Kut 29
29
1Bwanyima Yakobo akagumizamu orugyendo rwe, yaahika omu nsi y'abantu b'omu burugwa-izooba. 2Ku yaanagire ati amaisho, yaareeba eiziba omu ishwa n'amasyo ashatu g'entaama gahenzire enkokora aha rubaju rwaryo; ahabw'okuba eryo iziba niryo baabaire bageesheraho, kandi aha munwa gwaryo bakaba bakingisaho eibaare rihango. 3Amasyo g'entaama ku gaabaire geeteeranira aho, abariisa bakumbagaza eibaare bariiha aha munwa gw'eiziba, beeshera entaama; bwanyima barigarura omu mwanya gwaryo aha munwa gw'eiziba.
4Reero obwo Yakobo yaababuuza ati: Beene waitu nimuruga hi? Baamugarukamu bati: Nituruga Harani. 5Nawe abagira ati: Nimumanya Labaani mwene Nahori? Banu bati: Nitumumanya. 6Ayongyera ababuuza ati: Ariyo agumire? Bati: Agumire. Nangwa reeba na Rakeeli muhara we ngugwo naija afunyire entaama. 7Abagira ati: Reeba bukiri omu ihangwe, obunaku bw'okuzaagiza amasyo tibukahikire. Nimweshere entaama, haza bwanyima mugyende muziriise. 8Bamugira bati: titurikubaasa, amasyo goona gatakateeraine, bakakumbagaza eibaare rikaruga aha munwa gw'eiziba, tukabona kweshera entaama.
9Ku yaabaire naakigamba nabo, Rakeeli yaija n'entaama za ishe, ahabw'okuba niwe yaabaire aziriisa. 10Mbwenu Yakobo ku yaareebire Rakeeli muhara wa Labaani nyinarimi n'entaama za Labaani ogwo, yaagyenda yaakumbagaza eibaare, yaariiha aha munwa gw'eiziba, yaayeshera obusyo bw'entaama za Labaani nyinarumi. 11Bwanyima Yakobo yaanywegyera Rakeeli, yaarira naaborooga. 12Yakobo yaayetondera Rakeeli ku aine obuzaare na ishe, kandi ku ari mutabani wa Rebeka. N'onu atyo airuka abigambira ishe.
13Labaani ku yaahuriire enkuru ya Yakobo omwihwa, yairuka kumubugana. Yaamugwa omu kifuba, yaamunywegyera, yaamutaasya omwe. Yakobo yaateekyerereza Labaani ebyabaireho byona. 14Labaani yaamugira ati: Buzimazima ori owangye w'aha mara. Yaaguma nawe okwezi kwona.
Yakobo okushwera kikuru na kirumuna
15Bwanyima Labaani akabuuza Yakobo, ati: Mbwenu ngu ahabw'okuba twine obuzaare, nikyo oshemerereire kunkorerera busha? Ngambira ebihembo bi ndaakuhe? 16Obwo Labaani akaba aine abaishiki babiri, omukuru naayetwa Leeya, n'omuto naayetwa Rakeeli. 17Leeya akaba ataine maisho marungi, kwonka Rakeeli we ari murungi munonga w'okurigirwa. 18Yakobo akaba naakunda Rakeeli; yaagarukamu ati: Niinyija kumara emyaka mushanju ninkukorera ahabwa muhara waawe omuto Rakeeli. 19Labaani amugira ati: Haakiri mba niwe naamuha okukira okumuha ondiijo muntu. Guma naanye. 20Yakobo atyo amara emyaka mushanju naakora ahabwa Rakeeli, haza emubeera nk'ebiro bikye, ahabw'okuba akaba naamukunda.
21Bwanyima Yakobo akagira Labaani ati: Mpingira omukazi wangye ndaare nawe, ahabw'okuba mpikize ebiro byangye. 22Labaani atyo ayeta abantu boona ab'omuri ekyo kyanga, ateeka obugyenyi. 23Kwonka omwabazyo ku gwakiikire, Labaani yaihayo muhara we Leeya yaamutwarira Yakobo, onu yaaraara nawe. 24Labaani yaaha muhara we Leeya omuzaana we Zilipa kuba omuzaana we. 25Mbwenu ku bwaseesire, Yakobo ku ashanga ari Leeya, agira Labaani, ati: Beitu shi ontuzire ki? Tiinye naakukoreire ahabwa Rakeeli? Mbwenu ongobereize ki? 26Labaani amugarukamu ati: Owaitu tikwo tutwaza kuhingira omuto, omukuru akiri aha mahega. 27Banza omare ewiiki nooraarira ogu, haza twije tukuhingire omweija, reero onkorere endiijo myaka mushanju. 28Yakobo yaaba nikwo yaagira; yaahitsya egyo wiiki naamuraarira. Bwanyima Labaani yaamuhingira Rakeeli omuhara. 29Kandi Labaani yaashagarira omuhara Rakeeli omuzaana we Biliha kuba omuzaana we. 30Yakobo atyo araarira Rakeeli, haza akunda Rakeeli ogwo okukira Leeya agaruka akorera Labaani endiijo myaka mushanju.
Abaana bu Yakobo yaabandize kuzaara
31Nyakubaho ku yaareebire Leeya yaaba enyangwakazi, yaamuha okuzaara; haza Rakeeli yaaba engumba. 32Leeya yaabaka enda, yaazaara omutabani yaamweta Reubeeni, ahabw'okuba akagira ati: Mukama areebire okwitwa kubi kwangye. Mbwenu buzimazima ibanye naija kunkunda. 33Yaagaruka yaabaka enda, yaazaara ondiijo mutabani, haza yaagira ati: Ahabw'okuba Nyakubaho ahuriire ku ndi enyangwakazi, nikyo yampeera n'ogu mwana omwojo; atyo amweta eiziina Simeoni. 34Agaruka kandi agira enda, azaara ondiijo mutabani; reero agira ati: Mbwenu ogu murundi ibanye naija kukwatanisa naanye, ahabw'okuba mmuzaariire abatabani bashatu. Nikyo yaayeteirwe eiziina Leevi. 35Ayongyera atwara; nabwo azaara omutabani; haza agira ati: Mbwenu nu niinyija kuhimbisa Nyakubaho; n'ahabw'ekyo yaamweta eiziina Yuda. Bwanyima oruzaaro rwagarukira aho.
Abandi baana ba Yakobo
Voafantina amin'izao fotoana izao:
Kut 29: RKK2008
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible with Apocrypha in Runyankore-Rukiga, new revised joint translation © The Bible Society of Uganda, 2008.