Matyê Mətû məno
Mətû məno
Pə́ fúŋ ŋwaʼa yi Matyê lə ŋwaʼá lə̂ ndághʼ ńtsətə́ Nkəʉ Shʉʼʉ Yěso Kəlísto, ńjwó, mə́i a lə tsuŋtə́ mətû məno cər ye ŋwaʼa pə́ ghíʼ Máakúsʉ lə tsûŋtə́ yé.
A lâʼ yé no lə̂ nkəʉ yi Jâŋ Mbaptísʉ lə tsətə́ (3.1-12).
Ə́ nkə́ ncí ndáʼ yé no ńté ghíʼ Yěso lə pfú nci, tə mbaa ńté ghíʼ Sə́tə lə kwaʼtə́ Yěso (3.13–4.11).
Ə́ ntó ńdáʼ no lə̂ məfaʼ mi Yěso lə fǎʼ cər ngoŋ Galilêi, ghíʼ a lə tsətə́ Nkəʉ Shʉʼʉ wó, ə́ njyéʼ mənou pye zə̂u, tə mbaa ghíʼ a lə ghʉ̌ pəghou shwítə (4.12–18.35).
Ə́ ndáʼ no ńté ghíʼ Yěso lə pə́ ndə́r lə̂ Yelúsalêm lə̂ njwó ngwôʼ (19.20).
Ə́ nkə́ ncí ndáʼ no ńté ghíʼ Yěso kə kə́u wó ə́ ncʉ́ʼ ngʉ́ pə́ leʼé ndwuŋ, ngap lâʼ ghí mě, pə́ tághʼ ńgó pə́ wo jwí yé. Â ghʉ́ nzʉ́ʉ lə̂ ləwʉ̂, lə́ mə́i pə́ laa kə́ yáa njwó yə́rə́, a pou ŋáa ŋə́i ńgʉ̌ pə́ jwô yé (21.28).
Matyê cʉ̌ʼ lə̂ njí ŋwaʼa yé, ə́ tsə̌mbi ndáʼ no lə́ ləsǎʼ gháʼate, ńdáʼ tə fú lə́ Ábələhâm ə́ ngwo ńkə́u lə́ Yěso, nkə́ ncí ndáʼ no ghíʼ pə́ lə jí Yěso, mbaa ńté ghíʼ a lə ghúʼ təcər pəfə̌r pé (Kəm 1-2). Matyê lâʼ no lə́ ləsǎʼ Yěso ndaghʼ ńgʉ́ ghíʼ pə́ wo pə́ fûŋ Nkəʉ Shʉʼʉ lə̂ mbə̂u yi a lə ŋwaʼá yé, ə́ lǎghʼ jí ŋuu yi Yěso pə̌ wěi. Ə́ wo lə̂ məno mi Matyê lǎʼ lə̂ Nkəʉ Shʉʼʉ, a laghʼ ńgʉ̂ pə́ jî ńgó Yěso Fou, ḿbə́ Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́ mbó pye-mə́soŋ. Yěso kə̂ ncí mbə́ Emányuwêl, ə́ ndaghʼ ńdâʼ ngô: «Ə Sê pə́ nou paghʼə.» Ə́ pə̂ zə̂u yi pə́ lə ŋwaʼá cər Ndwuŋu kaa lə wo mbəutə́ lə́ zʉ́. Ə́ pə́ cər ŋwaʼa Matyê, a cʉ̂ʼ lə̂ njwó Ləfou Sê* ghíʼ pəcó pye, ə́ ndǎʼ yé pə́ ńgó Ləfou Sê pə́ tʉ̌-lə́pû. Paghʼ lə pə́ nkêʼtə wo ŋwaʼa, ńdǎʼ pə́ ńgó Ləfou Sê*.
Ə zə̂u yi Matyê lə ghʉ̌ cər ŋwaʼa yé tə ə́ pə̂ yé ləiʼi, ə́ pə́ ghíʼ a lə kəitə lələʉ məno mi Yěso lə jyêʼ pye, ə́ pə̂ mbôŋ gháʼate, ə́ ŋwaʼá lə̂ məsʉ̂ mə́ntaa.
1) A pə́ lə́ nduŋ-mbi sʉ̂, ə́ ŋwaʼá zə̂u yi Yěso lə kóʼ ńnyáŋ ndəu ləkôr mboŋə́ jyéʼ pye (Kəm 5-7). Yo zə̂u leʼtə lənyâŋ yi lə́nə́ʉ yi, ə́ pə́ ńtúŋu ńgó pye pi gháp wo kə́u cər no Ləfou Sê tʉ̌-lə́pû, gháp wo ghwǒ.
2) Ə́ ngwǒ lə̂ sʉ̂ mbâatə pwô, a ŋwáʼa zə̂u yi ə́ nâŋtə pye pi gháp ghwǒ lə̂ ngwó ndeʼtə́ ghíʼ no Ləfou Sê* ghʉ̌ pə́ yə́rə́ (Kəm 10).
3) Matyê wô lə̂ sʉ̂ mbâatə tárə́, ə́ ŋwaʼá pəsaghʼ-ləghaa saambwô pi Yěso lə laghʼ ńjyêʼ pye zə̂u yi ə́ pə́ ləlwǒ lə̂ no Ləfou Sê*. Yo no ləfou ə́ pə́ leʼé wo káa pə pə́ njwô yé lə̂ nyôghʼ lə́ ə́ ghʉ̌ cʉ́ʼ lə̂ nkwár mənyôghʼ pye, ə́ kwǎr tə lə́u pə́ póu ntúŋú yé túŋú po.
4) Ə́ pə́ lə̂ sʉ̂ mbâatə ləkwo, Matyê ŋwáʼa zə̂u yi Yěso lə lǎghʼ ńjyéʼ pye ghíʼ pəfə̌r pəfə̌r ghwǒ lə̂ ndághʼ ńnyáŋ yə́rə́, cər wo ngoŋ yi shwî, yi ə́ laghʼ ḿbə̂ Ləfou Sê* (Kəm 18).
5) Ə́ ncʉ́ʼ lə̂ ndyə́ghʼtə́ lə̂ sʉ̂ mbâatə taa, ə́ ŋwaʼá zə̂u yi Yěso lə lǎghʼ ńjyéʼ pye mbə̂u pə́ wo lǎghʼ zʉ́ʼtə́ ghíʼ no ləfou yé táa kwǎr tə̂ʉ yə́rə́ (Kəm 24-25).
Ə́ pə́ lə́ wo ŋwaʼa yi Matyê lə ŋwaʼá ńdághʼ ńtsətə́ Nkəʉ Shʉʼʉ lo, pə́ fûŋ ńzúʼ Yěso pə̂ cícye yi zʉ́ lə́ tô ńnyárə laŋə́-ndə̂u lə̂ ndêi mə́u, ə́ ngwǒ cər ngoŋ yi shwî. Yěso lə̂ kə̌ ḿbə́ ŋuu yi a pə̌ jyêʼ pye zə̂u yi ə́ pə́ ńtúŋu mbó pye pi gháp kǒŋ lə̂ nkə́u cər yo ləfou, yə́rə́, ńjí ńgó gháp wo ndeʼtə́ pəcó pye zə̂u yi gháp jí mə́u.
Voafantina amin'izao fotoana izao:
Matyê Mətû məno: NLA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra