Mataos 13
13
Kɨkɛna mbèl mompœʼ
(Markus 4.1-9; Lʉkas 8.4-8)
1É dobo laa, Yesʉs ze mʉa é mbɛr waa, to di é l'ebʉm e maŋ. 2Ntuntuma bʉr, yé ze fwal é gumo nye a be e. Syɛɛla yaa ze sa ó, nye mʉŋa tɨ, to kable é byɛl, di si, ntuntuma bʉr yɛɛ lé eliʼ ocɨcyel é l'ebʉm laa.
3Yesʉs ze lwib e be, lé edwe be sikʉlʉ é mɨlɔb é buobuo é zi bɨkɨkɛna. Nye ó: «Yé a ze be ó, nuu mbèl mompœʼ ze to myɛʼ mompœʼ é modiʼe mo peme ye. 4Mpʉ nye a to le emyɛʼ mompœʼ peme e peme e, wiʼ paʼ mompœʼ ze to le ekur é kakoo#13.4 «Kakoo», yé ó bwaʼbwaʼ egʉa paʼra bɨpeme, gumo bʉr lé ecwɨɨ ɨ.. Bɨnɔn ntɔʼ fulo, ze sil tor mompœʼ maa. 5Guu paʼ mompœʼ kur é bah ekoʼ, bwah mpa l'abuo tɨ. Mompœʼ, mé ntɔʼ kpahbe pah, ebe, bwah yé a be tɨʼ ɨ, yé a baabuo. 6Jɔʼ dobo lé a ka kah ɛ, dwehe ze ŋmɛha, ze diʼ mɨpɛha mompœʼ, myé ntɔʼ dwɛhla, ato ká ká, ebe, myé a baabe e mɨkaale mɨmpa, njɨ mɨfòŋ. 7Guu paʼ mompœʼ nteme ze kur é mɨndwinʉ. Mompœʼ ze pah, bé e mɨndwinʉ ze gwɨe sama. Mɨndwinʉ ze kaʼ mɨpɛha mompœʼ myaa, myé ntɔʼ lire. 8Dam be no, guu paʼ mompœʼ fih wɛɛ, wé a si kur é si mocyɛʼ. Mompœʼ maa, mé ze gwɨe le egumo mpumo. Etin egwar gumo mpumo nter. Lɨʼ etin, mpumo mowʉm tobo. Lʉʉ, mpumo mowʉm molɛl.» 9Nye ze ko tɨʼ ó: «Mʉr ndɨ e mogwal mo ejoʼo e, nye joʼa naa.»
Ebe yé Yesʉs lé elwib é zi bɨkɨkɛna ɛ?
(Markus 4.10-12; Lʉkas 8.9-10)
10No ó ompʉn mo Yesʉs, bé a ze dihle fum nye a be e, ze dîŋɔ e nye ó: «Ebe yé go lé elwib-lwib e be é zi bɨkɨkɛna no e?» 11Nye ntɔʼ bɨha e be ó: «Bɨn ó Da a gwih lwib odim lé etiibe e jwɨ̀ʼa ye e, ó bɨn gʉŋa ye é kpɛhla. No ó bɛɛ, bé a baagwihɔ ye. 12Mʉr ndɨ e tɨʼ ɨ, nye óbâʼle bul dweŋɔ, nye nkʉʼ di e bye é ntuʼ-ntu-ntuʼ. To kœb ó, waa ndɨ tɨtoʼo e, nye ópɛʼɔ ma bim nye ndɨ e tɨʼ ɨ. 13Ebe no ó me lé elwib e be é zi bɨkɨkɛna ɛ. Bé esyɛm mih, sa gwar, bé agʉa bee. Bé eceŋle mogwal, ajoʼo, nkʉ bi ba pɨʼ. 14É mbi waa ó mokan mo Kalara Zyɛm, mé lé edira ɛ. Yé ó tila ó:
“Bɨn bé ógʉa joʼlo; sa gwar, bɨn bé aŋa bi ba pɨʼ.
Syɛmɨ ga mih! Bɨn bé aŋa gʉa sɔʼɔ duho tɨ.
15Bʉr o kul yi, bɨ lɨl mɨleme.
Mogwal mɔɔ, mé agʉa joʼo sɔʼɔ.
Bɨ dible mih mɔɔ.
Nkʉ bé a be ó be, bee e mih mɔɔ é sʉlʉlʉ
ndwe le ejoʼo e mogwal mɔɔ é saŋ-saŋ nɛʼɛ,
mpa bɨ gʉa é kpɛhla é jɔʼ yaa.
Nkʉ bé a be ó be, gʉa ocyecye nɛʼɛ,
mpa bɨ dwibra, ntɔʼ ze boo me.
Mpa bɨ sa nteme ó, me dweʼ be tiʼ.”»
16Yesʉs ntɔʼ lɛɛ e be ó: «Bɨn bɛɛ, mocyɛʼ mo mpom, mé e bɨn, ebe, mih mɨn, mé ebee; mogwal mɨn, mé ejoʼo! 17Me elɛɛ bɨn cyecye ó nɛɛ: buobuo ogwiha o mɨlɔb le ocɨcyel o bʉr, bé a gwɨm-gwɨm ó, bé beŋɨ sa bɨn lé ebee e, sa gwar, abee ye, le ejoʼo sa bɨn lé ejoʼo e, sa gwar, ajoʼo ye.»
18Yesʉs ntɔʼ lɛɛ ó: «Ebe no, joʼla ga sa kɨkɛna mbèl mompœʼ lé elɛɛ ɛ. 19Jɔʼ mʉr lé ejoʼo lɔɔ lé etiibe e jwɨ̀ʼa mo Da, nye l'ajoʼo sa mpaŋla waa ndɨ epa kʉ lɛɛ ɛ, mʉr waa, nye enwɨɨla ó e l'empàh e zi, gumo mompœʼ mé a kur-kur ɨ. Bɨbla-mʉr, yé ntɔʼ pyal, ze dɛʼ mpœʼ yé a bèŋɔ é leme mʉr waa ɛ. 20Nwaʼ mʉr, nye enwɨɨla ó e bah ekoʼ, gumo mompœʼ, mé a kur ɨ. Nyiha, nye ejoʼo lɔɔ Zyɛm, ntɔʼ nʉa we e duu ndwe e bɨsʉhʉ. 21Sa gwar, lɔɔ Zyɛm, wé anara nye é leme tʉŋlʉ. Nye ebaʼle we ó, njɨ é ma peh jɔʼ. Jɔʼ nye mu lé esia e mɨtuu le etíilɔ ebe lɔɔ Zyɛm ɨ, nye óka bee ó, wé mu ó ebɔʼ nye lé ebɨm é leme, laa lé ódumo nye e. 22Nuu nteme, nye enwɨɨla ó e mpœʼ yé a kur é mɨndwinʉ ɨ. Nye a si kʉ joʼo lɔɔ Zyɛm. Sa gwar, mɨtuu mɨ mbi jɔʼ yiʼ ndwe e gwɨma okum e l'ogbaa, byé a si dimle nye, ntɔʼ kaʼ lɔɔ Zyɛm, wé l'aka johlo. 23Nuu mʉr nteme, nye enwɨɨla ó e mpœʼ yé a kur é mpaŋ si mocyɛʼ ɛ. Nyiha, nyi joʼo lɔɔ Zyɛm ndwe le egʉa joʼo we. Ebe no ó wé a gumo mpumo é tiʼ ye e. Lɨʼ etin, lé a si gumo mpumo nter; lʉʉ, mpumo mowʉm tobo; lʉʉ nteme, mowʉm molɛl.»
Kɨkɛna bɨka ndɨ abe e mpi ɨ
24Yesʉs ntɔʼ bâʼle sa be kɨkɛna fih. Nye ó: «Jwɨ̀ʼa mo Da, yé enwɨɨla ó e mʉr a bè mbɨambɨa mpœʼ é peme ye e. 25Yé a ze be ó, é guu pum, bʉr bɨbɛh bɨdwo e bɨdwo. Nuu mʉr dɔm we ze pyal é peme yaa é nyololo, ze bè mpœʼ bɨka ndɨ abe e mpi ɨ, gumo mɨmpaŋ mompœʼ mé a bèŋɔ ɛ, bè é bè bè, ntɔʼ laa, to. 26Jɔʼ mɨmbɨambɨa mompœʼ, myé a pah, gumo mpumo e, bɨka ndɨ abe e mpi ɨ, byé ze pah nteme. 27No ó osyɛl o mosa mo mʉr peme, bé a ze to dî e nye ó: “Da, go a baasi bè mbɨambɨa mpœʼ é peme yo? A bebebebe ka yi, yé duho nko?” 28Mʉr peme ze bɨha e be ó: “Mʉr dɔm wam ó b'a sa mpʉnʉ.” Osyɛl o mosa be, bé ntɔʼ dî e nye ó: “Zê bɨh toʼ, to tɨ ye, syɛŋ ye é paʼ ngwar ɛ?” Mʉr peme ntɔʼ bɨha e be ó: 29“Hɨʼɨ, yé e nkul epyal ó, ǃbɨn si tɨ bɨka ndɨ abe e mpi nɛʼɛ, byé óbɛm duuba ndwe e mɨmpaŋ mompœʼ mɨmɛh é jɔʼ gwar. 30Birɨ ga bɨka ndɨ abe e mpi ɨ, byé gwɨa, byé e mompœʼ mam, to pyal é mya me ólomo bʉr ó, bé ntaʼ é mɨngol ɨ. É mya mɨngol ó me ólɛɛ e bʉr baa ó, bé taara tɨ bɨka ndɨ abe e mpi ɨ, kaʼ bye mɨmbom, diʼɔ bye. Pie tɨ, bé òpɛʼ mpaŋ mode, kaale me é l'enkuna lam.”»
Jwɨ̀ʼa mo Da, yé ófuʼla bwaʼ
(Markus 4.30-32; Lʉkas 13.18-19)
31Nye ntɔʼ bâʼle ze sa be yʉʉ kɨkɛna. Nye e be ó: «Jwɨ̀ʼa mo Da, yé enwɨɨla ó e mpœʼ ndɨ bim boho nʉo e. Nye ó mbèl mompœʼ a nʉa, ntɔʼ myɛʼ é modiʼe mo peme me e. 32Dam be ó, mpʉ paha mpœʼ waa ndɨ é bul twaʼbe é mompœʼ mɨmɛh bɨn lé egʉa ɛ, é jɔʼ nye lé epah ɛ, nye elaa mompœʼ mɨmɛh é mpwaʼ. Nye efuʼla lɨ nɨnɨ é ntuuu. Bɨnɔn, byé eze, ze dɨ bebre tɨʼ é mɨlɔɔ.»
Kɨkɛna levure
(Lʉkas 13.20-21)
33Nye ntɔʼ bâʼle sa be kɨkɛna fih. Nye ó: «Jwɨ̀ʼa mo Da, yé enwɨɨla ó e levure. Nuu mʉma a syɛŋ nye e time bler, kwoʼ be okilo mowʉm moba ɛ, to pyal é jɔʼ time waa, wé a vus wiwɛh ɛ.»
Yesʉs lé eyeʼle bʉr é zi bɨkɨkɛna
(Markus 4.33-34)
34Yesʉs a lɛɛ-lɛɛ ntuntuma bʉr bɨsa byaa bibyɛh ó, é zi bɨkɨkɛna. Nye a baalwib e be é zi fih. 35Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we ó:
«Zyɛm, nye elɛɛ ó:
“Me ólwib e be ó é zi bɨkɨkɛna.
Me ólɛɛ be mɨlɔb ndɨ mɨfela ɛ,
Me a bɛa fol mye ó, duho é l'etɛɛrɨ e si nwa.”»
Pɛhla kɨkɛna mo bɨka ndɨ abe e mpi ɨ
36Yesʉs ze liʼe ntuntuma bʉr bé e l'ompʉn be, niŋɔ mbɛr. Ompʉn be, ze dihle fum nye a be e. Bé e nye ó: «Pɛʼla bɨh kɨkɛna é lɔb bɨka ndɨ abe e mpi ɨ.» 37Yesʉs ze bɨha e be ó: «Mʉr lé ebè mpœʼ mpa ɛ, nye ó ndɨ Mwan mo Mʉr. 38Peme ye, yé ó si nwa. Mpaŋ mpœʼ, yé ó dweʼle, sa lé elɛʼle nkɔb bʉr o ndɨ é jwɨ̀ʼa mo Da ɛ. Bɨka ndɨ abe e mpi ɨ, byé ó bʉr o ndɨ baa mo Bɨbla-mʉr ɨ. 39Mʉr dɔm mo mʉr peme a ze bè bɨka ndɨ abe e mpi ɨ, nye ó Njwɨɨ moleme. Mya mɨngol wɛɛ, wé ó dweʼle, sa lé elɛʼle esie e mbi jɔʼ yiʼ ɨ. Bʉr ô ze é mɨngol ɨ, bɛɛ, bé ó beengles. 40Mpʉ bé lé epɛʼ bɨka ndɨ abe e mpi ndwe le ediʼ bye é l'ebeʼe e, no nteme ó ngo saŋɔ é l'esie e mbi jɔʼ yiʼ ɨ. 41Mwan mo Mʉr ólomo beengles be, ó bé ntaʼ é lɔb mobɔʼ mɨmɛh mé óbɨm bʉr é mɨleme ó, bé saʼ syem ɨ. Bé óze pɛʼ mobɔʼ maa é jwɨ̀ʼa ye ndwe le edwih ontɔɔ o motie bɨbɛh. 42Nye òguho be é duro e molul, gumo bé ódɨ time le elwaare moje e. 43No ó, bʉr o ndɨ cɨcyel é mih mo Zyɛm ɨ, bé ópan mpʉ dobo é jwɨ̀ʼa mo Sɔŋ wɔɔ.» Nye ze ko tɨʼ ó: «Mʉr ndɨ e mogwal mo ejoʼo e, nye joʼa naa.»
