Mataos 7
7
Adwe ga bʉʉ bʉr mobe
(Lʉkas 6.37-42)
1«Adwe ga bʉr mobe, bɨn nkʉʼ be l'adweŋɔ mobe. 2É mbi bɨn lé edwe bʉr mobe e, é mbi waa nteme ó Zyɛm ódwe bɨn ma ɛ. Bim bɨn lé ekaale bʉʉ bʉr ɨ, bim yaa nteme ó nye ókaale bɨn ɨ. 3Ebe yé go lé ebee mpum ndɨ mɨɔ go é dih ɨ, gwɔɔ yɛɛ apa jʉʼra pehe go lé enkɛɛ é dih lo e? 4Wáa mbi go ndɨ e nkul elɛɛ e mɨɔ go ó: “Paʼ cyɛb, me pɛʼɛ go mpum ndɨ go é dih ɨ,” gwɔɔ yɛɛ apa pɛʼ pehe ndɨ é laa lo dih ɨ? 5Anya-bɨkʉʉŋʉ nwa, taara pɛʼ pehe ndɨ é dih lo e! É jɔʼ yaa ó go óbee é sʉlʉlʉ, pɛʼ mpum ndɨ mɨɔ go é dih le e.
6«Adwe ga ompye sa ndɨ ti ɨ. Bé amu dwibra le elʉ bɨn. Adwe ga onkʉ mɨndwe ndɨ é buo dime e. Bé amu tíile mye.»
Jwɨʼla ga e Zyɛm
(Lʉkas 11.9-13)
7«Jaʼa ga, bɨn nkʉʼ bi. Saŋa ga, bɨn nkʉʼ bee. Kwaʼla ga ebe, lé nkʉʼ dibɔ bɨn, 8ebe, mʉr nyiwɛh lé ejaʼ ɛ, nye óbi. Mʉr lé esaa ɛ, nye óbee. Ebe, lé ódibɔ é l'efu e mʉr lé ekwaʼle e. 9Wáa mʉr é sama yin ndɨ ó, ǃɨ mwan we si jaʼ nye bler nɛʼɛ, nyɛɛ ntɔʼ dwe nye ekoʼ e? 10ǃƗ mwan waa si jaʼ nye mbuba fu nɛʼɛ, zê nyɛɛ óbula dwe nye nyʉa kublakubla ɛ? 11Ebe no, bɨn pa taare be bɨbɨbla bɨ bʉr mpʉ bɨn ndɨ nɨ, bɨn yɛɛ bé edwe bwan bɨn mɨmpaŋ bɨsɔʼɔ, a dwɛʼra e Sɔŋ win ndɨ é jobo kʉ ɨ! Nye ódwe bʉr bya, baa ndɨ ejaʼ ɛ, laa naa. 12Ebe no, syɛɛla bɨn lé egwɨm ó, bʉr saʼ bɨn ɨ, dɨʼe sa ga nteme be ya. Yé ó sa Zyɛm lé elɛɛ é l'okalara o motie Moyiz a tile e, e sikʉlʉ ogwiha o mɨlɔb bé a dwe e.»
Mobe moba
(Lʉkas 13.23-24)
13«Niʼe ga é l'ebe ndɨ é ban ɨ, ebe, zi ndɨ é bwaʼ ndwe e l'akɔbla ɛ, nye ó ndɨ eto nko paʼ efie. No ó, bʉr o ndɨ ecwɨɨ tɨʼ ɨ, bé é buo. 14Yé é kɔbla ó, mʉr cwɨŋɨ é zi lé eto pyal é tiʼ njʉmdia ɛ! Ebe nye lé ecwɨɨ tɨʼ ɨ, lé é ban. Bʉr o lé ecwɨɨ tɨʼ ɨ, bé abuo.»
