Matyê 5
5
Yěso pə̌ ndeʼtə no ndʉʉ-mboŋ
(Mks 3.13; Lks 6.12-13,20)
1Yěso jwô ghíʼ mənou lâʼ tô, ə́ nkóʼ ndəu ləkôr, ə́ nyáŋ sê, ngaŋə-jyêʼ-no* yé tô ńkwátə́ yé. 2A jî lə̂ njyéʼ gháp no Sê, ə́ mə́ ndâʼ ngô:
3«Pəndʉʉ-mboŋ ə̂ pye pi gháp pə́ njî ńgó gháp pə́ mbi Sê, káa kuʼ gháp có zə̂u;
ńté no gháp táa zʉ́ pəi Ləfou Sê*. 4Pəndʉʉ-mboŋ, ə̂ pye pi gháp pə́ ngeʼtə́,
ńté no Sê ghʉ̌ zǎghʼ nci nyôghʼ gháp! 5Pəndʉʉ-mboŋ ə̂ pəghaŋə mbwórə,
ńté no gháp ghʉ̌ zʉ́ ngoŋ yi Sê kə ghʉ̌ ndaʼá mə́u lə̂ ŋə́ lə́ pye pé!
6Pəndʉʉ-mboŋ ə̂ pye pi gháp fú mə́ ntsâa lə̂ ngʉ́ zə̂u yi Sê pə̌ nkǒŋ zěi,
ńté no Sê wo ghʉ̌ gháp ghʉ́ zə̂u yi gháp tsáa lêi!
7Pəndʉʉ-mboŋ ə̂ pye pi gháp pə́ ntsâa məjʉ̂ŋ pəcó pye,
ńté no Sê táa tsáa məjʉ̂ŋ máp záp lə́wó!
8pəndʉʉ-mboŋ ə̂ pye pi kâa có kwaŋtə tə́poŋ pə̂ yé məntə̂ʉ páp,
ńté no gháp táa jwó Sê!
9Pəndʉʉ-mboŋ ə̂ pye pi gháp laghʼ pə̂ mbwórə ńtʉ̂ŋtə məno,
ńté no pə́ táa fúŋ gháp ńgó ghəpə́ Sê!
10Pəndʉʉ-mboŋ ə̂ pye pi pə́ pə́ ntyê gháp ńté no gháp pə́ ngʉ ghíʼ Sê pə̌ nkǒŋ,
ńté no gháp táa zʉ́ pəi Ləfou Sê*!
11Pêi pəndʉʉ-mboŋ mpfu yi pə́ pə́ nzoutə wéi, ə́ mə́ tyê wéi, ə́ mə́ nzápə sôu mbə̂u lə̂ mbə̂u tû pei ńté no pei tsə̌ʉ nzəm məŋ. 12Pə́ lə̌i mə́ ngʉ̂ yə́rə́ lə́ pei, pei tsêi. Ə́ nzǎp ḿbíŋ, ńté no Sê tsuŋtə tə́koʼ ntsoʼó-faʼ ə́ mə́ ndághʼ ńzʉ́ʼtə wéi. Pei yáa njí ńgó ə́ kə́ mbə́ pə̂ ndʉŋ-ndʉŋ yə́rə́ ghíʼ pə́ lə ghʉ̌ lə́ pətsətə́-nkəʉ Sê* pi ə́ lə pyə̌ghʼ ńtó, pei poŋə́ tô zéi.»
Ngwâŋ gháp nkeʼ
(Mks 9.50; 4.21; Lks 14.34-35)
13Pei lə̂ pə̌ ngwâŋ cər nzʉ̂. Ngwâŋ lə̌i mbə́ ghíʼi ə́ shə́rə́ tə ncʉ́ʼ ndə́pə ləpə́, pə́ pou ngʉ́ gháʼá mə́u tə ə́ kə̂ ncí ndə̂ʉ? Ə́ kə́ pǒu pfûtə yé lə̂ có zə̂u po, ə́ cʉ́ʼ túŋú pə́ lə̂ ncwə́r pěi, ə́ pə lâghʼ məku ńnyʉ̂ŋtə́.
