Yorhaq 4
4
Yeqsur, Saqmaqlivma-anr Maeqnaeq-euq
1Khoerngae, Yeqsur-aq, Yorhaq navmaqtser aqcawq-anr zaqlanr bi pyeuflar-awr, bartirsaq mrnaeq luf-eu mae laer Paqliqsaer deuq yagaq-euq gar Yeqsur yasiq-euq mae. 2(Aqdir aernar-aq, Yeqsur, aqcawq-anr bartirsaq maq mrnaeq-aq, aqyawf-euq zaqlanr deuq nae mrnaeq-euq taef mae.) 3Aqyawf, Yurdav mirkhanq-anr nae dov-ir-awr, Gaqliqlaer mirkhanq-anr ghofler-euq mae.
4Aerkhawf, aqyawf, Saqmaqliv mirkhanq-anr ya canpav-eu mae. 5Khoermirnae, aqyawf, Saqmaqliv mirkhanq-anr jav-eu Surkaq laer kur-eu meuq tiq meuq-anr irkeuv-euq mae. Meuq heumeuq-aq, Yaqkov nae aqyawf-euq zaqyo Yorsaev-anr biftaq yaf-euq mirtsaq khoertsanr-euq dawqpae jav-eu mae. 6Khoergar, Yaqkov-euq landuq jav-eu mae. Yeqsur ghaqdoer candoer-euq mirnae, landuq-euq dawqpae nuirluf-eu mae. Khoerngae yamq-anr nanlov caelar mawf-eu mae.
7Khoerngae, Saqmaqlivma tiq ghaq ircuf khawfle-euq mae. Yeqsur, aqyawf-anr shar-eu, “Ngaq-anr ircuf bidawr naeqlaf-awq.”
8(Khoerngae yamq-anr zaqlanr deuq meuq-anr dzaqdzaq dawrdawr zeurler-euq mae.)
9Khoerngae, Saqmaqlivma khoerghaq, aqyawf-anr aernaeq-eu, “Nawr, Yurdav tsawrhaq pyeuf-eu khawf, Saqmaqlivma pyeuf-eu ngaq-anr aqjox-aer ircuf shardawr-eu le?” Aqjeq mirnae aernar-aq, Yurdav tsawrhaq hawr-eu Saqmaqliv tsawrhaq yawkaq tiqjeq-iq maq mrtaf, maq cawqtaf-a. 10Yeqsur, aqyawf-anr aerkhof naeq-eu, “Miqyaer nae bif-euq lafsawq hawr-eu, ‘Ngaq-anr ircuf bidawr naeqlaf-awq’ laer nawq-anr sharluf-eu ghaq aqsur ghaq la laer nawr siqnya lawnmr-aq, nawr, aqyawf-anr shar taef-a. Aqyawf khawf nawq-anr daef-eu jeq bif-eu ircuf bidawr naeqlaf taef-a.”
11Khoerngae, zaqmiq aqbur khoerghaq heulof-aer aer-eu mae: “Saqlaq-or! Nawr ircuf khawf-eu keuka maqanr-eu uqtaf, landuq heuduq yawnaf mae. Nawr, daef-eu jeq bif-eu ircuf aqgeugar nae khawflaq-ir-eu? 12Nawr, landuq heuduq bifnaeq laf-euq, aqdui-euq aqda Yaqkov navmaqtser huiqdzaeq-eu le lor? Aqyawf hawr-eu aqyawf-euq zaqdeuq, aqyawf-euq jeqzaq deuq khawf, landuq heuduq-anr dawr-euq mae.”
13Yeqsur, aqyawf-anr heulof-aer aerkhof naeq-euq mae, “Ircuf heu khardawr-eu tsawrhaq-aq, par maeflar-a siq. 14Aerkhawf, ngar bidawr-eu ircuf khardawr-euq tsawrhaq-aq, tiqjawr-iq maqpar maeflar-ar. Ngar bidawr-eu ircuf khoer, tsawrhaq khoerghaq-euq lafkhoer ircuf irbyoe pyeuf-awr, mqmaq maqbyav yarzir daef-eu jeq za-eu gar keuvni tanqdavlaf taef-a.”
15Khoerngae, zaqmiq aqbur khoerghaq, aqyawf-anr aernaeq-eu, “Saqlaq-or! Ngar, ircuf maqya maef-eu uqtaf, ngar, heugar ircuf maqya khawfleni, ircuf khoer ngaq-anr bidawr naeqlaf-awq.”
16Yeqsur, aqyawf-anr aernaeq-eu, “Ghofler-awr nawq-euq khaqdzerzaq kurlaq ler-awq.”
17Zaqmiq aqbur khoerghaq aerkhof-eu lafkhoer aer-eu, “Ngar, khaqdzerzaq maqbaw.” Khoerngae, Yeqsur, aqyawf-anr heulof-aer aernaeq-euq mae: “ ‘Ngar, khaqdzerzaq maqbaw’ laer nawr aer-eu-aq tsaq mae. 18Aqjeq mirnae aernar-aq, nawr ngaq zanr irdzeur-awr, nymq-mr nawq naeq-aer jawrluf-eu ghaq khawf, nawq-euq khaqdzerzaq maqngeur-a. Nawr tox-aer aer-eu-aq tsaq duidui mae.”
19Khoerngae, zaqmiq aqbur khoerghaq, aqyawf-anr heulof-aer aernaeq-euq mae: “Saqlaq-or! Nawr-aq, Miqyaer gharduq ngaeqdan-eu tiq ghaq nga laer ngar hawdov-euq ma. 20Nga’maf-euq aqpoeq deuq-aq, gawqjawq heujawq-euq khoertav, Miqyaer-anr uqduq tanq-eu mae. Aerkhawf, nawmaf, Yurdav tsawrhaq-aq, Miqyaer-anr uqduqtanq nar-aq, Yeqlursaqlaeq-anr yatanq ler-eu mae laer aer-eu mae.”
21Khoerngae, Yeqsur, aqyawf-anr heulof-aer aernaeq-euq mae, “Zaqmiq aqbur-or! Ngaq-anr jan-awq. Gawqjawq heujawq-euq khoertav maqaer, Yeqlursaqlaeq-anr maqaer, nawmaf, Aqda-anr uqduq maqya tanqler-eu aryamq keuvle luf-eu mae. 22Nawmaf-aq, yawqha maq siqnya-eu jeq-anr uqduq tanqluf-eu mae. Nga’maf-aq, nga’maf siqnya-eu jeq-anr uqduq tanqluf-eu ma. Aqjeq mirnae aernar-aq, kakhof-eu jeq-aq, Yurdav tsawrhaq-euq lafkhoer nae dovle-eu mae. 23Aqda-anr aqdirma-aer uqduq tanq-eu tsawrhaq-aq, saflar-euq lafkhoer hawr-eu yawtsaq yawdawr-euq lafkhoer uqduq tanq-eu aryamq keuvle luf-eu mae. Nymq-mr keuvle taq-euq mae. Aqjeq mirnae aernar-aq, Aqda-aq, aqyawf-anr khoerlof-aer uqduq tanq-eu tsawrhaq-anr povluf-eu mae. 24Miqyaer-aq, Saflar mae. Khoermirnae, aqyawf-anr uqduq khartanq-eu tsawrhaq, saflar-euq lafkhoer hawr-eu yawtsaq yawdawr-euq lafkhoer uqduq yatanq-eu mae.”
25Zaqmiq aqbur khoerghaq, aqyawf-anr aernaeq-eu, “Kali laer kur-eu Meqsirya oeluf mae laer, ngar siqnya ma. Aqyawf oe ngae, nga’maf-anr yawqjeq navluf aernaeqlaf taef-a.”
26Yeqsur, aqyawf-anr aernaeq-eu, “Nawq naeq-aer dawq ngaeqcawq luf-eu ngar-aq, Meqsirya ma.”
27Khoerngae nyiq pav-aer, aqyawf-euq zaqlanr deuq ghofkeuv le-euq mae. Yeqsur, zaqmiq aqbur tiq ghaq naeq-aer dawq ngaeqcawq luf-eu mirnae, aqyawfmaf zanqler-euq mae. Aerkhawf, aqyawf-anr heulof-aer tiqghaq-iq maq narhaq-a, “Nawr aqjeq sharpov luf-eu le? Nawr aqjeq mirnae aqyawf naeq-aer dawq ngaeqcawq luf-eu le?”
