Mataos 12
12
Sikʉlʉ é lɔb moho saba
(Markus 2.23-28; Lʉkas 6.1-5)
1Ɨ til molu yaa, Yesʉs bé e l'ompʉn be, bé a be ó lé ecwɨɨ é bɨpeme bɨ ble é guu moho saba. Ngbaa le eka be nɛʼɛ, za ze mɛr ompʉn be, bé ze taare lé ebuʼo mɨtu mɨ ble mɨ peme yaa, ze deŋɔ#12.1 OYʉden, bé a baakamle mɨngbaalaŋa lé enʉa mode é bɨpeme ndɨ nkpah mpaʼa ɛ. Bé a lwib ó syɛɛ ompʉn bé a sea moho saba ɛ: emwaʼ le epɛʼ bɨkʉr.. 2Jɔʼ oFarizyɛŋ, bé a bee syɛɛla yaa ɛ, bé ze lɛɛ e Yesʉs ó: «Paʼ bee mpʉ ompʉn bo lé esa sa ndɨ kɔmlʉ é moho saba ɛ!» 3Yesʉs ze bɨha e be ó: «Bɨn bé a baasi láa mpʉ David a sa, é jɔʼ bé e l'esama le, bé a be mɨmo zoʼo e? 4Zê bɨn bé agʉa ó, bé a si ni é l'Odia mo Zyɛm tʉŋlʉ ɛ? David bana de guu paʼ bler yé a be koma é nko paʼ duu mo Zyɛm ɨ. To kœb ó, yé a be ó kɔmlʉ é paʼ wɔɔ ó, bé deʼ ye, njɨ opara mo Zyɛm bé ome. 5Zê bɨn bé a baasi láa motie mo Moyiz ɛ? Yé ó tila ó, é moho saba wiwɛh, opara lé esea é Mpah Zyɛm ɨ, bé ebana ntaa motie mo moho saba, adweŋɔ mobe. 6No ó, me elɛɛ bɨn ó nɛɛ: fum bɨna ndɨ ga yi, sɔʼɔ, yé ó wâʼ ndɨ é bul bwaʼ, laa Mpah Zyɛm bɨn lé eseʼle nɨ! 7Nkʉ bɨn bé a be ó be, gʉa joʼo mokan mo Kalara Zyɛm ó: “Me ebul gwɨm ó ncwɨncwɨa, laa motwina bɨn lé edwe me” nɛʼɛ, mpa bɨn bé a be ó, l'adwe bʉr o b'a baakunbo e mpɨŋ ɨ, mobe. 8Ebe, Mwan mo Mʉr ó ndɨ ejwɨ̀ʼ moho saba.»
Yesʉs lé etiʼ mʉr é moho saba
(Markus 3.1-6; Lʉkas 6.6-11)
9No ó, é jɔʼ Yesʉs a duho tɨʼ ɨ, nye ze to ni é nuu mpah mɨnjwɨʼla wɔɔ. 10Tɨʼ yé a be ó e nuu mʉr a be e mbo é fwam-fwam ɨ. No ó, bʉr o b'a be tɨʼ ɨ, bé ntɔʼ dî e nye ó: «Zê yé ó kɔmlʉ ó, mʉr joma bʉr mokpaa é moho saba ɛ?» Bé a dî nye tia waa ó, lé elamɔ nye é mbi syɛɛla nye ósa ɛ. 11Yesʉs ze bɨha e be ó: «Bɨna paʼ jwɨʼ ga ó, nuu mʉr é sama yin, nye e ntœme gwar, ntœme yaa to lʉŋa é bɨ é moho saba. Zê mʉr waa óbe, ato pɛʼ ye é bɨ yaa é moho saba ɛ? Tɨtoʼo! 12Ebe no, gʉŋa ga ó, mʉr, nye é bul buo dime, laa ntœme! No ó, etie ga lɨna, lé akamle mʉr lé elɛʼle bʉr ncwɨncwɨa é moho saba.» 13Nye ze lɛɛ e mʉr waa ó: «Syɛmɨ mbo.» Mʉr waa ntɔʼ syɛm mbo, wé ntɔʼ sa mbɨmbɨa mpʉ waa guu, wé a be e.
