Yohane 10
10
Pnungalan Kari Tibu Miric Rudu
1“Bale ba rngage maku, ini oda rhengun mremux tibu miric ma mkaro peeyah icil we kika mpgeeguy ma mpgeeluk gmeeguy. 2Moda rhengun mremux we kika mtabu miric. 3Mpqlahang rhengun we sraguh na rhengun ka heya. Mbahang hrenang na ka miric uri. Spuyu na knkingal ngayan na mlawa miric na ma aadis na peeyah hiya. 4Bobo wada na pltadun ka miric na duma mpkeso berah daha ma mpsnegul heya ka miric. Ado klaun daha ka hrenang na han. 5Ini snegul seediq icil ma qdriqan daha. Ado ini daha klai ka hrenang na han.” 6Yesu we srengo na dheya ka pnungalan kari nii. Kiya de yaa maanu ka rnengo na we ini daha klai.
Malu Mtabu ka Yesu
7Maanu so kiya de rmengo dungal dheya ka Yesu: “Bale ba rngage maku. Yaku ka rhengun miric. 8Plaale kenan mneyah ka kana seediq we kika mpgeeguy ma mpgeeluk gmeeguy. Ini qbahang dheya ka miric. 9Yaku we rhengun. Ani ima mooda kenan mremux we mpkuudus. Mtduwa mtbrberih mremux ma mlatac, smdiyal speriq uqun. 10Meyah ka mpgeeluk gmeeguy we meyah gmeeguy, pphuqil, ma smeeliq. Meyah ku ka Yaku we aangal daha knuudus ka miric. Kiya de maha maangal sstenge bale.”
11“Yaku we malu ku ba mtabu miric. Malu mtabu miric we ririh miric na ka ssruwa na qmada knuudus na. 12Uxe malu mtabu miric ka seediq snduwan. Ado uxe nheya ka miric. Kiya de taan na meyah ka huling bbuyu de laxan na ka miric ma qduriq da. Glekun huling bbuyu ka miric de wada na skrehak lmiwaq. 13Ado snduwan ka heya ma ini na psbgrnahi ka miric kika sqduriq na. 14Yaku we malu ku ba mtabu miric. Klaun mu ka miric mu. Mkela yaku ka miric mu uri. 15Mntena so Tama mu we mkela kenan. Yaku we mkela ku Tama mu uri. Kiya de ririh miric ka ssruwa mu qmada knuudus mu. 16Niqan ka duma miric mu uka tibu hini. Asi mu ka desun uri. Dheya we mpqbahang hrenang mu ma mmaha 1 rahul ma mmaha 1 nmtabu. 17So noda nii, Tama mu we gmalu yaku. Ado wada mu sqada ka knuudus mu ma ngngalun mu dungal. 18Uka ka gmeeluk knuudus mu. Yaku nanak ka qmada. Niqan ka pusu beyax mu qmada, niqan beyax mu uri ngalun mu dungal. So nii ka nangal mu pnosa kari Tama mu.”
19Kari nii ka stgdiyal daha seediq Yudaya dungal. 20Rmengo ka hbaro ckceka daha: “Ga sdooyun bgihur naqah ka heya ma nii mkuni! Ma ta lexun mbahang heya?” 21Rmengo ka duma daha: “Nii we uxe rnengo seediq ga sdooyun bgihur naqah. Mtduwa maanu rmaguh doriq mbudu ka bgihur naqah na peni?”
Sqada Seediq Yudaya
22Yerusalem ciida we smseman smqaras snlmean Sapah Thmkuwan. Misan ka ciida. 23Kiya de mkkesa sbesuk Selomoh Sapah Thmkuwan ka Yesu. 24Tmlibu tgqiri Yesu ka seediq Yudaya ma rmengo: “Maha nami betaq knuwan so su nii pgedang lhebun nami ho? Nasi su Kiristo ka isu we pklxani miyan rmengo.” 25Cmiyuk ka Yesu: “Wada ku rmengo yamu ma ini namu snhii. Mooda ngayan Tama mu ka qneepah mu we yaku ka spgkeela na. 26Kiya de ado ini namu snhii uxe namu miric mu ka yamu. 27Mbahang hrenang mu ka miric mu, mkela ku dheya uri. Smnegul kenan ka dheya. 28Sbege mu dheyaan uri ka uka psteqan knuudus. Ani betaq knuwan uxe mpgedang ka dheya. Ani ima uxe daha glekun peeyah baga mu ka dheya. 29Mgkala ani maanu knparu ka bnege Tama mu. Ani ima uxe daha glekun peeyah baga mu ka dheya. 30Yaku ma Tama mu we ida miyan 1 ba.”
31Maangal btunux dungal ka seediq Yudaya satang daha ccebu heya. 32Rmengo dheya ka Yesu: “Egu ba malu qneepah peeyah Tama ka wada mu spqita yamu. Tgiinu ka ccebu namu btunux kenan ho?” 33Cmiyuk heya ka seediq Yudaya: “Cmebu miyan btunux sunan we uxe malu qneepah su, pqluqah su Utux Baro! Ado ani su seediq ka isu we ngalan su Utux Baro ka isu!” 34Cmiyuk ka Yesu: “Uxe ga spatis gaya pndakar namu hiya ‘Yamu we duutux baro mnesa ku rmengo’ peni? 35Ini tduwa laxun ka kari Utux Baro. Nasi so mnangal kari Utux Baro, Utux Baro we duutux baro kesun na tmngayan ka dheya. 36So kiya de, pnsnakan mrtaso Tama ma snkgulan na meyah bobo dxeral, kiya ka rmnengo ‘Yaku we laqi ku Utux Baro’ we, gaga namu kesun ‘Rmnengo su kari smngayan’ nana ho? 37Nasi ku ini qeepah qpahun Tama mu we iya snhii kenan. 38Kiya de nasi ku qmeepah qpahun na ge, ani namu ini snhii kenan we snhii ka qneepah mu. Kiya de meeniq kenan ka Tama mu ma meeniq ku tama ka yaku we so namu maha klaun” kesun na. 39Maanu so kiya de satang mqerak dungal heya ka seediq Yudaya. Kiya de wada asi osa peeyah baga daha ka Yesu.
40Kiya de Yesu we mosa pnllayan ptgaya smino Yohane sipo yayung Yarden ma meeniq hiya da. 41Hbaro seediq meyah migin heya ma rmengo: “Ini qeepah ani maanu pnskraya ka Yohane. Kiya de quri rnengo na kana ka seediq nii, bale ba mesa ka Yohane” 42Kiya de snhii Yesu ka hbaro seediq.
Voafantina amin'izao fotoana izao:
Yohane 10: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
