu ho? Yaa uxe meeyah smseman ka Yesu ho?” 57Ciida, rmnengo kari ka dpusu msapuh ma seediq Parisay, nasi daha klaun ga inu ka Yesu de asi eyah tmgesa nhari ma qqeerac daha heya.
Voafantina amin'izao fotoana izao:
Yohane 11: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
