KEJADIAN 15
15
Allahn Abram ubam sali imbibag ane
1Welatfagma Abram inowen fulu roho yet harukmen Ninikni Allahn ele ubam uruk lit, ”Abram, hakol ha fug! Siyag ane hubam aruhu rohon ulug Anden hat fet hasug lit onggo suwon og huruhuk,” ibag.
2-3Ari ibagma Abramen ele uruk lit, ”Nikni suwon Allah, Haren malik eke og nitikin fugmu an war aruhuk halug an nanggengge obog toho namingmingangge Damsyik ahun Eliezer inggikmu aruhu. Ari roho tuhu angge re nungge fahet onggo suwon og huruhuk ehen?” ulug hiyag itfag.
4Hiyag itfagma Ninikni Allahn nin eke ele uruk lit, ”Hamingmingangge inowen haren angge ngi aruhu fug, hat hamloho hinggarehen tohonen ngi aruhu,” ibareg 5#Rm 4:18; Ibr 11:12Abram selma hondoholug libareg hiyag utuk lit, ”Poholma lahap hamihinteg suhal werehon winag himin! Suhal winag isa fug teg hag toho haren ondohowonen endebuhubon arimano anggolo mondeg lamuhup,” ibag.
6 #
Rm 4:3; Gal 3:6; Yak 2:23 Allahn ibag ane aru fahet Abramen we tem toho ehek ulug wenggel hibagma Ninikni Allahn at fahet fano peruk latfag.
7Fano pibareg nin eke Abram fam hiyag utuk lit, ”An Hikni Allah welahi. Kinang aru hat ngi aruhun ulug Anden o Ur Babilonia kinang famen hondog haplug wilip atikikteg humbahik waharikik,” ibag.
8Ibagma Abramen kapal haruk lit, ”Nikni suwon Allah, Haren kinang aru og huruhuk ehenon aru tem toho irisi puhuken nangginoho noluk aruhu?” ulug kapal hibag.
9Kapal hibagma Ninikni Allahn, ”Wam sapi heyon men kambing heyon hunon men enebe wal taneg mo hinahan fam endetuson walug waharuk lit suwe yalma hahon eke men pel hahon eke men An nubahet walug watmihin,” ulug hiyag itfagma 10walug watfag. Walug watfareg Abram inowen wam sapi kambing waroho pul ke pilang tibareg fima fil iraroho emberuk lit fima fil oho iraroho imbibag. Suwe itano eneg pilang tibibag fug. 11Ari tibareg weregma suwe kararakni imbalo wareg narukon wam Abramen imbibahon arimano fam hur arik wambik watfagma Abramen yanggal enepfag.
12Yanggal enepfareg mo ubuk urukmu Abram ino noho apeleg atfareg itano akol anggolo haruk latfag. 13#Kel 1:1-14; Kis 7:6Ari turukmu Ninikni Allahn ele uruk lit, ”Haren ondohowonen endebuhubon arimano ap pohon hag toho o winama welamuhubon fahet holuk toho welamin! Ap enemingmingangge weregma enele ying eneptukmen eneg mo ilig am wirig am turukmu teng-teng angge 400 welamuhup. 14#Kel 12:40-41; Kis 7:7Hat humbusagsi mingming eneptuk lamuhup inap arimano Anden alem angginon unubam emberuk laruhukmu humbusagsi o ino embeselug wilip atuk lit mun angge man angge hilalug wilip amuhup. 15Hat hinggareg eneg amusun toho wereg lit sabal aruhunteg hindi yuwag toho war aruhunmu kinangma sal habuhup. 16Hat humbusagsi o ino wereg lit unumalikisiyen endebuhubonen endebuhubon welamuhup li eneg suhuloho o aru wamuhup. Amori inap kinang tu fam werehon arimanowen siyag ane turukmen warukmen eneg mondabi hum atuk halug eneg Anden alem angginon unubam emberuk lit yanggal enebuhuk,” ulug hiyag itfag.
17Mo ubuk ibareg o mondabi hik atfagma indok kubag elma weregma hubu laharukon men iral indok ambulpul turukon men inam atfareg wam paloho imbibahon arimano honggoleg ke laruk latfag. 18-21#Kis 7:5Ari turuk lit itano Ninikni Allahn Abram ubam sali emberuk lit, ”Kinang o Mesir hili-hilimuwen tulug Keni inap enengginang men Kenas, Kadmon, Het, Feris, Refaim, Amori, Kanaan, Girgasi, Yebus inap enengginang arimano keyen tulug ik Efrat ayegma werehon oho haren enderuhunonen endebuhubon og isahuk,” ulug hiyag itfag.
Voafantina amin'izao fotoana izao:
KEJADIAN 15: YLI
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra