Yorhaq 8
8
Banq-awr Joe-eu Gar Binyaef-euq Zaqmiq Aqbur
1Khoerngae, Yeqsur, Saqloq gawqjawq-anr ir-euq mae. 2Uqshawq yawnaf-aer aqyawf, uqduq tanqnymr nymrma-anr par ghofler-euq mae. Tsawrhaq dawqtawvluf, aqyawf jawr-eu gar lar-euq mae. Khoerngae, Yeqsur nuir-awr, aqyawf maf-anr maeqnaeq tsovnaeq-euq mae.
3Khoerngae, zanr maeq-eu deuq hawr-eu Paqliqsaer deuq-aq, aqcawq naeq-aer banqluf joeluf-awr gar nyaefza-euq zaqmiq aqbur tiq ghaq sheuqlaf-awr, aqyawf-anr ghanrcae biyawf-euq mae. 4Khoernar-aq, aqyawfmaf, Yeqsur-anr heulof-aer aernaeq-euq mae, “Saqlaq-or! Zaqmiq aqbur heughaq, aqcawq naeq-aer banqluf joeluf-eu gar nyaefza-euq ma. 5Heulof-aer ghae-eu tsawrhaq-anr khaqlo nae ya biqsaef-eu mae laer Morseq, zanrdawq-euq lafkhoer dawq biftaq-euq mae. Aerkhawf, nawr aqjox-aer aer-eu le?”
6Aqyawfmaf khoerlof-aer aer-eu-aq, aqyawfmaf tiqjeqnav zmq-awr, Yeqsur-anr iqbax taqnya’ni tsermr haw-eu jeq pyeuf-eu mae. Aerkhawf, Yeqsur maqgaq-euq geuf-awr, awkhof-awr nae, aqyawf-euq lafnoer nae mirtsa bof-euq mae. 7Aqyawfmaf maq naqlerni aqyawf-anr narhaq luf-eu mirnae, aqyawf turlar-awr aqyawf maf-anr aernaeq-eu, “Nawmaf-euq lafkhoer, iqbax maqanr-eu ghaq, aqyawf-anr khaqlo nae jeqhu biq-awq.”
8Khoernar-aq, aqyawf par awkhof-awr, mirtsa parbof-euq mae. 9Khoerngae, dawq khoerdawq-anr yagaq-euq tsawrhaq deuq, aqyawf maf-euq zaqsiq nuisiq iqbax taq-eu mirnae, arkhof khawvdzaeq dzaeq-eu ghaq-anr nae nyirdzaeq dzaeq-eu ghaq-anr keuvni, tiqghaq sair tiqghaq dov-ir-euq mae. Yeqsur tiq ghaq taef-aer dzaeqlar-awr, zaqmiq aqbur khoerghaq ghanrcae yawfluf-a siq. 10Khoerngae, Yeqsur turlar-awr, zaqmiq aqbur khoerghaq maqngeur nar-aq tiqghaq-iq jawr-eu maqmawr-aer, Yeqsur, aqyawf-anr aernaeq-eu, “Zaqmiq-or! Nawq-anr iqbax taq-eu tsawrhaq deuq aqgar irjir-euq la? Tiqghaq-iq nawq-anr yarkhaq maqdar-a lor?”
11Aqyawf aer-eu, “Sanqpaq-or! Tiqghaq-iq maqdar-a.” Yeqsur, aqyawf-anr aernaeq-eu, “Ngar khawf nawq-anr maqdar. Ir-awq, aqkar nar-aq, iqbax taqpar mr.”
Yeqsur-aq, Mirtsaq-euq Yawshaef Mae
12Yeqsur, aqyawf maf-anr tiq pov par aernaeq-eu, “Ngar-aq, mirtsaq-euq yawshaef ma. Ngaq-euq maeqnan cantae-eu tsawrhaq-aq, yawzanr-euq lafkhoer maqpar can-aer, daef-eu jeq bif-eu yawshaef za taef-a.”