Mokan ga mɨna
(Lʉkas 6.43-44)
15«Diʼe ga ncye e mɨmpʉmpʉl mɨ ogwiha o mɨlɔb, ebe, bé eze-ze é l'esama lɨn ó e njwɨr é tala tala, nwɨɨla e bɨntœme. To kœb ó, é mɨleme myɔɔ tʉŋlʉ, myé ó mpʉ onkœœ! 16Bɨn bé ódweʼe be ó é bɨsyɛɛla byɔɔ. Bé abe lé emwaʼ mpumo sɔɔ é l'esyɛh, nkʉ mpumo ofig é ntʉmsakpɛl. 17Mpaŋ lɨ, yé gumo ó mɨmpaŋ mɨ mpumo. Syoblʉ lɨ, yé gumo ó mpumo ndɨ é bebe e. 18Mpaŋ lɨ, yé águmo bɨbla mpumo. Bɨbla lɨ, yé águmo mɨmpaŋ mɨ mpumo. 19Lɨ yiyɛh ndɨ agumo mɨmpaŋ mɨ mpumo e, yé etwɛ̀lɔ, guhɔ é l'ebeʼe e siʼe. 20No ó, bɨn bé ódweʼe mɨmpʉmpʉl mɨ ogwiha o mɨlɔb ó, é bɨsyɛɛla byɔɔ.»
Elɛɛ, lé abe mpʉ esa
(Lʉkas 13.25-27)
21«Ntʉʼ mʉr nyiwɛh ólɛɛ ó: “Da ɔɔ, Da ɛɛ!” óni é jwɨ̀ʼa mo Da, njɨ waa nyiwɛh lé esa gwɨma mo Sɔŋ wam ndɨ é jobo kʉ ɨ. 22Ebe, é l'esie e mbi jɔʼ yi, buobuo bʉr, bé ólɛɛ e me ó: “Da ɔɔ, Da ee! Paʼ bee! Bɨh bé a si gwih mɨlɔb mo Zyɛm é die lo. É die lo, bɨh bé a si dwih bʉr moleme! É die lo, bɨh bé a be ó si sa buobuo mosima.” 23No ó, me ólɛɛ e be ó: “Tɨtoʼo! Me apa gʉa bɨn. Cyɛba ga ká ká, bɨn ontɔɔ o motie!”»
Kɨkɛna é lɔb fumo
(Lʉkas 6.47-49)
24«Mbi mʉr lé ejoʼo mokan mam ma, ntɔʼ du me e, nye enwɨɨla ó e mʉr a fumo mbɛr é mbi wiʼ ɨ: Nye a cyel bɨpab bɨ tɨʼ ó, é gumo nye a bee bah ekoʼ e. 25Ompie ze nwɨɨ. Oboʼo ntɔʼ bila é mbɛr waa. Nkuo ntɔʼ kuulo le eŋmɛha tɨ. Wé a be yɛɛ ó, abwiʼ, ebe, nye a be ó si cyel modwii mo nkan mé a fuʼo bɨpab ɨ, é bah ekoʼ yaa kʉ. 26To kœb ó, mʉr lé ejoʼo mokan mam, adu mpʉ mé lé elɛɛ ɛ, nye enwɨɨla ó e gʉ yé a fumo mbɛr, cyel we njɨ é l'epumo e mosɨa ɛ. 27Ompie ze nwɨɨ, oboʼo, bé ze bila é biha bɨpab, nkuo ze kuulo, ŋmɛha é mbɛr waa. É mpʉ yé a syɛɛlɨ no e, mbɛr we nɨ, wé ze ka bwiʼ, swɨɨ si.»
Yesʉs lé edwe bʉr sikʉlʉ ye e nkul mojwɨ̀ʼa mo Zyɛm
(Markus 1.22; Lʉkas 4.32)
28Jɔʼ Yesʉs a sil yeʼle ntuntuma bʉr ɨ, bé a si bul jehe mbi sikʉlʉ nye a dwe-dwe be e, 29ebe, nye a baayeʼle mpʉ oyeʼle o motie bɔɔ. Nye a yeʼle-yeʼle ó e nkul mojwɨ̀ʼa Zyɛm a dwe nye e.
Voafantina amin'izao fotoana izao:
Mataos 7: ozmBad
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2002, Wycliffe Bible Translators, Inc. All rights reserved.
