Yaaya 9

Iisa rayyadda gimu ma ay koor̰ min wiyawti

1Meene kaƴi maa ga Iisa ƴelewɗo, ga gasse gimu butuuli ma ay koor̰ min wiyawti. 2Guu jobookeetee inniyya goo: «Garaawa! Ayme ga gimu keeke alɗo koor̰ min wiyawti? Ay min oko zunubgeetee maa ga leewe e, e ga min oko ku gayyeetee?»

3Gaa Iisa tiiliyyoo gaa: «Ay min oko zunubgeetee ɗa, o ga ay min oko ku gayyeetee ɗa. Koor̰uwti keeke, ay ku maa gu giimi ellicca gudiranti Mellayi maa ga leewa ma gaari ku ajjibiti. 4Ma paato ke gederra ke lubbiyya lubbiti oko gata ma n̰akamminoo. Aandoŋ pa asaa maa ga gimu alɗo gederra ɗa ga leeɗo ya lubbi kaƴi kulla. 5Maa na alɗo missa dunuune teete na ay bahaarane ta dunuune teete.»

6Maa ga Iisa beneyyiɗe goŋŋa pa, ga pise olo kiɗaati gaa lipiɗicca kiɗa taata, gaa doon̰iyyeeca iɗiitee oko koor̰r̰i. 7Gaa beneyyiyyee gaa: «Addo ki deeɗiy apila iɗiicam baale ta Silowe.» (Silowe pa goo ‘n̰aamo’.) Gaa koor̰ kaatiɗe, ga deeɗiy apila. Gaa maa ga yokowɗo, guu iɗiitee iyyiɗe saa pe caŋ. 8Guu bakeetee o giimi ma ellaa min omma maa gaa ŋarayya beneyyiɗe goo: «Ay gimu kee ɗa aɗe ma nowotte ga ŋarayɗo e?» 9Daare pa goo: «Ay gata aɗe.» Daare payya pa goo: «Ay gata ɗa, saabayyiya ka.» Gaa koor̰ pa tiiliyyoo gaa: «Ay naata saa pe.» 10Guu inniyya goo: «Iɗiicam iyye pe goo me?» 11Gaa tiiliyyoo gaa: «Gimu maa gu kolaa goo Iisa, ay gata, eeɗe kiɗa ma olootee gaa doon̰iyyawca iɗiitaw, gaa beneyyiyyaw gaa na addo baale ta Silowe na deeɗiy apila iɗiitaw. Naa kaatiɗe na deeɗiy apila, naa iyyiɗe saa pe.» 12Guu inniyya goo: «A gaa alɗo ŋa pe ga gimu kaaka?» Gaa tiiliyyoo gaa: «Na ibina ɗa.»

Pariziyennigee enaa koor̰ ma rayyide

13Guu asikki oko Pariziyennigeyyo miɗi ka omma kee ma ay koor̰. 14Caŋ gii meene maa ga Iisa lipiɗiɗe kiɗa ma olootee gaa doon̰iyyeeca oko koor̰r̰i, gaa iyyiyyeegu iɗiitee, ay meene ta nambiti. 15Ay kaaka appe, gu Pariziyennigee kulla ta kayco inniyya miɗi goo gu iɗiitee iyye goo me? Gaa miiɗi tiiliyyoo gaa: «Gata doon̰iyaw kiɗa ta lipiɗenta iɗiitaw, naa deeɗiy apila, gaa haŋka pa na elelɗo.» 16Guu daare min aacco beneyɗo goo: «Miiɗi ma leyya liyaw keeke asaa ɗa min Mellayi asan ga jobokkay ɗa hukumnigee ku meene ta nambiti.» Daare pa goo: «A gimu ma leewa zunubgee pa, gederra aɗɗe ga leeɗo garaawi ku ajjibiti aleŋ kooko?» Gii alɗiyo gala ɗa payya aacco. 17Guu inniyya payya koor̰ ma rayyide goo: «A kii pa, kii me pe ma gaartee oko gimu ma iyyamgu iɗiicam keeke?» Gaa tiiliyyoo gaa: «Ay nabiinice.»

18Oko keeke pa, gu taattuweeco Yawudigeyyo oyye ɗa kadar ga miiɗi keeke ay koor̰ min omma, gaa haŋka pa ga elelɗo caŋ caŋ. Ay ɗakko appe gu kolliɗiy gayyeetee, gu asiɗiy inna goo: 19«Ay ma tirta aɗe ga keeke ay runtoŋ ma kuu ga wiyenta saa koor̰ e? A haŋka pa goo me pe ƴa ga elelɗo?» 20Guu gayyeetee tiiliyyoo goo: «Ni ibinya kadar ga ay runtini aɗe, o min maa ni weeɗiya ga ay koor̰. 21Innasoopa, ni ibinya ɗa latta ma deero ga elelɗo haŋka, o ni ibinya ɗa kulla gimu ma rayyidiya. Innoŋga, gata kulla ay miica ɗa payya, gederra ga tiilittoŋ.» 22Gayyeetee pa beneyye goŋŋa, asan gu ɓayakka ta kayyeeco min taattuweeco Yawudigeyyo. Caŋ guu taattuweeco Yawudigeyyo guta pa, boode paaɗe ma ka pittico giimi ma oyye kadar ga Iisa ay Masi, gata maa ga Mella aparre, min aatti ger ka giraaniti. 23Ay ɗakko appe gu gayyeetee beneyyiɗe goo: «Gata ay miica ɗa payya, gederra ga tiilittoŋ ga gata ma kayaati! Innoŋga.»

24Guu Pariziyennigee jooriyya payya miiɗi ma ay koor̰ kee min omma, guu inniyya goo: «Beneyyu ma Mella kadar ki beneyyaca seene. Nii, gaa oko kantini ka, ga miiɗi ma rayyidum keeke leewa zunubgee.» 25Gaa tiiliɗe gaa: «Na ibina ɗa, baŋ ga leewa zunubgee e, e baŋ ga leewa ɗa. Innasoopa, ga maa na ibina keeke, ga naa ay koor̰, ga haŋka pa, na elelɗo caŋ caŋ.» 26Guu inniyya goo: «Leyyam ini me? Iyyamgu iɗiicam gaa me?» 27Gaa tiiliyyoo gaa: «Naa beneyyitoŋ appe, kuu alɗiya icca ɗa beneytu. Ayme ku enewɗino payya? Ku aŋka kulla ku deeɗo jobookeetee e?»

28Maa gu giyyiyya beneyti kaaka, guu n̰iliyya goo: «Ay kii ma ay jobookati. Nii, ay jobookeetee Muusa. 29Ni lekka kabarre kadar ga Mella beneyyiyee oko Muusa, Iisa kaaka soopa, ni ibinya ɗa baŋ ga asaa min taŋaa.» 30Gaa miiɗi tiiliyyoo gaa: «Beneytoŋ keeke ay ka ajjibiti! Miiɗi ma iyyawgu iɗiitaw keeke, kuu ku ibinya ɗa baŋ ga ay ka taŋaa? A naa soopa, ga iyyawgu iɗiitaw. 31Ke lekka kabarre kadar ga Mella geeway ɗa giimi ma leewa zunubgee, ma leewaa kanti maa ga aŋka soopa o gu bakammiya kanti, ga geeway. 32Ke giyye ɗa kaytiŋ gimu ma iyye koor̰ min wiyawti. 33Gaa gimu keeke asaa ɗa min Mellayi, ga gederra ɗa ga leeɗo maatiki.» 34Guu tiiliyyee goo: «Ki ɗa pe maa gu weewum aacco zunubgeyyo, kii aŋkiɗo ki ɓeldinni ma gaari?» Guu pittiyya renta min aatti ger ka giraaniti.

Giimi ma ibinya butulti Mellayi

35Maa ga Iisa giyyiɗe kadar gu pittiyya renta koor̰ kee maa ga rayyide, ga kaate ga deeɗiya diyya. Gaa gassiyya, gaa beneyyiyyee gaa: «Ki dowwaca aɗe galbancum oko Runti Gimi?» 36Gaa tiiliyyee gaa: «Tattuwe, gata ay we? Gaarawga ɗe Runti Gimi, naa duwicca galbantu oko gata.» 37Gaa Iisa beneyyiyyee gaa: «Ay maa ki ella keeke appe ma beneyyam haŋka.» 38Gaa miiɗi beneyyiyee gaa: «Miltu, na duwca galbantu oko kii.» Gaa darsiɗe unti Iisa.

39Gaa Iisa beneyyiɗe gaa: «Latta ma asawwikinoo iŋee dunuune teete ay maa na asiɗiy ɗedda giimi durgee seera. Gu ma ay koor̰ee ƴa iyyiɗo gu elelɗo, guu ma leewe goo gu ella pa koor̰uwɗo.» 40Guu lekkiɗo Pariziyennigee daare ma aaye saripti Iisa. Maa gu giyyiyya beneyti kaaka guu inniya goo: «A nii pa, ay koor̰ee kulla e?» 41Gaa Iisa tiiliyyoo gaa: «Kuu alɗo koor̰ee, gu gaari marakkatoŋ ɗa kayyeetoŋ. A maa ku lewɗe soopa kuu ku ella, gu gaari marakkatoŋ.»

Voafantina amin'izao fotoana izao:

Yaaya 9: mmy

Asongadina

Hizara

Dika mitovy