28Khoerngae, zaqmiq aqbur khoerghaq, aqyawf-euq ircuf oeqlanq bijav yaf-awr, meuq paw le-awr nae meuq-anr jawr-eu tsawrhaq-anr heulof-aer aernaeq-euq mae, 29“Nawmaf hawle sher-eq. Tsawrhaq tiq ghaq, ngaq nae khar mrdzeur yaf-euq yawqjeq navluf ngaq-anr ja’maeq naeqlaf-euq mae. Aqyawf-aq, Kali ngeur-eu law maqsiq ngar-a?” 30Khoermirnae, aqyawfmaf meuq-anr nae dov-ir-awr, Yeqsur jawr-eu gar ir-euq mae.
31Khoer yawkaq-anr aqyawf-euq zaqlanr deuq, Yeqsur-anr shar-eu, “Laqbir-or! Dzaqlar-awq.”
32Yeqsur, aqyawf maf-anr aernaeq-eu, “Ngar, nawmaf maq siqnya-eu dzaq-eu jeq jav-eu ma.”
33Khoerngae, zaqlanr deuq-euq yawkaq tiqghaq tirghaq aer-eu, “Tsawrhaq tiqghaqnav nae aqyawf-anr tiqjeqpaq bidzaq-euq nga laq?”
34Yeqsur, aqyawf maf-anr heulof-aer aernaeq-euq mae, “Ngaq-anr khaerghae lef-euq ghaq-euq nuima tsaqni mr-awr, aqyawf-euq gar mrluiv-eu heu-aq, ngaq-euq dzaqdzaq dawrdawr ma. 35‘Bala oeq siq dzeur nar-aq, caer yaeqyamq keuvlar-eu ngar-a’ laer nawmaf aer-eu maqngeur lor? Aerkhawf, ngar, nawmaf-anr aernaeq nyar. Myanlar-awr, yaeqder lar-euq caeryar-anr myavnuiv ghawrbyae-awr hawsher-eq! 36Saeq-eu ghaq hawr-eu yaeq-eu ghaq tiqkawv lof-aer laqkhaq yacaerni, yaeq-eu ghaq arpoeq za-awr, mqmaq maqbyav yarzir bidaef-eu arsiq dae’uiq-eu mae. 37‘Tiq ghaq saeq-awr, tiq ghaq yaeq-eu mae’ laer aer-eu khoerdawq-aq, heugar tsaq-eu mae. 38Ngar, nawmaf-anr khaerghae-awr nawmaf nae maqmr-aer, aqcawq nae mrtaq-euq caeryar-anr biyaeq-ir ma. Aqcawq nae mrtaq-euq gar nawmaf yayaeq taef-a.”
39Zaqmiq aqbur khoerghaq, “Ngaq nae khar mrdzeur yaf-euq yawqjeq navluf ngaq-anr jadov naeqlaf-euq mae” laer sarkir kamq-eu mirnae, meuq khoermeuq-anr jawr-eu Saqmaqliv tsawrhaq ghawqmya’ni Yeqsur-anr janlar-euq mae. 40Saqmaqliv tsawrhaq khoerdeuq, Yeqsur jawr-eu gar oe-awr, aqyawfmaf naeq-aer jawrnaeq laf-awq laer shar-eu mirnae, aqyawf khoergar nyiq nan jawr-euq mae.
41Khoerngae, Yeqsur-euq dawq baqda’nae janlar-euq tsawrhaq par myaqlar-euq mae.
42Khoerngae, aqyawfmaf, zaqmiq aqbur khoerghaq-anr aernaeq-eu, “Nymq-mr nga’maf jan-eu-aq, nawq-euq dawq baqda’nae maqngeur-aer, nga’maf, yawqha yawqha yagaq-euq mirnae jan-awr, tsawrhaq heughaq-aq, aqdir aqmar mirtsaqzaq-anr Kakhof-eu ghaq pyeuf-eu Kali ngar-a laer nga’maf siqnya lar-euq ma.”
