Yaaya 5

Iisa rayyadda gimu ma ay ruŋguyne

1Maa gu gaari kooko ƴiiliɗe, gii lekkiɗo laalanco Yawudigeyyo kaƴi aɗe maa gu leeca. Wikinne kaaka pa, ga Iisa kulla katee geegar ka Zerizalem laalanti. 2Gaa geegar kaaka lekkiɗo biití burgo, maa gu kolaa goo ‘Burgo ta Tameyyo’. Sariptí burgo taata pa, lekka tepirane ka geewenta maa gu kolaa goo Betzata ma beneyco Ebireenigeyyo#5.2 Seme ku Betzata kooko pa goo ‘Ger ka kawiyti’., ma lekka zubiŋgee beeƴa saripti. 3-4Guu lekkiɗo giimi maani ma parayya, ma ay koor̰ee, o ma ay mugulee, o ma ay ruŋguygee ma oƴee aɗicco zubiŋgee kotti.

5Gaa min aacco giimi kotti ma parayya ga lekkiɗo gimu kaƴi ma lekka ƴilaakee orooruwee subba o poppoɗi ma parayyi. 6Maa ga Iisa asiɗe iŋaa, gaa elliyya miiɗi kaaka ma oƴee. Gaa leeɗe kabarre kadar ga parayti kaaka domokkiyee. Gaa inniyya gaa: «Ki aŋka aɗe rayyido?» 7Gaa paraaya tiiliyyee gaa: «Miiɗi, na lekka ɗa gimu ma ɗolaano tepiraniyyi wikinne maa guu ammi wisse. Maa naa cokke naa na kataa na deeɗo ɗoola pa, ga gimu kaƴi omokkaw saa ɗooliti.» 8Gaa Iisa beneyyiyyee gaa: «Wacu! Iccicca birisancum, kii tan̰n̰iɗo!» 9Gaa kaytiŋ ka ga gimu kaaka rayyidiɗe. Gaa waciɗe partakan̰, ga iccicca birsanti ga tan̰n̰iɗe.

Caŋ gii meene taata pa maa ga rayyidiɗe, ay meene ta nambiti. 10Ay ɗakko appe, ga maa gu taattuweeco Yawudigeyyo elliyya gimu ma ga Iisa rayyide kaaka, gu beneyyiyee goo: «Meente ay meene ta nambiti. Ki lekka ɗa botol maa ki goyyicca birisancum, asan gu hukumnigeetine oyowwiya ɗa liyaw aleŋ keeke.» 11Gaa gata pa tiiliyyoo gaa: «Gimu ma rayyidinoo, ay gata ma beneyyiyaw gaa na iccicca birsantu, na tan̰n̰iɗo.» 12Guu inniyya goo: «Ay we ma beneyyiyam goŋŋa?» 13Gaa gimu ma rayyide kaaka soopa, alɗiya ibina ɗa gimu ma rayyidiya, asan ga Iisa masile aacco giimi kotti ma aaye iŋaa.

14Gaa wikinne paalta omma, ga Iisa waagikkiki gimu gata kee maa ga rayyide doorane ta girti Mellayi, gaa beneyyiyyee gaa: «Giyyu ƴa. Haŋka maa ki rayyidiɗe appe, ki addo niŋga ɗa payya. Kii niŋge, ki akka gassa pe gaari ku miɗɗa ma ƴiila parayyi, o gu lekka ɗa rayyido.» 15Gaa miiɗi kaaka kaatiɗe ga deeɗiyo beneyya oko taattuweeco Yawudigeyyo kadar ga ay Iisa ma rayyidiya. 16Ay ɗakko appe gu Yawudigee diiliɗe gu lewɗee gaari ku miɗɗa oko Iisa, asan ga rayyidiya gimu kaaka ma meene ta nambiti. 17Gaa Iisa soopa tiiliyyoo gaa: «Tattu lobokka meeni paracco o naa kulla lobokka.» 18Maa ga beneyyiɗe goŋŋa guu Yawudigee aŋkiɗe saa pe misilti ta kaw, ay asan ga rayyide ɗa ka gimu meene ta nambiti, innasoopa ga beneyye payya gaa ga Mella ay Tatti o ga leewe saa gaa ga sawa ma Mella oko gaari paracco.

19Gaa Iisa tiiliyyoo payya gaa: «Giyyoŋ! Na beneyyatoŋca seene: Runti Mellayi, gederra ɗa ga leeɗo maatiki kayti ka, illa ga leewa maatiki maa ga ella min oko Mella Baaba. Gaari paracco maa ga Mella Baaba leewa ga Runti kulla leeway, 20asan ga Mella Baaba ƴekka Runti, o ga gareegu gaari paracco maa ga leewa o ga akkeegu gaara payya gaari ma ƴiilay kooko asan ku ajjibiɗo ta kaw. 21Aleŋ maa ga Mella Baaba naɗaɗɗiy giimi o ga beraayo hayaatane, ga Runti kulla beraa hayaatane oko giimi maa ga aŋka. 22Mella Baaba pa, caɗaayo ɗa parlane oko gimo, innasoopa, ga bireeca darjane parattí ta parlanti oko Runti, 23ku maa gu giimi paracco karmiyiyya Runti aleŋ maa gu karmayɗiya Mella Baaba. Gimu ma karmayya ɗa Runti pa, karmayya ɗa kulla Mella Baaba ma n̰akammiya.

