Luk 16

Yóm tau là gulit kogoten yóm hmò le du

1Ne bud wen tulón Jisas yó kem tau gel lemolò du, monen, “Wen sotu tau alì wen kendengenen, ne mtukul se tau fen hogoten yó kem kimuhen. Sotu kdaw bè yó, wen tulón le du nim tau wen kendengenen ni, mon le, ‘Yóm tau fen hogotem kimuhem, wen gel namaen du.’ 2Kewóten se kun yóm tau wen kendengenen, tinoken yóm tau tnifù le yó, monen mò du, ‘Deng wen gungolu gbak ebéléem. Gotu snulatem dou kun yóm kmò khógówem du yó kem kimuhu, abay se sónen ni ne khogotu du kóm.’

3Tahu se. Yó mon nawa yóm tau tnifù le yó, monen, ‘Tey. Tedu bud atulu du yóm angat kkóhen du béléu yóm gónóhu mogot nim nmò hogoten dou ni? Blaem là gbeku du dou yóm nmò blat, ne là se mlose mni bè kem dumuhu. 4A, ni dii kehlanu du anì wen kem weu angat hmódó do bè gónô le ke deng kóhen béléu yóm gónóhu mogot nim nmò hkemen do ni.’

5Yó nmoen yóm tau là gulit yó, gotu tinoken yó kem tau tehe mutóng béléen bè kimu yóm gónóhen mogot. Sut bè yó yóm tanayen, monen mò du, ‘Hilu yóm kóm tehe nutóng bè yóm gónóhu mogot?’ 6Monen, ‘Lematu lata hono hnolo.’ Mon yóm tau hulung hemlan yó, ‘Ni dii listahem. Olom smulat limu folò ne.’

7Ne bud sut se yóm sotuhen, bud monen mò du, ‘Hilu yóm kóm tehe nutóng?’ Monen se, ‘Lemibu abì halay.’ Bud mon yóm tau hulung hemlan yó, ‘Ni dii listahem. Olom smulat wolu latu ne.’

8Tikóng tngón yóm tau fun kendengen yóm kmò kehlanen du yóm atulen yóm tau là gulit yó koni, botong monen, ‘Tey hulung hemlan yóm klowilen elem haya yóm tau là gulit yó.’ ” Bud mon Jisas, “Yó kem tau són ktes le klowil le te tonok, tey le hulung eles temgama du yóm klowil le elem haya. Yake bud lómón se yó yóm kul eles ketgama du yóm klowil laen dù sónen yó kem tau deng nô lem layag. 9Tódô tulónu kuy,” mon Jisas, “Hol gel benlay ye yó kem tau élél yó kem kendengen ye te tonok. Abay se ke deng gotu blay ye, angat tey khódó Dwata kuy ditu bè yóm gónó ye angat nô laen kô dù tul sónen.

10Yóm tau ke gulit kogoten yó kem udì hogot le du, bud gulit snéen bè yóm bong. Ne ke là gulit kogoten du yó kem udì hogot le du, là se gulit kogoten du yóm bong. 11Ke là gulit kogot ye du yó kem kimu ye lem nim benwu ni, laen se kô dù kimu angat blay Dwata kuy bè longit, yóm kimu hol tahu duhen. 12Ne ke là gulit kogot ye du yó kem sundu kuy du, laen se kô dù angat blay Dwata kuy.

13Laen kô dù tau,” mon Jisas, “ke lewu gónóhen mogot. Ke yó tô nmoen, déke mtukul knutó nawahen, ne mtukul se henlom nawahen. Déke mtukul fen nimónen, ne mtukul se fen sen-gilen. Ke són filak ktes ye, là kô gbek ye mimón ke Dwata.”

Kem dumu tolok Jisas

(Matyu 11:12-13; 5:31-32; Mark 10:11-12)

14Wen se kem Farisi nô bè yó, yó kem tau són filak alì henlom nawa le. Tikóng gungol le nim mon Jisas ni, mom sendekà le. 15Yó gónó Jisas mon du mò kul, “Tey dê nmò hegfan ye bè tau anì tedeng kton le kuy, okóm tódô tngón Dwata lem hendem ye. Yó kem alì mebtes bè kehedem tau, bè kton Dwata du, laen kô dù muhen.

16Gu laanen là deng sut yóm Jan gel mabtays,” mon Jisas, “són yó gel hlolò le yó kem tau, són yó kem tehe hlau Musis, ne són yó kem tehe snulat yó kem gna tugod Dwata. Okóm bè yóm deng ksut Jan, nbuten bè yó ne wen Tulón Hyu hetngón le gbak ebè yóm kmò kogot Dwata tau. Bè yóm kungol le du yó kem tau, hotu le gel le anì gmung le. 17Angat kmanas yóm longit ne yóm tonok,” monen. “Okóm yóm hlau Musis, balù yó kem olo leneken, là kóen na a lana.”

18Ne bud mon Jisas, “Yóm logi ke kóhen yehenen ne bud myehen dumu libun, deng ndaen ne yóm libun gna yehenen. Ne ke wen dumu logi bud myehen du yóm libun yó, bud salaen bè Dwata se kun.”

Yóm tau wen kendengenen ne Lasarus

19Bud wen tulón Jisas kul, monen, “Wen sotu tau alì wen kendengenen. Són gel leseken yó kem nes alì mebtes, ne tey mdengen klowilen ket kdaw. 20Ne wen se sotu tau élél laen dù bang gónóhen ma boluyen Lasarus. Nim Lasarus ni, tódô tfeng lówóhen mgas. Ket haya le na a gel hmasà du bè bak tikeb labat yóm tau wen kendengenen yó. 21Kóyóen ke wen blay le du yó kem ubang ken gel btang gu te lemisa yóm tau wen kendengenen yó. Balù yó kem ohu, gotu sut béléen na a dmilut yó kem tey mgasen. 22Sotu kdaw bè yó, matay yóm tau élél yó. Ne tódô wen hógów Dwata gu bè longit na a mangay du, ne nit le ebè longit klohok Abraham. Kóngen na a matay se kun yóm tau wen kendengenen yó, ne lebeng le. 23Tódô hlós elem lanaw ofi, ya tey keglayamen. Tikóng temngel etta, tódô tonen Abraham, okóm mayuk béléen yóm gónóhen nô. Ne tonen se Lasarus myón klohoken.

24Ne tmaba ebè Abraham yóm tau tehe wen kendengenen yó, monen, ‘Ó Fù Abraham, hol knoduhem ou. Dókem do edini Lasarus anì nan e hentdak dou él lem baku, bà mon se tey keglayamu bè nim ofi gónóhu nô ni.’

25Okóm bnalà Abraham, monen, ‘Hentulónem nawa, Fù, yóm tehe kóm klowil. Deng gotu gutahem ne kehyuhen, kóen kun nim Lasarus, fen gutahen ksideken. Okóm ni, deng gsengel ne kun kegnóm du bè ni, ne feni meflayam kóm. 26Lelen yó he,’ mon Abraham, ‘wen tey sol leyóng nô lem blóng tekuy. Anien he ke wen tô lemwót gu dini ke tô mógów edyó, là kô gifalen du. Dalang se ke wen tô lemwót gu dyó, là se kô wen gemgifal du edini.’

27Ne bud mudél yóm tau tehe wen kendengenen yó koni, monen, ‘Ke yó se kmoen, Fù, yó hol henkoduhu béléem, hol dókem dou Lasarus ebè gónô mà, 28yakà wen yó kem limu twolihu anì eles hetngónen kul, anì là glolò le dou ebè nim tey gónóu meflayam ni.’

29Yó bud balà Abraham du, monen, ‘Deng nô bélê le yó kem tehe snulat Musis ne yó kem dumu tugod Dwata ekni, tódô hol hnungol le he yó.’

30Ne bud mon yóm tau tehe wen kendengenen, monen, ‘Là, Fù, là kô hnungol le du. Hnongum se ke wen tau bud mowil sut bélê le, ngem kaem knogol le yó kem sidek gel nmò le.’

31Yó bud balà Abraham du, monen, ‘Ke là hnungol le du yóm tehe snulat Musis ne yó kem dumu tugod Dwata, sélét mom hnungol le ne baluen ke wen tau bud mowil mógów ebélê le.’ ”

Voafantina amin'izao fotoana izao:

Luk 16: tbl

Asongadina

Hizara

Dika mitovy