Yohanis 5
5
Yesus isuisene ia kupue isa
1Taue isa Yesus ieui na roe kota Yerusalem. Ieui roe, nanie ihokai tau sio Yahudiu no karisaa isa roe rei. 2Roe kota rei mo, waene isa wamo. Waene rei mo, wamo haineke kota Yerusalem nene mitanunue isa. Mitanunue rei nanae Rompa nene Mitanunue. Waene rei tau sou Ibrani mo, nanae Betesda. Waene nusue rei nene heuta hua nima. Heuta rai oainatare. 3Sio kupua panesi onekeso poe heuta rai. Sio umau mo, matao putia. Sio umau honu mo, oeu seu-seu. Sio umau honu mo, otalaso. Onekeso poe heuta rai onapa-napa waene rei nisue. 4Areimo, tau taua-taua mo, Anahatana ne maisosie on roe noiyaha ikaisunu na iuna waene rei nisue. Ia seia man wain isipui naone tau waene rei nisue areimo, ia rei ne kupue iake rei sirinia. Kupue sae man mka iake.
5Ia hanaie isa waimo iruei pan waene rei nusue. Ia hanaie rei mo, ikupui musum hutu tonu rahana wanu nea. 6Yesus inooi waipo inekei poe rei. Iatinu ata ia hanaie rei mo, ikupui potuina nea. Oyo Yesus iasei tanui ata, “Nanie me kupue rei iake te tewa?”
7Iahata, “Upu! E-e. Unina na we kupue rein iake. Ne waene reini nisue kani ia sia nanie iakahaiku na usipu poe waene reini? Ruaku nanie usipu, ne ukua tewa. Ia isa ianaoneku sui osa.”
8Yesus iasau ata, “Hanua roe, na noku me kinoe na aeu!”
9Oyo sira tau ia hanaie rei iake. Ihitioi, inoku ne kinoe, oyo ieu.
Yesus isuisene ia hanaie rei tau ranie hatae wan ami Yahudiu amuira Anahatana. 10Reiso sio Yahudiu no sio mainaya oasau osi ia hanaie rei. Oahata, “Ano onate! Ranie hatae repan mo, ranie hatae wan ita Yahudiu iamuira Anahatana. Musa ne maunauna rasopo na pene ipakarian. Reiso pene arori me kinoe rei!”
11Ne iahata, “We amau! Ia wain isuiseneku rei sahoro iaisosiku unoku we kinoe na ueu.”
12Oasei tanui honu. Oahata, “Reiso ia wain iaisosia anoku me kinoe na aeu mo, Ia sia?”
13Ne ia hanaie rei ianei tewa ata Ia sia sahoro isuisenei rei. Areimo tau sio panesi onete Yesus nea reiso inoo mosa Yesus tewa nea.
14Potuina tewa oyo, Yesus isupu ia hanaie rei roe Anahatana ne numa mainisie nene nusue. Iasau osiki. Iahata, “Amaku atinu mai na uasau osia ia-ia. Me kupue iake nea tea! Pene apalalosa nea! Pene tu-tu sae isa remunaya renesi me kupue wan mato-mato rei honu.”
15Ia hanaie rei ianamana runa Yesus suka oyo, ieu isima osi sio Yahudiu no sio mainaya. Iahata, “We amau, uanei ia wain isuiseneku mo, ia sia nea. Nanai Yesus.”
16Reiso, noso Yesus isuisene pannuhu ranie hatae wan ami Yahudiu amuira Anahatana, sio mainaya rei onina arena na ouna sinsara Yesus. 17Ne Yesus iasau osiso. Iahata, “We amau. Au Amaku mo, ipakarian onone ranie rotu-tu ranie hatae repan, masike reimo ranie hatae wani iamuira Anahatana oi. Reiso, Au iae, kahurae upakarian oi. Masike rei mo, ranie hatae wani iamuira Anahatana oi.”
18Noso Yesus iasau ata ipakarian tau ranie hatae wan ami Yahudiu iamuira Anahatana, reiso sio Yahudiu anoo rasaa renesi honu. Reiso onina arena na ohunu Yesus. Areimo tau pusu sio mo, Yesus ipusu Musa ne maunauna rerihoni ranie hatae wani iamuira Anahatana rei tewa. Na isa honu mo, Yesus ioi Anahatana tau Amai. Areimo iuna ruai nooi sani Anahatana.
Anahatana Anai ne kawasa noo sani Anahatana
19Yesus iasau osi sio mainaya arihoni akama Yahudi. Iahata, “We amau, oatinu mai ia-ia nanie uasau osimo ia-ia. Au, Anahatana Anai, una sae isa mo, upusu ruaku we maue tewa. Au mo, hasae una sae wan unoo Amaku iunai. Areimo noso sae wani Amaku iunai, Au iae una rei oi. 20Tea mo, Amaku anoi runaku. Iatuhete osiku runa sae man waron Ia ruai iunare. Mato-mato rei usuisene ia wain ikupui rei. Ne mka Anahatana iatuheteku una sima-simana waron mainaya ranesi usuisene sio kupua, reiso mka omi osira. 21Noo sani Amaku iuna mansia matane iamahaiki honu. Reiso Au iae, mka uapuhai mansia matane pusu ruaku we maue. 22Amaku iapasana ia sia man tewa. Ne irui pusi kawasa osi Au na Au sahoro uapasana mansia. 23Amaku irui kawasa osi Au na mansia pusiki oamuira Au. Ia sia iamuira Au tewa, areimo noo sani iamuira Amaku tewa. Amaku wain iaisosiku uhokaku mai tuniai reini oi.