13Khoerngae, Paqliqsaer deuq, aqyawf-anr aernaeq-eu, “Nawr-aq, yawqha-euq garkawv yawqha sarkir kamq-eu nga, nawq nae kamq-euq sarkir maqbyan-a.”
14Khoerngae, Yeqsur, aqyawf maf-anr heulof-aer aerkhof naeq-euq mae: “Ngar, ngaq-euq garkawv sarkir kamq-eu khawf, ngaq-euq sarkir-aq byan ma. Aqjeq mirnae aernar-aq, ngar aqgeugar nae oe-awr, aqgar ir-eu laer ngar siqnya-eu ma. Aerkhawf, ngar aqgeugar nae oe-awr, aqgar ir-eu la laer nawmaf maq siqnya-a. 15Nawmaf-aq, shiqshaq-anr dawqpaeq taq-awr yarkhaq dar-eu mae. Aerkhawf, ngar-aq, tiqghaq-anr-iq yarkhaq maqdar. 16Ngar yarkhaqdar lawnmr-aq, ngaq nae dar-euq khoer tsaq ma. Aqjeq mirnae aernar-aq, ngar tiq ghaq taef-aer dar-eu maqngeur, ngaq-anr khaerghae lef-euq Aqda Miqyaer, ngaq naeq-aer jawr-eu mae. 17Nawmaf-euq zanrdawq-euq lafkhoer boftaq-euq, ‘Tsawrkaq nyiq ghaq sarkirkamq nar-aq, sarkir kamq-eu khoer tsaq-awr dawr-eu mae.’ 18Ngar, yawha-euq garkawv sarkir kamq-eu tiq ghaq ma. Ngaq-anr khaerghae lef-euq Aqda Miqyaer khawf, ngaq-euq garkawv sarkir kamq-eu mae.”
19Khoerngae, aqyawfmaf, aqyawf-anr aernaeq-eu, “NawqDa aqgeugar jawr-eu la?”
Yeqsur aerkhof naeq-eu, “Nawmaf, ngaq-anr maq siqnya-a, ngaqDa-anr khawf maq siqnya-a. Nawmaf, ngaq-anr siqnya lawnmr-aq, ngaqDa-anr khawf siqnya taef-a.”
20Yeqsur, uqduq tanqnymr nymrma-euq lafkhoer pyurdamq bawqkeuv baftaq-euq tsanr-anr jawr-awr, dawq heudeuq maeqnaeq tsovnaeq-eu lafkhoer ngaeq-euq mae. Aqyawf-euq aryamq maq tsaqlar-euq mirnae, tsawrhaq tiqghaq-iq aqyawf-anr maqnyaef-a.
Ngar Ir-eu Gar, Nawmaf Maq Oenya-a
21Khoerngae, Yeqsur, aqyawf maf-anr par aernaeq-eu, “Ngar dov-ir luf-eu ma. Nawmaf, ngaq-anr sharpov taef-a. Aerkhawf, nawmaf-aq, nawmaf-euq iqbax-euq lafkhoer yashir taef-a. Ngar ir-eu gar nawmaf maqoe nya-ar.”
22Khoerngae, Yurdav tsawrhaq aer-eu, “Aqyawf, yawqhar yawqha saef-eu laer ghae-eu mirnae, ‘Ngar ir-eu gar nawmaf maqoe nya-ar’ laer aer-eu nga lor?”
23Khoerngae, Yeqsur, aqyawf maf-anr heulof-aer aernaeq-eu mae, “Nawmaf-aq, lafov paw nae lar-euq mae. Ngar-aq, laftav paw nae oe-euq ma. Nawmaf-aq, mirtsaq heu-anr taf-eu mae. Ngar-aq, mirtsaq heu-anr maqtaf. 24Khoermirnae, ngar, nawmaf-anr, ‘Nawmaf-aq, nawmaf-euq iqbax-euq lafkhoer yashir taef-a’ laer aernaeq-euq ma. Ngaq-anr khoerghaq ngar-a laer nawmaf maqjan nar-aq, nawmaf-aq, nawmaf-euq iqbax-euq lafkhoer yashir taef-a.”
