यहुन्ना 2

गलीला रै काना दी पैहलौ हैरानी वाल़ौ काम

1तैबै चिजै दिनै गलीला परदेशा रै काना गांवा दी कासरी शादी थी और यीशु री आमा भी तियै थी। 2यीशु और तेसरै च़ेलै भी तिऐ शादी दी थै औटाऐ औन्दै। 3ज़ेबी अंगुरा रौ रस खातम हुऔ, तैबै यीशु री आमै तेसलै बोलौ, “तिउंकै अंगुरा रौ रस नाईं रौ।” 4यीशुऐ तिंआलै बोलौ, “ओ आमा, तुमै मुलै कैलै बोलाई? इबी मैरौ आपु पौगड़ौ कौरणै रौ बौगत नाईं आशौ।” 5पर तेसरी आमै नुकरु लै बोलौ, “ज़ो कुछ़ सेऊ तुमुलै बोलालौ तिणी कौरेऊ।” 6तियै यहुदिऊ रै शुद्ध कौरणै रै रिवाज़ा रै मुताबिक पात्थरा रै छ़ौ बौड़ै घौड़ै थै छ़ाड़ै औन्दै, ज़ेथदी दुई चीन मण आशा थौ। 7यीशुऐ तिउंलै बोलौ, “घौड़ै दी पाणी भौरौ।” तिंउऐ सै घौड़ै टिब-टिबै भौरी गौऐ। 8तैबै यीशुऐ तिउंलै बोलौ, “आबै पाणी गाड़ीयौ रोटी चाणनै वाल़ै मुख्यै काऐ निऔं।” और तिंउऐ तिणौ कियौ, 9ज़ेबी रोटी चाणनै वाल़ै मुख्यै सेऊ पाणी च़ाखौ, ज़ो अंगुरा रौ रस बौणी गौ थौ, और तेसकै पौतौ नाईं थौ, कि सेऊ किदरु आशौ आ, पर ज़ेज़ै नुकरै पाणी गाड़ौ थौ, सेऊ ज़ाणा थौ तैबै रोटी चाणनै वाल़ै मुख्यै लाड़ौ औटाइयौ तेसलै बोलौ, 10“हर आदमी पैहलै आच़्छ़ौ अंगुरा रौ रस दिया आ और ज़ैबै लोग पीईयौ रौज़ा ई, तैबै दौख हौल़्कौ दिआई। पर तांइऐ आ आच़्छ़ौ अंगुरा रौ रस इबी झ़ांऊ छ़ाड़ौ औन्दौ।” 11यीशुऐ गलीला परदेशा रै काना गांवा दी आपणौ एज़ौ पैहलौ च़मतकार देखाइयौ आपणी महिमा पौगड़ौ कौरी और तेसरै च़ेलेउऐ तेस माथै विश्वास कियौ कि सौच़्च़ी एऊ मसीहा आ। 12तेथ बासिऐ यीशु और तेसरी आमा, तेसरौ भाई और तेसरै च़ेलै कफरनहूम गांवा लै डेवै और तिऐ कुछ़ दिना झ़ांऊ रौऐ।

परमेश्‍वरा रै घौरा कु सामाना बेच़णै वाल़ै गाड़नै

(मत्ती 21:12-13; मरकुस 11:15-17; लुका 19:45-46)

13यहुदिऊ रै फसह रै साज़ै रौ दीन नज़दीक आशणै वाल़ौ थौ और यीशु यरुशलेम शहरा लै डैऔ। 14और तिणीऐ परमेश्‍वरा रै घौरा दी बौल़द और भेरी और कबुतर बेच़णै वाल़ै और खरीदणै वाल़ै बोशै औन्दै देखै। 15तैबै तिणीऐ लोऊल़ी रौ (कोड़ौ) चाणियौ सारै भेरी और बौल़द परमेश्‍वरा रै घौरा कु गाड़ी गौऐ, और खरीददारा रै पैसै फोकी गौऐ, और ठेलै उल़टाई गौऐ। 16और कबुतर बेच़णै वाल़ेऊ लै बोलौ, “इऊं इदरा कु निऔं। मैरै बाबा रौ घौर व्यपारा रौ घौर नाईं चाणौ।” 17तेसरै च़ेलेऊ कै याद आशौ कि पवित्रशास्त्रा दी लिखौ औन्दौ आ, “मैरौ प्यार तैरै घौरा लै मुं भितै आगी बाशीऐ ज़ौल़ा आ।” 18एथ माथै यहुदिऊ रै मुख्यै लोगुऐ तेसलै बोलौ, “तू ज़ो एस कौरा ई ता आमुकै केज़ौ निशाण देखाल़ाई?” 19यीशुऐ तिउंलै ज़वाब दैऔ, “एस परमेश्‍वरा रौ घौर पोरु ढाल़ौ, और हाऊं एस चीन दिना दी चाणाऊ।” 20यहुदिऊ रै मुख्यै लोगुऐ बोलौ, “एस परमेश्‍वरा रै घौरा चाणना लै दुई बिऐ छ़ौ साल लागै ई, और का तू एस चिया दिना दी खौड़ौ कौरा ई?” 21पर तिणीऐ आपणै शरीरा रै बारै दी बोलौ थौ ज़ो परमेश्‍वरा रौ घौर आ। 22ज़ेबी सेऊ मौरै औन्दै मांझिया कु ज़िउंदौ हुऔ तेसरै च़ेलेऊ कै याद आशौ कि तिणीऐ एऊ बोलौ थौ। और तिंउऐ पवित्रशास्त्र और सेज़ौ वचन ज़ो यीशुऐ बोलौ थौ, मानी गौऐ।

यीशु लोगु रै मन ज़ाणा सा

23ज़ेबी यीशु यरुशलेम शहरा दी फसह रै साज़ै दी थौ, तेबी भौरी लोगुऐ सै निशाण ज़ो सेऊ देखाल़ा थौ देखीयौ तेस माथै विश्वास कियौ। 24पर यीशुऐ तिऊं कै इणै बोलणै रौ मौकौ नाईं दैऔ कि तिणीऐ मसीही रै हुणै री वज़ाह कु का च़ांई कौरणौ, कैलैकि सेऊ सब कुछ़ ज़ाणा थौ। 25तेसकै ज़ुरत नाईं थी कि आदमी रै बारै दी कोई गवाही दिआ, कैलैकि आपु ज़ाणा थौ कि आदमी रै मौना दी का सा?

Voafantina amin'izao fotoana izao:

यहुन्ना 2: BFZ-NT

Asongadina

Hizara

Dika mitovy