14«Pei lə̂ pə̌ nkeʼ cər nzʉ̂. Pə́ lə̌i nkə́r túsoŋ ndəu ləkôr, ə́ lwo yé po. 15Káa pə póu mə́ cûʼ yé lâm, ə́ ndâghʼ ngwǒŋ ńkə́ptə́. Pə́ cûʼ lâm, ə́ ntâghʼ pə́ ndəu ləʼtə zěi, a kêʼ pye pə́tsəm pi ə́ pə́ ndə̂. 16Ə́ kə́ mbə́ lə́ pei ə́ mbə́ pə́ yə́rə́, nkeʼ yi ə pə́ lə́ pei ghwo lə̂ nkêʼ pye pə́tsəm. Ə̂ lêi yə́rə́, gháp jwó məno shʉʼʉ yi pei pə̌ ńgʉ̌, ə́ ngúʼtə́ Tə́ wei yi a wə́ tʉ̌-lə́pû.»
Ə no ləpə̌ʉ
17«Koo pei kwâŋ ńgó n nkə tó pə́ lə̂ mbə́ghʼ ləpə̌ʉ* Mə̌usə̂i kəʉ pə̂ no yi pətsətə́-nkəʉ Sê* lə lǎʼ mo! Ə́ ngə́, káa n nkə tô ghâa lə̂ mbə́ghʼ, n nkə tô pə́ lə̂ ngʉ́ pə́ tsuŋu nzúʼ zěi. 18Pei cʉ́ʼ n ndáʼ wéi, kwaʼ lə́nə́ʉ, ləfaŋ gháp ndesé lə̌i ndáʼ ncí tə nkə́u pə́ ghó, lə́u môu mələsaa, kəʉ pə́ môu məzə̂u ńgó pyerə́ cwî yé lə̂ ləpə̌ʉ po. Ə́ láʼ kə́ pə̂ pə́ yə́rə́ tə kə́u mpfu yi zə̂u tsəm yi ləpə̌ʉ* laʼ zêi pəutə́. 19Ə̂ zə̂u yi ə́ ghʉ̌, ŋuu yi a fǎa pə́ môu məyʉʼ lə̂ ləpə̌ʉ, ə́ mbou njyéʼ pəcó pye lə̂ ngʉ́ záp ghíʼ zʉ́, pə́ táa caghʼə́ ńŋə́ yé tə nzəm lə̂ no Ləfou Sê*. Ə́ mbǒu ngwó lə́ ŋuu yi a tǎghʼ ku mə́u, ə́ njyéʼ pəcó pye lə̂ ngʉ́ yə́rə́, pə́ táa ŋə́ yé tə mbi lə̂ no Ləfou Sê*. 20Ə̂ zə̂u yi ə́ ghʉ̌, m mə̌ ndâʼ lə́ pei ngô: Pei lə̌i ndə́iʼ tsúŋú kúʼtə́ ləpə̌ʉ* tə lěi pəkeʼtə́-lə́pə́ʉ Mə̌usə̂i* gháp pə pəfalísia* po, mə́i pei láʼ kə̂u wéi cər Ləfou Sê po.»
Ə ndôu lə̂ nyáŋ mbə́ tâʼ ntsʉ
(Mks 11.25; Lks 12.57-59)
21«Pei lə zúʼ ńgó pə́ lə lâʼ lə́ pəmə́ngâa-njʉʼ paghʼə ngô: “Koo ŋuu lâʼ njwí ŋuu, ə́ ndáʼ ńgó ŋuu lə̌i njwí ŋuu, mə́i pə́ wo lǎghʼ yé wǒ mbi feʼ-məno.” 22Lə́ məŋ ndâʼ zâa lə́ pei ngô: Ŋuu lə̌i nzáŋə́ lóŋ ńté fə̌r ye, pə́ ghwo lə̂ ndághʼ yé ńgwó mbi feʼ-məno. Ŋuu yi a lâʼ lə́ fə̌r ye ngô: “Ghəghəʉ!” pə́ ghwo lə̂ ndághʼ ngaŋ ńdə́r lə̂ mbi cûʼtə pəsǎʼ lâʼ. Ŋuu yi a fǔŋ fə̌r ye ngô: “Tə jǐ Sê!” A kûʼ ŋuu yi mboʼ Sê mâʼ yé cər mǒghʼ yi tə́ láʼ ncwí. 23Ə́ pə̂ yə́rə́, ŋuu lə̌i ndághʼ məzə̂u ńtó lənuŋú poʼ Sê lə̂ ŋə́ lə̂ Sê, ə́ nkʉ́ʉtə́ ńgó a kə fâa no mbó fə̌r ye, 24ngaŋ nyêr məzə̂u poʼ mé mêi yʉʼ wó, ə́ ngwo njwó fə̌r ye gháp zʉ́ myaghʼ zêi no, a poŋə́ pə̌ʉ nzəm ə́ ŋə́ məzə̂u poʼ mé mêi mbó Sê.»
