Luka 23
23
Yesu i geerá Pilato
(Mt 27:1-2, 11-14; Mk 15:1-5; Yn 18:28-38)
1Boo/aay sleémeero iri sihhiít, Yesu kuri huúw ay dír Pilato. 2Kuri sakwasleemuút ta kaahi, “Heewí una araán iwa xooroorén sageqwaaremisi, asma i múk ila/án oo koódír hanmiís dír waawutmoó múk Rumi, slám i kaahi, ‘Aníng a Kristo, waawutmo.’”
3Pilato guri yaahaás, iri oó', “Kuúng an waawutmoó múk Yahudíro?”
Yesu iri oó', “A adoosíng kuúng ta kat.”
4Pilato geeraharuusér uren ar saalíngw múk Yahudi nee boo/aay giri báy, “Aníng gár heewí ngus sakwasleemuut a ara'araaká.”
5Inooín tari ló'wa buúhh axweesanto, ta kaahi, “Inós i tlaahhír qamín dír muko ar intsaahhatimisuuwós, iimír Galilaya ay Yudea sleémeero ay amoorí.”
Yesu i geerá Herode
6Pilato adoodá' ngiwa axaás iri oó', “Heewí a heé yaamaá Galilayáro?” 7Nee ngiwa tsaáhh gídaabá amór i dahhi a amór yaamaá waawuti'iimár Herode, guri waarahhaás amór Herode. Asma Herode sleeme deeloodae i baraá Yerusalemúr i dirii'. 8Herode Yesu nguwa ár, iri ló'wa qwalaá/, asma guna artá wa slaá' iimír deelór yaarire, asma iidíguú yaariír gwa axamaamiís daanduú Yesuwo. Nee tlehhmuú waa/oo/amo oo Yesu i tleehhi guna haraxuú'. 9Herode yaahamisuú yaariír guri yaahamiís, ala Yesu gár aa oó' i káhh. 10Geeraharuusér uren ar saalíngw múk Yahudi nee intsaahhatuusér hara'ayár Musa tari sihhiít, kuri sakwasleemuút ar /ayma'aá xaraaslá'. 11Herode nee askaárirós Yesu kuri waaqaqaá' kuri niqimís. Kuri inqwaarír hhoohhoó' i tsiitiís, kuri ki/ís amór Pilato. 12Nee iimír baldá' Herode nee Pilato mulqi'iima iri tleehharút, asma inooín geeraawo a múk ta wakawaak.
Kwasleemár Yesu kuwa gaasi
(Mt 27:15-26; Mk 15:6-15; Yn 18:39—19:16)
13Pilato geeraharuusér uren ar saalíngw múk Yahudi nee geeraharuusér múk Yahudi nee muu giri burumbuúr, 14giri báy, “Heewí nguna dir'eén i hubé' as gídaabá iwa múk sageqwaaremisi. Aníng una yaahamiís dír geeraahúng wa ale, ala án dakuúsár ni ara'ar baraá muruuwí kuwa sakwasleemuta' i káhh. 15Tam Herode sleeme dakuúsár aa ár i káhh, asma ngwa ki/ís amor'eén i alé. Gár gwa'arár wa hariim ar aa tleéhh i káhh. 16Ala gawaá adoorihe án u muúx, ngway gweér.”
[ 17Pilato adoorí gana oó', asma inós gár kuwa hariím deelór ure ar Pasakuwo, a heé wák gun gweer oo taa tseék.]
18Sleémeero tari tseeamín tari káh, “Heewí hingeeseek, nee Baraba na gweerang.” 19Baraba inós a heé serikaáli gaa sii', nee tam tlaahhi gari qaás baraá gixsár wa aleeró, nee muu guri tsuú/. Gawaá adoorihe inós kuri tseék.
20Pilato iri malé ilawaáts dír múk i alé, asma iwa Yésú gweerár wa slai. 21Ala muu iri tsimahhuús tari káh, “Kikiieek gawaá msalaába. Kikiieek gawaá msalaába.”
22Pilato giri i axweés malé alé sagaáwa tame, iri oó', “Asma milá? Heewí tlakweemaá aa tleéhh a milá? Aníng gár gwa'arár wa hariim aga ariiká gawaá heewihe. Gawaá adoorihe aníng muxtaaro bura hhe'eés, u gweér.”
23Ala tana tseeamín ar afór ur ló'wa ale ta kaahi, “Kikiieek gawaá msalaába.” Afor'ín tidá' iri baaliín. 24Pilato Yesu guri sakwasleemuút ar adoodá' inooín ta slai. 25Kudá' ta slai guri gweér dir'ín i alé, kudá' taa tseék as tlaahhi nee tsu/uta. Ala Yesu guri dir'ín i haniís as adoodá' kur slai kawa tleehhi.
Yesu kuwa kikií' gawaá msalaába
(Mt 27:32-44; Mk 15:21-32; Yn 19:17-27)
26Yesu kurir tláy, heeko ta babay Simoni nee inooín tari doogiyé'. Inós a heé yaamaá Kirene. Inós i aykwá daahh, i baraá gixsár káy. Kuri óh, kuri msalaábár i tsa/aás as ngiwa gagaari alaá Yesú wa ale.
