PUDUT 15
15
Pejani' Allah Idi Abram
1Pangeh ineh, bala Tuhan nacing kuan Abram bang aceh luk sinierneh. “Aleg iko matot, Abram, ngaceku Ui luk utapmu. Idi rayeh tu tabparmu.”
2Idi kebala Abram, “O Tuhan Allah, anunké ulek tabparMu kuanku, ngaceku ui na anak? Idi Elieser lun Damsik ineh luk ngalap binawehku. 3Idi Iko na nemaré anak kuanku, iamo' seburur demulunku luk miak ngalap amung-amung luk ui kuan.”
4Idi teh, kebala Tuhan neneh, “Demulun ineh na miak ngalap binawehmu, iamo' anak bururmu sebuleng luk ngalap ineh.” 5#Rum 4.18; Ibr 11.12 Idi Tuhan nenguit neneh remuat idi nepebala, “Tengook iko déi' langit, ngiap amung-amung gituen, kudeng iko miak ngiap amung-amungdeh. Kudeng ineh teh inulmu.”
6 #
Rum 4.3; Gal 3.6; Yak 2.23 Idi Abram manu ku bala Tuhan, idi ineh luk bila Tuhan mangun ku luk matu kuanneh.
7Idi kebala Tuhan neneh, “Ui ini Tuhan luk nenated namu remuat rat bang bawang Ur Kasdim, pad maré tana' ini ku babpatmu ruked-ruked.”
8Idi kebala Abram, “O Tuhan Allah, kudeng apehké ui kali' tana' ini mangun ku babpatku ruked-ruked?”
9Idi kebala Tuhan neneh, “Do' nguit kuanKu sebuleng sapi' tineh, sebuleng amék tineh teh, sebuleng dumba deléi luk teluh lak ulunneh, idi suit sukur sebuleng, idi sebuleng anak suit limun.” 10Idi Abram nenguit amung ineh, idi ieh nengupa nedeh dueh babpat, idi nengerareng nedeh dueh babpat teh; iamo' na ieh nengupa suit ineh. 11Idi suit-suit kanui netemurun pa luun luk kirat ineh, idi Abram nengusu nedeh.
12Kareb macep aco, idi Abram nerudap, idi nacing aceh gagap idi tot luk rayeh neneh. 13#Pur 1.1–14; Kek 7.6 Idi kebala Tuhan ni Abram, “Inulmu ineh miak mangun ku lun sakai bang bawang dulun. Idi ideh miak mangun ku demulun lun bang bawang ineh, idi ruendeh ngedereh apat ngeratu lak kinioneh. 14#Pur 12.40–41; Kek 7.7 Iamo' Ui miak ngukum pupu luk naban nedeh ineh pad inulmu miak remuat dengan binaweh luk mula'. 15Idi iko miak maté dengan awang; idi iko tinamen kareb petap ulunmu. 16Idi inulmu luk keapat miak lemubed amé' tungé', ngaceku dat lun Amori ineh luk amé' mula', pad Ui miak ngukum nedeh muci.”
17Kareb aco pangeh macep, idi dacem pana' macing, idi inan aceh su luk inan apui luk merabpun, idi aceh sesakan luk mebudung nengelaba uned amung-amung luk kirat ineh peh. 18#Kek 7.5 Idi bang aco sineh teh Tuhan nepejani' ni Abram, kebalaNeh, “Ui pejani' maré tana' ini kuan inulmu, ieh ineh rat lakan Masir macing déi' Abpa' Pirat, 19su luk inan lun Keni, lun Kenisi, lun Kadmoni, 20lun Hiti, lun Prisi, lun Repaim, 21lun Amori, lun Kanaani, lun Girgasi, idi lun Yebusi.
Voafantina amin'izao fotoana izao:
PUDUT 15: BLD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
BALA LUK DO' Lun Bawang Bible © The Bible Society of Malaysia 1982, Second Edition 1998.