Ubwandilo 26
26
Ịsịhaka ali nkāja kā Gelali
1Po papo lelo jilinkugwa injala nkị̄su, bo mụmo jāgwilị̄le ulutasị lula nkabalilo ka Abụlahamụ. Po papo Ịsịhaka alinkusāma ukubūka ku kāja akakulūmba ka Gelali, kwa Abịmelekị, umalafyale gwa ba Fịlịsịtị. 2Umwene UNTWA alinkunsetukila alinkummbūla alinkuti: Komma ukwịkilila ukubūka nkị̄su kya Egịpịtị gwịtūgalege nkị̄su iki nịkukubūlaga jujune. 3Lilino tāsị ujege nhēsya nkị̄su kikiki, nịkujaga nanụngwe, kangi nịkukusajaga; namanga nịsakukupaga ugwe pamopēne na ba nndujụ̄ngụ lwako ifị̄su fyosa fịfịfị. Nịsakulupelaga lwa maka ulufị̄ngo ulu nāfị̄ngịle nugūso Abụlahamụ. 4Nịsakubasajaga aba nndujụ̄ngụ lwako, bịsakujaga bo sị ndōndwa sya kumwanya, kangi nịsakubapaga ifị̄su fyosa fịfịfị. Nifịkolo fyosa ifya nkị̄su fisakusajilịgwaga mmyabo. 5Nịsakubasajaga papo Abụlahamụ āmbilikaga une nukukōnga amasyu gāngu. Ni ngomēlesyo syangu, nubulōngi bwangu ni ndagilo syangu.
6Po papo Ịsịhaka alinkujenga nkāja ka Gelali. 7Bo abāndu ba nkāja kala bịkunndālūsya isya nkasị, umwene alinkubāmụla alinkuti: ịlūmbu gwangu. Namanga ātị̄laga ukubabūla ukuti nkasị gwangu; alinkwịnogona ukuti pamo lumo bisakūngoga pa nōngwa ja Lebeka; namanga unkị̄kulu jujuju āli nnụnụ fị̄jo. 8Ịsịhaka agonịlemo fị̄jo nkāja kala kala, Abịmelekị, umalafyale gwa ba Fịlịsịtị, alinkukēta pānja ukufụma mbwasị bwa nyụmba, alinkummbona Ịsịhaka ịkukịna na Lebeka unkasị. 9Po papo Abịmelekị alinkummbilikila Ịsịhaka, alinkummbūla alinkuti: Kēta, uju nkasịgo nalolị; nōngwa ja fịkị gwajobaga ukuti ịlūmbugo? Umwene Ịsịhaka alinkummwamụla alinkuti: Papo nịnogonaga ukuti lumo bịsakūngoga linga mbabūlịle ukuti nkasị gwangu. 10Abịmelekị alinkuti: Syo nōngwa nngị isị utubōmbị̄le uswe? Kēta lumo angali mụmo jumo nkati mmbāndu bāngu agonịle nagwe, po lelo twajaga ni nōngwa, po gwajaga jo ugwe gwe utusofị̄fye. 11Buno buno lelo, Abịmelekị alinkubasoka abāndu bōsa alinkuti uju linga ammbōmbị̄le sịmo īmbị̄bị umụ̄ndu uju pamo unkasị, amanyege ukuti bo gwakugogịgwa.
12Po papo Ịsịhaka alinkulima imịgūnda nkị̄su kila, alinkufyaga ifyakulya ifị̄ngị fị̄jo nkyinja kila kila, po papo Kyala alinkunsaja. 13Umụ̄ndu uju alinkuja nkabị, alinkōngelapo ukubāla alinkuja nkulūmba fị̄jo. 14Alinkuja ni ng'ōsị, ni ng'ōmbe kangi na bāmbōmbo bā bị̄ngị, po papo aba Fịlịsịtị balinkummbikila ubūfị. 15Po papo balinkusyila numfụ ifisịba fyake ifị bākūmbịle ababōmbị ba Abụlahamụ ugwịse, bo alịko kubūmị. 16Po papo umwene Abịmelekị alinkummbūla Ịsịhaka alinkuti: Sokamo mmyitu mụno, papo uli gwa maka fị̄jo ukutukīnda uswe.
17Buno buno Ịsịhaka alinkwepukamo, alinkwakujēnga amatēmbe gāke mụntebēla gwa Gelali mo alinkwịtūgala. 18Alinkufịkūmba kangi ifịsịba fya mīsi ifị fyakūmbị̄gwe mmasịku ga gwịse Abụlahamụ; namanga aba Fịlịsịtị bāfịsyilị̄le bo afwịle Abụlahamụ; umwene Ịsịhaka bo afịsyulịle alinkufịpa ifịsịba fịla īngamụ sị̄syo ugwịse āfịpēle mbwandilo. 19Bo ababōmbị ba Ịsịhaka bịkukūmba ikisịba kimo ndusōko balinkujāga inyị̄buko pāsi. 20Po papo abatị̄mị ba nkị̄su kya Gelali balinkwanda ukulwa na batị̄mị ba Ịsịhaka, balinkuti: Amīsi aga gītu. Umwene Ịsịhaka alinkukipa ikisịba kila īngamụ ja Eseke (Kisiba kya Lukāni) papo abāndu balwaga nagwe. 21Kangi balinkukūmba ikisịba ikīngi, lolị kyope balinkulwilanịla nagwe, buno buno kyope alinkukipa īngamụ ja Sitina (Kisiba kya bukalale). 22Alinkusōkapo pala pala, alinkwakukūmba ikisịba ikīngi; kyo kukālipo ukulwilanịla, buno buno alinkwenda nukukipa īngamụ ja Lehobotị (Bwabuke) alinkuti papo UNTWA atupēle ubujo, lilino po tukubālaga nkị̄su.
23Bo asāmịle pa bujo bula, alinkufyuka ku Bēlị-syeba. 24Po papo UNTWA alinkunsetukila ikilo kikyo alinkuti: Jo une Kyala gwa gūso Abụlahamụ, ungatetemaga, buno ndi nanụngwe. Nịsakukusajaga kāngi nukubabāsya aba nndujụ̄ngụ lwako, panōngwa ja mmbōmbị gwangu Abụlahamụ. 25Po papo Ịsịhaka alinkwenda nukujēnga ikigemo kya kwịkemēkesyapo, alinkumpa Kyala ilịkemo, alinkuti ni hēma jāke alinkujenga pāpo. Ababōmbị bāke balinkukūmba ikisiba pala pala.
Ulwịtikano lwa Ịsịhaka na Abịmelekị
26Po papo Abịmelekị alinkwịsa kukunkēta Ịsịhaka ukufụma ku Gelali, alinkulōngosanịa na Ahusati ulịfụmụ gwake, na Fịkolị unndōngosịi gwake unkulūmba gwa bwịte. 27Umwene Ịsịhaka alinkubalālūsya alinkuti: Mụbīngilịle fịkị kuno? Kēta mwalimbēngịle une, kangi mwalingagịle kumyinụ? 28Abēne balinkuti: Tusyagēnịe fị̄jo isya kuti UNTWA ali nanụngwe, buno buno twịnogwịne ukuti twịsetusajane. 29Tukulōnda ukuti ufị̄nge ulufị̄ngo ulwakuti utịsakutubōmbelamo sịmo isya kilugu, bo mụmo na nụswe tukakubōmbelamo sịmo isya kilugu, lolị tulinkubabōmbela sị̄nụnụ ndupu kangi tulinkukusịndikila ndutēngāno. Lilino uli mụ̄ndu uju Kyala ansajịle. 30Po papo Ịsịhaka alinkubīka ulusekelo, alinkubapījila ịfīndu balinkulya nu kunwa. 31Balinkusụmụka nulubūnju fị̄jo; Ịsịhaka na abịmelekị, balinkufị̄nga ulufị̄ngo uju kunnịne uju kunnịne. Unwene Ịsịhaka alinkubasịndikila balinkulagana ndutēngāno. 32Mwịsịku lilyo po ababōmbị ba Ịsịhaka balinkwịsa balinkummbūla isya kisịba iki bākūmbịle balinkuti: Tugāgịle amīsi. 33Umwene alinkukipa ikisịba kila īngamụ ja Sịba; jo nōngwa iji na ku lilino kuno īngamụ ja kāja kala jo Bēlị-syeba.
Abakasị ba Esabu abā kikolo ikīngi
34Bo Esabu ali nifyinja amalōngo mana (40) alinkummwega Jụlịti, umwana gwa Beli ugwa nkikolo kya ba Hịtị, ukuja nkasị, kangi alinkummwega Basematị, umwana gwa Elonị, ugwa kikolo kya ba Hịtị. 35Abakị̄kulu bababa balinkubapelela fị̄jo ubusụlụmanịe ba Ịsịhaka nu nkasị Lebeka.
Voafantina amin'izao fotoana izao:
Ubwandilo 26: NYB96
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyakyusa Bible © Bible Society of Tanzania, 1996.