Kɨkɛna efo é peme
44«Jwɨ̀ʼa mo Da, yé enwɨɨla ó e sa ndɨ é buo dime e, yaa yé a be fola é peme e. No ó nuu mʉr a to pu tɨ, ntɔʼ gbɛm efo laa, nye ntɔʼ bâʼle buuro le tɨ. Nye ze bul soho, ntɔʼ to bɛma mobi me mɨmɛh, bula kwar, ze bwam peme yaa e mɔn ye.»
Kɨkɛna ndwe ndɨ é buo dime e
45«Jwɨ̀ʼa mo Da, yé enwɨɨla nteme ó e mʉr lé esaa ebwam mɨndwe ndɨ é buo dime e. 46Jɔʼ nye a to bee ekoʼ e mɨndwe ndɨ é bul buo dime e, nye ntɔʼ to bɛma mobi me mɨmɛh, ntɔʼ bula, ze bwam mbɨambɨa ekoʼ e mɨndwe laa.»
Kɨkɛna olɛa be okʉa
47«Jwɨ̀ʼa mo Da, yé ebâʼle nwɨɨla ó e kʉa bé a la é modibe maŋ ɨ. Bé a be ó lé egwɨm mɛr ofu bé ókwɨa tɨʼ ɨ, mɨmbi mimyɛh. 48Jɔʼ kʉa waa a be, mu si loŋlo e, olɛa be okʉa, bé ntɔʼ ze dulo nye tin, diŋɔ si, pyàlɔ ofu, gbaŋɔ mɨmpaŋ mɨ ofu é mokuro, myahɔ baa ndɨ abe e mpi ɨ. 49Mpʉ yaa nteme ó ngo saŋɔ é l'esie e mbi jɔʼ yiʼ ɨ. Beengles, bé óze bɛʼ bɨbɨbla bɨ bʉr e l'ocɨcyel o bʉr é bɛʼ bɛʼ, 50ntɔʼ guho bɨbɨbla bɨ bʉr é duro e molul. Gʉʼ ó bé ódɨ time le elwaare moje e.»
51Yesʉs ze dî e be ó: «Zê bɨn bé lé egʉa joʼo bɨkɨkɛna biʼ bibyɛh ɛ?» Bé ze mɛʼle. 52Nye ze lɛɛ e be ó: «Ebe no, yeʼle motie nyiwɛh mu mpʉn é jwɨ̀ʼa mo Da ɛ, nye enwɨɨla ó e mʉr mbɛr lé eto-to é l'ekʉm le, to nʉa-nʉa bɨsa bye tɨʼ ɨ. Yiʼ jɔʼ, nye ebula ó e bɨsa modwan; yʉʉ jɔʼ, bula e bɨsa bɨmya.»
Bʉr o Nazarɛt, bé ebene Yesʉs
(Markus 6.1-6; Lʉkas 4.16-24)
53Jɔʼ Yesʉs a sil sa be bɨkɨkɛna bɨnɨ ɨ, nye ntɔʼ laa tɨ. 54Nye ze to nye ye, ntɔʼ yeʼle bʉr é mpah mɨnjwɨʼla wɔɔ, bʉr bɨbɛh lé ejehe le eze dîilɔ ó: «Nye eduho e wiʼ ocyoo le maʼ mosima monɨnɨ nko? 55Ntʉʼ mwan mo kabina nwaʼ ɛ? Ntʉʼ nyɔŋ we ndɨ die Maaria ɛ? Ntʉʼ nye ndɨ mɨɔ mo Jacques bé e Yoseb, ndwe e Simɔn, ka kɛl Yʉd ɨ? 56Ntʉʼ bɨna ga e l'okɛl be bɨbɛh lé etiʼe wâʼ ɛ? A nyɛɛ duho e wiʼ ocyoo le nwaʼ nkul nko?» 57Bé ze bee syɛɛla yaa, yé ntɔʼ kol be ebɔʼ bé a bɨm é mɨleme e. Bé ntɔʼ kʉ ze bene nye. Yesʉs ntɔʼ ze lɛɛ e be ó: «Ngwiha mɨlɔb, nye egumo é bɨfum bibyɛh, pɛʼ njɨ é lal we, le é mbɛr bʉr we tʉŋlʉ.» 58No ó Yesʉs a be ó, abul sa mosima tɨ, ebe, bé a baajyɛʼ taa buʼo yɔɔ boo nye.
Voafantina amin'izao fotoana izao:
Mataos 13: ozmBad
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2002, Wycliffe Bible Translators, Inc. All rights reserved.