25«Ŋuu lə̌i mə́ nkə̂ nzǒ mbó gho, pei zʉ́ pyér pə́ laŋə́-ndə̂u lə̂ ngwó mbi pəfěʼ-məno, o lôu məsʉ̂ tə pei zʉ́ myaghʼ sǎʼ; tə ə́ ndə́iʼ yə́rə́ po, mə́i o wo kə́u mbi tə́-ndə̂ pəfěʼ-məno, â cághʼə́ ghô ńŋə́ lə́ pəpáp ndə̂-tsâŋ, gháp wó mǎʼ ghô ndə̂ tsâŋ. 26Məŋ ntsuŋu ndâʼ ghô kwaʼ lə́nə́ʉ ńgó o láʼ ghǐ kwǎr tsâŋ, ə́ fú tʉ́ zə̂u tsəm yi pə́ pə́ nkə̂ ghô zěi tə có cwî yé po.»
Ə no məghap
(Mat 18.8-9; Mks 9.43,47-48)
27«Pei lə zúʼ ńgó pə́ lə lâʼ ngô: “Koo ŋuu lâʼ ngʉ́ məghap.” 28Lə́ məŋ ndâʼ lə́ pei ńgó ŋuu mbiŋə lə̌i náŋ məngyě ńtsáa ńgó mboʼ gháp zʉ́ nûŋ, a jî ńgó ə́ pə́ cər ntə̂ʉ zʉ́, mə́i a tə́i mə́ ndáʼ ngʉ́ məghap. 29Ləjôghʼ zô yi təʉ lə̌i mə́ ncʉ́ŋə́ ghô o fâa no, o kwárə zěi ḿméʼ ndǐ təsə lə́ gho. Mboŋə́ ghíʼ mboʼ cǒ tâʼ lə̂ məyʉʼ mbəʉ mô cwî, lə́ pə́ pou lə́u ndáʼ mâʼ yé ghô cər mǒghʼ yi tə́ láʼ ncwí po. 30Pô zô yi təʉ lə̌i mə́ ncʉ́ŋə́ ghô o fâa no, o zâʼ zěi ḿméʼ ndǐ təsə lə́ gho. Mboŋə́ ghíʼ mboʼ cǒ tâʼ lə́ məyʉʼ mbəʉ mô cwî, lə́ pə́ pou lə́u ndáʼ mâʼ yé ghô cər mǒghʼ yi tə́ láʼ ncwí po.»
Ə no məngyě gháp ndə̌u ye pi gháp sěi nzǒʼ
(Mat 19.7-9; Mks 10.11-12; Lks 16.18)
31«Pə lə kə́ ncí ndǎʼ ngô: “Ŋuu lə̌i mə́ ngwô nzǔŋ ngwě ye, a ŋə̂ ŋwaʼa yi a nyarə ńgó gháp zʉ́ sei lə́ zʉ́”. 32Lə́ məŋ, n ndâʼ lə́ pei ngô: Ŋuu lə̌i nzûŋ ngwě ye, tə́ ghó məngyě ghʉ məghap, mə́i a cʉ́ŋə́ mə́ gháʼá yé lə̂ ngʉ́ məghap. Ŋuu pôu nzóʼ məngyě yi ndə̌u ye zǔŋ yé, mə́i a ghʉ mə́ gháʼá məghap.»