24Oatinu mai ia-ia nanie uasau osimo. Ia sia iatinu sae wani uasau runai reini na iparisaa tau Anahatana wain iaisosiku mo, mka iamahaiki ikata Anahatana rotu-tu ria supan. Mka Anahatana iapasanai tewa nea. Ia wain naone iruei hainau arihon Anahatana mo, muie reini wain iamahaiki ikata Anahatana rotu-tu ria supan nea. 25Oatinu mai ia-ia nanie uasau osimo. Mka nene orase rehokai na sio wason oparisaa tau Au tewa mo, mka oatinu Au, Anahatana Anai, nioku. Sio reimo, nooso sani sio matana. Ne wain iatinu tanuku mo, mka iamahaiki ikata Anahatana rotu-tu ria supan. Orase rei mo, wan reeu nea. 26Iamahaiki tau Amaku ne kawasa tau iunaso oamahaiso rotu-tu ria supan. Ia iae irui kawasa rei osi Au na una mansiau oamahaiso okatai rotu-tu ria supan. 27Irui kawasa osiku na uarinii ia sia wain ia manisate, ia sia wain ia manisate tewa. Irui kawasa osiku tau Au reini mo, Au Tumata wain Anahatana Ihitiku.
28Pene osira tau sae wan mato uasau runai osimo rei. Tea mo, pannuhu nene orase, sio matana wason ria hatu nohua oatinu Au nioku. 29Mka ohokaso arihoni kupuro anoa na oamahaiso honu. Ia sia wain on mai tuniai iamanisa, mka iamahaiki honu na iamahaiki rotu-tu ria supan ikata Anahatana. Ne ia sia wain on mai tuniai mo, iuna kahatene mka iamahaiki honu, uapasanai.
30Ne uapasana mansia pusu ruaku we kawasa tewa. Uapasana mansia pusu sae wan Amaku iasau osiku na unai. Uapasana mansiau mo, uese hae osa man tewa. Tea mo, upusu ruaku we maue mo, tewa. Ne upusu Amaku ne maue. Ia sahoro iaisosiku uhokaku mai tuniai reini.”
Sio osima runa Yesus
31“Sani Au ruaku usima na ruaku, mka sio oanei tewa ata kani sae wan usima runai rei mo, titue te tewa. 32Ne ia isa honu wain isima rerihoni Au. Ia rei mo, Amaku ruai. Au uanei ata sae wan isima runare rerihoni Au mo, pusire manisata.
33Omi oaisosi sio umau pan Yohanis mamsohue na oasei rerihoni Au rei. Yohanis mo, isima runa sae waron manisata. 34Ne unina mansia na osima rerihoni Au tewa. Hasae nanie uasau osimo na anomo rapeka runa sae wan Yohanis isima runai nea osimo rei man. Isima na oparisaa na Anahatana iapuheumo na pene iapasanamo. 35Sae wan Yohanis iasau runai rerihoni Au mo, reuna omi oanei sae wan titue rerihoni Au. Nooi sani kamane wani resita itane manahane nai osa na oanei mosa arena. Mataanoe okaumin na sae waron Yohanis isima nnare rei. Ne okaumin hasae rapu-rapu man.
36Ne sae isa wan mainae renesi Yohanis resima runa Au. Sima-simana waron Au unare rei mo, pusire ratuhete ata Au reini mo, Amaku sahoro iaisosiku na unare rei. Ratuhete ata Amaku wain roe noiyaha iaisosiku mai tuniai reini. 37Amaku wain iaisosiku rei iae ruai isima runa Au. Omi mo, oatinu nioi tewa nai osa. Te onooi iae tewa oi. 38Omi oparisaa tau Au reini tewa. Au wan Anahatana iaisosiku reini. Reiso oparisaa tau ne anamanaya pan anomo tewa. 39Oarinii Anahatana ne anamanaya ia-ia noso omi ata kani oariniire, mka osupu arena na oamahaimo kata Anahatana rotu-tu ria supan. Ne Anahatana ne anamanaya rai rasima rerihoni Au. 40Ne openemo oparisaa tau Au na oamahaimo okata Anahatana rotu-tu ria supan.
41Unina na mansiau oamuiraku tewa. 42Ne omi mo, Au uanei anomo. Omi mo, anomo runa Anahatana tewa. 43Uhokaku mai tuniai reini runa Amaku ne kawasa. Ne openemo oatarimaku. Ne sani ia tamene isa ihokai na ruai ne kawasa, omi oatarimai. 44Reiso onina na mansiau oamuiramo. Ne onina tewa na Anahatana wain ia osa man rei iamuiramo. Reiso oparisaa tau Au tewa.
45Pene oata kan Au mka uamanarumo roe Amaku. Ia wain mka iamanarumo mo, Musa. Aikee omi oata kani opusu Musa ne maunauna mo, mka Anahatana iapuheumo. 46Ne sani oparisaa tau sae waron Musa ikanure, areimo omi iae oparisaa tau Au oi. Tea mo, sae waroni ikanure rei mo, ikanu rerihoni Au. 47Ne oparisaa tau sae waron Musa ikanure rei tewa. Reiso oparisaa tau sae waron uasau runare tewa, tea!”
Voafantina amin'izao fotoana izao:
Yohanis 5: ANA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc., All rights reserved.