25Khoerngae, aqyawfmaf, Yeqsur-anr aernaeq-eu, “Nawr aqsur ghaq le?” Yeqsur heulof-aer aer-eu mae,
“Yawbae ngae nae, ngar, nawmaf-anr aernaeq luf-eu lof-aer ma. 26Ngar, nawmaf-euq garkawv ja-awr, yarkhaqdar paq-aer ghae-eu ghawqmya jeq jav-eu ma. Aerkhawf, ngaq-anr khaerghae lef-euq ghaq tsaq-awr dawr-eu mae. Ngar, aqyawf-anr nae yagaq-euq deuq mirtsaqzaq-anr ja’maeq naeq-eu ma.”
27Yeqsur, aqyawf maf-anr Aqda Miqyaer-euq garkawv ja’naeq-eu gar, aqyawfmaf maq ghovshaw nya-a. 28Khoermirnae, Yeqsur, aqyawf maf-anr heulof-aer aernaeq-euq mae: “Nawmaf, Tsawrhaq-euq Zaqyo-anr khanqtur ngae, ngar-aq, khoerghaq ngar-a laer siqnya-eu uqtaf, ngar-aq, yawqha yawqha taef-aer tiqjeq-iq maqmr-aer, ngaqDa nae ngaq-anr maeq-euq lof-aer ngar heudeuq aer-eu ngar-a laer nawmaf yasiq taef-a.
29“Ngaq-anr khaerghae lef-euq ghaq, ngaq naeq-aer jawrluf-eu mae. Aqda Miqyaer, ngaq-anr byaerdzae-awr, ngar tiq ghaq taef-aer maqbi jawrnaeq laf-a. Aqjeq mirnae aernar-aq, ngar aqmyanluf aqyawf nuima tsaq-eu heudeuq mrluf-eu ma.”
30Yeqsur dawq heudeuq ngaeq ngae, tsawrhaq ghawqmya’ni aqyawf-anr janlar-euq mae.
Yawtsaq Yawdawr, Nawmaf-anr Puirpyaeq Naeqlaf Taef-a
31Khoerngae, Yeqsur, aqyawf-anr jan-eu Yurdav tsawrhaq deuq-anr heulof-aer aernaeq-euq mae, “Nawmaf, ngaq-euq dawq-euq lafkhoer jawr nar-aq, aqdir aqmar ngaq-euq zaqlanr pyeuf-eu mae. 32Nawmaf, yawtsaq yawdawr-anr siqnya ngae, yawtsaq yawdawr, nawmaf-anr puirpyaeq naeqlaf taef-a.”
33Aqyawfmaf, aqyawf-anr aerkhof naeq-eu, “Nga’maf-aq, Aqbyaqhaq-euq zaqdeuq uvdeuq ma. Tiqjawr-iq, aqcawq-euq zaqkhav maq geufhaw-aq. ‘Nawmaf-anr puirpyaeq naeqlaf taef-a’ laer nawr aqjox-aer aernya-eu le?”
34Yeqsur, aqyawf maf-anr heulof-aer aerkhof naeq-euq mae, “Ngar, nawmaf-anr aqdir aqmar aernaeq nyar, aqsur ghaq maqkaq, iqbax mr nar-aq, iqbax-euq zaqkhav mae. 35Zaqkhav-aq, nymrjir-euq lafkhoer aqmyanluf maqya jawr-a. Zaqyo taef-aer aqmyanluf yajawr-eu mae. 36Khoermirnae, Zaqyo, nawmaf-anr puirpyaeqnaeq nar-aq, nawmaf aqdir yabuq-ir taef-a.
37“Nawmaf-aq, Aqbyaqhaq-euq zaqdeuq uvdeuq mae laer ngar siqnya ma. Aerkhawf, ngaq-euq dawq nawmaf-euq lafkhoer jawrkhar maqza-eu mirnae, nawmaf, ngaq-anr saef-eu laer jawqluf-eu mae. 38Ngar-aq, ngaqDa naeq-aer jawr ngae mawr-euq deuq ja’naeq-eu ma. Nawmaf khawf, nawmaf-euq aqda naeq-aer jawr ngae ya’mawr-euq jeq mr-eu ngar-a.”
