यहुन्ना 7
7
यीशु और तेसरै भाई
1इऊं बुशु बासिऐ यीशु गलील परदेशा दी घुमदै थाकौ लागी। कैलैकि यहुदी मुख्यै तेस झ़ांगणै री कोशिश थै कौरदै लागै औन्दै, एथीलै सेऊ यहुदी परदेशा दी घुमणौ नाईं च़ाआ थौ। 2यहुदिऊ रै ताम्बु रौ साज़ौ नज़दीक थौ। 3एथीलै तेसरै भाईउऐ तेसलै बोलौ, “इदरा कु यहुदिया परदेशा लै डेऊ, कि ज़ो काम तू कौरा ई तिऊं तैरै च़ेलै तिऐ भी देखा। 4कैलैकि इणौ कोइयौ ना औलौ ज़ुण मशहूर हुणौ च़ाहा और च़ोरुइयौ काम कौरा। अगर तू एज़ौ काम कौरा ई, ता आपु इऐं धौतरी दी पौगड़ौ औऊ।” 5कैलैकि तेसरै भाई भी तेस माथै विश्वास नाईं कौरा थै। 6तैबै यीशुऐ तिउंलै बोलौ, “मैरौ बौगत इबी झ़ांऊ नाईं आशौ, पर तुमुलै सारौ बौगत आ। 7दुनिया रै लोग तुमु कु दुश्मनी नाईं कौरी सौकदै, पर दुनिया रै लोग मुकु दुश्मनी छ़ाड़ाई कैलैकि हाऊं तेसरै विरोधा ई इऐं गवाही दिआऊ कि तेसरै काम बुरै ई। 8तुमै साज़ै दी डैऔ। हाऊं इबी एज़ै साज़ै दी नाईं डेउंदौ, कैलैकि इबी मैरै डेउणै रौ बौगत नाईं आशौ।” 9सेऊ तिऊंकु एज़ी बुशै बोलीयौ गलीला दी ई रौई गौ।
गरीबु रै घौरा दी साज़ै मांझ़ी यीशु
10पर ज़ेबी तेसरै भाई साज़ै दी डेई गौऐ ता यीशु आपु भी, पौगड़ै दी नाईं पर मानौ च़ोरुइयौ डैऔ। 11साज़ै दी यहुदी मुख्यै लोग यीशु लोड़दै थै लागै औन्दै और लोगु कु पुछ़ा थै कि, “का यीशु आशी गौ आ?” 12और लोगु मांझ़िऐ तेसरै बारै दी च़ोरी-च़ोरीऔ भौरी का बुशै हुई: कुछ़ बोला थै, “सेऊ भौलौ आदमी आ।” और कुछ़ बोला थै, “नाईं, सेऊ लोगु बिशवाशा आ।” 13तैबै भी यहुदिऊ रै डौरै कोई भी आदमी यीशु रै बारै दी खुलीयौ नाईं बोला थै।
साज़ै मांझ़ी यीशु री शिक्षा
14ज़ेबी साज़ै रै आधै दूस बिती गौऐ। ता यीशु परमेश्वरा रै घौरा रै खौल़ै दी डेइयौ शिक्षा दैंदै लागौ। 15तैबै यहुदी रै स्याणै हैरान हुइयौ बोलौ, “एसकै बिण पौड़ी विद्या किणी आशी गोई?” 16यीशुऐ तिउंलै ज़वाब दैऔ, “मेरी शिक्षा मेरी आपणी नाईं, पर मैरै भेज़णै वाल़ै बाब परमेश्वरा री आ। 17अगर कोई परमेश्वरा री इच़्छ़ा दी हांडणौ च़ाहा, ता सेऊ इऐं शिक्षा रै बारै दी ज़ाणालौ कि इऐ परमेश्वरा री तौरफा कु आ या हाऊं आपणी तौरफा कु बोलाऊ। 