Ə no lə̂ nkâa no
33«Pei lə kə́ ncí nzúʼ ńgó pə́ lə lâʼ lə́ pəmə́ngâa-njʉʼ pághʼə ngô: “Ŋuu lə̌i ndáʼ no tə ndághʼ ləjôghʼ Sê ńkǎa, ngaŋ ghʉ̂ zêi no.” 34Lə́, məŋ ndâʼ lə́ pei ngô: Koo pei lâʼ no tə nkâa; koo pei lâghʼ tʉ̌-lə́pû ńkǎa, ńté no ə̂ yʉʼ yi Sê nyâŋ wó. 35Koo pei lâghʼ ndesé ńkǎa, ńté no ə̂ yʉʼ yi Sê tâghʼ məku mé wó. Koo pei lâghʼ Yelúsalêm ńkâa, ńté no ə̂ túsoŋ fou yi njwǐ. 36Koo o pou ndághʼ tû zô ńkǎa, ńté no mboʼ o kûʼ ghô lə̂ ngʉ́ tâʼ lənyuŋu tû ghô fôghʼ kəʉ ngʉ́ ə́ shʉ̂ŋ po. 37Ńgó “ə̂ŋ” wei pə́ “ə̂ŋ”, “ə́ ngə́” wei pə̂ “ə́ ngə́”, ə yi pə́ kʉʼʉ mə́u cʉ́ʼ fû pə́ mbó Sə́tə.»
Ə no lə̂ mbʉ̂ŋ mbəu
38«Pei lə zúʼ ńgó pə́ lə lâʼ ngô: “Ŋuu lə̌i mbə̂ghʼ ləjôghʼ ŋuu, ngaŋ kə̂ mbə̂ghʼ yé lə́wó, ŋuu tsóʼ ləsoŋ ŋuu, ngaŋ kə̂ ntsôʼ yé yé lə́wó.” 39Lə́ məŋ ndâʼ lə́ pei ngô: Koo pei lâghʼ no tə́poŋ, ə́ mbʉ̂ŋ có. Ŋuu lə̌i sə́u ləfěi lə́ ndyəghʼə́ tû ghô yi təʉ, o shə́rə kwap ə́ nyárə́ a sə̂u. 40Ŋuu lə̌i mə́ ndôu mbútə́ ghô yʉʼ ləfěʼ məno lə̂ ndaghʼ ḿpfú ndǐ zô yi maʼá, o nâa nyér zěi gháp pə yi fwôghʼ lə́ zʉ́. 41Ŋuu lâghʼ təʉ ńfárə́ ghô ńgó ô khwôr pyeʼ, ə́ ndaghʼ ńŋə̂i no tâʼ kíləumítə lə̂ pfuʼ, a lâghʼ ŋə̂i no pəkíləumítə pə́tárə́. 42Ŋuu lə̌i ndóu ghô zə̂u, o ŋə̂ zěi lə́ zʉ́. Ŋuu lə̌i ndâʼ ńgó ô fó yé zə̂u, koo o lə̂ʼ.»
Ŋuu kôŋ ngaŋə-mbəu ye
43«Pei lə zúʼ ńgó pə́ lə lâʼ ngô: “Ŋuu kôŋ fə̌r ye, ə́ mbǎa ngaŋə-mbəu ye.” 44Lə́, məŋ ndâʼ lə́ pei ngô: Pei kôŋ pəghaŋə mbəu péi. [Pei sʉ́ʉtə́ Sê tû pye pi gháp ŋə̂ wéi ngwôʼ.] 45Pei lə̌i ngʉ́ yə́rə́, mə́i pei wo pə́ kwaʼ ghəpə́ Tə́ wei yi a pə̌ tʉ̌-lə́pû. Ńté ńgó a pə̌ ngʉ mə́nəu ye tə̂ lə́ pye tə́poŋ mbaa lə́ pye shʉʼʉ, ə́ mbou mə́ ngʉ̂ mbʉŋ lô lə́ pye pi gháp kûʼtə ləpə̌ʉ* yé mbaa lə́ pye pi káa gháp kûʼtə gháp zěi. 46Pei lə̌i mə́ nkôŋ pə́ ndaʼ pye pi gháp pə́ nkoŋ wéi, mə́i pə́ wo pǒu fə́tə́ wéi lə̂ hó? Pəpfǔ-ntsəp Pəlóma* kə́ mə́ ngʉ̂ záp pə́ yə́rə́. 47Pei lə̌i mə́ ntsêʼtə́ pə́ ndaʼ pəfə̌r péi, no shwî yi pei ghʉ̌ pə̂ zarə́? Pətəpə̌i-no Sê kə́ mə́ ngʉ̂ záp pə́ yə́rə́. 48Ghíʼ ə́ kə́ mbə́ yə́rə́ lə̂, pei pə́ pətə-lǒʼ*, ghíʼ Tə́ wei yi a pə́ tʉ̌-lə́pû pə̌ tə́ lǒʼ*.»
Voafantina amin'izao fotoana izao:
Matyê 5: NLA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