27Boo/oó úr oo muu guri aluú wa eehaár. Baraá tla/angw'ine /ameenarka i deer ar inós gu al/aa/amiim. 28Yesu /ameenadá' gari i warqáy gari báy, “Aá /ameenár Yerusalému, aníng mi al/aa/amiimara'. Ala kuungá' kiloohúng ti al/aa/amiinde', nee na/'iihúng. 29Asma deelo i hardát ar tawa ooi, ‘Múk amohhoó' a /ameenadár kampeéraay, tidá' aa laqwaliká, nee ar aa du'umisiká.’ 30Nee qoomaadae muu tlom'i gi bay, ‘Atén ti i hue',’ nee dindirma' kay bay, ‘Atén ti tuntuke'.’ 31Asma muruuwí burkuna tleéhh dír xa'anoó naá/ i alé, xáy, dír xa'anoó kaahaare gár ta may?”
32Yesu nee múk hatlá' tsár oo tlakuuse kiri alhuúw, as kiwa kiki'in. 33Nee tawa hardáh dirka ta babay “Fartá saga”, Yesu nee mukduú tlakuuse kiri alkiki'ín, oo wák dákw doó /iyáy nee kuqá' dákw doó basáy. 34Yesu iri oó', “Baabá, gurtlaweek, asma ar i tlehhiitiya' ngi xuiaaká.”
Tlabaawós kiri kilooín qasmiís ar loohír adór mugú'. 35Nee muu i didá' wa sihhimiit as tidá' tleehharuumiit ngiwa ga/ay. Mukdá' urén Yesu guri niqimís ta kaahi, “Muu guna ba/amiimís, nee inós ti kilós ba/amisi, inós bar Krístó Munguhe, kudá' taa tsawaár nee Mungú.”
36Askaári sleeme guna niqimís, guri harasáp, guri ma'aá qarqaár i hanís, awa taa tsoó/ gawaá na/'aá sabiíbuú wa ale. 37Kuri babáy, “Kuúng barnaxes a waawutmoó múk Yahudiro, ti ba/amis kilók alé.”
38Nee gawaá msalaábarose /aymi'iiká' kina gawaadí gooín, “Heewí a waawutmoó múk Yahudi.”
39Nee oo wák baraá tlakuuseedae Yesu gway /ooslín, iri káh, “Kuúng a Kristówoóke? Ti kilók ba/amis, nee atene.”
40Ala heedaáduú tsár nee inós taa alkikií' guri iigahhaát iri oó', “Kuúng tam Mungú u ilaiwawa/akáhe? Nee kuúnguú kilá' a baraá sakwasleemadár kilá' i dirí'. 41Asma sakwasleemarí atene a hariima. Asma tí taa slawaán a tidá' atén wa hariim asma tlehhemi'iirén. Ala kwí gár tlaakw aa tleéhh i káhh.” 42Tí ooaro ngiwa hhe'eés, iri oó', “Yésu, án inslawáng qoomár bara dát baraá waawuti'iimarók.”
43Yesu iri oó', “Án a kah, laarír kilá' án nee kuúng a al dinkwa didár amohhooaro.”
Gwa'arár Yesu
(Mt 27:45-56; Mk 15:33-41; Yn 19:28-30)
44Qoomár looár lahhoó' iwa xeér, yaamu sleémeero niri giwiyé' ay looár gwaleél. 45Tsee/amá gwa/atamaaye gari máy. Inqwaarír baraá Doó Mungú, ar do' gwa qasis, iri tla/a feehhít. 46Yesu iri tseé' ar afór ur, iri oó', “Baabá, qeeruueé' ngu dabaawók i qaás.” /Aymi'iiká' ooaro ngiwa hhe'eés, iri tsatiít.
47Nee geeraharusmoó askaári adoodá' ngiwa ár, Mungú guri xirfayeemiís iri oó', “Ar ló', heewí a heé gan'amuú koóm.”
48Múk yaariír aa didí burumburiít as tidá' tleehharuumiit kawa ga/ay. Nee tidá' aa tleehharuut kawa ár, tari waátl, ta hara da/ewer'ín pupuxuumiis as gurhaami. 49/Ameenadá' nee inós ti alkoomá' iimír Galilayár wa ale, nee kudá' sleémeero nee inós ti xuá', ta sihhimiit amorqá' saáw wa ale, muruuwí sleémeero kuri ga/áy.
Foolár Yesu
(Mt 27:57-61; Mk 15:42-47; Yn 19:38-42)
50Nee heeko wák i deer, umuuwós a Yosefu. Inós a heé hhoó' oo gan'amuú koóm. Inós a heé wák oo doó kwasleema, 51ala axweesanay'ín kudá' taa tsaát nee tlehhemuuín gwaa ya/aniká. Inós a heé yaamaá Arimataya, gixsár wák ar múk Yahudi. Nee inós waawuti'iimár Mungú gan daamaarán. 52Heewí ina daqáy dír Pilato as slaqwtá Yesu ngiwa slay. 53Slaqwtadá' gari aweeriís, gari untsuús ar inqwaarír /awaak, gari qaás baraá baa'ár taa baraá tlaa/ár i foól, ar taa baloó tuuaár i qaasiiká. 54Nee deeloodá' a deelór tiwa amohhe'eemisiya', asma looaytleérós a deelór hungu/uma.
55/Ameenadá' nee Yesu ti al koomá' iimír Galilayár wa aleeró, tari eeharín, /aanta kari ár nee adór slaqwtá Yesu kara qaás baraá /aantár i alé. 56Tari waátl, mooyaangw kuri amohhe'eés nee di/i.
Nee bál deelór hungu/umaawo tari iwiwiít, adoodá' kara hara'ayín.
Voafantina amin'izao fotoana izao:
Luka 23: IQWNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Iraqw New Testament © Bible Society of Tanzania, 1977.
