Kut 33
33
1Yakobo ku yaimukize ati amaisho, yaareeba Esau naija aine abashaija magana ana, yaabaganisa abaana, yaaha Leeya abe, na Rakeeli abe, na buri omwe omuzaana we. 2Atyo yaayebembeza abazaana n'abaana baabo, yaakuratsaho Leeya n'abaana be, reero haahereeruka Rakeeli na Yosefu. 3Haza we nyakabara abeebembera, agyenda naajuumara ahansi emirundi mushanju, okuhitsya obu yaahikire mukuru we. 4Reero Esau airuka kumubugana, amugwa omu kifuba, amubumbatira amunywegyera; bombi barira. 5Esau ku aimutsya amaisho, areeba abakazi n'abaana, abuuza ati: Aba abu oine ni baahi? Yakobo ati: N'abaana abu Ruhanga yampaire ahabw'embabazi nyowe omuheereza waawe. 6Mpaho abazaana bairira haihi n'abaana baabo bamutangirira. 7Leeya nawe n'abaana be bairira haihi bainama; hahereeruka Yosefu na Rakeeli, nabo bairira haihi bamutangirira. 8Esau abuuza ati: Ebimbuuro byona ebi mbugaine n'ebya ki? Yakobo amugarukamu ati: N'eby'okwenda ngu mukama wangye ongirire embabazi. 9Kwonka Esau amugira ati: Mwene tata, ebi nyine nibimmara; ebi oine yegumire nabyo. 10Yakobo amugira ati: Ngaaha naakweshengyereza, ku oraabe wangirira embabazi, yakiira ekiconco ki naakuha. Manya buzimazima okukureeba ahamaisho ni nk'okureebana na Ruhanga, ahabw'okuba waanyakiiza rukundo mpango etyo. 11Naakweshengyereza yakiira ekiconco ki naakureetera, ahabw'okuba Ruhanga ankoreire eby'embabazi, kandi ebi nyine nibimmara. Amugyemesereza atyo, n'onu akyakiira.
Esau okutsiga Yakobo ahi yaamubugaine
12Bwanyima Esau agira ati: Ka tugumizemu orugyendo rwaitu, nyowe mbeebembere. 13Kwonka Yakobo amugira ati: Mukama wangye, noomanya abaana ku bataine maani, kandi n'amasyo g'entaama n'ag'ente agarikwontsya ku niinye ndikugarinda; haza ku baraagabindirane eizooba ryona, nigaija kufa. 14Mbwenu mukama wangye naakweshengyereza, nyogaho nyowe omuheereza waawe, oyebembere: reero nyowe niinyija kugumizamu mpora nk'oku amasyo gu nfunyire garikugyenda, n'oku abaana barikugyenda, okuhitsya obu ndaakuhikireho Seiri, iwe mukama wangye.
15Esau atyo amugira ati: Ka nkutsigire bamwe aha bashaija bangye abu nyine. Kwonka we ati: Mbwenu n'ab'enki? Eki ndikwenda niiwe okungirira embabazi. 16Atyo Esau agarukayo eryo izooba kuza Seiri. 17Yakobo nawe agumizamu omuhanda, ahika Sukooti, ayeyombekyerayo enju; ayombekyerayo n'amasyo ge ebiju. Nikyo omwanya ogwo gwayeteirwe Sukooti.
Yakobo okuhika Shekemu
18Yakobo ku yaarugire Padanarama, yaahika aha rurembo rwa Shekemu n'obusingye, oruri omu nsi ya Kanaani; yaasiisira omu maisho g'orwo rurembo. 19Kandi yaagura ahari beene Hamori ishe wa Shekemu ekibanja ky'empiiha igana, eki yaateiremu eihema rye. 20Okwo yaayombekayo eitambiro, yaaryeta Elelohe, Ruhanga wa Isiraeli.
Okuhambwa kwa Dina
Voafantina amin'izao fotoana izao:
Kut 33: RKK2008
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible with Apocrypha in Runyankore-Rukiga, new revised joint translation © The Bible Society of Uganda, 2008.