Nawmaf-euq Aqda-aq, Naef Sanqpaq Mae
39Aqyawfmaf Yeqsur-anr aerkhof naeq-eu, “Aqbyaqhaq-aq, nga’maf-euq aqda ma.”
Yeqsur, aqyawf maf-anr heulof-aer aernaeq-euq mae, “Nawmaf, Aqbyaqhaq-euq zaq ngeur nar-aq, nawmaf, Aqbyaqhaq-euq gardeuq mr taef-a. 40Ngar, Miqyaer-anr nae yagaq-euq yawtsaq yawdawr jeq nawmaf-anr ja’naeq-euq ma. Aerkhawf, nymq-mr nawmaf, ngaq-anr saef-eu laer jawqluf-eu mae. Aqbyaqhaq-aq, teulof-aer maqmr-aq. 41Nawmaf-aq, nawmaf-euq aqda mr-eu lof-aer mr-eu ngar-a.”
Aqyawfmaf aer-eu, “Nga’maf-aq, banq-awr muv-eu baqda’nae daefle-euq zaq maqngeur, nga’maf-euq aqda-aq, Aqda Miqyaer tiq ghaq jawr-eu taef ma.”
42Khoerngae, Yeqsur, aqyawf maf-anr heulof-aer aernaeq-eu mae: “Miqyaer, nawmaf-euq Aqda ngeur nar-aq, nawmaf, ngaq-anr gaq taef-a. Aqjeq mirnae aernar-aq, ngar, Miqyaer-anr nae dovle-awr, Miqyaer jawr-eu gar nae oe-euq ma. Ngar, yawqha yawqha oe-euq maqngeur, aqyawf nae ngaq-anr khaerghae lef-euq mae. 43Ngar aer-eu dawq-anr nawmaf aqjeq mirnae maq ghovshaw nya-eu nya? Ngaq-euq dawq nawmaf maq narhaq coer-eu mirnae mae. 44Nawmaf-aq, nawmaf-euq aqda, naef sanqpaq-anr nae dovle-awr, nawmaf-euq aqda-euq nuikhanr nawmaf mrmawf-eu mae. Aqyawf-aq, yawbae ngae nae tsawrhaq-anr saef-awr, yawtsaq yawdawr-euq lafkhoer maqjawr-a. Aqjeq mirnae aernar-aq, aqyawf-euq lafkhoer yawtsaq yawdawr jeq maqanr-a. Aqyawf jaqmyawf myawf-eu-aq, aqyawf-euq lafkhoer pyeufluf-eu lof-aer myawf-eu mae. Aqjeq mirnae aernar-aq, aqyawf-aq, jaqmyawf myawf-eu ghaq pyeuf-awr, jaqmyawf-euq aqda mae. 45Aerkhawf, ngar yawtsaq yawdawr jeq ngaeq-eu mirnae, nawmaf, ngaq-anr maqjan-a. 46Nawmaf, aqsur ghaq, ngar-aq, iqbax anr-eu nga laer toeqmaeq nya-eu le? Ngar yawtsaq yawdawr jeq ngaeq-eu ngeur nar-aq, aqjeq mirnae nawmaf, ngaq-anr maqjan-eu le? 47Miqyaer-anr nae dovle-euq tsawrhaq-aq, Miqyaer-euq dawq narhaq taef-a. Nawmaf-aq, Miqyaer-anr nae dovle-euq maqngeur-eu mirnae maq narhaq-eu nga.”
Aqbyaqhaq Maq Daefle-euq Minav-aer Yeqsur Jawrluf-eu
48Khoerngae, Yurdav tsawrhaq, aqyawf-anr aerkhof naeq-eu, nga’maf, “Nawr-aq, Saqmaqliv tsawrhaq pyeuf-eu uqtaf, naef ur-eu nga laer aer-eu khoer, tsaq-eu maqngeur-a lor?”