14No ó oFarizyɛŋ, bé a ze pyal kʉl, to diŋɔ bʉm, bé ze dîila mpʉ bé a jala le ejʉ Yesʉs ɨ.
15Mpʉ Yesʉs a be si gʉa jwɨʼ yaa ɛ, nye ntɔʼ mʉa ɨ gumo yaa, buobuo bʉr ze du nye é koo pihe. Nye ze tiʼ mɨsyoblʉ mimyɛh myé a be tɨʼ ɨ. 16No ó nye a cyel be mpene, adwo ba ó, bé l'anyamle lɛɛ bʉr mbi mʉr nye ndɨ ɨ. 17Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó:
18Zyɛm, nye elɛɛ ó:
«Nwaʼ mʉr ó ndɨ syɛl mosa wam me a pɛh ɛ.
Nye ó waa me lé ebul kpɛl,
waa me lé emɨɨla e nye e.
Me ólomlo nye sisim wam. Wé óbe ó ɨ nye.
Nye óto le etuno ó, bʉr o ndɨ abe oYʉden ɨ,
lɔb wɔɔ, wi tiʼ é l'ocɨcyel.
19Nye aŋa sa mogo, atime.
Mʉr, nye aŋa joʼo twii we lé ebere kʉ é mpaʼa e mpaʼa.
20Nye ákwoʼ bɨh lɨ mu lé ecyɛʼ ɛ.
Nye ákwoʼ turo empom e saŋ,
ó wé dima njʉl elama mu lé egwɨm ja dwo e.
Nye ósa syɛɛla embɨa yaa ó, to pyal é jɔʼ bʉr, bé ómɛʼle ó,
Zyɛm, nye esa sa ndɨ cɨcyel ɨ.
21Bʉr o ndɨ abe oYʉden ɨ,
mɨleme myɔɔ, myé óloŋlo e mbɛla ó, ebe nkul die le.»
Yesʉs bé e Satan
(Markus 3.22-27; Lʉkas 11.14-23; 12.10)
22Bʉʉ bʉr ze pyalɔ e mʉr boo Yesʉs. Mʉr waa a si sia e l'eleme, eleme laa lé esa ó, nye diʼe ntim, le edi nteme gʉ́ʼ. Yesʉs ntɔʼ tiʼ mʉr waa. Pie tɨ, mʉr waa ntɔʼ taare lé ebee le elwib. 23Ntuntuma bʉr, yé ntɔʼ jehe lɔb waa le edîŋɔ ó: «Ntʉʼ Mwan mo David nwaʼ ɛ?»
24Jɔʼ oFarizyɛŋ, bé a joʼo no e, bé ntɔʼ lɛɔ ó: «Nye edwih-dwih bʉr moleme ó, njɨ e nkul nye a nʉa boo Belzebul, Njwɨɨ moleme e!»
25Mpʉ Yesʉs a be si gʉa mɨpɛhla bé a be e mye é mɨleme e, nye e be ó: «Jwɨ̀ʼa yiyɛh bʉr o tɨʼ lé elwimla paʼra wɔɔ ɛ, yé efuʼla ó, é siilʉ, aka be e bʉr. Nkʉ nkana, nkʉ mbɛr bʉr, ǃɨ bʉr o tɨʼ lwimla paʼra wɔɔ nɛʼɛ, yé abe e nkul ejohlo. 26ǃƗ Satan si dwih nye mʉr tɨʼ é bʉr nɛʼɛ, lɛɛ ó, nyi bɔʼa monkɔm moba. Ebe no, jwɨ̀ʼa ye, yé óka johlo nyá ɛ? 27Bɨn bé elɛɛ ó, me edwih-dwih moleme ó, ebe, Belzebul ó ndɨ edwe me nkul waa. A zé nyɛɛ lé edwe jyɛɛ yin wɔɔ nkul edwih bʉr moleme? Ebe no, bé ó ndɨ elɛʼle é kpɛŋlɛm ó, bɨn bé e mobe! 28Yé be ó, me edwih bʉr moleme é zi Sisim mo Zyɛm nɛʼɛ, lɛɛ ó, Zyɛm mu ó kunokuno le ecyel jwɨ̀ʼa ye é bɨn cyecye.
