मत्ती 3
3
यहुन्ना बपतिस्मौ देणै वाल़ौ
(मरकुस 1:1-8; लुका 3:1-18; यहुन्ना 1:6-8,15-34)
1सेज़ै बौगता दी यहुन्ना बपतिस्मौ दैणै वाल़ौ आशीयौ यहुदिया रै बंज़र ज़मीना दी इणौ परचार कौरदै लागौ कि, 2“सारै लोग आपणै-आपणै पापा कु माफी पाइणा लै बुरै कामा कु मन बौदल़ौ। कैलैकि सौरगा रौ राज़ नज़दीक आशी गौ आ।” 3एऊ सेऊ आ ज़ासरै बारै दी यशायाह भविष्यवक्तै बोलौ थौ, “शुनशान ज़ागाह दी एक हाकै मारीयौ बोलदै आ लागौ औन्दौ, की प्रभु रै आशणै रै बौगता दी तेसकु मिलणा लै तैयार रौऔ।” 4यहुन्नै ऊंटा रै बाल़ा रै जुड़कै थै भिड़ै औन्दै, और आपणी कौमरा दी च़ामड़ै रौ गाचौ थौ बानौ औन्दौ। तेसरी रोटी थाड़ै और बौणा री माक्खी रौ मौ हुआ थौ। 5तैबै यरुशलेम और सारौ यहुदिया और यरदना रै ओरु-पोरु रै सौभी ज़ागाह रै लोग तेस काऐ निकल़ियौ आशै। 6तिंउऐ आपणै-आपणै पाप मानियौ यरदन नौईं दी तेसकु बपतिस्मौ निऔं। 7ज़ेबी तिणीऐ भौरी फरीसी और सदुकी लोग बपतिस्मौ लै आपु काऐ आशदै देखै, त तिणीऐ बोलौ, ओ लोगुओ तुमै दुष्ट ई ज़ैहरिलै सापा ज़िणै, तुमै कुणिऐ च़ितलाऐ कि तुमै परमेश्वरा रै आशणै वाल़ै रोशा कु भागौ? 8आबै तुमै मन बौदुल़णै लाईक काम कौरौ। 9और आपणै-आपणै मौना दी इणौ नाईं सुंच़ौ की आमारौ बाब इब्राहिम आ। हाऊं तुमुलै बोलाऊ की परमेश्वर इऊं पात्थरु कु भी इब्राहिमा कालै सन्तान पैदौ कौरी बौल़ा सा। 10आबै परमेश्वरा रै फैसलै री कुराड़ पेड़ु री ज़ौड़ी काऐ छ़ाड़ी ऐन्दी ज़ो पेड़ आच़्छ़ौ फल़ नाईं आणालौ तेस काटियौ आगी दी पा ई। 11हाऊं ता पाणी कौरी तुमुलै मन बौदुल़णै रौ बपतिस्मौ दिआऊ, पर ज़ो मुं बासिऐ आशणै वाल़ौ आ। सेऊ मुकु भी शक्ति वाल़ौ आ। हाऊं ता तेसरै बुटा च़ुंगणै रै लाईक भी नाईं आसतौ। सेऊ तुमुलै पवित्र आत्मा और आगी कौरी बपतिस्मौ दिआ। 12तेसरौ शुपौ तेसरै हाथा दी आ, और सेऊ आपणौ खौल़ौ आच़्छ़ै कौरीऐ साफ कौरा, तैबै गीऊं छ़ाड़ा आपणी खौन्दीआल़ी दी भूस ज़ाल़ा आगी दी ज़ो आग केबी ना इशदी।
यहुन्ना कौरी यीशु रौ बपतिस्मौ
(मरकुस 1:9-11; लुका 3:21-22; यहुन्ना 1:31-34)
13सेज़ै बौगतै यीशु गलील परदेशा कु यरदन नौईं रै डिका दी यहुन्ना काऐ तेसकु बपतिस्मौ निंदै आशौ। 14पर यहुन्ना इणै बोलीयौ तेस रोकदै लागौ, “मुं ता तैरै हाथा कु बपतिस्मौ निणै री ज़ुरत आ, और तू आशौ मुं काऐ?” 15यीशुऐ तेसलै ज़वाब दैऔ, “आबै ता इणी ई हुणै दै, कैलैकि आमुऐ इणी ई रीती कौरी धौर्मा रै सौभी काम पुरै कौरणै ठीक आ।” तैबै तिणीऐ तेसरी बुशै मानी गोई। 16और यीशु बपतिस्मौ नीईंयौ खरकच़ार पाणी मांझिऊ कु उपरै आशौ, और, तेसलै सौरग खुली गौ, और तिणीऐ परमेश्वरा री आत्मा कबुतरा ज़िणी उतरियौ आपु माथै आशदै देखी। 17और सौरगा कु परमेश्वरा री हाक शुणुई “एऊ मैरौ प्यारौ छ़ोहरु आ, एसकु हाऊं भौरी खुश ऊ।”
Voafantina amin'izao fotoana izao:
मत्ती 3: BFZ-NT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.
