Luk̆a 9
9
Yesok Vit̆ojur Elçi Muşis Dulya Meçams
1Yesok Vit̆ojurepes ducoxu, hentepes mteli ç̆ink̆ape gamaonu do zabunepe ok̆auşeni menceli do xeʒala komeçu. 2Uk̆ule Ğormotişi Mapoba ognapinu do zabunepe ok̆auşa mendoşku. 3Yesok hentepes “Gzaşeni mutu mot ezdimt, bigati, t̆urvati, kovaliti, parati do gokturuşeni meşakunaleti. 4Nam oxorişa amaxtatna, noğaşen igzalatşakis hem oxoris dodgitit! 5Tkva na va gik̆abulespe, noğa mutepeşişen igzalamt̆atşk̆ule, hamuşi noz̆iremi ivas-ya do, k̆uçxe tkvanişi let̆a geipatxit!” 6Hentepeti gzas kogedgites. Oput̆eşen oput̆e gulurt̆es, k̆at̆a svalepes moşletinuşi k̆ai ambai duvaizes, zabunepe dok̆aes.
7Galileaşi mapa İrodik mtel hantepe ognuşi gak̆virdu. Hemuşeni ki, bazi k̆oçepek ‘Yani ğuraşen edgitu’-ya zop̆ont̆es. 8Bazepekti, ‘İlia keçkindu’-ya, çkvapekti ‘Ar mcveşi ambayoci ğuraşen edgitu’-ya zop̆ont̆es. 9İrodik, “Yanişi dudi ma mooboç̆k̆orapi do hak̆o ambaepe na bognam ham k̆oçi mi ren?”-ya do Yesoşi oz̆iramuşeni gza gorumt̆u.
Yesok Xut Şilya K̆oçi Oz̆ğams
10Elçepe goiktesşk̆ule na ves k̆at̆a mutxani Yesos duʒ̆ves. Uk̆açxe Yesok xvala hentepe elik̆atu do Vitsaida na coxons ar noğas kelianes. 11Mara xalk̆ik haya ognuşk̆ule hemus ek̆aonu. Yesok hentepes k̆aobate eʒ̆agu do Ğormotişi Mapobaşeni up̆aramitu, zabunobaşen moçitu na uk̆oremt̆upe dok̆au.
12Lumci k̆ele Vit̆ojurepe moxtes do Yesos, “Xalk̆i koxuşkvi, idan do gomtepes na ren oput̆e do merzepes onciruşeni sva do oç̆k̆omale koz̆iran, hemuşeni ki, uk̆oçeli ar svas boret”-ya uʒ̆ves.
13Mara Yesok, “Hentepes oç̆k̆omale tkva komeçit”-ya uʒ̆u.
“Çku xvala xut kovali do jur çxomi miğunan, xalk̆işeni oç̆k̆omale eç̆opumuşa çku bidati?”-ya do k̆itxes. 14Hek xut şilya k̆onari k̆oçi kort̆u.
Yesok mamguralepes, “Xalk̆i jureneçidovit-jurneçidoviti ok̆ortit do kok̆oxunit”-ya uʒ̆u.
15Mamguralepekti haşo doves do kok̆oxunes. 16Yesok xut kovali do jur çxomi keç̆opu, ʒa k̆ele mendaʒ̆k̆edu do ixvamu. Uk̆ule ok̆ortu do xalk̆is gortuşeni mamguralepe muşis komeçu. 17Mtelik iz̆ğesşa oç̆k̆omes. Dido oç̆k̆omaleti gyoskides. Na gyoskidespeşen vit̆ojur k̆alati dik̆orobu.
P̆et̆rek Xrist̆e İçinams
18Ar ndğas Yesok xvala-xvala ixvamamt̆u. Mamguralepeti muşi k̆ala rt̆es. Yesok hentepes, “Xalk̆ik ma mi mşinums?”-ya do k̆itxu.
19Hentepek: “Mavaft̆ize Yaniti zop̆onan do bazepek İlia, majuranepekti ar mcveşi ambayoci ğuraşen edgituti zop̆onan”-ya uʒ̆ves.
20Yesok hentepes, “Tkva mu zop̆ont, ma mi bore?”-ya do k̆itxu.
