SENESI 13
13
Liliu o Apalamo ki te fenua
1Nee hake leva ia Apalamo mai Esipito ki te potu saute, ia ia mo tona ohoana, mo te u mea fuli ae nee ina mau, pea nee hake leva ia Lote mo ia. 2Nee lahi osi te u koloa o Apalamo: nee lahi osi tana faga manu, mo tana paaga, pea mo tana aulo. 3Nee ina taki leva tona fagona mai te potu saute o kaku ki Petele, o kaku ki te kogamea ae nee tuu ai tona falela i te kamataaga, i te vaha o Petele mo Ai, 4te kogamea ae nee tuu ai te aletale ae nee ina fakatuu i mua. I ai, nee faikole leva ia Apalamo i te huafa o te Eteleno.
Mavete a Apalamo mo Lote
5Ko Lote, ae nee kauga fagona mo Apalamo, nee ina toe mau foki ni faga ovi fafine, mo ni faga pipi, mo ni falela. 6Pea nee mole feauga te fenua ke na nonofo fakatahi i ai, koteuhi kua lahi osi ona koloa, pea nee mole kei feala ke na nonofo fakatahi. 7Nee malaga leva he ke i te u tagata tauhi manu a Apalamo mo te u tagata tauhi manu a Lote. I te temi aia, nee nonofo te kau Kanaane mo te kau Felesi i te fenua. 8Nee ui leva e Apalamo kia Lote: E au kole atu kia koe, ke aua naa i ai he fekeikei ia au mo koe, pe i te vahaa o aku tagata tauhi manu mo au tagata tauhi manu; koteuhi e ta tautehina. 9Pe e mole tuu te fenua katoa i ou mua? Koia mavae la koe ia au: kapau e ke alu ki te fahai hema, pea e au alu anai ki te fahai matau; kapau e ke alu ki te fahai matau, pea e au alu anai ki te fahai hema. 10Nee hiki leva e Lote ona mata ki oluga, pea nee sio leva ia ia ki te fenua o te Solotane ae nee laulelei katoa pea nee fakavai katoa. O kaku ki Tesoa, ia mua o te maumaui o Sotoma mo Komola e te Eteleno, nee hage ia ko he oloto a te Eteleno, nee hage ia ko te fenua o Esipito. 11Nee filifili leva e Lote te fenua laulelei katoa o te Solotane maa ia, pea nee ina hiki leva tona nofoaga ki te potu esite. Pea nee na mavete leva i ai. 12Nee nofo leva ia Apalamo i te fenua o Kanaane; pea nee nofo leva ia Lote i te u kolo o te fenua laulelei, pea nee ina fakatuu leva ona falela o kaku ki Sotoma. 13Nee agakokovi te hahai o Sotoma, mo agahala lahi ki te Eteleno.
Fakapapau kia Apalamo
14Nee ui leva e te Eteleno kia Apalamo, i te osi o te mavae a Lote ia ia: Hiki ou mata, pea ke sio mai te kogamea ae e ke nofo ai ki te potu noleto mo te potu saute, ki te esite mo te potu uesite; 15koteuhi ko te fenua katoa ae e ke sio ki ai, e au foaki atu anai ia kia koe mo tou hakoga o tuumau. 16E au fakaliliu anai tou hakoga ke lahi o hage ko te efu o te kele, pea kapau e fealagia e he tagata te lau o te efu o te kele, pea e lau anai tou hakoga. 17Tuu ki oluga, o foli takai te fenua i tona loa mo tona laulahi, koteuhi e au foaki anai ia kia koe.
18Nee hiki leva e Apalamo ona falela, pea nee alu leva ia ia o nofo i te ulu sene o Mamele, ae e ovi ki Hepelone. Pea nee ina fakatuu leva i ai he aletale ki te Eteleno.
Voafantina amin'izao fotoana izao:
SENESI 13: WB2011
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland