Mə́líʼkus 12

Nkaʼtɛ́n ɛ paboʼ əmbín pá páyɛ́ɛ na ntɛ́m yɛ́ mbɛ́

(Maʼt 21.33-46; Lóʼk 20.9-19)

1Yə́sus əə́bə́ə́ kosɔyɔ na pɔ́lɛ́ a poʼkaʼtɛ́n a mɔɛn, ɔnɔ́: «Mɔɔd nyummú aa nyóon yɛɛ́dɛ́g pɔlɛ́m puə́ŋ, amágóʼkɛ́nɛ́ɛ́ na oʼkág, əə́dím nɔsá nó konɔg nyiín kɔ, aáwáág ɛyaa ɛ́ yoog kɔ lóóŋ a oʼkág a mɔɛn a mɔɔd nyɔ́ əə́nuŋ pólɛ́ agɛɛlɛ lɛ́ ádɛ́ʼtɛg pɔlɛ́m puim#12.1 Pódála tɛn náan a kálaʼtaʼ yɛ Ɛsa 5.1-2 Ná ayɛ́ɛ aáʼkoman kɛɛlɛ nkə kɛ́ɛg kiim, aáság kusiəd anɛ́ɛ́n pɔɔd pá pigólí, amáág kɔ a túʼpaaʼtɛ́, amɛ́ɛn ongɛn.»

2«Ná masómbóó mə́yíím əgiig, yiídə́ə́míni uʼkudin wəəŋ nyummú, amámoodóm lɛ́ yɛ́ɛn adɛ́anɛ na pɔsɔ́g pá páyɛ́ɛ əgud a pɔlɛ́m puə́ŋ lɛ́ píim pámodómɛn yəəŋ ngab. 3Náa, ná ayɛ́ɛ́n əgiig kɔ, pɔsɔ́g póob pə́yímugúmin, pámámobáám əgín náanɛ ɔʼtɛ́m úmmuʼ, pámámooŋɛ́ŋ, əmúúli na ɔmbɔg na ɔmbɔg. 4Mɔɔd o pɔlɛ́m aáság kiiʼkiniʼ kiim ádom uʼkudin wəəŋ nyummú. Ná nyóon əyíím əgiig tɛn, páyɛ́moodóga əgín náanɛ kɔŋɛʼ, pámámobáám, pámámoyɛ́ɛ́sɛ a oʼto. Páyɛ́mooŋɛ́ŋ tɛn nyɔ́lɛ́; əmúúli na ɔmbɔg na ɔmbɔg. 5Aáság kiiʼkiniʼ kiim ádom wɛndɛ́ŋ. Nyóon páyɛ́moyóón a kúfuʼ. Páyɛ́ɛ́lɛ yoom ímuʼ əgín náan na ɛ́fɔlɛ́ ɛ́ pəgudin pá mɔɔd nyóon ayɛ́ɛ əgiim ádóman. Ɔmbɔ́ úmmuʼ, pə́diʼkə́əsig, páyɛ́bobááma, pámóóna pɔsɔ́g pə́mmú. 6Ayɛ́ɛ aáʼkolɔbɛn mɔɔd nyóon əgín mɔɔ́n wəəŋ nyɔ́ ayáágɛn ɔʼtɛ́m wə́ə́ŋ ungim na nyɔ́lɛ́. Aáság kumudə́əmini tɛn nyɔ́lɛ́ əguyibənən, amámoodóm. Ayɛ́ɛ agofɛg ɔnɔ́: “Wɔnɔ́ ná kɛ́lɛɛ́ lɛ́ alɛ mɛ mɔɔ́n wo ɔʼtɛ́m, pádɛáwɛ́ɛsɛ komodɔ́bɔ.” 7Náa, ná pəgudin póob pɛ́ɛ́dála lɛ́ mɔɔ́n áa nyóon, páyɛ́ɛ agosɔyɔ agá kɔ pɔ́lɛ́ na pɔ́lɛ́ pɔ́nɔ́: “Táá mɔɔd nyɔ́ alɛ́ɛ́ kolɔbɛɛ́ a tugúm tó sɛ aa nyóonɛ! Tímuúguminəən, tɛ́moyóon. Náan, tugúm tóonɛ tóagoob na pəsi.” 8Pááság kumuúgumin, pámámoyóón, pámɛ́ɛn ado kɛlóŋ kiə́ŋ laálá na pɔlɛ́m.» 9Náa Yə́sus ɔnɔ́ na pɔ́lɛ́ əə: «Áay oóoʼ! Tuə́ áa mɔɔd o pɔlɛ́m aágɛɛlɛ na pəgudin póob əə́? Adɛ́ əəbuúgumən, áboyóóna ná ə́siəd pɔlɛ́m puə́ŋ agɛɛ́ʼkɛn na pɔɔd pá pigólí pɛ́ndɛ́ŋ á? 10Adɛ́ poáʼkobana nkə kɛ́ɛnɛ kɛ́ kɛ́lɛɛ́ kidiídílə́ a Kálaʼtaʼ ɛ Táán lɛ́:

“Nɛdáán nɛ́ pawáagaʼ toádɛʼ pɛ́ɛ́dó,

nɛ́lɛ́ aa nɛ́yáán nɛdáán nɛ́ nígumíníníí noádɛʼ. 11Táá niɛlɛʼ nɛ́ Sə́dúk áa nɛ́ɛn aá! Kɛ́lɛ na pəsi kiə́wúunəniʼ kɛ́ kɛbán#12.11 Kɛ́lɛ náan a kálaʼtaʼ ɛ Pɛʼk 118.22-23 !” »

12Puʼkúm pó Yúdɛn póyálɛ́ŋɛ́ɛ́ lɛ́ kɛbán kɛɔ́bɔn aa Yə́sus ayɛ́ɛ əgusəə a nkaʼtɛ́n yɛ́ɛy náan, pə́ə́bə́ə́ kuunə pungə́ pó kumuúgumin. Náa, pádɛʼkáawɛ́ɛsɛ komodɔ́bɛd lɛ́ pɔɔd páyɛ́ɛ kɔ piíŋ. Pááság kumuudi, pámɛ́ɛn.

Yɛ́ ɛ́lɛɛ́ ɛ́ Sɛsáal, poɛ́ʼkɛn na Sɛsáal, yɛ́ ɛ́lɛɛ́ ɛ́ Táán, póyɛɛ́ʼkɛn na Táán

(Maʼt 22.15-22; Lóʼk 20.20-26)

13Pídə́ə́míni ngab ɛ pɔɔd a ondáŋ ó Pafalɛsɛyɛ́ɛŋ na pɔsɔ́g tɛn pá a ɛgɔny yɛ́ Ɛlóod pámáboodóm ná Yə́sus alɛɛ́, pɛ́ɛlɛ ná áfɛáʼpɛ əgín ɔmbɔ́ nɔmɛm əgusəə kɛbán kɛ́ kɛbɛ́. 14Ná páyɛ́ɛ́n əgiig kɔ, pə́yímuŋíən pɔ́nɔ́ əə: «Kɛlág, tɛálɛŋ lɛ́ wɛ olɛ əgusəə fɔ́lɔ́b, olɛ agaaʼkananɛ tɛn sáád wɔnɔ́ ná mɔɔd ogódíí lɛ́ ádáŋana a ngə́ yɛ́ yəə́gə́mmi Táán. Udiə́gu niis na mɔɔd, ungim alɛ yoom ímuʼ a əngis yááŋ. Kólɛ́ aa timíim əguŋíən lɛ́ óbɛdɛ́anɛ, a nɛáŋ ə́ə, pɛcɛm piə́s pɛ́lɛ əgusəə lɛ́ tɛ́ʼpɛ́ɛ́ mag na Sɛsáal əə́? Ɛɛ́, kɛ́lɛ lɛ́ tɛ́ʼpɛ́ɛ́ óm, tɛdɛmbɛ́ɛ́ ə́?» 15Yə́sus yɛɛ́lɛ́ŋ lɛ́ pálɛ moɔ́ŋɛ́ná pusú, ambaan yə́ə́ŋ áa pálɛɛ́ əguunə, adɛ́njaŋ kɛbán kɛmɔɛ́d kɛ́ páyɛ́ɛ na kɛ́lɛ́ a ɔʼtɛ́m a kɛ́ɛg, əyíbuŋíən ɔnɔ́ əə: «Poagɛnjaásɔsɛn lɛ́ nkə ə́? Mayɛ́nyɛɛ́ʼkɛ́naan kisúg kɛ́ mɔɔnɛ́ áay aáŋ, ntála!» 16Pááság kolónɛ kisúg kɛ́ mɔɔnɛ́ kímuʼ, pámámonáámɛ́nɛ. Yə́sus yiísə́sə́ŋə́ni kisúg kɛ́ mɔɔnɛ́ kɛ́ɛg yəə́b, náa ɔnɔ́ na pɔ́lɛ́: «Udi wóonɛ wó ólɛɛ́ a mɔɔnɛ́ mááŋan əə, wó ánɛ aa ólɛɛ́nɔ ə́? Niiŋ tɛn nɛ́ɛnɛ nɛ́ nɛ́lɛɛ́ kɔ nidilídə́ə́n ə́ə, nɛ́ ánɛ aa nɛ́lɛɛ́nɔ ə́?» Náa pɔ́nɔ́ na nyɔ́lɛ́: «Udi wóow, ólɛ ó Sɛsáal: Ɔmbɔ́ tɛn niiŋ nɛ́ɛn, niə́ŋ áa nɛ́lɛɛ́nɔ.» 17Yə́sus əyíbuyúlísíni ɔnɔ́ na pɔ́lɛ́: «Náa nkə anɛ́ɛ́n kímmú ə́? Yɛ́ ɛ́lɛɛ́ ɛ́ Sɛsáal, poɛ́ʼkɛn na Sɛsáal. Yɛ́ ɛ́lɛɛ́ ɛ́ Táán, póyɛɛ́ʼkɛn na Táán!» Pə́yə́wúnə́níí kɛ́fɔlɛ́ ná əyíbuyúlísíni náan.

Pɛlóŋ pɛ́lɛ́ɛ́ kiiʼkiniʼ kiim pɛ́lon a kəəniʼ

(Maʼt 22.23-33; Lóʼk 20.27-40)

18Ngab ɛ Pasadosɛyɛ́ɛŋ yímmú, (pɔ́lɛ́ aa pádɛʼkɛ́lɛɛ́ əgəə́liʼtini lɛ́ pɛlóŋ pɛ́lɛ́ɛ́ koóndɛg) páyɛ́ɛ́n aboan Yə́sus, pááság kumuŋíən pɔ́nɔ́ əə: 19«Kɛlág! Táá nkə kɛ́ Moyíis yiísə́ə́ áa kɛ́ɛnɛ ɔnɔ́: “Mɔɔd amaʼkogóan ɔʼkɛ́ɛd, náa əə́gú, əʼtí pɔɔ́n na oʼkán, móŋŋí ə́díin əsiəd kidí, pə́bíənə pɔɔ́n na kɛ́lɛ́ a niiŋ nɛ́ kɛlóŋ móŋŋí wəəŋ#12.19 Kɛ́lɛ náan a kálaʼtaʼ ɛ Tɛʼt 25.5-6 ” 20Kɛbán áa anɛ́ɛ́n a kɛ́ɛnɛ kɛ́lɛɛ́ lɛ́: Pɔɔd aa póob páyɛ́ɛ a niŋŋí nɛɔ́bɔn nto ɛ́ʼtáan na ɛ́baan. Sɔ́g nyɔ́ osaá aágóan ɔʼkɛ́ɛd, əə́gú, əʼtí mɔɔ́n. 21Móŋŋí nyɔ́ ayɛ́ɛ əgumuyə́ən aáság kudíin əsiəd kidí, nyɔ́lɛ́ tɛn əə́gú əʼtí mɔɔ́n. Sɔ́g wo annam ádáád tɛn yoom ímuʼ. 22Pɔ́lɛ́ piim nto ɛ́ʼtáan na ɛ́baan píílə́ndin na kidí kɛ́ɛg, pə́ə́guə́ʼkən pə́ʼtí mɔɔ́n. Ná pɔ́lɛ́ piim páyɛ́ɛ pə́ʼkuguə́ʼkən, ɔʼkɛ́ɛd nyóon tɛn aáság kudíin əgu a ngim. 23Áay oóoʼ! Wɔnɔ́ ná yɛɛ́dɔ́n na pɔ́lɛ́ póob piim əə, na pɛlóŋ pɛ́lɛ́ɛ́ koóndɛgan anɛ́ɛ́n óoʼ, oyaán áa alɛ́ɛ́ kɛɛnɛɛ́ onom wəəŋ ə́?» 24Yə́sus əyíbuyúlísíni ɔnɔ́ na pɔ́lɛ́: «Nkə kɛ́ɛg kɛ́ polɛɛ́ əgusəə kɛ́lɛ a ɔsɛd a mɔɛn lɛ́ podɛɔ́gɔ agolɛŋ nkə kɛ́ kɛ́lɛɛ́ kidiídílə́ a kálaʼtaʼ, pondɛŋ tɛn toɛn tó Táán wɔnɔ́ ná tólɛɛ́. 25Kɛ́lɛ lɛ́, ná pɛlóŋ pɛ́lɛ́ɛ́ koóndɛgan, ungim alɛ́ɛ́ kolaa wɔnɔ́ məŋun má maʼtom a mɔɛn, panɔ́mɛɛd páʼkoána pagɛ́ɛd, pagɛ́ɛd pádiɛnán pɛdɔ́ʼtɔn tɛn. 26A kɛ́ɛnɛ kɛ́ pɛlóŋ koóndɛg, podɛ́mbana a kálaʼtaʼ ɛ Moyíis nkə kɛ́ yiísə́ə́ kɔ a nkə kɛ́ kɛ́yásánɛ́ɛ́ a idúʼtún ɛ́ pɔsɛ́n á? Adɛ́ kɛ́lɛ kɔ kidiídílə́ lɛ́ Táán yiísə́ə́ ɔnɔ́ na nyɔ́lɛ́: “Ndɛ Táán yɛ Ábɛlaam, Táán yɛ Ɛ́sag, Táán ɛ Yáʼkɔb#12.26 Kɛ́lɛ náan a kálaʼtaʼ yɛ Ɔsa 3.2, 6 ” 27Kólɛ́ aa ndɛɛ́ agobodɛ́anɛ na pəŋi nyɔʼkɔ́, nkə kɛ́ɛg kɛ́ pumíŋiə́n kɛ́lɛ a ɔsɛd a mɔɛn lɛ́, wɔnɔ́ ná Táán yiísə́ə́ náan na Moyíis, kíoloodi anyóon lɛ́ pálɛ a ɔlaa lɛ́ Táán ɔdɛɔ́gɔ Táán ɛ pɔɔd pá pálɛɛ́ pɛlóŋ, alɛ Táán ɛ pá pálɛɛ́ a ɔlaa.»

Kɛcɛm kɛ́ kɛ́mááyɛn pɛcɛm piim a kɛ́ɛg kɛ́yaán ə́

(Maʼt 22.34-40; Lóʼk 10.25-28)

