Ruth 3
3
1Ma doppu ca turnau unni so soggira, ’ntisi da idda: Figghia mia, circhirrò, ca ti cuitassi, e farrò, ca tu putissi stari beni.
2Chistu Booz, cu li picciotti di lu quali ti juncisti ’ntra lu so locu, è parenti nostru, e sta notti spagghia l’ aria di l’ orzu.
3Lavati dunca, e allisciati, e mettiti li megghiu robbi, ca hai, e va ’ntra l’ aria. Nè ti lassari vidiri di l’ omu, finu ca nun avissi finutu di manciari e di viviri.
4Quannu poi si sarrà jutu a curcari, vidi lu locu unni dormi: vacci, scummigghia la cutra di la parti di li pedi, jettaticci, e statti aggucciata: iddu poi ti dirrà chiddu, chi hai a fari.
5Idda rispusi: farrò tuttu chiddu, chi mi dici.
6Scinniu unni era l’aria, efici tuttu chiddu, chi la soggira cci avia dittu.
7Ed avennu Booz manciatu e vivutu, e divintatu cchiù allegru, si nni jiu a dormiri vicinu a lu mazzu di li gregni. Idda si nni vinni ammucciuni, scummigghiau la cutra di la parti di li pedi, c si cci jittau.
8Ed eccu ca versu la menzannotti l’ omu si scutiu, e si turbau, vidennu ’na fimmina curcata a li so pedi,
9E cci dissi: Cui sì tu? Ed idda rispunniu: Iu sugnu Rut la to serva: stenni la to cutra supra la to serva, giacchì tu sì parenti.
10Ed iddu dissi: Biniditta sì di lu Signuri, o figghia. Cu chista tua ultima bontà hai superatu la prima: giacchì nun sì juta appressu a li giuvini, poviri o ricchi.
11Nun ti scantari dunca, ed iu farrò tuttu chiddu, chi mi dirrai. Già tuttu lu populu, chi abita dintra li parti di lu me paisi, sapi, ca tu sì ’na donna di virtù.
12Nè mi negu d’ essiri parenti; ma cci nn’ è ’n autru cchiù strittu di mia.
13Riposati sta notti: e fattu jornu, si chiddu ti voli pigghiari pri drittu di parintela, va beni: si poi nun vurrà, iu senza nudda difficultati ti pigghirrò, comu è veru lu Signuri. Dormi sinu a lu matinu.
14Durmiu dunca a li so pedi sinu ca durau la notti. Si livau poi prima ca l’ omini si vidissiru ’ntra li facci, e Booz cci dissi: Duna a cura, ca nuddu sapissi, ca vinisti ccà.
15E sicutau a diri: Stenni lu mantellu, cu lu quali sì cuperta, e tenilu cu tutti dui manu. Ed avennulu idda stisu e tinutu, cci misurau sei moggi d’ orzu, e cci lu carricau. Ed idda purtannusillu trasiu ’ntra la cità,
16E si nni jiu unni so soggira. La quali cci dissi: Chi facisti, figghia? Ed idda cci cuntau tuttu chiddu, ca dd’ omu cci avia fattu.
17E dissi: Eccu sei moggi d’ orzu, ca m’ ha datu, e mi dissi: Nun vogghiu, ca ti nni turnassi vacanti unni to soggira.
18E Noemi dissi: Aspetta, o figghia, finu ca videmu comu finisci la cosa; giacchì l’ omu nun si firmirrà ’nfinu ca nun avrà adimputu chiddu, ca prumittiu.
Voafantina amin'izao fotoana izao:
Ruth 3: SCN
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
First published in 1860 and 1861.