Ubwandilo 22
22
Kyala ịkunndagila Abụlahamụ ukunsōsya Ịsịhaka ukuja ịkemo
1Panyụma pali sịsịsị, Kyala alinkunngela Abụlahamụ, alinkummbūla alinkuti: Abụlahamụ: Umwene Abụlahamụ alinkummwamụla alinkuti: Une ndi apa Malafyale. 2Kyala alinkummbūla alinkuti: Umwegege umwanāko Ịsịhaka jumojwene ntiga; uju unnganịle ubūkege nagwe kukị̄su kya Molija; kula kula pa Kyamba kimo iki nịsakukunāngisya, ko ukị̄kemēsyege kumyangu umwanāko ukuti ajege ịkemo ilyokye. 3Po papo lelo Abụlahamụ alinkutemēlela nulubūnju alinkutendekesya ifya kutūgalila pa mbụ̄nda jāke, alinkummwega umwanāke Ịsịhaka na babōmbị bāke babili, alinkumenya īmbabu sya ịkemo; alinkusụmụka ukubūka kubujo bubo Kyala ālimmbūlịle. 4Pị̄sịku lya butatu, Abụlahamụ alinkukēta, alinkukibona ikyamba kubutalị. 5Popāpo alinkubabūla ababōmbị bāke alinkuti: Mụje papapa ni mbụ̄nda, lolị une nu mwanịke tụkubūka kula kukwịkemēsya; tukwakwịsa kangi: 6Alinkwega imbabu alinkuntwika umwanāke Ị̄shaka, umwene Abụlahamụ, alinkukōlela umōto nulūbo. Balinkulōngosanịa bo babīli ukubūka ku kyamba 7Po papo Ịsịhaka alinkunndālūsya ugwịse alinkuti: Gwe tāta: Umwene alinkummwamụla alinkuti: Jobaga mwanāngu. Umwanike alinkuti: umōto ni mbabu fyo tulinafyo, akang'ōsị ka kwịkemēkesya ko kali kūgu? 8Abụlahamụ alinkuti: Gwe mwanāngu, kyala ịkwakutupa akang'ōsị kakwịkemēkesya. Po papo balinkubūka injila jābo.
9Abụlahamụ alinkujenga papo ikigemo kya kwịkemēkesyapo, alinkubīkapo imbabu. Po papo alinkumpịnya umwanāke Ịsịhaka alinkunndāmbalika pa kigemo kya kwịkemēkesyapo. 10Abụlahamụ alinkukwaba ulūbo ukuti ammbōle umwanāke. 11Lolị ugwandumị gwa Kyala alinkummbilikila ukufụma kumwanya alinkuti: Abụlahamụ! Abụlahamụ alinkuti: Une apa Malafyale. 12Po papo ugwandumị gwa Kyala alinkuti: Unganngogaga umwanịke, ungammbōmbelaga nasịmo, lilino po mmēnye ukuti kuntị̄la Kyala nalolị, papo ukakāna ukūmba une umwanāko jumojwene ntiga. 13Po papo Abụlahamụ alinkukelenganịa alinkujibona īng'ōsị īmbōngo kūnyụma kumyake, jị̄kolịle īmbēmbe nkisyanju. Jo alinkubūka alinkwakujēga īng'ōsị jila; alinkwịkemēsya lilinkuja ịkemo ilyokye mbujo bwa mwanāke. 14Abụlahamụ alinkubupa ubujo bula īngamụ ja “Jehobajile” kokuti Kyala ikupa. Kifwene bo mụmo abāndu bịkujobela na kulilino kuno, ukuti Nkyamba kya NTWA fịkwagịgwaga.
15Umwene ugwandumị gwa NTWA jo alinkunkōlela Abụlahamụ ulwa bubili ukufụma kumwanya alinkuti: 16UNTWA ịkuti njīgịle ulujīgo ukuti nịsakukusajaga ugwe, papo usịbōmbịle sịsịsị, ukakāna ukūmba une umwanāko uju ali jumojwene ntiga. 17Nịsakukusajaga nalolị kangi nisakubabāsyaga aba nndujụ̄ngụ lwako, bịsakujaga bo sị̄ndōndwa sya kumwanya, kangi bo gunsānga gwa kwa sūmbi. Abākikolo kyako bịsakubatolaga abalugu bābo. 18Kangi ifịkolo fyosa ifya bāndu bankị̄su fịsakusajilịgwaga mụ mmyako papo usị̄tị̄ke isị ngubūlịle. 19Umwene Abụlahamụ alinkubūka kuno bālịko ababōmbị bāke, po papo bōsa balinkugomoka ukubūka ku Bēlị-syeba kuno Abụlahamụ ājēngịle.
Aba nnyụ̄mba ja Naholị
20Bo pagonịlepo, balinkummbūla Abụlahamụ ukuti: Mịlịka ampāpị̄le abāna ugwamyinụ Naholị. 21Usị ugwakipanda gwake, Busị unnụgụna gwa Usị na Kimwelị, ugwịse gwa Alamụ. 22Kangi na Kyesendi, na Haso, na Pilundasi, na Jindilafu na Betwelị, 23Betwelị jo uju ālimpāpịle Lebeka. Abāna Lwele bababa bo aba Mịlịka ālimpāpịle Naholị, unnụgụna gwa Abụlahamụ. 24Umwene unkị̄kulu ummbōmbị, uju ingamụ jāke āli jo Leama, jo āpāpịle abāna aba: Teba, Gahamu, Tahasi na Maka.
Voafantina amin'izao fotoana izao:
Ubwandilo 22: NYB96
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyakyusa Bible © Bible Society of Tanzania, 1996.