28Ɔndɛŋ pɛcɛm nyummú ayɛ́ɛ kɔ ná Yə́sus ayɛ́ɛ agosɔyɔ na Pasadosɛyɛ́ɛŋ póob. Yɛɛ́dám ntóɛŋ kɔŋɛʼ agoob nkə kɛ́ páyɛ́ɛ agosɔyɔ, aáság kodála lɛ́ Yə́sus alɛ agolɛŋ kuúlisəni tɔgɛ́ɛ́. Yɛɛ́dɛ́ɛ́mɛn, amáyɛ́ʼtɛ́nɛ́ɛ́ ndúmiʼ na Yə́sus, ná ɔnɔ́ na nyɔ́lɛ́: «Sə́dúk, a pɛcɛm piim əə, kɛ́yaán áa kɛ́lɛɛ́ na oʼto na oʼto ə́?» 29Yə́sus əyímuyúlísíni ɔnɔ́ na nyɔ́lɛ́: «Kɛcɛm kɛ́ kɛ́mááyɛn pɛcɛm piim a kɛ́ɛnɛ kɛ́lɛɛ́ lɛ́: Ɛ́sɛlayɛl taa, Sə́dúk Táán wəəs alɛ nyɔ́lɛ́nyɔ́əsíŋ nkúm. 30Nyɔ́ŋɛn Sə́dúk Táán waaŋ na ɔʼtɛ́m wááŋ ungim, na ɛdáányɛ́ yááŋ yiim, na mafɛgaʼ mááŋ miim, na toɛn toáŋ tuim#12.30 Kɛ́lɛ náan a kálaʼtaʼ ɛ Tɛʼt 6.4-5 31Kɛ́ kiə́yə́ə́n kɛ́ɛg a kɛ́ɛnɛ kɛ́lɛɛ́ lɛ́: Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d#12.31 Kɛ́lɛ náan a kálaʼtaʼ ɛ Ləf 19.18 Kímmú kɛ́ kɛ́mááyɛn pɛ́ɛb pɛ́baan kɛ́dɛɔ́gɔ.» 32Náa ɔndɛŋ pɛcɛm nyóon ɔnɔ́ na Yə́sus: «Ɛɛ́ɛ Sə́dúk, nkə kɛ́ɛg kɛ́ wəə́səə kɛ́lɛ fɔ́lɔ́b. Táán alɛ úmmuʼ súg, wɛndɛ́ŋ ɔdɛɔ́gɔ#12.32 Pódála tɛn náan a kálaʼtaʼ ɛ Tɛʼt 4.35 33Kɛ́lɛ tɛn fɔ́lɔ́b náan wɔnɔ́ ná wəə́səə lɛ́ mɔɔd ányɔ́ŋɛn Táán na ɔʼtɛ́m wə́ə́ŋ ungim, na mafɛgaʼ mə́ə́ŋ miim, na toɛn tuə́ŋ tuim, ányɔ́ŋɛn tɛn sɔ́g mɔɔd