Yeqsur, Tsawrhuiq Tsawrma-euq Zaqyo Lavtaq-euq
43Khoergar jawr-eu nyiq nan dzeur-euq nar-aq, Yeqsur khoergar nae dov-ir-awr, Gaqliqlaer mirkhanq-anr le-euq mae. 44Yeqsur, Miqyaer gharduq ngaeqdan-eu tsawrhaq-aq, yawqha-euq jawrkhanq-anr khanqsaer maqjav-a laer sarkirkamq taq-euq jav-eu mae. 45Aerkhawf, Yeqsur, Gaqliqlaer mirkhanq-anr lekeuv ngae, Gaqliqlaer tsawrhaq deuq, aqyawf-anr hageuf-euq mae. Aqjeq mirnae aernar-aq, aqyawfmaf khawf Yeqlursaqlaeq-anr yawbui bui-eu gar le-awr, yawbuibui ngae Yeqsur nae kharmr-euq yawqjeq navluf ya’mawr-euq mae.
46Khoernar-aq, Yeqsur, aqyawf nae ircuf-anr aqgaf dzaruir lavpyeuf-euq Gaqliqlaer mirkhanq-anr jav-eu Gaqnaq pu-anr parle-euq mae. Khoerngae, tsawrhuiq tsawrma tiq ghaq-euq zaqyo, Gaqbeqneqoq-anr jawr-awr narluf-eu mae. 47Yeqsur, Yurdav mirkhanq-anr nae Gaqliqlaer mirkhanq-anr lartaq-euq mae laer tsawrhuiq tsawrma heughaq yagaq ngae, Yeqsur jawr-eu gar le-awr aqyawf-euq zaqyo-anr bi lavtaq leni Yeqsur-anr tanqshar-euq mae. Aqjeq mirnae aernar-aq, aqyawf-euq zaqyo shirler luf-eu mae.
48Yeqsur, aqyawf-anr aernaeq-eu, “Bisiq bimawr-eu jeq hawr-eu zanqler paq-aer ghae-eu jeq-anr nawmaf maqya mawr-euq khoer-aq maqjan-a.”
49Tsawrhuiq tsawrma khoerghaq aer-eu, “Sanqpaq-or! Ngaqli maqshir-euq minav-aer hawle naeqlaf-awq!”
50Yeqsur, aqyawf-anr aernaeq-eu, “Nawr ghof-ir-awq, nawqli maqshirni yadaef taef-a.”
Khoerngae, tsawrhuiq tsawrma khoerghaq, Yeqsur nae aqyawf-anr aernaeq-euq dawq-anr jan-awr ghof-ir-euq mae. 51Aqyawf ghof-ir luf ngae, aqyawf-euq kuirlaf zaqkhav deuq, aqyawf-anr garpaer-anr tanqpuq-awr aer-eu, “Nawqli maqshirni daefluf mae.”
52Khoerngae, aqyawf-euq zaqyo aqgeu yamq-anr danqbae-awr maqgar lar-euq la laer aqyawf, aqyawf maf-anr narhaq ngae, aqyawfmaf, aqyawf-anr aernaeq-eu, “Mirnan nan’ghanr paw naqliq tiq laf-anr aqyawf pyaq-eu lawq-ir-euq mae.”
53Aryamq khoeryamq-aq, “Nawqli maqshirni yadaef taef-a” laer Yeqsur, aqyawf-anr aernaeq-euq khoeryamq nyiq pav-aer tsaq ngar-a laer tsawrhuiq tsawrma khoerghaq-anr siqler-euq mae. Khoerngae, aqyawf hawr-eu aqyawf-euq miqsawrzaq dawqtawvluf, Yeqsur-anr janlar-euq mae.
54Heu-aq, Yeqsur, Yurdav mirkhanq-anr nae Gaqliqlaer mirkhanq-anr lekeuv-awr, bisiq bimawr-eu jeq mr-euq nyiq jeq tiqjeq mae.
Voafantina amin'izao fotoana izao:
Yorhaq 4: AKA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2018 ©
Bibles International ®
The Bible Society of Baptist Mid-Missions