29«Mʉr, nye abe e nkul eni mbɛr mo njɨh mʉr, dɛn nye bɨsa bye, alaa ó nye osi taare kaʼ nye nkara mobo mo nɔn. ǃNye si taare kaʼ nye nɛʼɛ, é jɔʼ yaa ó nye ndɨ e nkul esà mbɛr we e.
30«Mʉr nyiwɛh ndɨ abe é nkɔm wam ɨ, nye ó me é nkɔm nkɔm-nkɛɛ. Ebe no, waa ndɨ akœb me lé esyɛŋ ɨ, nye egbah ó gbaha. 31Ebe no, me elɛɛ bɨn ó nɛɛ: Zyɛm óbɛm pɛʼ bʉr bɨbaa nye a niʼe é lɔb mɨsyem le mpyoo wɔɔ wiwɛh ɛ. Sa gwar, ǃɨ mʉr si pyeh Mbɨambɨa Sisim nɛʼɛ, baa ebebe yaa, yé ákwoʼ pɛʼɔ ebe mɨnjwɨʼla mye. 32Mʉr nyiwɛh lé elwib ebebe é lʉ Mwan mo Mʉr ɨ, baa ebebe yaa, yé óbɛm pɛʼɔ. Sa gwar, mʉr ólwib ebebe é lʉ Mbɨambɨa Sisim ɨ, baa ebebe yaa, yé ákwoʼ pɛʼɔ, dam be é jɔʼ yi, dam be pie e l'esie e mbi jɔʼ yi.»
Mokan ga mɨna
(Mataos 7.16-17; Lʉkas 6.43-45)
33«ǃBɨn si lɛɛ ó, lɨ, yé é mbɨa nɛʼɛ, gʉŋa ga nteme ó, mpumo we, nye é mbɨa. ǃBɨn si ka lɛɛ ó, lɨ, yé é bebe nɛʼɛ, lɛŋɨ ga nteme ó, yé e bɨbebebebe bɨ mpumo. Mʉr, nye edweʼe lɨ yiyɛh ó, é we mbi mpumo. 34Kampaŋa bɨgurokɔɔ yi, wáa mbi bɨn ndɨ e nkul elɛɛ mɨmpaŋ bɨsɔʼɔ ɛ? Ebe, bɨn bé é bebe! Sa mʉr ndɨ e ye lwɨŋla é leme e, yé ó nʉm we lé epyɛl kʉl ɨ. 35Mʉr ndɨ é mbɨa ɛ, nye enʉa-nʉa bɨsa bɨ embɨa bye ó, é leme we, ndɨ mpʉ mbɨambɨa ekʉm le e, ntɔʼ pyɛl bye kʉl. Mʉr ndɨ é bebe e, nye enʉa bɨsa bɨ ebebe bye ó, é leme we, ndɨ bebebebe ekʉm le e, ntɔʼ pyɛl bye kʉl. 36Me elɛɛ bɨn ó, é dobo le etiʼ e mɨlɔb, bʉr, bé óto kar é l'efu le ambɛhambɛha ekan lɨlɛh bé a lwib-lwib ɨ, 37ebe, Zyɛm ódwe mʉr nyiwɛh mokebe nkʉ mobe ó, é lɔb mokan me.»
Yesʉs lé ebene lé esa esima
(Mataos 16.1-4; Markus 8.11-12; Lʉkas 11.16, 29-32)
38No ó bʉʉ oyeʼle o motie bé e l'oFarizyɛŋ, bé a ze lɛɛ e Yesʉs ó: «Yeʼle, bɨh bé ejɨ bee yʉʉ dweʼle nkul go.»
39Nye ze bɨha e be ó: «A bebe bʉr o mya wiʼ ɛ! Odul be ozyɛm ofih! Bé ejɨ bee dweʼle nkul wam lé elɛʼle mbi mʉr me ndɨ ɨ. Bé ákwoʼ lɛʼlɔ dweʼle nkul gwar, alaa ó yaa yé a syɛɛlɨ é tiʼ mo ngwiha mɨlɔb Yonas ɨ. 40Ebe, mbi ngwar Yonas a di é mo bwaʼbwaʼ fu mɨmoho mɨlɛl, mɨpum mɨlɛl ɨ, mbi ngwar e ngwar waa nteme ó Mwan mo Mʉr ódi é foo mɨmoho mɨlɛl, mɨpum mɨlɛl ɨ. 41É dobo le etiʼ e mɨlɔb, bʉrʉm o nkana Niniv, bé ómʉa, nwahle bʉr o mya wi, ebe, bé a be ó si gwɨma mobebe mɔɔ le edwir mɨleme lé ejoʼo mpaŋla Yonas a cen be e. No ó, paʼ bee ga: cyela mɨtuno lé elaa Yonas ɨ, nye ó bana kʉ be wâ! 42É dobo le etiʼ e mɨlɔb, njwɨɨ mʉma a duho nko tie e, nye óbana cyɛb, nwahle bʉr o mya wi, ebe, nye a be ó si duho é l'odumo o si, lé eze joʼo motɨɨ mo ocyoo mo Salomɔŋ. Mbe ga: sa lé elaa Salomɔŋ ɨ, yé ó bana be wâ!»
Mpula bɨbla sisim
(Lʉkas 11.24-26)
43«Jɔʼ bɨbla sisim mu si duho é nyʉl mʉr ɨ, yé esa ó, to le eyeŋe, to le esaa gumo egbala. To kœb ó, gumo yiyɛh, yé ó é fwâh-fwâh, abe e modibe. Yé abee gumo egbala. 44Yé ntɔʼ lɛɛ é yé mʉr tɨʼ ó: “Me bula ó, to mbɛr wam, gumo me a duho e.” Yé ntɔʼ bula, to kœb fo mbɛr waa, wé mu ngwɛmla, bɨsa bibyɛh mɨtɛʼa é bɨcye byɔɔ. 45Yé ntɔʼ ze bâʼle to, to nʉa mɨsisim mɨfih tambɛl, myaa ndɨ é laŋle bebe e. Myé e boo nɔɔ ntɔʼ bula nye ye, ze komlɔ odia wɔɔ é mʉr waa tʉŋlʉ. É jɔʼ nɨ, tiʼ mʉr waa a sia e ye e, yé óbula bebe-bebe beba, laa mbi yaa efoʼ, yé a taare be e. Mbi ngwar e ngwar waa nteme ó, yé óbe é l'efu e bɨbɨbla bɨ bʉr o mya wiʼ ɨ.»
Nyɔŋ ndwe e l'obɨɔ mo Yesʉs
(Markus 3.31-35; Lʉkas 8.19-21)
46Yesʉs dina lé elwib e ntuntuma bʉr nɛʼɛ, nyɔŋ we bé e l'obɨɔ be ntɔʼ pyal, cyɛbɔ kʉl, lé esaa mozi mo elɛɛla e nye. [47Nuu mʉr ze lɛɛ e Yesʉs ó: «Mbe! Nyʉŋ le obɨʉ, bé ó kaʼ kʉl. Bé egwɨm lɛɛ go sɔʼɔ.»] 48Yesʉs ntɔʼ bɨha e mʉr a cen nye mpaŋla waa ó: «Zé ndɨ nyɔŋ wam? Ozé ndɨ obɨɔ bam?» 49Nye ntɔʼ syɛm mbo, lɛʼle nko ompʉn be, bé a be e. Nye e nye ó: «Mbe ga: baʼ ó ndɨ nyɔŋ wam e l'obɨɔ bam! 50Mʉr nyiwɛh lé esa sa Sɔŋ wam ndɨ é jobo kʉ ɨ, lé egwɨm ɨ, nye ó ndɨ mɨɔ wam, kɛl wam ndwe e nyɔŋ wam.»
Voafantina amin'izao fotoana izao:
Mataos 12: ozmBad
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2002, Wycliffe Bible Translators, Inc. All rights reserved.