18ज़ो आपणी तौरफा कु कुछ़ बोला आ, सेऊ आपणी ई बौड़ाई च़ाहा सा। पर ज़ो आपणै भेज़णै वाल़ै री बौड़ाई च़ाहा सा सेऊ ई इमानदार आ, और तेसदी कोई बेइमानी नाईं। 19का मुसै तुमुलै नियम नाईं दैऔ? तैबै भी तुमु मांझ़िया कु कोई नियमा दी नाईं हाण्डदौ। तुमै मुं कैलै झ़ांगणौ च़ाहा ई?” 20लोगुऐ ज़वाब दैऔ, “तुमु दी बुरी आत्मा आ! तुमु कुण झ़ांगणौ च़ाहा सा?” 21यीशुऐ तिउंलै ज़वाब दैऔ, “मुंइऐ एक आरामा रै दिनै च़मतकार किऔ, और तुमै सारै हैरान हुआई। 22तुमै बोलाई कि मुसै तुमुलै खतनौ कौरणै रौ हुकम आ दैऔ औन्दौ, एथीलै तुमै आरामा रै दिनै आदमी रौ खतनौ कौरा ई, पर इणौ नाईं सेऊ मुसा री तौरफा कु आ पर इऐ ता नाना-बुड़ु कु च़ाली ऐन्दी रीती आ। 23ज़ेबी आरामा रै दिना दी आदमी रौ खतनौ कौरा ई ताकी मुसा रै नियमा रौ हुकम टौल़ौ ना च़ांई, ता तुमै मुं माथै एज़ी ताइंऐ रोश कैलै गाड़ाई कि मुंइऐ आरामा रै दिना दी एक आदमी आच़्छ़ा कौरीऐ च़ांगौ किऔ। 24मूंह देखीयौ फैसलौ नाईं कौरौ, पर ठीक-ठीक फैसलौ कौरौ।”
का यीशु ई मसीह आ?
25तैबै कुछ़ यरुशलेमा दी रौइणै वाल़ै बोलदै लागै, “का एऊ सेऊ नाईं ज़ास यहुदी मुख्यै झ़ांगणै री कोशिश कौरदै ई लागै औन्दै?” 26पर देखौ, “एऊ ता खुलम-खुलौ बुशै ला सा और कोई भी तेसलै कुछ़ नाईं बोलदै। का मुख्यैउऐ सौच़्च़ौ-सौच़्च़ौ ज़ाणी ऐरौ आ कि एऊ ई मसीह आ? 27एस ता आमै ज़ाणी ई कि एऊ किदलौ आ। पर ज़ेबी मसीह आशा लौ ता कोई नाईं ज़ाणालौ कि सेऊ किदलौ आ।” 28तैबै यीशुऐ परमेश्वरा रै घौरा रै खौल़ै दी शिक्षा दैंदी बारै औटाइयौ बोलौ, “तुमै मुं ज़ाणाई, और इणौ भी ज़ाणाई कि हाऊं किदलौ ऊ, हाऊं ता आपु नाईं आशौ, पर मैरौ भेज़णै वाल़ौ सौच़्च़ौ आ, तेस तुमै नाईं ज़ाणदै, 29पर हाऊं तेस ज़ाणाऊ कैलैकि हाऊं तेसरी तौरफा कु और तिणीऐ हाऊं भेज़ौ ऊ।” 30एज़ी बुशा माथै तिऊं मुख्यैउऐ सेऊ पाकुड़नौ च़ाऔ, तैबै भी कोइऐ तेसदी हाथ नाईं लाऔ कैलैकि यीशु रै मौरणै रौ ठीक बौगत इबी झ़ांऊ नाईं आशौ थौ। 31तैबै भी भीड़ा रै भौरी लोगुऐ तेस माथै विश्वास कियौ, और बोलदै लागै, “मसीह ज़ेबी आशा लौ ता का एथकु भी बौड़ै च़मतकार देखाल़ाई ज़िणै इणीऐ देखाल़ै ई?”
