मत्ती 9

लकवे रे रोगिये जो चंगा करना

(मरकुस 2:1-12; लूका 5:17-26)

1फेरी यीशु इक्की किश्तिया च बैट्ठया कने नदिया ते पार अपणे तिस नगरा च आईग्या तिसच जे सै रैई कराँ था। 2तिस वगत किछ लोक लकवे रे इक रोगिये जो पाल़किया पर रखीने तिसले ल्याये। तिन्हांरा विश्वास देखीने यीशुये तिस लकवे रे रोगिये ने बोल्या, “हे पुत्र, हौंसला रख; तेरे पाप माफ हुईगे।” 3कने कई यहूदी शास्त्रियें अप्पूँ चियें गलाया, भई “ये माहणु त परमेशरा री निंध्या कराँ।” 4यीशुये तिन्हांरे मना रियां गल्लां जाणीने बोल्या, “तुहें लोक अपणे-अपणे मनां च बुरा बचार काँह करी रायें? 5जादा ठीक क्या? ये बोलणा, भई ‘तेरे पाप माफ हुये’, या ये बोलणा, भई ‘खड़ा ओ कने चली पौ।’ 6पर इस खातर भई तुहें जाणी लवा भई मिन्जो यनि माहणुये रे पुत्रा जो धरतिया पर पाप माफ करने रा अधिकार आ।” तिने लकवे रे रोगिये जो गलाया, “उट्ठ, अपणिया पाल़किया चक कने घरौ चली जा।” 7सै इकदम खड़ा हुया कने अपणे घरौ चलिग्या। 8लोक येढ़ा देखीने डरीगे कने परमेशरा रे गीत गाणे लगे तिने जे माहणुआं जो येढ़ा अधिकार दित्या।

यीशुये रा मत्तिये जो चुणना

(मरकुस 2:13-17; लूका 5:27-32)

9ऊत्थीते अग्गे बधीने यीशुये मत्ती नौंवां रे इक्की माहणुये जो चुंगी लेणे औल़े नाक्के पर बैठिरा देख्या कने तिसजो बोल्या, “मेरे सौगी औ।” इस खातर सै उट्ठया कने तिसरे पिच्छे चलीप्या। 10कने ताहली जे सै घरें रोटी खाणे बैट्ठया, तां मते सारे चुंगी लेणे औल़े कने पापी आईने यीशु कने तिसरयां चेलयां सौगी खाणे बैट्ठे। 11ये देखीने फरीसियें तिसरे चेलयां ने बोल्या, “तुहांरा गुरू चुंगी लेणे औल़यां ने कने पापियां ने सौगी खाणा कजो खां?” 12ये सुणी ने यीशुये तिन्हांने गलाया, “भले चंगयां जो नीं पर बमाराँ जो डाक्टरा री जरूरत हुआंईं। 13इस खातर तुहें जाईने इसरा मतलब सिक्खी लौआ, भई हऊँ बलिदान नीं चाहन्दा पर दया चाँह; काँह्भई हऊँ धर्मियां जो नीं, पर पापियां जो सदणे आईरा।”

उपवासा पर स्वाल

(मरकुस 2:18-22; लूका 5:33-39)

14फेरी बपतिस्मा देणे औल़े यूहन्ने रे चेलयां तिसले आईने बोल्या, “क्या वजह इ भई अहें कने फरीसी इतणा उपवास कराँ ये, पर तेरे चेले उपवास नीं करदे?” 15यीशु तिन्हांजो उदाहरण देईने ये दसणा चाँह, भई “क्या बरातिये, तदुआं तक जे लाड़ा तिन्हां सौगी आ, दुख मनाई सक्कां ये? पर सै दिन औणे भई ताहली जे लाड़ा तिन्हाते लग कित्या जाणा, तिस बगत सै दुखी हुणे कने उपवास रखणा। 16नये कपड़े री टल्ही पुराणे कपड़े पर कोई नीं लान्दा, काँह्भई सै टल्ही कपड़े ते होर किछ खिंजी लेईं, कने सै जादा फटी जां। 17नौआं अंगूरी रस पुराणियां चमड़े रिया थैलियां च नीं भरदे, काँह्भई येढ़ा करने ते सै फटी जाईयां, कने अंगूरी रस बगीने बिखरी जां कने मशकां बी खत्म हुई जाईयां; पर नया अंगूरी रस नई मशकां च भराँ ये कने सै दोन्नों बची रैईयां।”

मुईरी कुड़ी कने बमार जनाना

(मरकुस 5:21-43; लूका 8:40-56)

18यीशु तिन्हां लोकां जो ताहली जे ये गल्लां बोल्या इ कराँ था, भई यहूदियां रा इक मुखिया तिसले आया कने तिसले झुकीने विनती करदे हुये गलाया, “मेरी कुड़ी येब्बां इ मरी! तू चल्लीने जे तिसा पर अपणा हात्थ रखी दो, तां सै भीं ते ज्यून्दी हुई जाणी।” 19यीशु उट्ठीने अपणे चेलयां ने तिस सौगी चलीप्या। 20तित्‍थी इक जनाना थी तिसौ जे बारा साल्लां ते खून बगणे री बमारी थी, सै पिच्छे ते यीशुये रे नेड़े आई कने तिसरे कपड़े री कनारी छुई ली। 21काँह्भई सै छोणे ते पैहले अपणे मना च सोच्चीराँ थी, “जे हऊँ जरा बी इसरे कपड़यां जो छुई लुँ, तां बी मांह ठीक हुई जाणा।” 22मुड़ीने तिसाजो देखदे हुये यीशुये गलाया, “बेटी हौंसला रख; तेरे विश्वासे तिज्जो इसा बमारिया ते ठीक कित्या।” कने सै जनाना तिस इ पल ठीक हुईगी। 23ओतखा ताहली जे यीशु तिस मुखिये रे घरें पुज्जया, तां तिने देख्या भई शंख बजणे औल़े कने तित्थी कट्ठे हुईरे लोक कुड़िया रे मरने पर हल्ला करीराँ थे, 24फेरी यीशुये लोकां ने गलाया, “इत्थीते बाहर जावा, कुड़ी मरीरी नीं, पर ये सुत्ती री।” तिसरिया इसा गल्ला पर लोक यीशुये रा मजाक डवाणे लगे। 25फेरी ताहली जे लोक बाहर भेज्जीते, तां यीशुये कुड़िया रे कमरे च जाईने तिसारा हात्थ पकड़या, कने सै उट्ठीने बैठिगी। 26कने इसा गल्ला रा चर्चा सारे लाके च फैल्लीग्या।

दुईं अन्हेयां रियां आक्खीं च जोत पाणा

27यीशु ताहली जे तित्थी ते जाणे लगया, तां दो माहणु आक्खीं ते अन्हे तिसरे पिच्छे हाक पान्दे हुये चले, “ओ राजा दाऊद रे वंशज, अहां पर दया कर!” 28सै ताहली जे घरा रे अन्दर पुज्या, तां सै अन्हे तिसले आये, फेरी यीशुये तिन्हांते पुच्छया, “क्या तुहांजो विश्वास आ भई हऊँ तुहांजो ठीक करी सक्कां?” तिन्हें जबाब दित्या, “हाँ, प्रभु, अहें विश्वास कराँ ये भई तू अहांजो ठीक करी सक्कां।” 29फेरी तिने तिन्हांरियां आक्खीं ने छोईने बोल्या, “काँह्भई तुहें विश्वास कराँ ये भई हऊँ तुहांजो ठीक करी सक्कां इस खातर तुहां ठीक हुई जाणा।” 30कने सै दोन्नों अन्हे इकदम देखणे च सक्षम हुईगे, फेरी यीशुये तिन्हांजो चेतावनी देईने गलाया, “खबरदार, तुहें किसी ने नीं बोल्यों भई मैं तुहांरे खातर क्या कित्तीरा।” 31पर तिन्हे ऊत्थीते जाईने ये खबर तिस लाके रे चऊँ पासयां फैलाईती।

इक गुंगे जो चंगा करना

32ताहली जे सै अन्हे आदमी ऊत्थी ते जाईराँ थे, तां किछ लोक यीशुये ले इक गुंगे जो लेईने आये, सै गुंगा बुरीआत्मा रा सताईरा था, इस खातर सै बोल्ली नीं पान्दा था। 33ताहली जे यीशुए बुरीआत्मा जो तिस आदमिये चते बाहर कड्डीत्या, तां तिने गुंगे बोलणा शुरू करीत्या। फेरी इस पर लोकें चम्भा करीने गलाया, “इसते पैहले इस्राएल च येढ़ा कदीं नीं देख्या गया।” 34पर फरीसी गलाई कराँ थे, “येत बुरीआत्मां जो शैतान्ना रे मुखिये री सहायता ने बाहर कड्डां।”

यीशुये जो लोकां पर खेद

35फेरी यीशु कने तिसरे चेले गलील प्रदेशा रे बौहत सारे नगराँ कने गाँवां च गये कने तिन्हां रयां यहूदी सभा घराँ च उपदेश करदा, कने परमेशरा रे राज्जा री खुशखबरिया रा प्रचार करदा, कने हरेक किस्मा रियां बमारियां कने कमजोरियां जो दूर करदा रैया। 36यीशु ताहली जे कई लोकां जो देक्खां तां तिस्सो लोकां पर तरस आया, काँह्भई सै लोक तियां इ सताईरे कने मजबूर थे, तियां जे सै भेड्डां हुआं इयां तिन्हांरा जे कोई रखवाल़ा नीं हुन्दा। 37फेरी यीशुये अपणे चेलयां ने गलाया, “बौहत लोक सै जे मेरा सन्देश सुणने रे खातर त्यार ये सै तिस खेता साई ये सै जे फसला रिया बिजाईया खातर त्यार आ, पर मेरा सन्देश लोकां जो सुनाणे औल़े बड़े कम लोक ये। 38इस खातर परमेशरा ने प्राथना करा कने पुच्छा भई सै अपणिया फसला जो कठेरने कने मेरा सन्देश सुनाणे खातर बौहत मजदूर भेज्जी दो, तियां जे खेता रा मालक अपणे खेता रिया फसला जो कठेरने खातर बौहत सारे मजदूर भेज्जां।”

Voafantina amin'izao fotoana izao:

मत्ती 9: KFSNT

Asongadina

Hizara

Dika mitovy