Matthai 3
3
Tiynawtuv Johan Phungrina
1Ca cuo ning ca tiynawtuv Johan ca Judea ruochung lie kha a vya luo te, 2“Nama suena kha a ngiepachiy ung, tahematapakieca Vuoruo Pena na a ngie tli,” tapata phung a ri. 3Profet Isaiah ta,
“Ueryi suokha ca ruochung lie kha u te:
‘Abyipa luopuv kha sapa tie ung,
a luopuv kha padang tie ung’” tapata a za ri tiyta
Johan hingna a za ta khing hnuochuopa ta a cuo.
4Ama ca kala-uv hming ta taapa caw kha a tue te a se lie kha savang tesaw aa saw, a sa ca khawbyapa hne khyitiy ta a cuo. 5Jerusalem taa hne Judea pe bangkhuo taa cuose, Jordan cavaa kie khyta bangkhuo taata cawsaa zaw kha ama'a luo ca pya yite, 6ama suena kha a phu yite Jordan cavaa lie kha tiy a naw yi.
7Cuorasala Johan ta Farasi ming hne Sadusi ming zaw tiy a naw riypata amaa vawpa kha a hmung tiyta, “Pariy ciypathla zaw, a vya tlung riypa Khazing hihaana chung taata a ruo riypata ahungma a raaringna caa pi yi? a ta yi. 8Sue a ngiepachiyna hne aa phuvpa hringzya kha hnyi tie ung. 9Niema hne niema kha, ‘Malie a sa a vyatuv Abraham na ma hnyi tapata rue kha ung;’ ica chang yi: Khazing ca hing alung chung taahingta Abraham samingsahlaa zaw kha a sa khu yi. 10Ahryi ca thingkungpa thabaw lie pahlaa pacie pata cuote thyiphaa a pathyi lipa thingkungpa bangkhuo ca hu pata myi chung luo thawpa ama cuo aa.
11Kama ca nama sue a ngiepachiy-napa paluosana ta tiy ta#3:11 Or tiy chunglie tiy ica naw yi, cuorasala kama laata a le viepapaa ca i hnang taata a vaw'a te kama hing ca a phyipakaw a cyipale riypa tahmuo a tla va ang. Ama ta Thlaapa Pathe hne myi ta tiynawnapa aca pi'a yi. Ama ca kama laata a le vie karaa. 12A kuv lie sazinapa pahraa kha a cyi te sa kha a zi diy aa. A chuo ca be luo kha raw'a te asiypa ca a thiy buo lipa myi luo kha a hmaw aa,” a ta.
Zingsuv Tiy-anawna
(Mar 1:9-11; Luk 3:21-22)
13Capa cuo ning ca Zingsuv ca Galilee taakhata Jordan cavaa luo kha Johan kuv ta tiy a naw riypata aa vaw. 14Cuorasala Johan ta, “Kama hingna nama kuv ta tiy a naw riypa a cuo ang, nama tlaku ma kama'a luo a vaw ciy?” a ta.
15Cuorasala Zingsuv ta, “Ata hing ca hinghaahingta cuo thluo se, tahematapakieca a dangna bangkhuo a tlingna riypata hinghaahingta ma tue riypa hing a phapa tana a cuo,” a ta. Cacuonakawta Johan ca a naa a tla.
16Zingsuv ca tiynawna hmung te tiy chung taata a kya thu pahne ta vuoruo kha sungkha ta a pahaw te Khazing Thlaapa kha thuvruv haata zaa zu te a cunglie a zaa cang pakha a hmung. 17Vuoruo taata ueryi suokha ta, “Hingpapaa hing i duepa i Saacapaa tana a cuo, a cunglie hing i palung a tling,” a ta.
Voafantina amin'izao fotoana izao:
Matthai 3: LNT1
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
New Testament in Chin Lautu © Bible Society of Myanmar, 2015.
