लूका 22

यीशु दी अत्या आस्ते सलहा-मशवरा

1खमीर रुट्टी दा त्यार जिसी फसह आखया जन्दा ऐ, कोल हा; 2ते प्रधान याजकें ते शास्त्री एस गल्ल दी टूंढ बेच हे के उसी कियां मारचै, लेकन ओ लोकें कोलां डरदे हे।

यहूदा इस्करियोती दा विश्वास त्रोड़ना

3पी शतान यहूदा इस्करियोती च समाया, जिसी इस्करियोती आखदे हे ते ओ बारें चेलें च गिनया जंदा हा। 4ओनें जाईयै प्रधान याजकें ते पैरेदारें दे प्रधानें कन्ने गल्ल-बात कित्ती, के उसी केस तरीके उन्दे अथ्थ च पड़काया जा। 5ओ खोश ओए, ते उसी रूपये देने दा वचन दिता। 6ओनें ए गल्ल मनी लेई, ते मौका तुपन लगया, के बिना दंगे दे उसी उन्दे अथ्थ च पड़का।

फसह दी त्यारी

7पी खमीर रुट्टी दे त्यार दा धयाडा आया, जेस बेच फसह दा लैला बलि करना जरुरी हा। 8ते यीशु ने पतरस ते यूहन्ना गी ए आखीयै पेजया; “जाईयै साड़े खाणे लेई फसह त्यार करो। 9उनै उसी पूछया, तू कुत्थें चांना ऐ, के अस इसी त्यार करचै?” 10ओनें उनेंगी आखया, “दिखो, शैर च दाखल ओदे गै एक मनुक्ख पानी दा कड़ा लेते दा तुसेंगी मिलग; जेस कर च ओ जाग, तोस ओदे पिछें चली जायो, 11ते ओस कर दे मालक गी आखयो; गुरु तुगी आखदा ऐ के ओ मैमाने आला कमरा कुत्थें ऐ जेदे च आऊँ अपने चेलें कन्ने फसह खां?” 12ओ तुसेंगी एक सजा-सजाया बड़ा कमरा दसी ओड़ग; उत्थें तोस त्यार करयो। 13उनै जाईयै, जियां ओनें उनेंगी गलाया हा, उयांगै उनै दिखया, ते फसह दा खाणा त्यार कित्ता।

प्रभु दा खीरी पोज

14जेलै ओ कड़ी आई पूजी, तां ओ प्रेरित कन्ने पोजन करने गी बैठया। 15ते ओनें उनेंगी आखया, “मेरी बड़ी इच्छा ही, के दोख पोगने कोलां पैलैं ए फसह थुआड़े कन्ने खां। 16किके आऊँ तुसेंगी आखना ऐं, जेलै तकर ओ परमेसर दे राज च पूरा नेई ओग अतुं तकर आऊँ उसी कदें बी नेई खागा।” 17ओस बेलै ओनें कटोरा लेई यै शुकर कित्ता ते आखया, “एस गी लियो ते अप्पुं-पिछें बंडी लियो। 18किके आऊँ तुसेंगी आखना ऐं, कि जेलै तकर परमेसर दा राज नेई औग अतुं तकर आऊँ अंगुरें दा रस हुन थमां लेईयै कदें बी नेई पीगा।” 19पी ओनें रुट्टी लेई, ते शुकर करियै पन्नी, ते उनेंगी ए आखदे ओई दिती, “ए मेरी जेंद ऐ, जेड़ी थुआड़े लेई दिती जन्दी ऐ; मेरे याद लेई इयै करदे रवयो।” 20इसै तरीके ओनें रुट्टी दे बाद कटोरा बी ए आखीयै दिता, “ए कटोरा मेरे ओस खून च जेड़ा थुआड़े लेई बगाया जंदा ऐ नमां बायदा ऐ। 21लेकन दिखो, मेरा पड़काने आले दा अथ्थ मेरे कन्ने मेज उपर ऐ। 22किके मनुक्ख दा पुत्तर तां जियां ओदे लेई पक्का कित्ता गीया ऐ, के ओ मारया जा, पर बसोस ओस मानु उपर जेसदे अथ्थें ओ पड़काया जन्दा ऐ!” 23ओस बेलै ओ अप्पुं पिछें पोछ-पड़ताल करन लगे, साड़े बिचा ओ कोन ऐ, जेड़ा ए कम करग?

कोन बड़ा समझया जाग?

24उन्दे च ए बैस-मूयासा ओया; के साड़े बिचा बड़ा कोन समझया जंदा ऐ। 25ओनें उनेंगी आखया, “दुई जातीयें दे राजा उन्दे उपर राज करदे न, ते जेड़े उन्दे उपर अख्त्यार रखदे न, उनेंगी फायदा देने आले आखया जन्दा ऐ। 26लेकन तोस इयै जिए नेई बनयो; मतलब जेड़ा थुआड़े च बड़ा ऐ, ओ निक्के आला लेखा ते जेड़ा प्रधान ऐ, ओ दास आला लेखा बनें। 27किके बड़ा कोन ऐ, ओ जेड़ा रुट्टी करन बैठा, जां ओ जेड़ा रुट्टी खला दा ऐ? के ओ नेई जेड़ा रुट्टी खांन लेई बैठा ऐ? लेकन आऊँ थुआड़े बेच दास आला लेखा ऐं।

28“लेकन तोस उवै ओं जेड़े मेरी परिखें च लगातार मेरे कन्ने रे; 29ते जियां मेरे पिता ने मेरे लेई एक राज पक्का कित्ता ऐ, इयां गै मैं बी थुआड़े लेई राज पक्का कित्ता ऐ। 30तां जे तोस मेरे राज बेच मेरी मेज उपर खाओ-पीयो; लेकन सिहांसनें उपर बेईयै इस्राएल दे बारां गोत्रें दा न्याय करो।

पतरस दे एन्कार दी पविखवाणी

31“शमौन, ए शमौन! देख, शतान ने तुसें लोकें गी मंगी लेत्ता ऐ के कनक आला लेखा शटै। 32लेकन मैं तेरे लेई अर्ज कित्ती, के तेरा बश्वास चली नेई जा; ते जेलै तू तोवा करियै फिरगा, तां अपने प्राऐं गी बश्वास च तकड़ा करयां।” 33ओनें उसी आखया, “ए प्रभु, आऊँ तेरे कन्ने कैदी च जाने, मतलब मरने लेई बी त्यार ऐं।” 34ओनें आखया, “ए पतरस, आऊँ तुगी आखना ऐं के अज्ज कुकड बांग देग जदूं तकर तू त्रै बार मेरा एन्कार नेई करी लैगा के आऊँ उसी नेई जानदा।”

दोख सैनें आस्ते त्यार रवो

35ते ओनें उनेंगी आखया, “जेलै मैं तुसेंगी बटुए, ते चोल्ली, ते जूतें दे बगैर पेजया हा, ते के तुसेंगी किसे चीज दी कटी ओई ही?” उनै आखया, “किसे चीज दी नेई। 36ओनें उनेंगी आखया, लेकन ऊन जेसदे कोल बटुआ ऐ ओ उसी लेई लै, ते इयां गै चोल्ली बी, ते जेसदे कोल तलवार नेई ऐ ओ अपने कपड़े बेचियै एक मुल्लें लेई लै। 37किके आऊँ तुसेंगी आखना ऐं, के ए जेड़ा लिखे दा ऐ; ओ पापियें कन्ने गिनया गीया, ओसदा मेरे च पूरा ओना जरुरी ऐ; किके मेरे बारै च पवित्र शास्त्र च लिखी दियां गल्लां पूरीयां ओनें उपर न। 38उनै आखया, ए प्रभु, देख, इत्थैं दो तलवारां न। ओनें उनेंगी आखया, मता ओया।”

जैतून दे पाड उपर यीशु दी प्रार्थना

39ओसलै ओ बार निकलियै अपनी रीति दे मताबक जैतून दे पाड़ उपर गीया, ते चेलें ओसदे पिछें आई गै। 40ओस जगा उपर पूजियै ओनें उनेंगी आखया, “प्रार्थना करो के तोस परिख्या च नेई पवो।” 41ते ओ अप्पुं उन्दे कोलां लग-पग त्री मीटर दी दूरी तकर अगें गीया ते गोढे टेकियै प्रार्थना करन लगया, 42“ए पिता, जेकर तू चां तां एस कटोरे गी मेरे कोलां चुकी लै; पी बी मेरी मरजी नेई, लेकन तेरी मरजी पूरी उवै। 43ओसलै सोर्ग चा एक दूत उसी लबया जेड़ा उसी शक्ति दिन्दा हा। 44यीशु प्राण निकलने आला लेखा दुखी ओईयै प्रार्थना करन लगया, ते ओसदा पसीना समझो खून आला लेखा बढ़ीयां-बढ़ीयां फूंगाँ जमीना उपर पवा दियां हियां। 45ओसलै ओ प्रार्थना चा उठया ते अपने चेलें दे कोल आईयै उनेंगी दुआसी दे मारे सुत्ते दें दिखया। 46ओनें उनेंगी आखया, कि सौंदे ओ? उठो, प्रार्थना करो, के परिख्या च नेई पवो।”

यीशु गी कैदी बनाना

47ओ ऐ आखा गै करदा हा, के एक दिखो पीड आई, ते ओनें बारें चेलें बिचा एक जेसदा नां यहूदा इस्करियोती हा ओस पीड दे अगें-अगें आवा दा हा। ओ यीशु दे कोल आया, के उसी चूमा दे। 48यीशु ने उसी आखया, “ए यहूदा इस्करियोती, के तू मनुक्ख दे पुत्तर गी चूमियै तोखे कन्ने पड़कानां ऐं?” 49ओसदे साथियें जेलै दिखया के के ओनें आला ऐ, तां आखया, “ए प्रभु, के अस तलवार चलाचै?” 50ते उन्देचा कुसे एक ने महायाजक दे दास उपर तलवार चालाईयै ओदा सजा कन बड़ी ओड़या। 51एस गल्ल उपर यीशु ने आखया, “ऊन बस करो!” ते ओनें ओदा कन छुईयै ठीक करी ओड़या। 52ओस बेलै यीशु ने प्रधान याजकें ते मंदर दे पैरेदारें दे प्राचीन ते बजुरगें गी जेड़े उसी पकड़ने गी आए दे हे, आखया, “के तोस मिगी डाकू समझीयै तलवारां ते डंडे लेईयै निकले ओ? 53जेलै आऊँ अर देन मंदर च थुआड़े कन्ने हा, तां तुसें मिगी अथ्थ नेई पाया; लेकन ए थुआड़ी कड़ी ऐ, ते न्हेरे दी शक्ति ऐ।”

पतरस दा एन्कार

54पी ओ उसी पकड़ीयै लेई गै, ते महायाजक दे कर लेई आए; लेकन पतरस बड़ा गै दूर ओदे पिछें-पिछें चलीयै आवा दा हा। 55ते जेलै ओ बेड़े च अग्ग बालीईयै किट्ठे बैठे, तां पतरस बी उन्दे बेच बैठी गीया। 56ते एक दासी ने उसी अग्गी दी लोई च बैठे दे दिखियै ते उसी तकीयै बोलन लगी, “एबी तां ओदे कन्ने हा।” 57लेकन ओनें ए आखीयै एन्कार कित्ता, “ए नारी, आऊँ उसी नेई जानदा।” 58थुड़े चेर बाद कुसे ओर ने उसी दिखियै आखया, “तू बी तां उन्दे बिचा एक ऐं।” पतरस ने आखया, “ए मानु, आऊँ नेई ऐं।” 59कोई लग-पग एक कैंटे बाद एक ओर मानु जोर देईयै आखन लगया, “पक्का एबी तां ओदे कन्ने हा, किके ए गलील दा रौने आला ऐ।” 60पतरस ने आखया, “ए मानु, आऊँ नेई जानदा के तू के बोला दा ऐं? ओ बोला दा गै हा के फोरन कुकडै बांग दिती। 61ओस बेलै यीशु ने मुड़ीयै पतरस आली बखी दिखया, ते पतरस गी प्रभु दी ओ गल्ल याद आई जेड़ी ओनें बोली ही; अज्ज कुकड बांग देने कोलां पैलैं, तू त्रै बार मेरा एन्कार करगा।” 62ते ओ बार निकलियै फूटी-फुटीयै रौन लगया।

यीशु दा मजाक

63जीनें मनुक्खें यीशु गी पकड़े दा हा, ओ ओसदा मजाक करियै उसी डंडे मारन लगे; 64ते ओदीयां अखां बनियै उसी पूछन लगे, “पविखवाणी करियै बोल के तुगी कोस ने मारया!” 65ते उनै मतीयां सारीयां ओर बी निंदया आलियां गल्लां ओदे खलाफ च बोलियां।

बुजुर्गें ते बड़ी सभै दे अगें यीशु

66“जेलै धयाडा चढ़या तां लोकें दे प्राचीन ते प्रधान याजकें ते शास्त्री किट्ठे ओए ते उनै उसी अपनी महासभा बेच आनीयै पूछ्या; 67जेकर तू मसीह ऐं, तां असेंगी दस।” ओनें उनेंगी आखया, “जेकर आऊँ बोलां, तां तुसें बश्वास नेई करना, 68ते जेकर आऊँ पूछां तां तोस जबाब नेई देगे। 69लेकन ऊन थमां मनुक्ख दा पुत्तर समर्थमान परमेसर दी सजी बखी बैठा रौग।” 70एस गल्ल उपर सारें आखया, “तां के तू परमेसर दा पुत्तर ऐं?” ओनें आखया, तोस अप्पुं गै आखा दे ओ, किके आऊँ ऐं। 71ओस बेलै उनै आखया, “ऊन असेंगी गवाही दी के लोड ऐ? किके असैं अप्पुं गै ओदे मुहं चा सुनी लेत्ता ऐ।”

Voafantina amin'izao fotoana izao:

लूका 22: DOG

Asongadina

Hizara

Dika mitovy