मत्ती 17

यीशुये दा रूप बदली जाणा

(मरकुस 9:2-13; लूका 9:28-36)

1छिं दिनां दे बाद यीशुयैं पतरस कने याकूब कने तिसदे भाऊ यूहन्ने जो सौगी लेआ, कने तिन्हां जो सुनसाण च कुसी ऊचे प्हाड़े पर लेई गेआ। 2तित्थु तिन्हां सामणै तिसदा रूप बदली गेआ, कने तिसदा मुँ सूरजे साइआं चमकेया कने तिसदे कपड़े जोतिया साइआं चिट्टे होई गै। 3कने दिक्खा, मूसा कने एलिय्याह यीशु सौगी गल्लां करदे तिन्हां जो दुस्से।

4इसा गल्ला पर पतरस यीशुये नैं ग्लाणा लग्गा, “हे प्रभु अहां दा ऐत्थु रैहणा ठीक ऐ। जे तेरी इच्छा होयैं तां मैं ऐत्थु त्रै तम्बू बणां; इक्क तिज्जो तांई इक्क मूसे तांई कने इक्क एलिय्याह तांई।” 5सैह़ ग्ला दा ई था कि इक्क चिट्टे बदल़ैं तिन्हां जो ढक्की लेआ, कने तिस बदल़े च एह़ उआज़ आई; “एह़ मेरा प्यारा पुत्तर ऐ, जिसते मैं बड़ा भरी खुस ऐ, इसदी सुणा।” 6चेले एह़ सुणी नैं मुँऐ भार पेई गै कने बड़े भरी डरी गै। 7यीशुयैं बक्खे आई नैं तिन्हां जो छुई नैं, ग्लाया, “उठा, डरा मत।” 8ताह़लू तिन्हां अपणियां अखीं खोलियां तां यीशुये जो छड्डी नैं होर कुसी जो नीं दिख्या।

9जाह़लू सैह़ प्हाड़े ते लौआ दे थे ताह़लू यीशुयैं तिन्हां जो एह़ हुक्म दित्ता, “जाह़लू तिकर मैं माणु दा पुत्तर मरेयां च जिन्दा नीं होई जां, ताह़लू तिकर जेह्ड़ा कुच्छ तुहां दिख्या ऐ कुसी नैं मत दस्सदे।” 10इसा गल्ला पर तिसदे चेलेयां यीशुये ते पुछया, “भिरी सास्त्री माणु क्जो ग्लांदे हन कि एलिय्याह दा पैहल्ले औणां जरूरी ऐ?” 11तिन्हीं जवाब दित्ता, “एलिय्याह जरूर ओंगा, कने सब कुच्छ सुधारगा। 12अपर मैं तुहां नैं ग्लांदा ऐ, कि एलिय्याह आई चुकेया ऐ, कने लोकां तिसियो नीं पणछैणया; अपर जदेया चाया तिंआं ई तिस सौगी कित्ता। इस तरीके नैं माणु दा पुत्तर भी तिन्हां दे हत्थे ते दुख झेलगा।” 13ताह़लू चेले अप्पु च समझणा लग्गे कि तिन्हीं अहां जो यूहन्ना बपतिस्मा दैणे आल़े दे बारे च ग्लाया ऐ।

दुष्टआत्मा दे सतायो जागते जो ठीक करणा

(मरकुस 9:14-29; लूका 9:37-43)

14जाह़लू यीशु कने तिसदे चेले भीड़ा अल्ल पुज्जे, तां इक्क माणु तिस अल्ल आया, कने गोड्डेयां दे भार बेई नैं ग्लाणा लग्गा, 15“हे प्रभु मेरे जागते पर दया कर। क्जोकि तिसियो मिर्गी ओंदी ऐ, कने सैह़ बड़ा दुख झेलदा ऐ; कने कई बरी अग्गी च कने कई बरी पांणिये च पोंदा। 16कने मैं तिसियो तेरे चेलेयां अल्ल लंदेया था, अपर एह़ तिसियो ठीक नीं करी सके।” 17यीशुयैं जवाब दित्ता, “हे बेबसुआसियो कने बेइमान लोको, मैं काह़लू तिकर तुहां सौगी रैंह्गा? काह़लू तिकर तुहां दी झेलगा? इसियो ऐत्थियो मिन्जो अल्ल लेयोआ।” 18ताह़लू यीशुयैं दुष्टआत्मां जो झिड़केया, कने सैह़ तिसते निकल़ी गेई; कने जागत तिसी बग्त खरा होई गेआ।

19ताह़लू चेले पड़दे नैं यीशु अल्ल आई नैं ग्लाणा लग्गे, “अहां तिसा दुष्टआत्मां जो क्जो नीं कड्डी सके?” 20तिन्हीं तिन्हां नैं ग्लाया, “अपणे बसुआसे दी कमिया दिया बज़ाह ते, क्जोकि मैं तुहां नैं सच्च ग्लांदा ऐ, जे तुहां दा बसुआस राईया दे दाणे बराबर भी हुंगा, तां इस प्हाड़े नैं ग्लाई सकगे, ‘ऐत्थु ते खिसकी नैं औत्थू चली जा’, तां तिन्हीं चली जाणा; कने कोई भी गल्ल तुहां तांई औखी नीं हुंगी। 21अपर एह़ जाति बिना प्रार्थना कने बिना ब्रत ते नीं निकल़दी।”

अपणिया मौत्ती दे बारे च दुवारी भिरी भविष्यवाणी

(मरकुस 9:30-32; लूका 9:43-45)

22जाह़लू सैह़ गलील प्रदेसे च थे, तां यीशुयैं तिन्हां नैं ग्लाया, “मैं माणुये दा पुत्तर माणुआं दे हुआलैं कित्ता जांगा; 23सैह़ तिसियो मारी दिंगे, कने सैह़ त्रीये दिनैं मरेयां ते जिन्दा होई जांगा।” इसा गल्ला पर चेले बड़े उदास होये।

मंदरे दा कर

24जाह़लू सैह़ कफरनहूम सैहरे च पुज्जे, तां मंदरे दा कर#17:24 कर -दा मतलब चुंगी या टैक्स बसूलणे आल़ेआं पतरसे अल्ल आई नैं पुछया, “क्या तुहां दा गुरू मंदरे दा कर नीं दिंदा ऐ?” 25तिन्हीं ग्लाया, “हाँ दिंदा ऐ।” जाह़लू सैह़ घरैं आया, तां यीशुयैं तिसदे पुछणे ते पैहल्ले ई तिसियो ग्लाया, “हे शमौन, तू क्या सोचा दा ऐ? धरतिया दे राजे महसूल#17:25 महसूल -इसदा मतलब भी टैक्स या कर कुणा ते लैंदे हन? अपणे पुत्तरां ते या परायां ते?” 26पतरसैं तिस नैं ग्लाया, “परायां ते।” यीशुयैं तिस नैं ग्लाया, तां पुत्तर बची गै 27तमी इसतांई कि अहां तिन्हां जो ठोकर नीं खुआन, तू झीला कनारे पर जाई नैं मच्छी पकड़णे तांई बिइड़ी पा, कने जेह्ड़ी मच्छी पैहल्ले निकल़ैं, तिसायो लै; तां तिज्जो तिसादे मुँऐ खोलणे पर इक्क चाँदिया दा सिक्का मिलगा, तिसियो लेई नैं मेरे कने अपणे बदले तिन्हां जो कर देई देंआ।

Voafantina amin'izao fotoana izao:

मत्ती 17: XNR

Asongadina

Hizara

Dika mitovy