wɔnɔ́ ná aágaányɔ́ŋɛn nyɔ́lɛ́nyɔ́amɔɛ́d. Kɛ́lɛ kɔŋɛʼ náan agaáyɛn ponyam pó pɔ́ɔgɔ́lɔnɛ a yug agɛɛlɛnɛ Táán pifuləʼ#12.33 Pódála tɛn náan a kálaʼtaʼ yɛ Osə́ 6.6 » 34Mɔɔd nyóon yɛɛ́sɔ́yɔ a nɛ́ mɔɔd nyɔ́ alɛɛ́ na nsiŋ. Náan aa tɔgɛ́ɛ́ tuə́ŋ toɛ́sɔ́d Yə́sus, aáság komodɛ́anɛ ɔnɔ́: «Mɔɔ́n wo mbáa, Nɛlaamɛʼ nɛ́ Táán nɛ́dɛɔ́gɔ laálá na wɛ áaá!» Mɔɔd adɛʼkɛ́ɛ agowɛ́ɛsɛ kumuŋíən kə́mmú kɛbán.

Mɔɔd ogo úmmuʼ lɛ́ nyɔ́lɛ́ Məsíi, nyɔ́lɛ́ mɔɔ́n o Tə́fid

(Maʼt 22.41-46; Lóʼk 20.41-44)

35Wɔɔ́s wúmmú, Yə́sus ayɛ́ɛ agaaʼkananɛ pɔɔd Tɔsɔm tó Táán a Tɛ́mpɛl. Aáság kudə́əmini tɔgɛ́ɛ́ ɔnɔ́: «Adɛ́ Palɛŋ pɛcɛm pálɛ əgusəə agá lɛ́ Məsíi alɛ mɔɔ́n o Tə́fid əə́? 36Adɛ́ kɛ́lɛ lɛ́, Tə́fid nyɔ́lɛ́nyɔ́amɔɛ́d, ná Uŋun wó Ufúlúʼtú úyímuyə́ə́g a ɔʼtɛ́m yiísə́ə́ ɔnɔ́: “Sə́dúk Táán aádɛánɛ na Sə́dúk waam ɔnɔ́: Wɛ, ləndin áanɛ a ombɔg wáam ó nɛnom agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́ úgíʼtən pabɛnɛn pááŋ na ambaan#12.36 Kɛ́lɛ náan a kálaʼtaʼ ɛ Pɛʼk 110.1 ” 37Tuə́ áa Məsíi alɛɛ́ ugiiʼkini kɛɛn lɛ́ alɛ mɔɔ́n o Tə́fid, Tə́fid nyɔ́lɛ́nyɔ́amɔɛ́d aámodɔ́ŋɔn lɛ́ Sə́dúk wəəŋ ə́?» Ɛ́fɔlɛ́ ɛ́ pɔɔd ɛ́yɛ́ɛ yoób kɔŋɛʼ na tɔgɛ́ɛ́ tó Yə́sus.

Yə́sus ɔnɔ́ pádɛmmáʼkɛ a niə́siəd nɛ́ palɛŋ pɛcɛm

(Maʼt 23.1-36; Lóʼk 20.45-47)

38Táá nkə kɛ́ Yə́sus ayɛ́ɛ adɛ́ananɛ na pɔɔd pá ayɛ́ɛ yaʼkananɛ aa kɛ́ɛnɛ ɔnɔ́: «Lóʼkɔ́dɔɔn na palɛŋ pɛcɛm ó! Pányɔ́ŋɛ́nɛn kiim páánadɛna na pɛlanda pɛ́ poʼtaa a kaábágɛdɛ. Páanyóŋɛnɛla lɛ́ kɛnɔ kɛ́ pálɛɛ́ agosan, pə́buúsoyidəni na nnyáádɛ́ ngim. 39A puog pó pɛɔ́sɔ́gɔ́lɔ́n na a pɛsɛɛn pɛ́ pɛgóón, pə́əguunə kuləndən əgín a mɔʼkɔɔ má yuudi, mɔʼkɔɔ má niiŋ. 40Pálɛ əgiiʼkini kobɔgɔ pidí pɛ́ pagɛ́ɛd nkə kɛ́ pógódíí, pɛɔ́sɔ́gɔ́lɔ́n pɛɔ́bɔn pɔ́mbɔ́d kosom lɛ́ ná páboodála. Pɔ́lɛ́ póob náan pálɛ́ɛ́ kɔɔŋ ntɔ́b yɛ́ ɛmábosán oʼto.»

Nɔŋáan nó ɛsɔ́gasɔ́gá ɛ́ kidí kɛ́ ɔʼkɛ́ɛd

(Lóʼk 21.1-4)

41Kɔ áay a Tɛ́mpɛl, píísóbíni kɛnɔ kímmú a kɛsom kɛ́ kiɛd agaágan mɔɔnɛ́ má ngab kɔ. Náa Yə́sus aáság kodɛ́ɛmɛn, amɛ́ɛn ələndin kɔ a ɛbá ɛ́ kɛa kɛ́ɛg agodɛ́ʼtɛg wɔnɔ́ ná pɔɔd pálɛɛ́ əgiim agaágan ngab yɔɔbɔn kɔ. Pɔɔd pá tugúm páyɛ́ɛ əgusuginə mɔɔnɛ́ kɔ miíŋ. 42Náa ɛsɔ́gasɔ́gá ɛ́ kidí kɛ́ ɔʼkɛ́ɛd yímmú yə́əgiim. Ɛ́yáág muyənjə́g muə́ŋ mó fɛláaŋ móbaan súg a síísi mmuʼ#12.42 Síísi ɛyɛ́ɛ las ɛ mɔɔnɛ́ má məliʼti má a kɛnɛŋ kɛ́ɛg. 43Ná Yə́sus yɛɛ́dála nkə kɛ́ ɛsɔ́gasɔ́gá yɛ́ɛy ɛ́yáág, əyə́búʼkíníí paaʼkan pə́ə́ŋ, ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́ nkə kɛ́ ɛsɔ́gasɔ́gá ɛ́ kidí kɛ́ ɔʼkɛ́ɛd yɛ́ɛy ɛ́máág a ngab kɛ́mááyɛn kiim kɛ́ pɔsɔ́g pámáágan 44lɛ́ ungim nyóon, nkə kiim kɛ́ əə́sugin a ngab, kɛ́lɛ nkə kɛ́ kídiʼkúgódií pigólí#12.44 nkə kɛ́ kídiʼkúgódií pigólí: Áay lɛ́ nkə kɛ́ páyɛ́ɛ págolóʼkanɛ kɛ́dɛbogányɛn. lɛ́ ogóódi mólɛ́ ilubənən. Kɔmɔɛ́d lɛ́ kidí kɛ́ɛnɛ, na osog wə́ə́ŋ ungim, amáyóláá, amɛ́ʼkɛn yiim yɛ́ ayɛ́ɛ lɛ́ álaa na yɛ́lɛ́.»

Voafantina amin'izao fotoana izao:

Mə́líʼkus 12: yatDBL

Asongadina

Hizara

Dika mitovy