24«Giyyoŋ! Na beneyyatoŋca seene: Gimu ma geewaa beneytu, o ga dowwica galbanti oko gata ma n̰akamminoo lekkica hayaatane ma gakamma ɗa ta kaw, o gi parlanti Mellayi bagaa ɗa, innasoopa, ga uttiyee oko botol ma kataa muuti, gaa icciɗe pe botol ma kataa hayaatane ma gakamma ɗa ta kaw. 25Giyyoŋ! Na beneyyatoŋca seene. Wikinne asaa, o ga ase paaɗe haŋka, maa gu giimi ma ecekke botol ka muuti asiyya giyya beneyti Runti Mellayi. Guu giimi ma akkiya giyya o ma amanna icciɗo botol ma kataa hayaatane ma gakamma ɗa ta kaw, 26asan aleŋ Mella Baaba ma ay Miltí hayaatane parattí, ga oko Runti kulla ga bireeca gudirane ku maa ga deeɗo Miltí hayaatane parattí, 27o ga biryee botol ku maa ga caaɗiyyo parlane oko giimo, asan ga ay Runti Gimi. 28Aɗoŋ ajjiba ɗa oko gaari kooko, asan ga wikinne asaa maa gu giimi ku mattenta paracco asicca giyya ur̰uuti Runti Gimi, guu naɗiɗo paracco min muuti. 29Kaaka pa, gu giimi ma leewee gaari ku samaane maa ga Mella aŋka ƴa naɗakka, guu gassicca hayaatane ma gakamma ɗa ta kaw. Giimi ma leewe gaari ku miɗɗa pa naɗakka, gii parlanti Mellayi baagiɗiy. 30Naa kaytu ka, gederra ɗa na leeɗo maatiki. Na caɗaayo parlane oko giimo aleŋ maa ga Mella Baaba aŋka, o gi parlantu taata maa na caɗaayo ɗayaŋ, asan na aŋka ɗa na leeɗo maatiki maa ga naa ka aŋka, innasoopa, na leeɗo maatiki maa ga Mella Baaba ma n̰akamminoo aŋka.

31«Gaa naa milco ka beneyya gaari ku kayaatu, ga beneytu ku ecekkaa ɗa, 32innasoopa, ga lekka kaƴi ma asaa min Mellayi ma beneyya gaartaw, o na lekka kabarre kadar ga beneyti ay seene. 33Ku n̰aame giimi wikirti Yaaya ma batasayya giimi, gaa gata pa beneyyiɗe ma gaartaw o ga beneyti kaaka ay seene. 34Gayee ɗa maatiki ga gimu beneyyiɗo ma gaartaw. Na beneyyitoŋ ma gaartee Yaaya ku maa ku duwɗiy galbigeetoŋ oko naa gaa Mella najjiyittoŋ. 35Beneyti Yaaya ay aleŋ okko ma zegee, gii berewɗiyo oko giimo. Kuu oyyiɗe ma beneyti o ku parhine paalta oko wikinne ka bahaaranti taata. 36Gaari maa na leewa ga naa soopa, ƴilaa beneyti Yaaya kaaka, o gu gaartaw ay lubbi maa ga Mella Baaba berewwiyaw ka tattipiti ma garaatoŋ kadar ga ay Mella Baaba ma n̰akamminoo, 37o ga Mella Baaba ma n̰aaminoo beneyye seene ma gaartaw. Kuŋ pa kaytiŋ giyyica ɗa ur̰uuti o ku elliyya ɗa ta kaw. 38Beneyti ku nowottikiki ɗa, asan ku dowwiy ɗa galbigeetoŋ oko n̰amaakati. 39Ku garkayya maani Kitamniti Mellayi, asan gi ma giraane taata ku leewe ku walaŋ ku gasakka botol ka hayaatane ma gakamma ɗa ta kaw. Beneyti Mellayi kaaka soopa beneyya ma gaartaw. 40Gaa ma kaaka aɗe, kuu alɗo aŋka ɗa ku jobbinno naata ma beraatoŋ hayaatane ma gakamma ɗa ta kaw.

41«Naa deyekka ɗa gu giimi cepelɗiy semeetaw, 42asan na ibintoŋ kadar ku ƴekka ɗa Mella galbigeetoŋ. 43Naa ase ma semeetee Tattu, kuu alɗino jobba ɗa. Gaa gimu kaƴi ase ma gaari ku kayaati ka pa, ku jobokkaa. 44Kuŋ ma deyekka cipilo ta semeetoŋ ka, kuu alɗo deyekka ɗa ga Mella cipilɗiy semeetoŋ. Goŋŋa pa, ku dowwiy pe kuu me galbigeetoŋ oko naata? 45Aɗoŋ mooya ɗa kuu ga naa ma akkitoŋ luumiya unti Mella Baaba, ay Muusa gata maa ku ocokke ga asitoŋ gaaya, ay gata ma akkitoŋ luumiya. 46Kuu amanne aɗe goŋŋa ma seene oko beneyti Muusa maa ga ketepeyye, ku amanna kulla oko beneytu, asan ga Muusa ketepeyyiy gaartaw. 47Kuu amanne ɗa pa oko beneyti Muusa maa ga ketepeyye, ku amanna pe kuu me oko beneytu?»

Voafantina amin'izao fotoana izao:

Yaaya 5: mmy

Asongadina

Hizara

Dika mitovy