P̆et̆rek hemus, “Si Ğormotişi Xrist̆e re”-ya uʒ̆u.
21Yesok, “Haya mitis mot uʒ̆umert”-ya do andu.
Ğuraşen Edgituşi Ambai
22Uk̆ule Yesok haşo tku: “K̆oçişskiris dido nʒ̆orasen. Tişinerepe, P̆ap̆aşumçanepe do Maç̆aralepek hea var moik̆ardanen, oğurinanen mara masumani ndğas ğuraşen edgitasen.”
23Uk̆ule mtelis “Ma na memaonasen k̆oçi, ti muşis gaʒ̆k̆as. K̆at̆a ndğas st̆avro muşi moik̆idas do ma ek̆emaonas”-ya. 24“Şuri muşi moşletinu na unon, hea gundunasen do şuri muşi çkimişeni na gundunasenti hea moşletinasen. 25Ar mitik, mteli kiana komogas do şuri muşi kogundunasna, mus apelen? 26Çkimden do çkimi notkvamepeşen oncğore mot gaert̆an. Ar mitxanis oncğore davasna, K̆oçişskiristi; muşi, baba muşişi do ʒ̆k̆onda melaikepeşi didobate moxtasşk̆ule, hem k̆oçişen oncğore avasen. 27Mtinala muşi giʒ̆umert, hak na dginanpeşen, Ğormotişi Mapoba var z̆iraşakis na var ğuranen mitxanepe korenan.”
Yesoşi Oʒ̆k̆omile İkturen
28Yeso, hantepe tkuşi ovro k̆onari ndğaşk̆ule P̆et̆re, Yani do Yak̆ovi k̆ala oxvamuşeni germaşa keşaxtu. 29Yesok ixvamet̆uşi p̆ici muşişi oʒ̆k̆omile daktiru. Dolokunu muşi divaluk̆osteri dikçandu. 30Ham oras jur k̆oçi hemu k̆ala op̆aramitus kogyoç̆k̆es. Hentepe Mose do İlia rt̆es. 31Hentepe didobate eçkindes do Yeso Yeruşalimis jin na extasenşi ip̆aramitamt̆es. 32P̆et̆re do majuranepes nciri gyadvesdort̆un. Mara ncirişen gok̆uʒxesşk̆ule Yesoşi didoba do hemu k̆ala na ok̆odginan jur k̆oçi kaz̆ires. 33Hantepe Yesoşen ok̆iʒ̆k̆ert̆esşk̆ule P̆et̆rek Yesos, “Mance çkuni, çku hak na bort̆it dido k̆ai ivu! Sum tenta kodobdgat: Ar skanişeni, ar Moseşeni, arti İliaşeni.” Mara mu zop̆ont̆u musti var uçkit̆u.
34P̆et̆rek hantepe zop̆ont̆uşk̆ule ar mp̆ula komoxtu do hentepes komatu. Mp̆ula matvesşi aşkurines. 35Mp̆ulaşen ar xoma komoxtu, “Haya çkimi Skiri ren, goşaoneri ren. Hemus nuucit!”-ya uʒ̆u.
36Xoma distibuşi Yeso xvala na rt̆u kaz̆ires. Mamguralepek haya na z̆ires irişen dompules do hem ndğalepes na z̆irespe miti k̆ala var ip̆aramites.
Yesok ar Bere Ç̆ink̆aşen Moşletinams
37Majurani ndğas hentepe germaşen kogextes. Dido k̆oçepek Yesos eʒ̆ages. 38Hekoni ar k̆oçik, “Mamgurapale”-ya do ducoxu, “Goxveʒ̆ebur, biç̆i çkimi ar koz̆iri, ma ar bere mionun. 39Ar pinti şurik hea dokaçams, heati birdemşi gamibecğams. Ç̆ink̆ak nuk̆uşa popoci moğaşa xvantums. Zorişa naşkumt̆aşa xuras pupulepe aven. 40Hea gamaonuşeni mamguralepe skanis boxveʒ̆i, mara var axenes.”
