Lûqa 7
7
Îmanê Jew Yizbaşî
(Matta 8:5-13; Yûhanna 4:46-53)
1Îsay nê qisey pêro şêligî rê vatî ew bahdo da piro şi sûka Kefernahûm. 2Uja di jew yizbaşîyêndê eskerandê Romay bi, ew jew xizimkarê nê yizbaşî zî ci rê bol qedr bi, hima no xizimkar giran nêweş bi, mergî fek di bi. 3Senî ki nê yizbaşî xebera Îsay aşnawit, Yawudîyan ra çend merdimê pîlî riştî Ey hetek ki Ey ra reca bikerê ew O bîro xizimkarê ci bireyno. 4Nê camêrdî amey Îsay hetek, Ey ra bol reca kerd ew va: “No merdimêndo ercîyaye yo, ti recayê ey qebul kerê. 5Çiki o qewmdê ma ra hes keno ew nê sînagogê ma zî ey day viraşten.”
6Îsa înana pîya şi. Hima Îsa hewna keyedê ey nêresabi, nê yizbaşî embazê xo riştî vera Ey ew va: “Şirê, vajê: Begê mi, reca kena ezîyet meki, ez hend ercîyaye nîya ki ti bîrê keyedê mi, 7xora qandê coy mi xo ercîyaye nêdî ki bîra to hetek. Ti jû qisa vajê, bes o, a qisaya to xizimkarê mi reynena! 8Ezo zî emrî bin di ew emirdê mi di zî eskerî estê. Eki ez jewerî rê vaja ‘Şo!’, o şino, eki jewnay rê vaja ‘Bê!’, o zî yeno, ew çimhal ki ez xizimkardê xo rê vaja ‘Ney bik!’, o zî keno.”
9Îsay ki nê qisey aşnawitî, îmandê yizbaşî rê ecêb mend. Mileta ki Îsay dima ameyê, Îsay xo açarna hetê înana ew wuna va: “Ezo şima rê vana, no îmano winayin hewna mi Îsraîlî mîyan di zî nêdî!” 10Merdimê ki yizbaşî riştîbî, senî ki ageyray keye, dî ki xizimkar bîyo weş.
Îsa Gan Dano Jew Xortî
11Bahdo Îsa şi jû sûki, nameyê na sûk Nayîn bî. Telebeyê ey, camêrdî, cenî ew xeylê şêlig zî Ey dima bî. 12Hima ê amey kêberdê sûk hetek ki, a çeq di sûk ra cinaza jew merdimî ardê teber ki berê mezel kerê. Na cinazaya lajdê jû cenîyerda vîya bî ew jew lajê ci tenya bi. Sûk ra bol merdimî zî cenîyekera pîya bî. 13Rebbî senî ki na cenîyek dî, zerrîya ci ay veşê ew ay rê va: “Mebermi!” 14Bahdo şi hetê cinazaya ew destê xo na cinaza ser, wexta êyê ki cinaza wegirota, herunda xo di vinderdî. Îsay merdî rê va: “Xorto, ezo to rê emir kena, werz pay!” 15Wexta merdî xo kerd raşt û qisey kerdî ew Îsay o peyser da marda ci.
16Pêro tersa ra bî wişkî, înan Ellay rê şukur kerd ew veynda: “Mîyabeyndê ma ra pêxemberêndo gird vijya ew Ella bixo ame paştî bido qewmdê xo!” 17Îsay nê girweyê ki kerdî, na xebera ci heme cadê Yawudîye di ew çorşmedê ci di, înan ra bî vila.
Yehya Îsay Rê Xeber Rişeno
(Matta 11:2-6)
18Telebanê Yehyay zî nê girweyê ki bîyê, pêro resnaybî Yehyay.#7:18 Ê rojan di Yehya hewna newe kewtbi hepis. Nay sera Yehyay veynda di tenan telebandê xo 19ew ê riştî Rebbî hetek ki Ey ra pers kerê, vajê: “Oyo ki do bîyameyê, raşta O tî yê? Yazî ma do jewnay bipawim?”
20Nê telebey wirna amey Îsay hetek ew Ey rê va: “Yehyayo ki waftîz kerdo ma riştim ki to ra pers kem: ‘Oyo ki do bîyameyê, raşta O tî yê? Yazî ma do jewnay bipawim?’ ”
21A çeq di Îsay bol nêweşî ew êyê ki ezîyet antê, ê kerdê weş. Merdimê ki cinan tepiştîbî, ê merdimî cinan ra reynayê ew çimê bol koran zî kerdê roşnî. 22Îsay telebandê Yehyay rê va: “Şima tîya di çiçî aşnawit ew dî se, şirê nînan Yehyay rê vajê: Merdimê korî yê vînenê, fercî yê pay şinê, nêweşê cizamî yê benê pakî, merdimê kerrî yê aşnawenê, merdey ê werzenê ew feqîrî yê mijdîyana Ellay aşnawenê.#7:22 Bewnîrê kitabdê Yeşaya'y di 61:1. 23Kamo ki qandê mina nêguneno ero ew şîfe nêkeno, werrekê ey!”