49Khoerngae, Yeqsur heulof-aer aerkhof naeq-euq mae: “Ngaq-euq lafkhoer naef maqur. Ngar, ngaqDa-anr taqhuiq taqmanr ma. Aerkhawf, nawmaf, ngaq-anr maq taqhuiq maq taqmanr nga. 50Ngar, ngaq-euq yawshaef khanqsaer za’ni maqpov. Aerkhawf, ngar yawshaef khanqsaer za’ni sharpov-awr yarkhaq dar-eu tiq ghaq jawr-eu mae. 51Ngar, nawmaf-anr aqdir aqmar aernaeq nyar, ngaq-euq dawq-anr mrcaw-eu tsawrhaq aqsur ghaq maqkaq, shir-eu jeq-anr tiqjawr-iq maqya mawr-ar.”
52Khoerngae, Yurdav tsawrhaq, Yeqsur-anr heulof-aer aernaeq-euq mae: “Nymq-mr pov-aq, nawq-euq lafkhoer naef ur-eu nga laer, nga’maf siqnya ma. Aqbyaqhaq shir-awr, Miqyaer gharduq ngaeqdan-eu tsawrhaq deuq khawf shirjir-euq mae. Nawr, ‘Ngaq-euq dawq-anr mrcaw-eu tsawrhaq aqsur ghaq maqkaq, shir-eu jeq-anr tiqjawr-iq maqya myeufhaw-ar’ laer aer-eu beu. 53Maqngeur nar-aq, nawr-aq, shirdzeur-euq aqdui-euq aqda Aqbyaqhaq hawr-eu shirdzeur-euq Miqyaer gharduq ngaeqdan-eu tsawrhaq deuq navmaqtser huiqdzaeq-eu le lor?”
54Khoerngae, Yeqsur heulof-aer aerkhof naeq-euq mae: “Ngar, yawqhar yawqha taqhuiq taqmanr nar-aq, ngaq-euq taqhuiq taqmanr-eu jeq-aq, gardanr tiqpawf-iq maqtsoeq-a. Ngaq-anr taqhuiq taqmanr naeqlaf-eu ghaq-aq, ngaqDa mae. Aqyawf-aq, nawmaf-euq Miqyaer ma laer nawmaf aer-eu khoerghaq mae. 55Nawmaf, aqyawf-anr maq siqnya-aq. Aerkhawf, ngar, aqyawf-anr siqnya ma. ‘Ngar, aqyawf-anr maq siqnya nya’ laer aer lawnmr-aq, ngar khawf nawmaf lof-aer jaqmyawf myawf-eu tsawrhaq pyeuf-eu mae. Ngar, aqyawf-anr siqnya-awr, aqyawf-euq dawq-anr mrcaw-eu ma. 56Nawmaf-euq aqda Aqbyaqhaq-aq, ngaq-euq arnan-anr ya’mawr taef-a laer laqkhaq caer-eu mae. Aqyawf khoer-anr ya’mawr-awr laqkhaq caer-eu mae.”
57Khoerngae, Yurdav tsawrhaq, aqyawf-anr aernaeq-eu, “Nawr 50 khof khawf maq khawvlar-euq gar, nawr, Aqbyaqhaq-anr mawrhaw-euq le lor?”
58Yeqsur, aqyawf maf-anr aernaeq-eu, “Ngar, nawmaf-anr aqdir aqmar aernaeq nyar, Aqbyaqhaq maq daefle-euq minav-aer ngar-aq, jawrluf-eu ma.” 59Khoer baqda’nae, aqyawfmaf khaqlo ghov-awr, aqyawf-anr biq-eu laer ghae-eu mae. Aerkhawf, Yeqsur, aqyawf maf-anr maqbi mawrni, aqyawf maf-euq ghanrcae nae irpav-awr irdzeur ghae-awr nae, uqduq tanqnymr nymrma-anr nae dov-ir-euq mae.
Voafantina amin'izao fotoana izao:
Yorhaq 8: AKA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2018 ©
Bibles International ®
The Bible Society of Baptist Mid-Missions