यीशु पाकुड़नै रौ कोशिश
32फरीसीउऐ लोगु कु यीशु रै बारै दी एज़ी बुशै च़ोरी-च़ोरीऔ लाइंदै शुणी। और बौड़ै याजकु और फरीसीउऐ तेस पाकुड़ना लै परमेश्वरा रै घौरा रै च़ोउकीदार भेज़ै। 33एथ माथै यीशुऐ बोलौ, “हाऊं थोड़ै बौगता झ़ांऊ तौंइऐ तुमु आइलै ऊ, तैबै आपणै भेज़णै वाल़ै काऐ वापिस डिआऊ। 34तुमै मुं लोड़ाई, पर नाईं मिलु लौ। और ज़िऐ हाऊं ऊ, तिऐ तुमैं नाईं आशी बौल़दै।” 35एथ माथै यहुदी मुख्यै आपु मांझ़िऐ बोलदै लागै, “एऊ किऐ डिआ कि एऊ आमुकै नाईं मिला लौ? का एऊ तिऊं यहुदी लोगु काऐ डिआ ज़ो युनानिया दी तितर-बितर हुइयौ रौआ ई, और युनानिऊ मांझ़िऐ भी परचार कौरा? 36एऊ का बोलणौ च़ाहा सा ज़ो इणीऐ बोली, कि ‘तुमै मुं लोड़ाई, पर नाईं मिलु लौ। और ज़ियै हाऊं ऊ, तिऐ तुमै नाईं आशी बौल़दै?’ ”
ज़िन्दगी रै पाणी री नौ (नदी)
37साज़ै रै आखरी दिनै, ज़ो बौड़ौ दीन आ, यीशु खौड़ौ हुऔ और औटाइयौ बोलौ, “अगर कोई चिशौ आ ता मुं काऐ आशा और पिया।” 38ज़ुण मुं माथै विश्वास कौरालौ, ज़िणौ पवित्रशास्त्रा दी आ लिखौ औन्दौ, “तेसरै ज़िवा कु ज़िन्दगी दैणै वाल़ी पाणी री नौईं ज़ेथ कौरी ज़िन्दगी मिला बौइयौ निकल़ा।” 39तिणीऐ एऊ वचन तिऐं पवित्र आत्मा रै बारै दी बोलौ, ज़ो विश्वास कौरणै वाल़ेऊ लै मिलणै वाल़ी थी। कैलैकि आत्मा इबी झ़ांऊ नाईं उतरौ थौ, यीशु इबी झ़ांऊ आपणी महिमा दी नाईं आशौ थौ। 40तैबै भीड़ा मांझ़िया कु कुणिऐ एज़ी बुशै शुणियौ बोलौ, “सौच़्च़ी ई एऊ सेज़ौ भविष्यवक्ता आ ज़ास आमै ज़ागदै थै लागै औन्दै।” 41दुजै आदमीऐ बोलौ, “एऊ मसीह आ।” पर केज़ेउऐ बोलौ, “कैलै? का मसीह गलील परदेशा कु आशा आ? 42का पवित्रशास्त्र दी इणौ नाईं आ लिखौ औन्दौ कि मसीह दाऊद रै वंशा कु और बैतलहम गांवा कु आशा ज़िऐ दाऊद रौआ थौ?” 43तैबै तेसरी वज़ाह कु लोगु मांझ़िऐ फूट पौड़ी। 44तिऊं मांझ़िऐ कुछ़ तेस पाकुड़नौ च़ाहा थै, पर कोइऐ तेसदी हाथ नाईं लाऔ।
यहुदी अगुएउ रौ अविश्वास
45तैबै सै परमेश्वरा रै घौरा रै च़ोउकीदार बौड़ै याजकु और फरीसीउ काऐ आशै। तिंउऐ तेसलै बोलौ, “तुमुऐ सेऊ कैलै नाईं आणौ?” 46च़ोउकीदारुऐ ज़वाब दैऔ, “केज़ै आदमीऐ केबी भी इणी बुशै नाईं लाई।” 47फरीसीउऐ तिउंलै ज़वाब दैऔ, “का तुमै भी ठौगुई गौऐ? 48का सरदारु या फरीसीउ मांझ़िया कु कोइऐ भी तेस माथै विश्वास कियौ आ? 49पर इऐ लोग ज़ो मुसा रै नियम नाईं ज़ाणदै, सै परमेश्वरा री तौरफा कु शापित ई।” 50नीकुदेमुसै, ज़ो पैहलै एकी राचीऐ यीशु काऐ आशौ थौ और तिऊं मांझ़िआ कु एक थौ, तिणीऐ बोलौ, 51“का आमारौ नियम केज़ै आदमी लै, ज़ेबी झ़ांऊ पैहलै तेसरी शुणियौ सौमझ़ा नाईं लै कि सेऊ का कौरा आ, आरोपी चाणा ई?” 52तिंउऐ तेसलै ज़वाब दैऔ, “का तू भी गलीला परदेशा रौ ई? पवित्रशास्त्रा दी पढ़ तैबै ताउंकै पौतौ लागा कि गलील परदेशा कु कोई भविष्यवक्ता पौगड़ौ ता ना हुऔ।” 53तैबै सौभी आपणै-आपणै घौरै डेई गौऐ।
Voafantina amin'izao fotoana izao:
यहुन्ना 7: BFZ-NT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.
