Yohanis 15
15
Yesus iatuhete ata kahurae anori osa nnai sui osa na Anahatana anoi manahane
1Yesus iruni runa matieue isa osi ne mampusua ata, “Au mo, noo sani ai anggur wan manisate. Omi mo, ai anggur nene sanaya. Amaku mo, nooi sani ia mamsaka nisi anggur. 2Sani ia mamsaka nisi iretu sanaya waron rauhua tewa mo, Amaku iae inea sio wason oasau ata anoo osa na Au ne oauhua tewa. Oauhua tewa, areimo no hali pannuhu na Anahatana anoi tewa. Sanaya waron rauhua, mka iseka tau nene totua na rahoka huaya panesi honu. 3Omi mo, noo sani sanaya waron iseka tanre nea na nanie ohoka huaya nea. Tea mo, oparisaa tau maunauna waron uaunaumo tanure rei nea. 4Omi mo, kahurae anomo osa na Au sui osa. Sani anomo osa na Au, mka Au iae anoku osa runa omi oi. Ai sanae wani oretui arihon nene tinaie nea mo, mka reuhua tewa nea. Omi iae sani rei oi. Sani oamahaimo anomo osa runa Au tewa mo, mka oauhua tewa. Areimo, mo hali pannuhu na Anahatana anoi tewa. Reiso kahurae anomo osa na Au na oauhua.
5Au reini mo, sani anggur nene tinaie. Omi mo, sani anggur nene sanaya. Ia seia wain anoi osa runa Au na Au anoku osa runa ia, mka iauhua. Areimo ne hali pannuhu na Anahatana anoi. Ne sani anomo osa na Au tewa, mka mo hali pannuhu na anoi tewa. 6Ia seia man wain iamahaiki anoi osa runa Au sui osa tewa, mka Anahatana ipesiki sani ia mamsaka nisi iretu anggur sanaya na nanie ipesire rei. Sani sanaya rai rakaimenso nea, iamanoure oyo ipesire pan usa na iakanupure. 7Ne sani oamahaimo anomo osa runa Au sui osa na orime kuru we maunauna sui osa mo, oainisi sae man wan oninai arihon Amaku, mka irui sae wan oainisiki rei osimo. 8Sani mo hali pannuhu na Anahatana anoi, areimo oatuhete ata omi mo, titue-tue Au we mampusua. Areimo oamuira Amaku.
9Anoku runamo nooi sani Amaku anoi runa Au. Reiso, omi mo, kahurae anomo osa runa Au sui osa na oanei ata Au mo, anoku runamo. 10Sani opusu we maunauna, mka oanei ata anoku runamo. Au iae upusu Amaku ne maunauna na uanei ata anoi runaku. 11Usima na pusire osimo reini na anomo mirika sani Au oi. Na anomo mirika ia-ia. 12Areini mo, Au we maunaune osimo. Anomo runa umau, nooi sani Au anoku runa omi. 13Ia wain anoi runa ne netau nai osa, areimo ia wain nanie irui ruai na imatai ikatiso runa iapuheuso. 14Sani opusu we maunauna, omi mo, Au we netau. 15Uoimo tau manianeu tewa nea. Tea mo, ia maniane mo, ianei sae wan upui iunai tewa. Ne uoimo tau we netau. Tea mo, usima osimo nea rerihon sae man wan uatinure arihon Amaku.
16Omi oroma Au tewa na ouna we mampusua. Ne Au ruaku sahoro uroma omi na una we mampusua. Uromamo na mo haliu pannuhu na Anahatana anoi sui osa. Mo haliu pannuhu na anoi, mka Amaku irui sae man wan oainisiki tau Au nanaku. 17Reiso we maunaune osimo wan san rei. Kahurae anomo runa umau.”
Sio wason openeso tau Anahatana openeso tau ne mampusua oi
18Yesus iasau osi ne mampusua ata, “Sani sio mai tuniai openeso tau Anahatana, areimo openeso tau omi oi. Anomo rapeka ata sio mo, openeso tau Au naone nea. 19Sinana omi anomo osa na sio mai tuniai reini wason openeso tau Anahatana mo, mka anoo runamo sani anoo runa no mansiau. Ne omi mo, anomo osa na sio rei tewa. Tea mo, uroma omi nea na pene okata sio mai tuniai reini. Reiso openeso tanumo. 20Anomo rapeka na sae wan uasaui nnai osimo nea rei. Uasau ata, ‘Ia maniane mo, ia mainae inesi upui tewa.’ Reiso sani ouna sinsaraku nea, areimo omi iae mka sio ouna sinsaramo oi. Sani sio oatinu sae wan uatuheteso tanre, sio iae mka oatinu sae wan omi oatuheteso tanre rei oi. 21Mka ouna sinsaramo tau omi mo, Au we mansiau. Tea mo, oationa Ia wain iaisosi Au reini tewa. 22Sinana uhoka tewa na uatuheteso tewa, areimo osana tewa. Tea mo, openeso tanuku tewa. Ne, muie reini, Au wan uhokaku uatuheteso nea, reiso sio mo, mka oasau tewa nea ata oanei tewa ata sae wan ounai rei mo, opalalosa. 23Ia seia wain ipenei tau Au, areimo ipenei tau Au Amaku oi. 24Onoo Au una sima-simana waron ia seia man iuna kuare tewa. Ne openeso oparisaa tau Au sirinia. Sinana Au una sima-simana rai tewa, osana tewa. Ne masike onoo sima-simana rai nea iae, openeso tau Au runa Amaku sirinia. 25Ne openeso tanuma rei, areimo opusu waron sio okanure tau Anahatana ne maunauna. Okanu ata Anahatana iasau ata, ‘Openeso tanuku ne umunaso tewa.’#Kapatau 35:19; 69:5
26Mka tau muie uaisosi Anahatana ne Inaha on roe Amaku na iakahaimo. Mka iatuhete maunauna waron manisata rerihon Anahatana osimo. Anahatana ne Inaha mka isima rerihoni Au. 27Omi iae kahurae osima rerihoni Au oi. Tea mo, oni mato uanori mai tuniai rein mo, omi okataku nea.”
Voafantina amin'izao fotoana izao:
Yohanis 15: ANA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc., All rights reserved.