41Yesok haşo tku: “E uceru do gza gonduneri nesli! Çkva nak̆o oras tkvani k̆ala dobdgita do mebuxonda? Skiri skani haşo komooni!” 42Bere Yesoşi k̆ele mulurt̆uşi ç̆ink̆ak bere let̆as kogyoç̆k̆idu do doxvantu. Mara Yesok pinti şuris duperxu, bere dok̆au do baba muşis komeçu. 43Do iri-xolo, Ğormotişi didoba do mskvanobaşa goişaşu.
Yesok Ğuraşen na Edgitasenşi Ambai Xolo Meçams
İri, Yesok na vu mteli mutxanepeşeni goişaşesdort̆un. Yesok mamguralepe muşis, 44“Ham nenape çkimis k̆aite uci meçit”-ya uʒ̆u. “K̆oçişskiri, k̆oçepeşi xes niçinasen.” 45Mara ham nena var oxoʒ̆ones. Nena mot oxoʒ̆onamt̆an-ya do, mu itkven, hentepeşen dimpulinu. Hentepes, Yesos ham nenaşeni, mutu ok̆itxuşa aşkurinert̆es.
Mtelişen Didi Mi Ren?
46Mamguralepek, “Çkunden namu çkva didi boret?”-ya do ok̆op̆aramitus kogyoç̆k̆es. 47Yesok, hentepes gurepes mu uğunan hea oxuʒ̆onamt̆u, ar ç̆ut̆a bere kelik̆açu. 48Do hentepes haşo uʒ̆u: “Miti ha bere, çkimi coxoşeni k̆abuli dovasna mati k̆abuli mikoms, ma na mik̆abulasen, ma na momocğonuti k̆abuli ikoms. Tkvani doloxe eni ç̆ut̆a miti ren, eni didi hea ren.”
49Yanik haşo ek̆untxozu, “Mance çkuni, skani coxote ç̆ink̆a na gamionams ar mitxa komaz̆ires, mara çkuni k̆ala, si na var ek̆egoumt̆uşeni hemus kogolobudgitit.”
50Yesok, “Hemus mot goludgiturt!”-ya “Tkva na var gologidginan, tkvani k̆ala ren.”
Samarurepes Yeso var Unonan
51Ʒaşa na eizdinasen ora moxoluşi Yeso Yeruşalimişa oxtimuşeni gzas kogedgitu. 52Ʒ̆oxle muşişen maambaepe mendoşku. Hantepek Yesos buxazirat-ya do Samarurepeşi ar oput̆es kamaxtes. 53Mara hentepek Yeso var ik̆abules. Hemuşeni ki, Yeruşalimiş k̆ele ulurt̆u. 54Mamguralepe muşişen Yak̆ovi do Yanik haya az̆iresşk̆ule Yesos, “Mance çkuni, hantepe eç̆k̆odinuşeni ʒaşen daçxuri geboşkvapat, ginoni?”-ya uʒ̆ves. 55Yeso goiktu do hentepes duperxu. 56Do uk̆açxe arçkva oput̆eşa mendaxtes.
Yesos Ek̆aonu
57Gzas ulurt̆esşk̆ule ar k̆oçik Yesos, “Si soti idare, mati ek̆egaonare”-ya uʒ̆u.
58Yesokti hemus, “Mk̆yapus ğorma, k̆inçepes obğe kuğunan, mara K̆oçişskiris ti na meşiğasen ar svatina var uğun”-ya uʒ̆u.
59Çkva mitxanis, “Ma ek̆emaoni!”-ya uʒ̆u.
Mara k̆oçik, “E Mance çkimi, ma izni momçi, ipti bida do baba çkimi let̆as komepça”-ya uʒ̆u.
60Mara Yesok hemus: “Naşkvi ğurerepe! Mutepeşi ğurerepe mutepek doxvan. Si idi do Ğormotişi Mapoba ognapi”-ya uʒ̆u.
61Arçkva mitxanik, “Mance çkuni, mati si ek̆egaonare, mara izni momçi, ipti lavoni çkimi k̆ala dobixelala”-ya uʒ̆u.
62Yesok hemus, “Oxonaleşi maç̆a ak̆nasşk̆ule na ek̆iʒ̆k̆edams, Ğormotişi Mapobas var nomskun”-ya uʒ̆u.
Voafantina amin'izao fotoana izao:
Luk̆a 9: LZZ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Laz Luke © Bible Society in Turkey (Kitabı Mukaddes Şirketi) 2020