Îsa Qalê Yehyay Keno
(Matta 11:7-19)
24Wexto ki telebeyê Yehyay uja ra abiryay şî, Îsay milet rê Yehyay sera qisey kerdî: “Wexto ki şima şîyê gem Yehyay hetek, şima çiçî pawitê? Şima vatê, qay şima do jew qamîşê bivînê ki o yo va di şaneyeno? 25Yazî vajê, şima şîyê çiçî bivînê? Şima qayilî bîyê jewerî çinado birîsimina bivînê? Şima zanê, merdimê ki çinayo winî vay danê xo ra ew zengîney mîyan di, ê winînî koşkan di roşenê! 26Vajê, şima çiçî pawitê? Jew pêxember? Winî yo se, ez şima rê nay vaja, o pêxemberî sera yo! 27Heqdê ey di verî ra winî vajîyabi:
‘Bewnî, ezo xeberdarê xo verdê to rişena ki
O to rê ray hadre kero.’#7:27 Bewnîrê kitabdê Malaki di 3:1.
28“Ez şima rê nay vaja, heme êyê ki cenîyer ra bîyê, înan mîyan di Yehyay sera kesna çinî yo. Hima nay bizanê, jewo ki Hukumdareyda Ellay d'o ew en werdîkek o, hewna o Yehyay zî sera yo.
29“Wexto ki qewmî pêroy hetanî tahsîldarandê ci zî, qiseyê Yehyay aşnawitîbî ew vatê ki raya Ellay raya raşt a, ew ê ameybî Yehyay hetek ki o înan waftîz kero. 30Ferîsîyan û Alîmanê Kitabana tenya reynayişê Ellay qebul nêkerdbi ew qandê coy zî waftîz nêbîbî.
31“Ez şima rê vaja, merdimê nikay zeydê çiçîya yê? Yazî çiçî manenê? 32Nê zeydê qeçkan ê, qeçekê ki çarşi di cadê mezatî di roniştê ew pêjewbînandê xo rê vanê: ‘Ma lûlî cenê, şima kay nêkerd, ew ma lorî kerd, şima nêbermay!’
33“Çiki Yehya ame, nan nêwerdê ew şerab nêşimitê, şima ey rê vanê ‘Cinin o!’ 34Naqor Lajê Însanî ame, werd û şimit, şima Ey rê zî vanê: ‘Hele bewnîrê, no nefsiz o, no serxoş o, embazê tahsîldaran û gunakaran o!’ 35Hima êyê ki zerrîya ci hîkmetda Ellay rê akerdîya, înan hemin di hîkmeta Ellay do biaso.”
Cenîya Gunakar Îsay Rê Hurmet Kena
36Jew Ferîsî Îsa dahwet kerd keyedê xo ki pîya nan bûrê. Îsa şi keyedê ey ew sifre di ronişt. 37Sûkda nê Ferîsî di jû cenîyênda gunakar bî ew heminan zanayê a gunakar a. Senî ki nay aşnawitbî ki Îsa nê Ferîsî rê bîyo meyman, ay jû şûşa ruwenê lewantî girot û amê keyedê Ferîsî. 38Îsay pey ra amê, lingandê ey ver di çok bî û bermê ew hersî rijnay lingandê Îsay ser. Nay sera ay porrdê xoya lingê Îsay kerdî wişkî, lewî nay lingandê Îsaya ew ruwendê lewantîya lingê Îsay ruwen kerdî.
39Ferîsîyo ki Îsa dahwet kerdo keyedê xo, xo bixo rê va: “Eki no merdim raşta pêxember bîyayê, Ey do bizanayê ki a kam bî, destê xo na Eya. Gerek Ey bizanayê na cenîyênda xirab a.”
40Uja di Îsay Ferîsî rê va: “Sîmon, gerek ez to rê çîyê vaja!”
Sîmonî va: “Vaj, mehlîmê mi!”
41Îsay va: “Wextê di, di merdimî benê, ê jew faîzcî#7:41 Yazî: faîzwer rê benê deyndarî, êdê jewerî panj sey tene perreyo sêmin o ew êdê ê bînî zî pancas teney o. 42Nê wirdina zî pêrşan ê ew nêşenê deynê xo bidê. Qandê coy no faîzcî deynê wirdina zî ci rê hîbe#7:42 Yazî: hîva keno. Nînan ra kamcî do faîzcî ra bol hes bikero?”
43Sîmonî va: “Ez vana, oyo ki deynê ci vêşî bi.”
Îsay va: “E, tî yê raşt vanê.” 44Îsa weyna cenîyeker ra ew Sîmonî rê va: “Tî yê na cenîyer vînenê? Ez ameya to rê meymaney, to aw mi nêdê ki ez linganê xo bişuwa. Hima na cenîyer lingê mi hersandê xoya şitî ew porrdê xoya zî kerdî wişkî. 45Ez ameya, to lew mina nêna, hima zeki ez ameya ki a ya lew nana lingandê mina. 46To ruwen seredê mi ra nêsawit, hima na cenîyer ruwenê lewantîyo ki vay o, a sawit lingandê mi ra. 47Ez to rê vaja: Gunayê ay bolî yê, ê ef bî, qandê coy a ya hendayê bol qedra mi zana ew mi ra hes kena. Kamo ki gunayê ci taynî yê ew ê ef bî, o zî tayn hes keno.”
48Bahdo Îsay cenîyeker rê va: “Gunayê to ef bî!”
49Meymananê bînan pêjewbînandê xo rê va: “No senî merdim o ki O yo gunayan zî ef keno?”
50Ew Îsay cenîyeker rê va: “Îmanê to ti reynaya, silameteya şo!”
Voafantina amin'izao fotoana izao:
Lûqa 7: diq
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.
