Yohana 2

Ʉlʉhekelo lwa vʉtegʉlanie kʉ Kana

1Wʉ atsovile ago, pa kɨgono ɨkya daatu, lʉkavepwo ʉlʉhekelo lwa vʉtegʉlanie kʉ Kana, mu kɨlʉnga kya Galilaya. Pa vʉtegʉlanie apo aalepwo najyʉ vanyina va Yɨɨsʉ. 2Ikange ʉYɨɨsʉ na vakongi va mwene naveene vaalepwo pa vʉtegʉlanie ʉwa, manya naveene vɨɨlangilwe. 3Wʉ gʉlʉtɨngʼiinie ʉnsɨkɨ, ɨdivai jɨkasila. Pwʉ ʉvanyina va Yɨɨsʉ akambʉʉla ʉYɨɨsʉ akata, “Vavʉla divai.”#2:3 Vavʉla divai Ʉnsɨkɨ gʉlya kyale kɨɨnu kya soni siitso kʉ vaanu avitegʉlana ʉkwagɨlwa ɨdivai pa lʉhekelo lwa vʉtegʉlanie. 4ɄYɨɨsʉ akamwanda ʉvanyina akata, “Gwe, jyʉva, kɨki vukʉmbʉʉla ʉne itsi?#2:4 Kɨki vukʉmbʉʉla ʉne itsi Pa kʉtsova ndavʉle, ʉYɨɨsʉ aateetsaga ɨlyo najyale mbombo jya mwene ʉvanyina. Naantanilage ʉvanyina. Ʉnsɨkɨ gwango nagʉsiiki.”#2:4 Ʉnsɨkɨ gwango nagʉsiiki Mu mamenyu aga, ʉYɨɨsʉ aambʉʉlaga ʉvanyina ʉkʉta ʉnsɨkɨ gwa mwene gwa kwɨvonia ʉkʉta ʉmwene Mwana va Ngʉlʉve gwale gʉkaanale ʉkʉsika. 5Pwʉ ʉvanyina akavavʉʉla avavombi akata, “Ɨlɨveetsaga ɨlyʉ ʉYɨɨsʉ jiikʉvavʉʉla, jʉmuvombage.”

6Apoonu apo, tsyalepwo inzɨɨlo ntanato (6). AVayahudi vaavɨɨkaga ʉmwa amagasi ga kʉvombela inyiiho tsa veene, tsa kwɨvalatsa. Ɨnzɨɨlo mamato jyadɨgaga amadebwe ʉta gahaano evo ntanato. 7Pwʉ ʉYɨɨsʉ akavavʉʉla avavombi avo akata, “Mudɨtse amagasi mu nzɨɨlo itso.” Pwʉ vakanega amagasi, vakadɨtsa mu nzɨɨlo itso. 8Pwʉ ʉYɨɨsʉ akavavʉʉla akata, “Lɨno tʉmi madebe, mummɨlɨkɨle ʉmbaha va lʉhekelo.” Pwʉ vakatʉma amagasi nʉ kʉmpa ʉmbaha ʉjwa. 9Ʉmbaha va lʉhekelo akavonza amagasi ago, ʉgwʉ ʉYɨɨsʉ aandwe gave divai. Ʉmwene naalʉmanye ʉkwʉ jɨhʉmile, apeene avavombi avaanegile amagasi, wʉ veene vaalʉmanyile ʉkwʉ jɨhʉmile. Pwʉ ʉmwene akamwɨlanga ʉntegʉlanʼdala. 10Wʉ itsile ʉntegʉlanʼdala, ʉmbaha ʉjwa akata, “Ʉmuunu ʉvaveetsaga pa vʉtengʉlɨlo ikʉvapa avaanu ɨdivai ɨnonu, pwʉ wʉ avaanu vanyue nʉ kʉkwɨlanila, pwʉ kʉ vʉmalɨlo ikʉvapa ɨdivai ɨjɨtava nonu. Lɨno ʉve ʉsigiitse ɨdivai ɨnonu ʉkʉsikila lɨno kʉ vʉmalɨlo!”

11ɄYɨɨsʉ aavombile ɨkɨmanyilo ɨkɨ, mu vʉtsenge wa Kana wa kʉ Galilaya. Ɨkɨmanyilo ɨkyo kyale kyʉ kɨtatsi ʉkʉvombwa nʉ mwene, pa kʉvonia ʉwɨɨmɨkiwa wa mwene kʉ vaanu. Ʉkʉhʉmana nɨɨlyo avakongi va mwene vakamwɨdɨka. 12Ʉlʉhekelo lwa vʉtegʉlanie wʉ lʉsilile, ʉYɨɨsʉ akiika kʉ Kapelenaumu paninie nʉ vanyina, avanunaave, na vakongi va mwene. Vakataama ʉkwa isigono sidebe.

ɄYɨɨsʉ iswɨma avatsuluusi mu tembile

(Mataayo 21:12-13; Maliko 11:15-17; Luuka 19:45-46)

13Ʉnsɨkɨ gwa kyaka kya Vayahudi, ɨkyʉ viita Pasaka,#2:13 Pasaka Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. wʉ kɨlɨ piipi, ʉYɨɨsʉ akatoga ʉkʉbɨha kʉ Yelusalemu. 14Wʉ asiike ʉkʉ, akiingila mu lʉvɨgo lwa tembile.#2:14 Tembile Ʉvʉganulu wa litaawa ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. Ʉmwa akavavona avaanu ʉwʉ vaagʉtsaaga isenga, ingʼolo, ingʉndya, nʉ wʉ vaandʉlaniaga indalama tsa kʉvombela mu tembile, vaataamile pa meesa tsa veene.#2:14 Nʉ wʉ vaandʉlaniaga indalama tsa kʉvombela mu tembile Najyɨdɨkiwaagwe ʉkʉvombela indalama itsitava tsa Kɨyahudi mu mbombo tsa tembile. Ʉkʉhʉmana nɨɨlyo avaanu vaandʉlaniaga indalama tsa veene pakʉta vave ni ndalama tsa Kɨyahudi tsa kʉvombela mu tembile. 15ɄYɨɨsʉ wʉ agaweene ago, akanotsa ʉndegehe gʉve kɨkoti, akaswɨmɨla kʉnzi avaanu vooni avaale ʉmwa, paninie natsi senga ni ngʼolo. Akagalamula imeesa tsa vaanu avaandʉlaniaga indalama nʉ kʉpalangʼania indalama tsa veene. 16Pwʉ akavavʉʉla avaanu ʉwʉ vaagʉtsaaga ingʉndya akata, “Hetsi ingʉndya apa! Kwʉ baako ʉkʉjɨvɨɨka ɨnyumba jya Daada jɨve soko!” 17Avakongi va mwene kʉmbele vakakʉmbʉka amamenyu ʉgwʉ gaavɨgilwe mu Vʉvɨge ʉVʉvalatse ʉkʉta, “Ʉvʉnogwe wango wa kʉta ɨnyumba jyako jyɨmɨkiwaagwe, jʉvukʉvapelela vambiipile nʉ kʉmbejanga ʉne.”#Zabuli 69:9

18Pwʉ avalongotsi va Vayahudi wʉ vagaweene ʉgwʉ ʉYɨɨsʉ avombile, vakambʉʉtsa vakata, “Vuvomba kɨmanyilo kɨki ɨkya kʉtʉvonia ʉwe ʉkʉta ʉve ʉlɨ nʉ vʉtavʉlɨlwa wa kʉvomba itsi?” 19ɄYɨɨsʉ akavaanda akata, “Mumamule ʉVʉtaamo ʉVʉvalatse wa Ngʉlʉve ʉvʉ, ʉne jʉnditsenga kʉ sigono sidatu.” 20Pwʉ aveene vakaanda vakata, “ɄVʉtaamo ʉVʉvalatse wa Ngʉlʉve ʉvʉ waatsengilwe kʉ myaka isitsigo sinni na ntanato (46). Pwʉ ʉve vuweesa ndeeti ʉkʉtsenga kʉ sigono sidatu?”

21Mu mamenyu ago, ʉYɨɨsʉ naatsovage ikulongwi tsa Vʉtaamo ʉVʉvalatse wa Ngʉlʉve ʉmwʉ vɨɨsajɨlaga, apeene aatsovaga ikulongwi tsa mmana gwa mwene ʉgwahegelye ʉkʉvejangwa. 22Wʉ ʉYɨɨsʉ atsʉʉkile ʉkʉhʉma kʉ vaswe, avakongi va mwene vakakʉmbʉka amamenyu ago ʉgwʉ aatsovile. Kʉ nzɨla ɨjyo, vakɨɨdɨka amamenyu ʉgwʉ gaavɨgilwe mu Vʉvɨge ʉVʉvalatse, na mamenyu ʉgwʉ ʉYɨɨsʉ aatsovile.

ɄYɨɨsʉ agamanyile agalɨ mu nʼgati mu numbula tsa vaanu vooni

23ɄYɨɨsʉ wʉ alɨ pa kyaka kya Pasaka mu Yelusalemu, avaanu vongosu vakatengʉla ʉkʉmwɨdɨka, manya vaasiweene isimanyilo isyʉ aavombaga. 24Ʉmwene ʉYɨɨsʉ naavɨɨdɨkɨlage, ʉlwakʉva aatsimanyile tsilya itsʉ tsilɨ mu numbula tsa vaanu vooni. 25Ikange naalondage ʉmuunu ʉvaveetsaga ooleletse itsʉ avaanu visaaga, manya aatsimanyile tsyoni itsilɨ mu numbula tsa vaanu vooni.

Voafantina amin'izao fotoana izao:

Yohana 2: zga

Asongadina

Hizara

Dika mitovy