- उत्पत्ति 14
14
अब्राम कौ लूत हों छुड़ाबो
1शिनार के राजा अम्रापेल, एल्लासार के राजा अर्योक, एलाम के राजा कदोर्लाओमेर और गोयीम के राजा तिदाल के दिना में एैसो भओ, 2कि उनोंरन ने सदोम के राजा बेरा, अमोरा के राजा बिर्शा, अदमा को राजा शिनाब, सबोयीम के राजा शमेबेर और राजा बेला जो सोअर भी कहात आय, इन राजाओं के बिरुद्ध युद्ध करो। 3इन पांचई ने सिद्दीम नाओं तराई में मृत सागर के लिगां आकें एका करो। 4बारह साल लौ तौ जे राजा कदोर्लाओमेर के अधीन रए; परन्त तेरहवें साल में ऊके बिरुद्ध बिद्रोह करो। 5-6सो चौदहवें साल में राजा कदोर्लाओमेर और ऊके संगी राजा आए, और अश्तरोत-करनैम में रपाइयों हों, हाम में जूजियों हों, शावे-किर्यातैम में एमियों हों, और सेईर नाओं पहड़वा पै होरियों हों मारत-मारत ऊ एल्पारान लौ जो जंगल के लिगां आय, उतै पोंचे। 7उतै सें लौटकें एन-मिशपात हों आए, जो कादेस भी कहात आय, और अमालेकियों के पूरे देस हों और उन एमोरियों हों भी जीत लओ, जो हससोन-तामार में रैत हते। 8तब सदोम, अमोरा, अदमा, सबोयीम और बेला, जो सोअर भी कहात आय; इनके राजा कड़े, और सिद्दीम नाओं तराई में, उनके संगै लड़बे हों पांति बांधी: 9मतलब एलाम के राजा कदोर्लाओमेर, गोयीम के राजा तिदाल, शिनार के राजा अम्रापेल और एल्लासार के राजा अर्योक, इन चारऊं के बिरुद्ध उन पांचई ने पांती बांधी। 10सिद्दीम नाओं तराई में जितै डामर के गड्डा हते; सदोम और अमोरा के राजा भगत-भगत ऊमें गिर पड़े, और जो बचे बे पहड़वावारे देस में भग गए। 11तब बे सदोम और अमोरा कौ पूरो धन और खाबे-पीबे कौ सामान लूट-पाटकें चले गए। 12अब्राम कौ भतीजा लूत, जो सदोम में रैत हतो, ऊहों भी धन समेंत लैकें चले गए।
13तब एक मान्स जो गदबद दैकें बच कड़ो हतो ऊने जाकें इब्री अब्राम हों संदेसो दओ; अब्राम तौ एमोरी मम्रे, जो एश्कोल और आनेर कौ भईया हतो, ऊके तारपीन के पेड़ों के मजारें रैत हतो; और जे औरें अब्राम के संगै बाचा बांधे भए हते। 14जौ सुनकें कि ऊकौ भतीजा बन्दी बना लओ गओ आय, अब्राम ने अपने तीन सौ अट्ठारह लड़बे में माहिर मान्सन हों लैकें जो ऊके कुटम्ब में पैदा भए हते, अस्त्र-सस्त्र बांधकें दान लौ उनकौ पीछा करो; 15और अपने मान्सन के अलग-अलग दल बांधकें रात में उन पै चढ़ाई करके उनहों मार लओ और होबा लौ, जो दमिश्क के उत्तर कोद आय, उनकौ पीछा करो। 16ऊ पूरे धन हों, अपने भतीजे लूत और ऊके धन हों, बईयरों हों और बन्दियों हों लौटा ल्याओ।
मलिकिसिदक कौ अब्राम हों आसीस दैबो
17जब अब्राम, राजा कदोर्लाओमेर और ऊके संगी राजाओं हों जीतकें लौट रओ हतो, तब सदोम कौ राजा, शावे नाओं की तराई में, जो राजा की तराई भी कहात आय, ऊसें भेंट करबे के लाने आओ। 18तब शालेम कौ राजा मलिकिसिदक, जो परमपरधान यहोवा परमेसुर कौ याजक हतो, रोटी और दाख कौ रस ल्याओ। 19ऊने अब्राम हों जौ आसीरवाद दओ,
“परमपरधान यहोवा परमेसुर कुदाऊं सें,
जो आकास और पृथ्वी कौ रचबेवारो आय, तें धन्य होए।
20धन्य आय परमपरधान यहोवा परमेसुर,
जीने तोरे बैरियन हों तोरे बस में कर दओ आय।”
तब अब्राम ने ऊहों सब बस्तों कौ दसमों हींसा दओ। 21तब सदोम के राजा ने अब्राम सें कई, “मान्सन हों तौ मोए दे और धन हों अपने लिगां रख।” 22अब्राम ने सदोम के राजा सें कई, “परमपरधान यहोवा परमेसुर, जो आकास और पृथ्वी कौ रचबेवारो आय, 23ऊकी मैं जा कौल खात आंव, कि जो कछु तोरो आय ऊमें सें नें तौ मैं एक सूत, और नें पनईंयां हों कसबेवारी डोरी, नें कोऊ और चीज लैहों कि तें एैसो नें कै पाए कि ‘अब्राम मोरेई कारन पईसावारो भओ।’ 24जो कछु इन जवानों ने खा लओ आय और जो मोरे संगै गए हते, मतलब आनेर, एश्कोल और मम्रे, मैं उनकौ हींसा नें लौटाहों, बे तौ खुदई अपनो-अपनो हींसा रख लें।”
Voafantina amin'izao fotoana izao:
- उत्पत्ति 14: BHB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators